Un Hogar Kaminda e Spiritu di Señor ta Biba
Boso lo haña algun di boso goso di mas grandi den boso esfuersonan pa hasi boso hogar un lugá di fe den Señor JesuCristu i un lugá yená ku amor.
Mi rumannan stimá, mi ta gradesí pa a wòrdu invitá pa papia ku boso awe den di 189 Konferensia General Anual di E Iglesia di JesuCristu di e Santunan di e Delaster dianan. Riba e fecha aki na 1830 José Smith a organisá e Iglesia bou di direkshon di Señor. El a wòrdu hasí den e kas di famia Whitmer banda Fayette, New York. Tabatin seis miembro i rònt di 50] otro hende interesá einan e dia ei.
Ounke mi no sa kiko e Profeta José Smith a bisa òf kon e tabata ora el a para dilanti e grupo chikitu aki, mi sa kiko e hendenan ei ku fe den JesuCristu a sinti. Nan a sinti e Spiritu Santu, i nan a sinti ku nan tabata na un lugá sagrado. Ku seguridat nan a sinti ku nan tabata uní manera un.
E sentimentu milagroso aki ta lokual nos tur ke den nos hogar. E ta un sentimentu ku ta bini for di ta, manera Pablo a deskribí, “animó spiritual.”1
Mi propósito di awe ta pa siña loke mi sa di kon nos por kalifiká pa e sentimentu aki mas biaha i invit’é pa keda mas tantu den nos famia. Manera boso sa for di eksperensia, esei no ta fásil pa hasi. Kontenshon, orguyo i piká mester keda leu. E amor puru di Cristu mester bini den tur kurason di esnan den nos famia.
Adam i Eva, Lehi i Sariah, i otro mayornan ku nos konosé for di skritura a haña esei di ta un desafio grandi. Tòg tin ehèmpelnan di ánimo di sostené felisidat den famianan i hogarnan pa trankilisá nos. I e ehèmpelnan aki ta laga nos mira e manera ku e por sosedé pa nos i nos famia. Boso ta kòrda e relato di 4 Nefi.
“I awor a sosodé ku no tabatin kontenshon den e tera, pa motibu di e amor di Dios ku tabata biba den e kurason di e pueblo.
I no tabatin envidia, ni pleitamentu, ni tumulto, ni fornikashon, ni gañamentu, ni matamentu, ni ningun sorto di inmoralidat; i sigur no por tin un pueblo mas felis entre tur e pueblonan ku a wòrdu kreá pa e man di Dios.
“No tabatin ladronnan, ni matadónan, ni tampoko tabatin lamanitanan, ni ningun sorto di –itanan; pero nan tabata den unu, e yunan di Cristu, i herederonan na e reino di Dios.
“I kon bendishoná nan tabata! Pasó Señor a bendishoná nan den tur nan echonanan; si asta nan a wòrdu bendishhoná i prosperá te ora shentidies aña a pasa; i e promé generashon for di Cristu a pasa, i den henter e tera no tabatin kontenshon.”2
Manera boso sa, e tempu felis aki no a dura pa semper. E relato den 4 Nefi ta deskribí e síntomanan eventual di dekadensia spiritual bou di e grupo di bon hende. E ta un patronchi ku a aparesé durante siglonan den henter pueblonan, den kongregashonnan, i, mas tristu, den famianan. Dor di studia e patronchi, nos por mira kon nos por protehá i hasta oumentá e sentimentunan di amor den nos famia.
Aki tin e patronchi di dekadensia ku a aparesé despues di 200 aña di biba den pas perfekto ku e evangelio ta trese:
Orguyo a drenta.
E pueblo a stòp di kompartí lokual nan tabatin ku otro.
Nan a kuminsá mira nan mes den klase mas haltu òf bou di otro.
Nan a kuminsá disminuí den nan fe den JesuCristu.
Nan a kuminsá odia.
Nan a kuminsá kometé tur sorto di piká.
Mayornan sabio lo ta sufisiente alerta pa nota e síntomanan aki ora nan paresé bou miembronan di nan famia. Klaro, nan lo, ta prekupá. Pero nan lo sa ku e kousa tras di esaki ta e influensia di Satanas ku ta purba pa hiba bon hende na e kaminda di piká i pues ta pèrdè e influensia di e Spiritu Santu. Asina ku e mayor sabio lo mira e oportunidat aki ta pa guia kada yu, i nan mes, pa aseptá mas kompletamente Señor su invitashon pa bini na Dje.
Boso por tin éksito limitá dor di yama un yu pa arepentí, por ehèmpel, di orguyo. Boso por purba na persuadí muchanan pa kompartí lokual ku nan tin mas generosamente. Boso por puntra nan pa stòp di sinti ku nan ta mihó ku otro persona den famia. Pero e ora ei boso ta yega na síntoma deskribí komo “Nan a kuminsá mengua den nan fe di JesuCristu.”
Ei tin e yabi pa guia boso famia pa lanta na e lugá spiritual ku boso ke pa nan—i pa boso ta aya ku nan. Ora boso ta yuda nan krese den fe ku JesuCristu ta nan Redentor amoroso, nan lo sinti deseo pa arepentí. Ora nan hasié, humildat lo kuminsá remplasá orguyo. Ora nan kuminsá sinti lokual Señor a duna nan, nan lo ke kompartí mas generosamente. Rivalidat pa ta prominente òf rekonosementu lo disminuí. Odio lo wòrdu saká afó ku amor. I finalmente, meskos ku el a hasi pa e pueblo kombèrtí pa Rei Benjamin, e deseo pa hasi bon lo fortalesé nan kontra tentashon pa hasi piká. Rei Benjamin su pueblo a yedtifiká ku ya nan no tabatin , e deseo pa hasi hasi piká.”3
Pues edifiká fe den JesuCristu ta e kuminsamentu di kambia dekadensia spiritual den boso famia i den boso hogar. E fe ei probablemente ta trese arepentimentu mas ku boso predikashi kontra kada síntoma di dekadensia spiritual.
Ta mihó pa boso guia dor di ehèmpel. Miembronan di famia i otronan mester mira boso krese den boso fe den JesuCristu i den Su evangelio. Resientemente boso a haña gran yudansa. Mayornan den Iglesia a wòrdu bendishoná ku un kuríkulo inspirá pa famianan i personanan. Segun boso uz’é, boso lo edifiká boso fe i e fe di boso yunan den Señor JesuCristu.
Krese den Fe
Boso fe den e Salbador a krese ora boso a sigui Presidente Russell M. Nelson su sugerensia pa lesa e Buki di Mormon atrobe. Boso a marka versonan i palabranan ku ta referí na e Salbador. Boso fe den JesuCristu a krese. Pero meskos ku un mata nobo, tal fe den JesuCristu lo marchitá a no ser ku boso haña solushon kontinuo pa meditá i hasi orashon pa oument’é.
Boso ehèmpel di kresementu den fe kisas lo no wòrdu siguí pa tur miembro di boso famia awor aki. Pero tuma ánimo for di e eksperensia Alma Yu. Den su nesesidat doloroso pa arepentimentu i haña pordon, el a rekòrdá fe di su tata den JesuCristu. Boso yunan lo por rekòrdá boso fe den e Salbador na un momentu ora nan tin nesesidat pa arepentí desesperadamente. Alma a bisa di tal momentu:
Miéntras mi tabata tormentá di e manera aki, miéntras mi tabata den angustia pa rekuerdo di mi hopi pikánan, mi a kòrda tambe di a skucha mi tata profetisá na e hendenan tokante di e binida di e un tal JesuCristu, un Yu di Dios, pa ekspiá pa e pikánan di e mundu.
Awor, ora mi a pensa esaki, mi a yora den mi kurason: O Jesus, abo, Yu di Dios, tene piedat di mi, ku ta na punto amargura:wak Hechonan 823. i mi ta rondoná ku kadenanan eterno di morto.
I ora mia pensa esaki, mi no por a kòrda mi dolornan mas; mi no tabata angustiá mas pa e rekuerdo si mi pikánan mas.4
Hasi Orashon ku Amor
Adishonalmente na boso ehèmpel di krese den fe, boso orashon komo famia por tin ròl spesial den hasi boso hogar un lugá sagrado. Usualmente ta skohe un persona pa ta bosero den orashon pa famia. Ora e orashon ta klaramente na Dios na bienestar di e personanan na rudia i skuchando, fe ta krese den nan tur. Nan por sinti e ekspreshonnan di amor pa Tata Selestial i pa e Salbador. I ora e persona ku ta hasi orashon menshoná esnan ku ta na rudia den e sirkulo ei ku ta den nesesidat, tur por sinti e amor pa i for di kada miembro di e famia.
Hasta ora miembronan di famia no ta biba na kas, orashon por edifiká lasonan di amor. Orashon den famia por tin alkanse rònt mundu. Mas ku un biaha mi a sa ku un miembro di famia leu tabata hasiendo orashon na mes momentu pa mes un kos ku ami. Pa mi, e dicho bieu “Un famia ku ta hasi orashon huntu ta keda huntu” por ekspandé na “E famia ku ta hasi orashon huntu, ta huntu, hasta ora nan ta leu for di otro.”
Siña Arepentimentu Tempran
Pasá niun di nos no ta perfekto i sentimentunan ta wòrdu lastimá fásilmente, famianan por bira santuarionan sagrado solamente ora arepentí tempran i sinseramente. Mayornan por duna e ehèmpel. Por arepentí lihé i sinsero di palabranan duru òf pensamentunan poko amabel. Un simpel “despensá mi” por kura heridanan i invitá pordon i amor.
E Profeta José Smith tabata un ehèmpel pa nos ,iéntras e tabata wördu ataká, I asta ku dskördia ku su famia. El a pordoná lihé, ounke e tabata sa ku e atakadó lo por ataká atrobe. El a pidi pordon, el a dun’é libremente.5
Kultivá e Spiritu Mishonal
E yunan di Mosia tabata desidido pa ofresé e evangelio na tur hende. E deseo aki bini for di nan eksperensianan personal ku arepentimentu. Nan no por a soportá e pensamentu di kualke persona sufriendo pa e efektonan di piká manera ku nan a pasa den. Asina ku nan a enfrentá añanan di rechaso, difikultat, i peliger pa ofresé e evangelio di JesuCristu na nan enemigunan. Den e proseso, nan a haña goso den hopi di esnan ku a arepentí i a eksperensiá e goso di pordon pa medio di e Ekspiashon di JesuCristu.
Miembronan di nos famia lo krese den nan deseo pa kompartí e evangelio ku goso di pordonamentu. Esei por bini hasta ora nan ta renobá nan kombenionan ora nan partisipá di santa sena. E spiritu mishonal lo krese den nos hogar ora yunan i mayornan sinti e goso di pordon den e reunion sakramental. Dor di nan ehèmpel di reverensia, mayornan i yunan por yuda otro pa sinti e goso aki. E goso aki por yega asina leu di kombertí nos hogar den sentronan di entrenamentu mishonal. Tur lo no sirbi mishon, pero tur lo sinti e deseo pa kompartí e evangelio, ku a laga nan sinti pordon i pas. I sea sirbiendo mishon di tempu kompleto aktualmente òf no, tur por sinti e goso den ofresé e evangelio na otronan.
Bishitá Tèmpel
Pa tantu mayornan komo yunan, e tèmpel ta e mihó oportunidat pa haña un sentimentu i un amor pa lugánan selestial. Esei ta spesialmente bèrdat ora e muchanan ta yòn. Muchanan ta nase ku e Lus di Cristu. Hasta un beibi por sinti ku un tèmpel ta sagrado. Pasó mayornan ta stima nan muchanan chikitu, e tèmpel ta representá pa nan e speransa ku nan lo tin nan yunan pa stima den nan famia eterno—pa semper.
Algun di boso tin potrètnan di tèmpel den boso hogar. Komo tèmpelnan ta wòrdu poné rònt mundu, ta posibel pa hopi mayor pa bishitá terenonan di tèmpel ku nan famia. Algun por a hasta bishitá kas habrí ora tèmpelnan a wòrdu konstruí. Mayornan por puntra nan yunan kon nan a sinti pa ta serka òf den un tèmpel.
Tur mayor por duna testimonio di lokual un tèmpel ta nifiká p’e. Presidente Ezra Taft Benson ku tabtata stima tèmpelnan, a papia hopi biaha di a mira su mama strika e bistínan di tèmpel kuidadosamente.6 El a papia di su rekuerdo komo un mucha hòmber mirando su famia segun nan sali su kas pa bishitá tèmpel.
Tempu e tabata Presidente di Iglesia, e tabata bishitá tèmpel mes dia kada siman. Semper el a hasi obra di tèmpel pa un antepasado. El a bin prinsipalmente dor di ehèmpel di su mayornan.
Mi Testimonio
Boso lo haña algun di boso gran goso den boso esfuersonan pa hasi boso hogar un lugá di fe den Señor JesuCristu i un lugá yená ku amor, e amor puru di Cristu. E Restourashon di e evangelio a kuminsá ku un pregunta humilde meditá den un hogar humilde, i e por sigui den nos kada un su hogar segun nos sigui establesé i praktiká e prinsipionan di evangelio aya. Esaki tabata mi speransa i mi deseo di mas profundo for di tempu ku mi tabata un mucha chikitu. Boso tur a haña un sombra di tipo di hogarnan aki. Boso tur a haña un bista di tipo di hogarnan aki. Hopi di boso a krea nan, ku yudansa di Señor.
Algun a purba ku henter nan kurason pa e bendishon aki, pero ainda e no a wòrdu kumplí. Mi promesa na boso ta un ku un miembro di e Quorum di e Diesdos Apòstelnan a yega di hasi na mi. Mi a bisé ku pa motibu di algun desishon ku algun den nos famia ekstendé a hasi, mi tabata duda ku nos lo por ta huntu den e mundu benidero. El a bisa, asina leu ku mi por kòrda, “Bo ta preokupando pa e problema robes. Abo simplemente biba digno di e reino selestial, i e areglonan familiar lo ta mas maravioso ku por imaginá.”
Mi ta kere ku e lo ekstendé e speransa felis aki na kualke di nos den mortalidat ku a hasi tur lokual nos por pa kualifiká nos mes i miembronan di nos famia pa bida eterno. Mi sa ku Tata Selestial su plan ta un plan di felisidat. Mi ta testifiká ku Su plan ta hasi posibel pa kada un di nos ku a hasi lo mihó ku nos por pa ta seyá den un famia pa semper.
Mi sa ku e yabinan di saserdosio restourá na José Smith a wòrdu pasá den un liña direkto na Presidente Russell M. Nelson. E yabinan aki ta hasi seyamentu di famianan posibel awendia. Mi sa ku Tata Selestial stima nos, Su yunan spiritual, ku un amor perfekto. Mi sa ku pa motibu di e Ekspiashon di JesuCristu, nos por arepentí, wòrdu limpiá, i bira digno pa biba den famianan amoroso pa semper ku nos Tata Selestial i ku Su Yu Stimá, JesuCristu. Asina mi ta testifiká den nòmber di JesuCristu, amèn.