Fasbon

Long taem blong ol petriak blong bifo, fasbon boe nao i kasem raet (Jen 43:33), mo long wei ia, hem i kasem wok blong lidasip blong famli taem papa i ded. Fasbon i mas klin inaf blong tekem wok ia (1 Kron 5:1–2), mo hem i save lusum raet ia blong hem sapos fasin blong hem i no stret mo i no gud.

Anda long loa blong Moses, boe we i fasbon, oli tekem hem se hem nao i blong God. Fasbon i kasem dabol pat long ol samting blong papa blong hem (Dut 21:17). Afta long ded blong papa blong hem, hem nao i responsibol blong lukaotgud long mama blong hem mo ol sista blong hem.

Fasbon animol we i man, hem tu i blong givim long God. Oli bin stap yusum ol klin animol blong mekem ol sakrifaes, mo olgeta animol oli no klin, oli save pemaot olgeta, o oli save salem, o oli save kilim i ded (Eks 13:2, 11–13; 34:19–20; Lev 27:11–13, 26–27).

Fasbon, i simbol blong Jisas Kraes mo seves blong hem long wol ia, mo i mekem ol pipol oli tingbaot se Mesaea we i hae bae i kam (Moses 5:4–8; 6:63).

Jisas i bin fasbon blong ol spirit pikinini blong Papa blong yumi long Heven, Hem hem i Wan Stret Pikinini Ia Nomo blong Papa we i gat mit mo bun, mo Hem i faswan blong girap long ded long taem blong Laef Bakegen long Ded (Kol 1:13–18). Ol fetful sent oli kam ol memba blong Jos Ia blong Fasbon long taem we i no save finis (D&K 93:21–22).