Konstruí un Fortalesa di Spiritualidat i Protekshon

Mi kerido rumannan, mientras e konferensia aki ta yegando na final, mi ta duna nos Tata Selestial danki pa e konseho, bèrdatnan, i revelashonnan kompartí for di e pulpito aki durante e dos dianan aki. Nos a wòrdu eduká pa siervonan di Dios yamá pa papia Su palabranan sagrado. Señor a korda nos den revelashonnan di ultimo dia, “sea ku e ta di mi propio bos òf … e bos di mi siervonan, e ta e mesun.”¹

Mirando riba e kongregashon di Santunan i imaginando miembronan mirando e konferensia rònt mundu, mi ta pensa riba e reunion den e Buki di Mormon ora JesuCristo a aparesá na e Nefitanan despues di Su Krusifikshon. E la siña nan e evangelio i despues enkurashánan, “Bai boso hogar, i skrudiñá riba e kosnan ku mi a bisa, i puntra e Tata, den mi nòmber, pa bo por komprondé.”²

“Bai boso hogar, i skrudiñá” ta e siguiente paso den hiba e palabranan di e profetanan i lidernan di Iglesia ekspresá den e lugá sagrado aki. Hogarnan ku Kristu komo sentro ta fortalesanan di e reino di Dios na tera den un tempu kaminda, manera profetisá, e malbado “lo rasa den e kurason di e yunan di hende, i kousa [nan] di tin rabia kontra di loke ta bon.”³

Hende a bin ta konstrui fortalesanan durante historria pa tene e enemigu afo. Hopi bia e fortalesanan ei ta inkluí toren di guardia kaminda guardiannan - manera profetanan - ta atverti di forsanan menasante i atakenan ku ta biniendo.

Imagen

Thomas Rasband

Den kuminsamentu di e tempu di pioneronan di Utah, mi bias abuelo Thomas Rasband I su famia Tabata un di e promé pioneronan pa drenta e Heber Valley den e bunita Serunan di Wasatch na Utah.

Na 1859, Thomas a yuda dirigí e fòrti Heber, konstruí pa nan protekshon. E tabata un simpel struktura di palunan posishoná banda di otro, formando un perimetro di e fòrt. Kabinanan di pali tabata wòrdu konstruí den e fortalesa usando e muraya komun. E struktura tabata proveé seguridat pa e famianan pionero ora nan ta planta i alabá Señor.

Imagen

Forti [di] pioneronan

Asina ta ku nos tambe. Nos hogarnan ta fortalesanan kontra e maldat di e mundu. Den nos hogarnan nos ta bin na Cristu pa siñ sigui Su mandamentunan, dor di studia e skrituranan i hasi orashon huntu, i dor di yuda un i otro keda riba e kaminda di konvenio. E emfasis nobo riba estudio personal i familia den e hogar pa medio di e kurikulo Bin, Sigui Mi ta diseñá “pa profundisá nos konvershon i yuda nos bira mas maenra Jesucristo.”⁴ Hasiendo esaki nos lo bira manera Pabo a yama “kriaturanan nobo”⁵ ku nos kurason i alma entoná ku Dios. Nos mester di e fortalesa pa enfrentá e eskiba e asaltonan di e adversario.

Mientras nos ta biba ku deboshon haña den fé den Jesucristo, nos ta sinti e presensia ku pas di e Espiritu Santu, ku ta guia nos na bèrdat, inspirá nos pa biba digno di e bendishonnan di Señor, i duna testimonio ku Dios ta bibu i e stima nos. Tur esaki den e fortalesa di nos propio hogarnan. Pero kòrda, nos hogarnan ta solamente mesun poderoso ku e fortalesa spiritual di kada un di nso ku ta den su murayanan.

Presidentr Russell M. Nelson a siña, “den e dianan benidero, lo no ta posibel pa sobrebibí espiritualmente sin e guia, direkshon, konsuelo, i influensia konstante di e Espiritu Santu.”⁶ Komo Señor su profeta bibiente, vidente, i reveladó den e tempu aki, e guardian riba e toren di nos fortalesa, E Iglesia di Jesuscristo di e Santunan di Delaster dianan, e ta mira adelantá e enemigu.

Rumannan, nos ta den guera ku Satanas pa e almanan di hende. E liña nan di e bataya a wòrdu marká den nos bida di pre eksistensia. Satanas i un tersera parti di e yunan di nos Tata den Shelu a bira lomba pa Su promesanan di eksaltashon. For di e tempu ei, e asistentenan di e adversario a bin ta lucha kontra e fielnan ku a skohe e plan di Tata.

Satanas sa ku su dianan ta numerá i ku e tempu ei ta birando kortiku. Maske kon astuto e por ta, e no ta gana. Sinembargo, su bataya pa kada un di nos su almanan ta sigui.

Pa nos protekshon, nos mester konstruí un fortalesa spiritual i protekshon pa nos mes almanan, un fortalesa no pa wòrdu penetra pa e malbado.

Satanas ta un kulebra sutil, drentando den nso mente i kurason ora nos guardia ta abou, enfrentando desapunte, òf perde speransa. E ta tentan nos ku palabranan bunita, un promesa di kalmu, konsuelo, òf alsabo temporalmente ora bo ta abou. E ta hustifika orguyo, mal manera, desonestidat, malkontentu, i imoralidat, i ku tempu nos por ta “mas aya di sentumentu.”⁷ E Espiritu por bandoná nos. “I e ora ei e diabel ta tenta nos kurason, i ta guianan poko poko abou na fièrnu.”⁸

Den kontraste, hopi bia nos ta sinti e Espiritu asina fuerte ora nos ta kanta alabansa na Dios ku palabranan manera esaki:

Ora nos ta konstrui e fortalesa di poder spiritual, nos por kita e avansenan di e adversario, bira nos lomba p’e, i sinti e pas di e Espiritu Santu. Nos por siguie ehèmpel di nos Señor i Salbador, ken, ora e la wòrdu tentá den e desierto, a bisa, “bai fo’i mi, Satanas.”¹⁰ Kada un di nos ta siñ pa medio di eksperiensia di bida kon pa hasi esaki.

E tipo di proposito rekto ta bon deskribí den e Buki di Mormon ora Kapitan Moroni a prepará e Nefitanan pa enfrentá atakenan di e Amalikianan engañoso, ku gana di sanger, i poder. Moroni a konstruí fortalesanan pa protehé e Nefitanan “pa nan por biba pa Señor nan Dios, i pa nan por mantené e loke ta wòrdu yamá pa nan enemigunan e kousa di Kristiannan.”¹¹ Moroni “tabata firme den e fé di Cistu,”¹² i e pueblo tabata fiel “den warda e mandamentunan di Dios … i resistí inikidat.”¹³

Ora e Lamanitanan a bin pa batayá, nan a wòrdu sorprendé pa e prepashon di e Nefitanan, i nan a wòrdu derotá. E Nefitanan a gradisí “Señor nan Dios, pa motibu di su poder inigualabel den salba nan for di e mannan di nan enemigunan.”¹⁴ Nan a konstruí un fortalesa pa protekshon di dj’afó, i nan a konstruí fé den Señor Jesucristo di paden - profundo den nan almanan.

Kiko ta algun di e maneranan ku nos por fortifiká nos mes den tempunan di problema, ku nos por ta “instrumentunan den e mannan di Dios pa logra su gran obra?”¹⁵ Laga nos wak e skrituranan.

Nos ta obediente. Señor a manda Tata Lehi pa manda su yunan bèk na Jerusalem pa “buska e registronan, i trese nan den e desierto.”¹⁶ Lehi no a kuestioná; e lo a pensa dikon ni kon. Tampoko Nefi a hasi esaki, ken a respondé, “Mi lo bai i hasi tur kos ku Señor manda,”¹⁷

Nos ta aktua ku obediensia dispuesto manera Nefi? Of nos ta mas inkliná na kuestioná Dios su mandamentunan manera Nefi su rumannan, ken su falta di fé eventualmente a pone nan bira lomba pa Señor? Obediensia, ehersé ku “kurason santu,”¹⁸ ta loke Señor ta pidi di nos.

Nos ta konfia Señor, ken a bisa na Joseé ora e tabata preparando pa guia e Israelitanan den e tera prometí, “Ta fuerte i di … bon kurashi; no tene miedu, tampoko konsterni; pasobra Señor bo Dios ta ku bo na unda ku bo bai.”¹⁹ Josué a konfia e palabranan ei i a konsehá e pueblo, “Sanktifiká boso mes: pasobra mañan Señor lo hasi milagernan entre boso.”²⁰ Señor a parti e awanan di Jordania, i e Israelitanan su 40 aña di kana den e desierto a terminá.

Nos ta para pa bèrdat, manera e profeta Abinadi den e Buki di Mormon. Arestá, trese dilanti Rei Noé i su saserdotonan malbado, Abinadi a siña nan e Dies Mandamentunan i a prediká ku poder ku Kristu “lo bin abou serka e yunan di hende, i … redimí su pueblo.”²¹ E ora ei e, ku fé profundo den dje, a proklamá, “Oh Dios, risibí mi alma,”²² i Abinadi “a sufri morto pa medio di kandela.”²³

Imagen

T¿mpel di Roma Italia

Nos ta hasi i renobá nos konvenionan dor di partisipá di e sakramento i dor di alabá den e tèmpel. E sakramente ta e sentro di nos adorashon dominikal, kaminda nos ta risibí e promesa pa “semper tin e Espiritu huntu ku [nos].²⁴ Ku e ordenansa sagrado nos ta komprometé pa tuma riba nos e nòmber di Jesucristo, i sigui’E, i pa pone nos skòuder bou di nos responsabilidatnan den e obra divino manera E a hasi. Den e tèmpel nos por “pone tur kos di mundu un banda”²⁵ i sinti e presensia di Señor den Su pas transendente. Nos ta enfoká riba nos antepasadonan, nos famianan, i bida eterno den e presensia di e Tata. No ta straño ku Presidente Nelson resientemente a deklará na Roma, “E bon ku lo sali for di e tèmpel ta di grandesa inkalkulabel.”²⁶

Nos mester tin integridat den tur loke nos ta hasi. Nos mester desaroyá disernimentu i disiplina pa asina nos no mester dermina kontinuamente kiko ta bon i kiko ta malu. Nos mester tuma na kurason e atvertensia di Pedro, e Apostel di antaño di Iglesia, ku a atevertí, “Ta serio, vigilá; pasobra bo adversario e diabel, ta manera un leon, kanando tur kaminda, buskando ken pa devora.”²⁷

Mientras nos ta reforsá diligentemente nos fortalesa, nos ta bisa manera Jesucristo, manera Su disipulonan bèrdadero, ku nos propio almanan bou di Su protekshon.

Bo testimonio di Jesucristo ta bo fortalesa personal, e seguridat pa bo alma. Ora mi abuelo i su kompañeronan pionero a konstruí e fòrt Heber, nan a pone un palu kada bia te ora e fòrt tabata “pas firme huntu”²⁸ i nan tabata protehé. Meskos ta ku nos testimonionan. Unu pa unu nso ta gana e testimonio di e Espiritu Santu ora E ta papia na nos kurasonnan, siñando nos e “bèrdatnan den nos entraña.”²⁹ Ora nos ta biba e evangelio di Jesucristo, ora nos yega mas serka di e Ekspiashon di e Salbador i pusha pa dilanti ku fé, nos ta fortifiká kontra di e atakenan di e adversario. Nos testimonionan ta konekta ku e shelunan, i nos ta wòrdu bendishoná ku “e bèrdat di tur kos.”³⁰ I, manera tur fortalesa, nos ta wòrdu brasá den e brasanan di Señor su amor.

E profeta Eter a siña, “Pesei, ken ku kere den Dios por tin e siguransa speransa den un mundu mihó, si, hasta un lugá na e banda drechi di Dios, kua speransa ta bin dor di fé, hasiendo un anka den e almanan di hende, kua lo hasi nan firme sigur, sempre abundante den bon obra, siendo dirigí pa glorifiká Dios.”³¹

Mi kerido rumannan, mi ta laga boso ku mi bendishon pa bai dilanti ku konfiansa den Señor i Su evangelio. Pone bo brasanan rònt di esnan ku ta trompeká i, ku forsa di e Espiritu den bo, guia nan ku amor bèk den e fortalesa di spiritualidat i protekshon. Buska “pa ta manera Hesus”³² den tur loke bo hasi, resistí maldati arepentí,manera nos a wòrdu amonestá ayera pa nos profetak kerí; ta honesto di kurason ta firme I puru, mustra kompashon I karidat, I stima Señor boso dios ku e deboto I di un bèrdadero disipulo.

Nos testimonionan di e evangelio di Jesucristo, nos hogar, nos famianan, i nos miembresia den E Iglesia di JesuCristo di e Santunan di Delaster dianan por ta nos fortalesa personal di protekshon rondó di nos protehiendo nos di poder di esun malbado. Di esaki mi ta testifiká solemnemente den e nòmber di nos Señor i Salbador, Jesucristu, amèn.