Buk blong Ebraham

1 Long kantri blong Ol ^aMan Koldia, long ples we ol papa blong mi oli stap long hem, mi, ^bEbraham, mi bin luk se mi gat nid blong kasem wan narafala ^dples blong stap long hem;

2 Mo, taem mi bin faenem se i gat moa ^ahapines mo pis, mo ^bspel blong mi, nao mi lukaotem ol blesing blong ol papa blong bifo, mo raet ia we oli mas odenem mi long hem blong mi save yusum ol blesing ia; from se miwan, mi wan disaepol ^dblong stret mo gud fasin, mo mi wantem stap olsem wan we i gat bigfala ^esave, mo blong mi stap olsem wan moa bigfala disaepol blong stret mo gud fasin, mo blong mi gat moa save, mo blong mi stap olsem papa blong plante nesen, wan prins blong pis, mo mi wantem blong kasem ol tijing, mo blong holem ol komanmen blong God, nao mi kam olsem wan long ol stretwan we oli gat raet, wan ^fHae Pris, we mi gat ^graet ia we i blong ol papa blong mi.

3 Ol papa blong mi oli bin ^agivim long mi; hem i folem ol papa i kam daon, stat long stat blong taem, yes, we i stat blong stat, o bifo long fandesen blong wol, i kamdaon i kam kasem taem naoia, yes, we i raet blong ^bfasbon, o fas man, we i ^dAdam, o fas papa, i go tru long papa i kam kasem mi.

4 Mi bin stap lukaotem blong oli ^aputum mi long Prishud, folem toktok we God i bin talem long ol papa long saed blong laen.

5 Ol ^apapa blong mi, from oli stop blong folem stret mo gud fasin blong olgeta, mo from oli stop blong folem ol tabu komanmen we Lod, God blong olgeta i bin givim long olgeta blong stap ^bwosipim ol god blong olgeta mo olgeta we oli no gat respek long God, nao, oli no wantem nating blong lisin mo mekem folem voes blong mi;

6 From se hat blong olgeta i strong blong mekem nogud fasin, mo oli tanem olgeta fulwan long ^agod blong Elkena, mo god blong Lina, mo god blong Mamakra, mo god blong Koras, mo god blong Fero, king blong Ijip;

7 From hemia, oli tanem hat blong olgeta i go long fasin blong sakrifaes blong olgeta we oli no gat respek long God mo stap mekem sakrifaes blong ol pikinini blong olgeta i go long aedol ia we oli no save toktok; mo oli no lisin long voes blong mi, be oli strong blong traem tekemaot laef blong mi tru long han blong pris blong Elkena. Pris blong Elkena, hem tu i bin pris blong Fero.

8 Naoia, long tetaem ia, i bin kastom blong pris blong Fero, king blong Ijip, blong givim olsem ofring i go long ol narafala god, ol man, ol woman, mo ol pikinini antap long olta we oli bin bildim long kantri blong Koldia.

9 Mo i bin hapen se pris ia i bin mekem wan ofring long god blong Fero, mo tu, long god blong Sagrehel, hemia folem fasin blong Ol Man Ijip. Nao, god blong Sagrehel, hem i san.

10 Mo pris blong Fero i bin givim wan pikinini, olsem wan ofring blong talem tangkyu, antap long olta we i bin stap kolosap long hil ia we oli singaotem hil blong Potifa, long stat blong flat ples blong Olisem.

11 Be, pris ia i bin givim tri woman we oli neva go wetem man yet, olsem ofring antap long olta ia long wantaem; mo ol gel ia oli ol gel blong Onita, wan bladlaen blong king we i kamaot stret long laen blong ^aHam. Hem i bin givim trifala woman ia we oli neva go wetem man yet olsem ofring from klin fasin blong olgeta; olgeta tri ia oli no bin wantem ^bbodaon blong wosipim ol god blong wud, o blong ston, taswe, oli bin kilimded olgeta antap long olta ia, mo oli bin mekem hemia folem fasin blong Ol Man Ijip.

12 Mo i bin hapen se ol pris oli holem mi wetem fasin blong faet, blong oli kilimded mi tu, semmak olsem we oli bin mekem, antap long olta, wetem ol woman ia we oli neva go wetem man yet; mo blong yufala i save long saed blong olta ia, mi sendem yufala i gobak long pikja we i stap long stat blong histri ia.

13 Oli bin mekem i olsem wud bed, olsem hemia we oli bin save faenem long medel blong ol man Koldia, mo hem i bin stap long fored blong ol god blong Elkena, Libna, Mamakra, Koras, mo tu, wan god we i olsem hemia blong Fero, king blong Ijip.

14 Blong yufala i save andastanem long saed blong ol god ia, mi bin givim yufala wan pikja blong olgeta we i stap long ol pikja we oli stap long stat; ol kaen pikja ia, ol man Koldia oli singaotem Ralinos, we i minim pikja raeting.

15 Mo taem oli bin stap leftemap han blong olgeta antap long mi, blong oli givim mi olsem ofring mo tekemaot laef blong mi, luk, mi bin leftemap voes blong mi i go long Lod, God blong mi, mo Lod i bin ^alisin gud mo i bin harem, mo i bin fulumap mi wetem visen blong Hem we I Gat Olgeta Paoa, mo enjel we i bin stap wetem God i bin stanap long saed blong mi, mo wantaem nomo, i ^bkaremaot ol rop we oli fasem mi;

16 Mo voes blong hem i bin talem long mi: “Ebraham, Ebraham, luk, nem blong mi i ^aJehova, mo mi bin harem yu, mo mi bin kamdaon blong mekem yu fri, mo tekemaot yu i go longwe long haos blong papa blong yu, mo longwe long evri famli blong yu, i go long wan narafala ^bkantri we yu yu no save long hem;

17 Hemia, from oli bin tanem hat blong olgeta i gowe long mi, blong oli wosipim god blong Elkena, mo god blong Libna, mo god blong Mamakra, mo god blong Koras, mo god blong Fero, king blong Ijip; from hemia, mi bin kamdaon blong kam agensem olgeta, mo blong kilimded hem we i bin leftemap han blong hem agensem yu, Ebraham, boe blong mi, blong tekemaot laef blong yu.

18 Luk, bambae mi lidim yu tru long han blong mi, mo bambae mi tekem yu, blong putum long yu nem blong mi, we i ^aPrishud blong papa blong yu, mo paoa blong mi bae i stap wetem yu.

19 Olsem we i bin hapen long Noa, bae i hapen wetem yu; be tru long seves blong yu, bae oli save ^anem blong mi long wol blong oltaem, from we mi, mi God blong yu.”

20 Luk, Hil blong Potifa i bin stap long kantri blong ^aUru, long Koldia. Mo Lod i bin brekemdaon olta blong Elkena, mo blong ol god blong kantri ia, mo i prapa spolem gud evriwan olgeta, mo i kilim pris blong hem i ded; mo i bin gat wan bigfala harem sore long Koldia, mo tu, long haos blong Fero, mo Fero i minim king tru long bladlaen blong king.

21 Nao, king ia blong Ijip i wan we i kamaot long laen blong ^aHam, mo hem i bon long sem blad ia blong Ol ^bMan Kenahan.

22 Mo evriwan long Ol Man Ijip oli bin kamaot long laen ia, mo olsem ia nao, blad blong Ol Man Kenahan oli bin sef long kantri ia.

23 Mo kantri blong ^aIjip ia, wan woman nao i faenem faswan, we hem i gel blong Ham, mo gel blong Ijiptas, we long lanwis blong Koldia, i minim Ijip, we i minim samting ia we oli blokem;

24 Taem woman ia i bin faenem kantri ia, wota i kavremap kantri ia; mo afta, hem i putum ol boe blong hem oli stap long hem; mo olsem ia nao, aot long Ham, laen ia nao i kamaot we i bin holemtaet strong nogud tok we i stap long kantri ia.

25 Nao, fas gavman blong Ijip, Fero, we i fasbon boe blong Ijiptas, mo gel blong Ham nao tufala i bin stanemap; mo oli bin mekem folem fasin blong gavman blong Ham, we i folem laen blong papa.

26 Fero, we i bin wan stret mo gud man, i bin stanemap kingdom blong hem mo i bin jajem ol pipol blong hem wetem waes tingting mo stret fasin long evri dei blong laef blong hem, i stap traehad blong folem stret oda we ol papa blong hem oli bin stanemap long ol fas jeneresen, stat long taem blong fas rul blong ol petriak, we i rul blong Adam, mo tu, blong Noa, papa blong hem, we i bin blesem hem wetem ol ^ablesing blong wol ia, mo wetem ol blesing blong waes tingting, be i bin sakem strong nogud tok long hem long saed blong Prishud.

27 Nao, from Fero i kamaot long laen ia we hem i no save gat raet long ^aPrishud, nomata we ol Fero oli stap klemem raet ia long Noa tru long Ham, from hemia, oli bin lidim papa blong mi i gowe tru long fasin blong olgeta blong wosip long aedol;

28 Be bae mi traehad, afta, blong talemaot oda blong ol samting we i bin hapen, stat long miwan i gobak kasem stat blong kriesen, from se ol ^arekod oli kam long han blong mi, mo mi holem olgeta naoia.

29 Nao, afta we God i kilim pris blong Elkena blong hem i ded, ol samting we oli bin talemaot long mi long saed blong kantri ia, Koldia, oli bin kamtru; hemia se bae i mas gat wan hadtaem blong kasem kaekae long kantri ia.

30 Stret folem hemia, wan hadtaem blong kasem kaekae i kavremap ful kantri blong Koldia, mo tingting blong papa blong mi i bin trabol tumas from hadtaem blong kasem kaekae ia, mo hem i bin sakem sin long nogud samting we hem i gat plan from agensem mi, we i blong tekemaot ^alaef blong mi.

31 Be histri blong ol papa blong mi, we oli ol petriak, long saed blong raet blong Prishud, Lod, God blong mi i bin holemtaet gud i stap long han blong mi; taswe, mi bin holemtaet kasem tedei, save ia long saed blong stat blong kriesen, mo tu, long saed blong ol ^awol, mo long saed blong ol sta, olsem we God i bin talem long ol papa, mo bae mi traehad blong raetem sam long ol samting ia long histri ia, blong gud blong laen blong mi we bae i kam afta long mi.