រឿងទាំងឡាយនៃព្រលឹងខ្ញុំ
តើបងប្អូនគិតពីរឿងអ្វីខ្លះ ? តើរឿងទាំងឡាយណាខ្លះដែលពិតជាមានន័យចំពោះបងប្អូន ? » តើអ្វីខ្លះជារឿងទាំងឡាយនៃព្រលឹងរបស់បងប្អូន ?
បងប្អូនប្រុសស្រី កាលដែលខ្ញុំឈរនៅក្នុងមជ្ឈមណ្ឌលសន្និសីទទូទៅជាទីស្រឡាញ់នេះជាថ្មីម្តងទៀត នោះខ្ញុំបាននឹកឃើញអំពីប្រសាសន៍របស់សាវកពេត្រុស ៖ « ព្រះអម្ចាស់អើយ ដែលយើងខ្ញុំនៅទីនេះបានល្អណាស់ » ។ ១
គំនិតរបស់ខ្ញុំនៅថ្ងៃនេះផ្តោតទៅលើពាក្យរបស់ព្យាការីនីហ្វៃដែលបានរក្សាកំណត់ត្រាប្រជាជនលោកបន្ទាប់ពីឪពុករបស់លោក លីហៃទទួលមរណៈភាព ។ នីហ្វៃបានសរសេរថា « ហើយនៅលើផ្ទាំងទាំងនេះ ខ្ញុំសរសេរអំពីរឿងទាំងឡាយនៃព្រលឹងខ្ញុំ » ។ ២
ខ្ញុំធ្លាប់អានចំខនេះ ដោយគិតថាពាក្យ រឿងទាំងឡាយ គឺពុំថ្លៃថ្នូរ ឬខាងវិញ្ញាណទេ វាមិនអាចផ្គូផ្គងជាមួយនឹងពាក្យ « ព្រលឹងខ្ញុំ » បានឡើយ ។ ទោះយ៉ាងណាខ្ញុំបានដឹងថា ពាក្យ រឿងទាំងឡាយ នេះបានប្រើនៅក្នុងខគម្ពីរចំនួន ២៣៥៤ ដងឯនោះ ។ ៣ ឧទាហរណ៍ នៅក្នុងម៉ូសេ ៖ « យើងជាដើម និងជាចុង ជាព្រះដ៏មានមហិទ្ធិឫទ្ធិ ដោយសារព្រះរាជបុត្រាបង្កើតតែមួយរបស់យើង ទើបយើងបានបង្កើត របស់ទាំងនេះមក » ។ 4 ហើយពាក្យរបស់នីហ្វៃ ៖ « មើលចុះ ព្រលឹងខ្ញុំត្រេកអរចំពោះ ការណ៍ទាំងឡាយ នៃព្រះអម្ចាស់ ឯចិត្តខ្ញុំរំពឹងគិតជារៀងរហូតអំពីការណ៍ទាំងឡាយ ដែលខ្ញុំបានឃើញ ហើយបានឮមក » ។ ៥
ពាក្យរបស់នីហ្វៃចោទជាសំណួរថា « តើបងប្អូនគិតអំពីរឿងទាំងឡាយណាខ្លះ ? » « តើរឿងទាំងឡាយណាខ្លះដែលពិតជាមានន័យចំពោះបងប្អូន ? » « តើអ្វីខ្លះជារឿងទាំងឡាយនៃព្រលឹងរបស់បងប្អូន ? »
រឿងទាំងឡាយនៃព្រលឹងរបស់យើងតែងតែត្រូវបានបំភ្លឺ និងធ្វើឲ្យស៊ីជម្រៅដោយការសួរសំណួរ ។
អំឡុងជំងឺរាតត្បាត ខ្ញុំបានជួបនឹងយុវវ័យមកពីទូទាំងពិភពលោកនៅក្នុងការប្រជុំធម្មនិដ្ឋានជាច្រើន ទាំងតូចទាំងធំ តាមការចាក់ផ្សាយ និងប្រព័ន្ធផ្សព្វផ្សាយសង្គម ហើយយើងបានពិភាក្សាអំពីសំណួររបស់ពួកគេ ។
យ៉ូសែប ស៊្មីធ អាយុដប់បួនឆ្នាំ មានសំណួរមួយនៅក្នុងព្រលឹងរបស់លោក ហើយលោកបានយកវាទៅទូលព្រះអម្ចាស់ ។ ប្រធាន រ័សុល អិម ណិលសុន បានសង្កត់ធ្ងន់ថា « សូមយកសំណួររបស់បងប្អូនទូលទៅព្រះអម្ចាស់ និងប្រភពដ៏ស្មោះត្រង់ផ្សេងៗទៀត ។ សូមសិក្សាដោយមានបំណងចិត្តដើម្បី ជឿជាជាងបងប្អូនចង់រកកំហុសក្នុងជីវិតរបស់ព្យាការី ឬភាពមិនស្របគ្នានៅក្នុងបទគម្ពីរ ។ សូមឈប់បង្កើនការសង្ស័យរបស់បងប្អូន ដោយទៅការពិភាក្សាជាមួយអ្នកដែលសង្ស័យទាំងឡាយ ។ សូមទុកឲ្យព្រះអម្ចាស់ដឹកនាំបងប្អូនក្នុងដំណើររុករកខាងវិញ្ញាណរបស់បងប្អូន » ។ ៦
យុវវ័យតែងតែសួរខ្ញុំពីអ្វីដែលខ្ញុំជឿ ហើយហេតុអ្វីខ្ញុំជឿ ។
ខ្ញុំចាំថា ខ្ញុំបានជួបយុវនារីម្នាក់តាមអ៊ិនធើណិតនៅក្នុងផ្ទះរបស់នាង ។ ខ្ញុំបានសួរថា តើនេះជាលើកទីមួយឬដែលសាវកម្នាក់បាននៅក្នុងផ្ទះរបស់នាង ។ នាងញញឹមហើយឆ្លើយភ្លាមថា « ចាស » ។ សំណួរដែលនាងសួរខ្ញុំនោះគឺល្អ ៖ « តើរឿងទាំងឡាយ ណាខ្លះដែលសំខាន់បំផុតដែលខ្ញុំគួរដឹង ? »
ខ្ញុំបានឆ្លើយថា « រឿងទាំងឡាយនៃព្រលឹងខ្ញុំ » ជាអ្វីដែលរៀបចំខ្ញុំឲ្យស្តាប់ការបំផុសគំនិត ដែលជួយខ្ញុំឲ្យមើលទៅហួសពីទស្សនៈនៃពិភពលោក វាផ្តល់នូវគោលបំណងដល់ការងាររបស់ខ្ញុំនៅក្នុងដំណឹងល្អ និងជីវិតខ្ញុំ ។
តើខ្ញុំអាចចែករំលែកនូវរឿងមួយចំនួននៃព្រលឹងខ្ញុំជាមួយបងប្អូន បានដែរឬទេ ? រឿងទាំងនេះអនុវត្តចំពោះមនុស្សណាដែលខិតខំធ្វើជាសិស្សពិតរបស់ព្រះយេស៊ូវគ្រីស្ទ ។ លេខដប់ ជាលេខដ៏ល្អហើយ ។ ថ្ងៃនេះខ្ញុំនឹងផ្តល់ឲ្យបងប្អូនលេខប្រាំពីរ ហើយសង្ឃឹមថាបងប្អូននឹងបញ្ចប់ដល់លេខប្រាំបី ប្រាំបួន និងលេខដប់ចេញមកពីបទពិសោធន៍ផ្ទាល់ខ្លួនរបស់បងប្អូន ។
ទីមួយ គឺស្រឡាញ់ព្រះវរបិតាសួគ៌ និងព្រះយេស៊ូវគ្រីស្ទ ដែលជាអង្គសង្គ្រោះរបស់យើង ។
ព្រះយេស៊ូវបានចេញបញ្ញត្តិធំទីមួយ ៖ « ត្រូវឲ្យស្រឡាញ់ព្រះអម្ចាស់ ជាព្រះនៃឯងឲ្យអស់អំពីចិត្ត អស់អំពីព្រលឹង ហើយអស់អំពីគំនិតឯង » ។ ៧
ប្រធានណិលសុនបានប្រកាសពីការលះបង់របស់លោកចំពោះព្រះ ជាព្រះវរបិតាដ៏អស់កល្ប និងព្រះរាជបុត្រារបស់ទ្រង់ ព្រះយេស៊ូវគ្រីស្ទ ពេលលោកត្រូវបានហៅឲ្យដឹកនាំសាសនាចក្រព្រះអម្ចាស់ ដោយថ្លែងថា « ខ្ញុំស្គាល់ពួកទ្រង់ ស្រឡាញ់ពួកទ្រង់ ហើយប្តេជ្ញាចិត្តបម្រើពួកទ្រង់—និងបងប្អូន—រហូតដល់ដង្ហើមចុងក្រោយនៃជីវិតខ្ញុំ » ។ ៨
ដូច្នោះទីមួយគឺស្រឡាញ់ព្រះវរបិតា និងព្រះរាជបុត្រា ។
ទីពី « ត្រូវឲ្យស្រឡាញ់អ្នកជិតខាង » ។ ៩
វាមិនមែនគ្រាន់តែជាគំនិតល្អមួយប៉ុណ្ណោះទេ តែវាគឺជាបញ្ញត្តិធំទីពីរ ។ អ្នកជិតខាងរបស់បងប្អូន គឺប្តី ឬប្រពន្ធ និងគ្រួសារ សមាជិកវួដ អ្នករួមការងារ អ្នករួមបន្ទប់ អ្នកដែលមិនមានជំនឿដូចយើង អ្នកដែលត្រូវការជំនួយ ហើយនិយាយឲ្យចំគឺមនុស្សគ្រប់គ្នា ។ ខ្លឹមសារនៃឃ្លា « ត្រូវឲ្យស្រឡាញ់អ្នកជិតខាង » ត្រូវបានឮនៅក្នុងទំនុកតម្កើង « ចូរស្រឡាញ់គ្នាទៅវិញទៅមក » ។ ១០
ប្រធានណិលសុនរំឭកយើងថា « នៅពេលយើងស្រឡាញ់ ព្រះ ដោយអស់ពីដួងចិត្តរបស់យើង នោះទ្រង់បង្វែរដួងចិត្តរបស់យើងទៅរកសុខុមាលភាពរបស់ អ្នកដទៃ » ។ ១១
ទីបី ខ្ញុំស្រឡាញ់ខ្លួនឯង ។
នេះគឺជាចំនុចមួយដែលមនុស្សភាគច្រើនមានបញ្ហា ។ តើវាមិនគួរឲ្យចាប់អារម្មណ៍ទេឬអី ដែលការស្រឡាញ់ខ្លួន ហាក់ដូចជាមិនសូវងាយស្រួលជាងការស្រឡាញ់អ្នកដទៃនោះ ? ទោះយ៉ាងណា ព្រះអម្ចាស់មានបន្ទូលថា « រឡាញ់អ្នកជិតខាងដូចខ្លួនឯង » ។ ១២ ទ្រង់ឲ្យតម្លៃដល់ទេវភាពក្នុងយើងហើយ ដូច្នេះយើងត្រូវតែឲ្យតម្លៃខ្លួនយើង ។ នៅពេលយើងមានផ្ទុកនូវកំហុស ការឈឺចាប់ អារម្មណ៍មិនល្អគ្រប់គ្រាន់ ការខកចិត្ត កំហឹង ឬអំពើបាប នោះអំណាចនៃដង្វាយធួនរបស់ព្រះអង្គសង្គ្រោះ តាមរយៈការរៀបចំរបស់ទេវភាព គឺជារឿងមួយដែលអាចជួយលើកស្ទួយដល់ព្រលឹងវិញ្ញាណ ។
ទីបួន ចូរធ្វើតាមព្រះបញ្ញត្តិទាំងឡាយ ។
ទ្រង់មានបន្ទូលយ៉ាងច្បាស់ថា « បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តិរបស់ខ្ញុំចុះ » ។ ១៣ សូមព្យាយាមរាល់ថ្ងៃដើម្បីប្រែក្លាយ ហើយធ្វើឲ្យបានល្អប្រសើរជាងមុនបន្តិច រួចដើរឆ្ពោះទៅមុខនៅក្នុងសេចក្ដីសុច្ចរិត ។
ទីប្រាំ សូមមានភាពស័ក្តិសម ដើម្បីចូលព្រះវិហារបរិសុទ្ធជានិច្ច ។
ខ្ញុំហៅថាជាការថ្វាយដល់ព្រះអម្ចាស់ ។ មិនថាបងប្អូនអាចចូលព្រះវិហារបរិសុទ្ធឬអត់នោះទេ ការមានភាពស័ក្តិសមកាន់ប័ណ្ណចូលព្រះវិហារបរិសុទ្ធជួយឲ្យបងប្អូនផ្តោតអារម្មណ៍យ៉ាងមុតមាំទៅលើអ្វីដែលសំខាន់ គឺផ្លូវនៃសេចក្តីសញ្ញា ។
ទីប្រាំមួយ មានអំណរ និងរីករាយ ។
ព្រះអម្ចាស់បានមានព្រះបន្ទូល ៖ « ចូរសង្ឃឹមឡើង ហើយចូរកុំខ្លាចឡើយ » ។ ១៤ ហេតុអ្វីទៅ ? តើដោយរបៀបណាទៅ បើយើងប្រឈមមុខនឹងឧបសគ្គនៅគ្រប់ជំហាននោះ ? ដោយសារការសន្យារបស់ព្រះយេស៊ូវគ្រីស្ទ ៖ « អ្នក ហើយនឹងឈរនៅក្បែរអ្នក » ។ ១៥
ប្រធាន ណិលសុនបានពិព៌ណនាពីដំណឹងល្អដែលបានស្តារឡើងវិញដូចជា « សារនៃអំណរ » ១៦ ហើយលោកបានពន្យល់ថា « អំណរដែលយើងទទួលអារម្មណ៍ដឹង ពុំសូវទាក់ទងទៅនឹងស្ថានភាពនៃជីវិតរបស់យើងទេ តែវាទាក់ទងទៅនឹងអ្វីៗដែលយើងត្រូវផ្តោតជីវិតរបស់យើងវិញ » ។ ១៧
ទីប្រាំពីរ ការធ្វើតាមព្យាការីនៅរស់របស់ព្រះ ។
នេះជាចំនុចទីប្រាំពីរនៅក្នុងបញ្ជីរបស់ខ្ញុំ ប៉ុន្តែវាស្ថិតគំនិតខ្ញុំខ្លាំងជាងគេដោយសារតែវាមានសារៈសំខាន់នៅបច្ចប្បន្ននេះ ។
យើងមានព្យាការីម្នាក់នៃព្រះនៅលើផែនដីសព្វថ្ងៃនេះ ។ សូមកុំបន្ទាបតម្លៃនៃអ្វីដែលមានអត្ថន័យចំពោះបងប្អូន ។ បងប្អូននៅចាំអំពីយុវនារីដែលខ្ញុំបានរៀបរាប់ពីខាងដើមទេ ។ នាងចង់ដឹង រឿងទាំងឡាយដែលសំខាន់បំផុត ។ ខ្ញុំបាននិយាយ ហើយខ្ញុំសង្កត់ធ្ងន់ម្តងទៀតនៅថ្ងៃនេះថា « សូមធ្វើតាមព្យាការីដែលនៅរស់ » ។
យើងត្រូវបានគេស្គាល់ថាជាសាសនាចក្រមួយដែលដឹកនាំដោយពួកព្យាការី អ្នកមើលឆុត និងអ្នកទទួលវិវរណៈ ដែលត្រូវបានហៅពីព្រះសម្រាប់សម័យកាលនេះ ។ ខ្ញុំសន្យាថា នៅពេលដែលបងប្អូនស្តាប់ និងធ្វើតាមការប្រឹក្សារបស់ពួកលោក នោះបងប្អូននឹងពុំវង្វេងផ្លូវឡើយ ។ ពុំវង្វេងសោះឡើយ !
យើងរស់នៅក្នុងគ្រាដែលយើង « ត្រូវផាត់ចុះឡើង » ១៨ ជាពេលដែលជីវភាពខាងវិញ្ញាណ សុជីវធម៌ សុច្ចរិតភាព និងការគោរព ត្រូវគេវាយប្រហារ ។ យើងត្រូវតែធ្វើការជ្រើសរើស ។ យើងមានសំឡេងរបស់ព្រះអម្ចាស់តាមរយៈព្យាការីរបស់ទ្រង់ ដើម្បីរម្ងាប់ការភ័យខ្លាចរបស់យើង ហើយកែលម្អទស្សនៈរបស់យើង ព្រោះនៅពេលប្រធានណិលសុនមានប្រសាសន៍ នោះគឺលោកមានប្រសាសន៍ជំនួសឲ្យព្រះអម្ចាស់ ។
យើងត្រូវបានប្រទានពរឲ្យមានព្រះគម្ពីរ និងការបង្រៀនទាំងឡាយដែលរំឭកយើងថា « គំនិតយើងមិនមែនដូចជាគំនិតរបស់ឯងរាល់គ្នាទេ ឯផ្លូវរបស់ឯងរាល់គ្នាក៏មិនមែនជាផ្លូវរបស់យើងដែរ » ។ ១៩
ដូចជា ណាម៉ាន់ មេដឹកនាំយោធាដ៏អស្ចារ្យនៅស៊ីរី តែគាត់គឺជាមនុស្សឃ្លង់ម្នាក់ ដែលមានគេប្រាប់ថាព្យាការីអេលីសេអាចព្យាបាលគាត់បាន ។ អេលីសេបានប្រាប់អ្នកនាំសាររបស់គាត់ ឲ្យទៅប្រាប់ណាម៉ានឲ្យទៅងូតទឹកក្នុងទន្លេយ័រដាន់ប្រាំពីរដង ហើយគាត់នឹងបានជាសះស្បើយ ។ ណាម៉ាន់បានសើចចំអក ។ ពិតណាស់មានទន្លេមួយដែលធំជាងទន្លេយ័រដាន់ទៅទៀត ហើយហេតុអ្វីបានជាបញ្ជូនអ្នកបម្រើម្នាក់មកជំនួសវិញទាំងគាត់រំពឹងថាព្យាការីអេលីសេនឹងមកព្យាបាលគាត់ដោយផ្ទាល់នោះ ? ណាម៉ាន់បានដើរចេញ ប៉ុន្តែទីបំផុតត្រូវបានអ្នកបម្រើរបស់គាត់បញ្ចុះបញ្ចូលថា « បើសិនជាហោរានោះបានប្រាប់ឲ្យលោកធ្វើការអ្វីយ៉ាងធំ នោះតើលោកមិនធ្វើតាមទេឬអី ? » ២០ នៅទីបំផុតណាម៉ាន់បានលាងខ្លួនប្រាំពីរដងនៅក្នុងទឹកទន្លេយ័រដាន់ ហើយបានជាសះស្បើយ ។
ដំណើររឿងរបស់ណាម៉ាន់រំឭកយើងអំពីហានិភ័យនៃការរើស និងជ្រើសរើសយកចំណែកនានានៃការប្រឹក្សាដ៏ព្យាករ ដែលត្រូវនឹងការគិតរបស់យើង ការរំពឹងទុករបស់យើង ឬត្រូវទៅតាមបទដ្ឋានសព្វថ្ងៃនេះ ។ ព្យាការីរបស់យើងតែងតែចង្អុលបង្ហាញយើងឲ្យទៅកាន់ទន្លេយ័រដាន់របស់យើងផ្ទាល់ដើម្បីឲ្យបានជាសះស្បើយ ។
ពាក្យដ៏សំខាន់បំផុតដែលយើងអាចស្ដាប់ឮ សញ្ជឹងគិត និងធ្វើតាម គឺជាពាក្យដែលបានបើកបង្ហាញតាមរយៈព្យាការីនៅរស់របស់យើង ។ ខ្ញុំសូមថ្លែងទីបន្ទាល់ថា ខ្ញុំបានអង្គុយប្រឹក្សាជាមួយប្រធានណិលសុនដើម្បីពិភាក្សាអំពីបញ្ហាដ៏សំខាន់ទាំងឡាយក្នុងសាសនាចក្រ និងពិភពលោក ហើយខ្ញុំបានឃើញវិវរណៈបើកសម្តែងមកតាមរយៈលោក។ លោកស្គាល់ព្រះអម្ចាស់ លោកដឹងផ្លូវរបស់ទ្រង់ ហើយលោកប្រាថ្នាឲ្យកូនចៅរបស់ព្រះទាំងអស់នឹងស្តាប់តាមទ្រង់ ដែលជាព្រះអម្ចាស់ ព្រះយេស៊ូវគ្រីស្ទ ។
អស់រយៈពេលជាច្រើនឆ្នាំមកហើយដែលយើងបានស្ដាប់ឮមកពីព្យាការីចំនួនពីរដងក្នុងមួយឆ្នាំនៅឯសន្និសីទទូទៅ ។ ប៉ុន្តែដោយមានបញ្ហាស្មុគស្មាញនៅសម័យយើងនេះ ប្រធានណិលសុនមានប្រសាសន៏ជាច្រើនតាម ២១ ប្រព័ន្ធផ្សព្វផ្សាយសង្គម ២២ ការប្រជុំធម្មនិដ្ឋាននានា ២៣ ហើយសូម្បីតែសន្និសីទសារព័ត៌មានទៀតផង ។ ២៤ ខ្ញុំបានសង្កេតឃើញលោករៀបចំ និងបង្ហាញនូវសារលិខិតប្រកបដោយវិវរណៈយ៉ាងជ្រាលជ្រៅ លើកទឹកចិត្តឲ្យកាន់តែមានការដឹងគុណ ជំរុញឲ្យកាន់តែមានការបង្រួបបង្រួមបងប្អូនប្រុសស្រីរបស់យើងនៅលើផែនដីនេះ និងបង្កើនសន្តិភាព ក្តីសង្ឃឹម អំណរ សុខភាព និងការជាសះស្បើយនៅក្នុងជីវិតរបស់យើងម្នាក់ៗ ។
ប្រធានណិលសុនគឺជាអ្នកទំនាក់ទំនងដ៏មានទេពកោសល្យ ប៉ុន្តែដែលសំខាន់ជាងនេះ លោកគឺជាព្យាការីរបស់ព្រះ ។ រឿងនោះគឺពិតជាលើសលប់ណាស់ ពេលបងប្អូនគិតអំពីវា ប៉ុន្តែវាសំខាន់ណាស់ដើម្បីដឹងថាការណែនាំដ៏ច្បាស់លាស់របស់លោកនឹងការពារយើងទាំងអស់គ្នាពីការបោកបញ្ឆោត ល្បិចកល និងវិធីខាងលោកីយ៍ដែលវាជារឿងសាមញ្ញទៅហើយនៅក្នុងពិភពលោកសព្វថ្ងៃនេះ ។ ២៥
សិទ្ធិអំណាចនៃការព្យាករ គឺជាវិវរណៈ ។ « ការស្ដារឡើងវិញនៃភាពពេញលេញនៃដំណឹងល្អរបស់ព្រះយេស៊ូវគ្រីស្ទ ៖ ការប្រកាសដល់ពិភពលោកនៃខួបលើកទីពីររយឆ្នាំ » ដែលបានធ្វើនៅក្នុងសន្និសីទទូទៅ ខែ មេសា ឆ្នាំ ២០២០ សង្កត់ធ្ងន់ថាព្រះអម្ចាស់កំពុងដឹកនាំកិច្ចការនេះ ។ នៅក្នុងការប្រកាសនេះ គណៈប្រធានទីមួយ និងកូរ៉ុមនៃពួកសាវកដប់ពីរនាក់មានប្រសាសន៏ថា « យើងរីករាយនឹងប្រកាសថា ការស្ដារឡើងវិញដែលបានសន្យានោះ បន្ដឆ្ពោះទៅមុខតាមរយៈវិវរណៈជាបន្ដបន្ទាប់ ។ ផែនដីនឹងពុំនៅដដែលឡើយ នៅពេលព្រះនឹង ‹ បំព្រួមគ្រប់ទាំងអស់ក្នុងព្រះគ្រីស្ទ › ( អេភេសូរ ១:១០ ) » ។ ២៦
« គ្រប់ទាំងអស់ក្នុងព្រះគ្រីស្ទ » ២៧ និង « រឿងទាំងឡាយនៃព្រលឹងខ្ញុំ » ២៨ គឺជាអ្វីដែលសាសនាចក្រនេះ ដំណឹងល្អនេះ និងមនុស្សទាំងនេះតំណាងឲ្យ ។
ខ្ញុំសូមបញ្ចប់ដោយការអញ្ជើញបងប្អូនម្នាក់ៗឲ្យពិចារណាអំពី « រឿងទាំងឡាយនៃព្រលឹងខ្ញុំ » ចំនួនទាំងប្រាំពីរ ដែលខ្ញុំបានចែករំលែកនៅថ្ងៃនេះ ៖ ស្រឡាញ់ព្រះវរបិតា និងព្រះយេស៊ូវគ្រីស្ទ ដែលជាព្រះអង្គសង្គ្រោះរបស់យើង, ស្រឡាញ់អ្នកជិតខាងរបស់បងប្អូន, ស្រឡាញ់ខ្លួនឯង, រក្សាបទបញ្ញត្តិទាំងឡាយ, មានភាពស័ក្ដិសមកាន់ប័ណ្ណព្រះវិហារបរិសុទ្ធជានិច្ច, មានអំណរ និងរីករាយ, ហើយធ្វើតាមព្យាការីដែលនៅរស់របស់ព្រះ ។ ខ្ញុំសូមអញ្ជើញបងប្អូនឲ្យកំណត់ចំនុចទីប្រាំបី ទីប្រាំបួន និងទីដប់ដោយខ្លួនឯង ។ សូមពិចារណាពីវិធីដែលបងប្អូនអាចចែកចាយនូវ « រឿងទាំងឡាយ » នៃដួងចិត្តរបស់បងប្អូនជាមួយអ្នកដទៃទៀត ហើយលើកទឹកចិត្តពួកគេឲ្យអធិស្ឋាន ពិចារណា និងស្វែងរកការណែនាំពីព្រះអម្ចាស់ ។
រឿងទាំងឡាយនៃព្រលឹងខ្ញុំ គឺមានតម្លៃចំពោះខ្ញុំក៏ដូចជារឿងទាំងឡាយនៃព្រលឹងរបស់បងប្អូនផងដែរ គឺមានតម្លៃចំពោះបងប្អូន ។ រឿងទាំងឡាយនេះជួយពង្រឹងការបម្រើរបស់យើងនៅក្នុងសាសនាចក្រ និងគ្រប់ផ្នែកទាំងអស់នៃជីវិត ។ រឿងទាំងឡាយនោះតាំងចិត្តយើងចំពោះព្រះយេស៊ូវគ្រីស្ទ ហើយវារំឭកយើងអំពីសេចក្តីសញ្ញារបស់យើង និងវាជួយយើងឲ្យមានអារម្មណ៍សុវត្ថិភាពនៅក្នុងព្រះហស្តរបស់ព្រះអម្ចាស់ ។ ខ្ញុំសូមថ្លែងទីបន្ទាល់ថា ទ្រង់ប្រាថ្នាចង់ឲ្យព្រលឹងរបស់យើង « នឹងពុំចេះស្រេកឃ្លានឡើយ តែបានឆ្អែតជានិច្ច » ២៩ ជាមួយនឹងសេចក្តីស្រឡាញ់របស់ទ្រង់ នៅពេលយើងខិតខំក្លាយទៅជាសិស្សពិតរបស់ទ្រង់ ដើម្បីក្លាយជាតែមួយនឹងទ្រង់ ដូចជាទ្រង់ជាមួយនឹងព្រះវរបិតាដែរ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕