ចូរលើកពន្លឺរបស់អ្នករាល់គ្នាឡើង
ការអញ្ជើញរបស់ខ្ញុំនៅថ្ងៃនេះគឺសាមញ្ញ ៖ សូមចែកចាយដំណឹងល្អ ើយលើកពន្លឺឡើង ។
ពីរបីឆ្នាំកន្លងទៅអំឡុងពេលនៅលើយន្ដហោះទៅប្រទេសប៉េរូ ខ្ញុំបានអង្គុយក្បែរមនុស្សម្នាក់ដែលមិនជឿលើព្រះ ។ គាត់បានសួរខ្ញុំថា ហេតុអ្វីខ្ញុំជឿលើព្រះ ។ នៅក្នុងការសន្ទនាដ៏រីករាយដែលបានកើតឡើង ខ្ញុំបានប្រាប់គាត់ថា ខ្ញុំជឿលើព្រះព្រោះ យ៉ូសែបស្មីធបានឃើញទ្រង់—ហើយបន្ទាបមកខ្ញុំបានបន្ថែមពីលើចំណេះដឹងរបស់ខ្ញុំអំពីព្រះដែលកើតចេញពីបទពិសោធន៍ខាងវិញ្ញាណពិតផ្ទាល់ខ្លួន ។ ខ្ញុំបានចែកចាយជំនឿរបស់ខ្ញុំថា « គ្រប់ការណ៍ទាំងអស់បង្ហាញថា មានព្រះមួយអង្គមែន » ១ ហើយបានសួរគាត់វិញថា តើគាត់គិតយ៉ាងណាដែរចំពោះផែនដីនេះ—ដែលជាជម្រកនៃជីវិតទាំងឡាយនៅក្នុងលំហ—ដែលបានកកើតឡើងនេះ ។ គាត់បានឆ្លើយថា វាជា « ការចៃដន្យ » ដែលអាចកើតឡើងបានក្នុងរយៈពេលដ៏យូរ ។ កាលដែលខ្ញុំបានពន្យល់ពីរបៀបរៀបរយដែលមិនគួរឲ្យជឿចំពោះ « ការចៃដន្យ » ដែលបានកកើតឲ្យមានសម្រស់ និងមានរបៀបល្អបែបនោះ គាត់ក៏បានស្ងាត់មាត់មួយសន្ទុះ ហើយបានឆ្លើយតបដោយរមទម្យថា « ខ្ញុំក៏ឆ្ងល់ដែរ » ។ ខ្ញុំសួរថា តើគាត់ចង់អានព្រះគម្ពីរមរមនទេ ។ គាត់ឆ្លើយថា គាត់ចង់ ដូច្នេះខ្ញុំបានផ្ញើព្រះគម្ពីរមរមនឲ្យគាត់ ។
ច្រើនឆ្នាំក្រោយមក ខ្ញុំមានមិត្តថ្មីម្នាក់ ពេលនៅក្នុងព្រលានយន្ដហោះក្រុងឡាហ្គូស ប្រទេសនីហ្សេរីយ៉ា ។ យើងបានស្គាល់គ្នា នៅពេលគាត់ពិនិត្យលិខិតឆ្លងដែនរបស់ខ្ញុំ របស់គាត់ ហើយគាត់បានបង្ហាញសេចក្ដីជំនឿដ៏រឹងមាំលើព្រះ ។ ខ្ញុំបានចែកចាយសេចក្តីអំណរ និងភាពរស់រវើកនៃដំណឹងល្អដែលបានស្ដារឡើងវិញរបស់ព្រះយេស៊ូវគ្រីស្ទ ហើយបានសួរថា តើគាត់ចង់រៀនបន្ថែមទៀតពីអ្នកផ្សព្វផ្សាយសាសនាដែរឬទេ ។ គាត់ឆ្លើយថាចង់ ហើយគាត់បានរៀន និងទទួលបុណ្យជ្រមុជទឹក ។ មួយ ឬពីរឆ្នាំក្រោយមក កាលខ្ញុំដើរនៅព្រលានយន្ដហោះនៅប្រទេសលីបេរីយ៉ា ខ្ញុំបានឮសំឡេងមួយហៅឈ្មោះខ្ញុំ ។ ខ្ញុំបានងាកមើល ហើយយុវជនដដែលនោះបានដើរមករកខ្ញុំដោយស្នាមញញឹម ។ យើងបានឱបគ្នាពេញដោយសេចក្តីអំណរ ហើយគាត់បានប្រាប់ខ្ញុំថា គាត់សកម្មនៅក្នុងព្រះវិហារ ហើយកំពុងជួយពួកអ្នកផ្សព្វផ្សាយសាសនាឲ្យបង្រៀនមិត្តស្រីរបស់គាត់ ។
ឥឡូវនេះខ្ញុំមិនបានដឹងថា មិត្តដែលមិនជឿលើព្រះរបស់ខ្ញុំបានអានព្រះគម្ពីរមរមន ឬបានចូលព្រះវិហារឬក៏អត់នោះទេ ។ មិត្តទីពីររបស់ខ្ញុំបានចូលរួម ។ សម្រាប់មិត្តទាំងពីរនាក់ នោះការទទួលខុសត្រូវរបស់ខ្ញុំ ២ ឱកាសរបស់ខ្ញុំ—គឺដូចគ្នាដែរ ៖ គឺលើកពន្លឺដំណឹងល្អឡើង—ដើម្បីស្រឡាញ់ ចែកចាយ និងអញ្ជើញពួកគេម្នាក់ៗតាមរបៀបធម្មតា និងសាមញ្ញ ។ ៣
បងប្អូនប្រុសស្រីទាំងឡាយ ខ្ញុំបានដកពិសោធន៍នូវពរជ័យក្នុងការចែកចាយដំណឹងល្អ ហើយវាអស្ចារ្យណាស់ ។ នេះជាចំនួនពីរបីដែលមាន ៖
ការចែកចាយដំណឹងល្អនាំមកនូវអំណរ និងសេចក្ដីសង្ឃឹម
បងប្អូន និងខ្ញុំដឹងថា យើងបានរស់នៅជាបុត្ររបស់ព្រះបិតាមាតាសួគ៌យើង មុនពេលមកកាន់ផែនដីនេះ ៤ ហើយថា ផែនដីនេះត្រូវបានបង្កើតឡើងក្នុងគោលបំណង ដើម្បីផ្ដល់ឱកាសឲ្យមនុស្សម្នាក់ៗទទួលបានរូបកាយ បទពិសោធន៍ រៀនសូត្រ និងរីកចម្រើនឡើង ដើម្បីទទួលបានជីវិតអស់កល្បជានិច្ច—ដែលជាព្រះជន្មរបស់ព្រះ ។ ៥ ព្រះវរបិតាសួគ៌ជ្រាបថា យើងនឹងរងទុក្ខ ហើយមានបាបនៅលើផែនដីនេះ ដូច្នេះទ្រង់បានបញ្ជូនព្រះរាជបុត្រារបស់ទ្រង់ដែល « បូជាដ៏មហិមា » ៦ និងធួននឹងបាប ៧ ដើម្បីធ្វើឲ្យយើងអាចទទួលបានការអភ័យទោស ការព្យាបាល និង បានពេញលេញ ។ ៨
ការដឹងពីសេចក្ដីពិតទាំងនេះគឺជីវិតផ្លាស់ប្ដូរ ! នៅពេលមនុស្សម្នាក់ដឹងពីគោលបំណងដ៏រុងរឿងនៃជីវិត ហើយដឹងថាព្រះគ្រីស្ទអភ័យទោស និងជួយដល់អ្នកដែលដើរតាមទ្រង់ រួចហើយជ្រើសរើសដើរតាមព្រះគ្រីស្ទទៅក្នុងទឹកនៃពិធីបុណ្យជ្រមុជទឹក សម្រាប់ជីវិតផ្លាស់ប្ដូរប្រសើរឡើង—ទោះបីជាកាលៈទេសៈខាងក្រៅនៃជីវិតមិនមានក៏ដោយ ។
ប្អូនស្រីដ៏ស្រស់ស្រាយម្នាក់ ដែលខ្ញុំបានជួបនៅទីក្រុងអូនីស្សា ប្រទេសនីហ្សេរីយ៉ា បានប្រាប់ខ្ញុំថា ចាប់ពីពេលនោះមក នាងបានរៀនពីដំណឹងល្អ និងបានជ្រមុជទឹក( ហើយឥឡូវនេះ ខ្ញុំសូមដកស្រង់ពាក្យសំដីរបស់នាង ) « គ្រប់យ៉ាងគឺល្អសម្រាប់ខ្ញុំ ។ ខ្ញុំសប្បាយចិត្ត ។ ខ្ញុំនៅស្ថានសួគ៌ » ។ ៩ ការចែកចាយដំណឹងល្អនាំឲ្យមានអំណរ និងក្ដីសង្ឃឹមដល់ព្រលឹងរបស់អ្នកដែលចែកចាយផង និងអ្នកទទួលផង ។ ពិតណាស់ « អ្នកនឹងមានសេចក្ដីអំណរដ៏មហិមា » ១០ ពេលបងប្អូនចែកចាយដំណឹងល្អ ! ការចែកចាយដំណឹងល្អគឺជាការមានអំណរ និងក្ដីសង្ឃឹមម្ដងហើយម្ដងទៀត ។ ១១
ការចែកចាយដំណឹងល្អនាំឲ្យមានព្រះចេស្ដារបស់ព្រះនៅក្នុងជីវិតរបស់យើង
កាលយើងជ្រមុជទឹក ពួកយើងម្នាក់ៗបានចូលក្នុងសេចក្ដីសញ្ញាដ៏នៅអស់កល្បជានិច្ច ១២ ជាមួយព្រះដើម្បី « នឹងបម្រើព្រះអង្គ ហើយកាន់តាមព្រះបញ្ញត្តិទាំងឡាយរបស់ទ្រង់ » ១៣ ដែលរួមមានការ « ឈរជាសាក្សីដល់ [ ទ្រង់ ] នៅគ្រប់ពេល និងគ្រប់សេចក្ដី និងគ្រប់ទីកន្លែង » ។ ១៤ នៅពេលយើង « នៅជាប់នឹង » ទ្រង់ តាមរយៈការរក្សាសេចក្ដីសញ្ញានេះ នោះព្រះចេស្ដាដ៏រស់រវើក គាំទ្រ និងបន្សុទ្ធនៃព្រះនឹងហូរមកក្នុងជីវិតយើងពីព្រះគ្រីស្ទ គឺដូចជាមែកឈើទទួលបានជីវជាតិពីដើមវាដែរ ។ ១៥
ការចែកចាយដំណឹងល្អការពារយើងពីការល្បួង
ព្រះអម្ចាស់បានបង្គាប់ថា
« ចូរលើកពន្លឺរបស់អ្នករាល់គ្នាឡើង ប្រយោជន៍ឲ្យបានភ្លឺដល់មនុស្សលោក ។ មើលចុះ យើងជាពន្លឺដែលអ្នករាល់គ្នានឹងលើកឡើង—គឺនូវអ្វីដែលអ្នករាល់គ្នាបានឃើញយើងធ្វើ ។ …
« យើង ម្ល៉ោះហើយ អ្នករាល់គ្នាក៏ត្រូវធ្វើយ៉ាងនោះដល់មនុស្សលោកដែរ ហើយអស់អ្នកណាដែលបំបាក់បញ្ញត្តិនេះ គឺបណ្ដោយខ្លួនឲ្យត្រូវដឹកនាំទៅក្នុងការល្បួងវិញ » ។ ១៦
ការជ្រើសរើសមិនលើកពន្លឺដំណឹងល្អឡើង ផ្លាស់យើងទៅរកទីងងឹត ជាកន្លែងដែលយើងងាយចាញ់នឹងការល្បួង ។ អ្វីដែលសំខាន់ការសន្ទនាគឺពិតថា ៖ ការជ្រើសរើសដើម្បីលើកពន្លឺដំណឹងល្អឡើង នាំយើងទៅកាន់តែពេញដោយពន្លឺនោះ ហើយវាផ្ដល់ការការពារប្រឆាំងនឹងការល្បួងផងដែរ ។ ឱ នេះគឺជាពរជ័យដ៏អស្ចារ្យមួយនៅក្នុងពិភពលោកសព្វថ្ងៃនេះ !
ការចែកចាយដំណឹងល្អនាំមកនូវការព្យាបាល
បងស្រី ធីហ្វានី ម៉ាឡូន បានទទួលយកការអញ្ជើញឲ្យគាំទ្រដល់ពួកអ្នកផ្សព្វផ្សាយសាសនា ទោះជាគាត់មានការពិបាកផ្ទាល់ខ្លួនខ្លាំង និងរួមមានទាំងសំណួរអំពីសេចក្ដីជំនឿរបស់គាត់ក្ដី ។ ថ្មីៗនេះគាត់បានប្រាប់ខ្ញុំថា ការគាំទ្រដល់ពួកអ្នកផ្សព្វផ្សាយសាសនាបានរំឭកពីសេចក្ដីជំនឿ និងអារម្មណ៍នៃសុខុមាលភាពរបស់គាត់ ។ គាត់ថ្លែងថា « កិច្ចការផ្សព្វផ្សាយសាសនាជួយព្យាបាលខ្លាំងណាស់ » ។ ១៧
សេចក្តីអំណរ ។ សេចក្ដីសង្ឃឹម ។ ព្រះចេស្ដាគាំទ្រមកពីព្រះ ។ ការការពារពីការល្បួង ។ ការព្យាបាល ។ ទាំងអស់នេះ—និងអ្វីជាច្រើនទៀត ( រួមទាំងការអភ័យទោសពីអំពើបាប ) ១៨ ចាក់ស្រោចពីស្ថានសួគ៌ដល់យើង ពេលយើងចែកចាយដំណឹងល្អ ។
ឥឡូវនេះ សូមងាកទៅរកឱកាសដ៏អស្ចារ្យរបស់យើង
បងប្អូនប្រុសស្រីអើយ « មានមនុស្សជាច្រើនក្នុងចំណោម … ក្រុម [ បក្ស និង ] និកាយទាំងឡាយ … ជាពួកអ្នកដែលលាក់ពីសេចក្ដីពិត ពីព្រោះពួកគេមិនដឹងជាទៅរកសេចក្ដីពិតឯណាទេ » ។ ១៩ ការចាំបាច់ត្រូវលើកពន្លឺរបស់យើងឡើងគឺមហិមាណាស់ ហើយមិនធ្លាប់មាននៅក្នុងប្រវត្តិសាស្ដ្រមនុស្សលោកឡើយ ។ ហើយសេចក្ដីពិតមិនដែលទទួលបានដោយងាយស្រួលជាងនេះឡើយ ។
ជីមី ថន ដែលបានធំឡើងជាពុទ្ធសាសនិក បានស្ញើចសរសើរចំពោះគ្រួសារមួយ ដែលបានចែកចាយពីជីវិតរបស់ពួកគេនៅលើ YouTube ។ ពេលគាត់ដឹងថា ពួកគេគឺជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នោះគាត់បានសិក្សាដំណឹងល្អតាមអនឡាញ ហើយអានព្រះគម្ពីរមរមនដោយខ្លួនឯងប្រើនូវកម្មវិធីតាមទូរសព្ទ ហើយបានជ្រមុជទឹក ក្រោយពីជួបនឹងពួកអ្នកផ្សព្វផ្សាយសាសនានៅមហាវិទ្យាល័យ ។ ២០ ឥឡូវនេះ អែលឌើរ ថន គឺជាអ្នកផ្សព្វផ្សាយសាសនាពេញម៉ោងម្នាក់វិញម្ដង ។
គាត់ និងមិត្តអ្នកផ្សព្វផ្សាយសាសនារបស់គាត់នៅជុំវិញពិភពលោក គឺជាកងពលរបស់ព្រះអម្ចាស់—ដើម្បីដង់ស្រង់ពាក្យសំដីមកពីព្យាការីរបស់យើង ។ ២១ ពួកអ្នកផ្សព្វផ្សាយសាសនាទាំងនេះធ្វើអ្វីមួយខុសពីនិន្នាការពិភពលោកនេះ ៖ ខណៈការស្ទង់មតិបង្ហាញថា ជំនាន់ Gen Z កំពុងងាក ចេញ ពីព្រះ ២២ នោះកងទ័ពកំលោះរបស់យើង ២៣ គឺអែលឌើរ និងស៊ីស្ទើរទាំងឡាយកំពុងបង្វែរមនុស្ស មករក ព្រះ ។ ហើយចំនួនសមាជិកសាសនាចក្រដ៏ច្រើន កំពុងរួបរួមគ្នាជាមួយនឹងពួកអ្នកផ្សព្វផ្សាយសាសនានៅក្នុងការចែកចាយដំណឹងល្អ ដោយជួយមិត្តភក្ដិកាន់តែច្រើនឡើងឲ្យមករកព្រះគ្រីស្ទ និងសាសនាចក្ររបស់ទ្រង់ ។
ពួកបរិសុទ្ធថ្ងៃចុងក្រោយជាទីស្រឡាញ់របស់យើងនៅប្រទេសលីបេរីយ៉ា បានជួយមិត្តភក្ដិចំនួន ៥០៧ នាក់បានជ្រមុជទឹកនៃពិធីបុណ្យជ្រមុជទឹកអំឡុងពេល១០ ខែ ដែលគ្មានពួកអ្នកផ្សព្វផ្សាយសាសនាបម្រើនៅក្នុងប្រទេសរបស់ពួកគេ ។ កាលប្រធានស្ដេកដ៏អស្ចារ្យរបស់យើងម្នាក់បានឮថា ពួកអ្នកផ្សព្វផ្សាយសាសនាពេញម៉ោងអាចត្រឡប់មកវិញ នោះគាត់ពោលថា « អូ ពិតជាល្អណាស់ ឥឡូវនេះ ពួកគេអាចជួយយើងជាមួយកិច្ចការ របស់យើងបាន » ។
លោកនិយាយត្រូវ ៖ ការប្រមូលផ្ដុំអ៊ីស្រាអែល—ជាបុព្វហេតុដ៏អស្ចារ្យបំផុតនៅលើផែនដី ២៤ គឺជាការទទួលខុសត្រូវលើសេចក្ដីសញ្ញា របស់យើង ហើយនេះគឺជាពេលវេលា របស់យើង ! ការអញ្ជើញរបស់ខ្ញុំនៅថ្ងៃនេះគឺសាមញ្ញ ៖ សូមចែកចាយដំណឹងល្អ ។ សូមធ្វើជាខ្លួនឯង ហើយលើកពន្លឺឡើង ។ សូមអធិស្ឋានសម្រាប់ជំនួយពីស្ថានសួគ៌ ហើយធ្វើតាមការបំផុសគំនិតខាងវិញ្ញាណ ។ សូមចែកចាយពីជីវិតរបស់បងប្អូនតាមធម្មតា និងសាមញ្ញ ហើយអញ្ជើញអ្នកដទៃឲ្យមកហើយមើល មកហើយជួយ និងមកហើយធ្វើជាកម្មសិទ្ធិ ។ ២៥ ហើយបន្ទាប់មកអររីករាយ នៅពេលបងប្អូន និងមនុស្សដែលបងប្អូនស្រឡាញ់ទទួលបានពរជ័យដែលបានសន្យា ។
ខ្ញុំដឹងថា នៅក្នុងព្រះគ្រីស្ទ ដំណឹងល្អទាំងនេះនឹងផ្សាយដល់អ្នករាបសា នៅក្នុងព្រះគ្រីស្ទ អ្នកមានចិត្តសង្រេងនឹងបានផ្សារភ្ជាប់ នៅក្នុងព្រះគ្រីស្ទ នឹងមានការប្រកាសសេរីភាពដល់ពួកអ្នកដែលជាប់ចំណង ហើយនៅក្នុងព្រះគ្រីស្ទ គឺមានតែនៅក្នុងព្រះគ្រីស្ទប៉ុណ្ណោះ ទើបពួកអ្នកដែលសោយសោកបានភួងលម្អជំនួសផេះ ។ ២៦ ហេតុដូច្នេះ ចាំបាច់ត្រូវធ្វើឲ្យការណ៍ទាំងនេះបានដឹង ! ២៧
ខ្ញុំសូមថ្លែងទីបន្ទាល់ថា ព្រះយេស៊ូវគ្រីស្ទគឺជាមេផ្ដើម ហើយជាមេសម្រេចនៃសេចក្ដីជំនឿរបស់យើង ។ ២៨ ទ្រង់នឹងបញ្ចប់ ទ្រង់នឹងបំពេញការអនុវត្តសេចក្ដីជំនឿរបស់យើង—មិនថាវាមិនល្អឥតខ្ចោះប៉ុណ្ណាទេ—ក្នុងការលើកពន្លឺដំណឹងល្អឡើង ។ ទ្រង់នឹងសម្ដែងអព្ភូតហេតុនៅក្នុងជីវិតរបស់យើង និងក្នុងជីវិតរបស់អស់អ្នកដែលទ្រង់ប្រមូលផ្ដុំមក ដោយសារទ្រង់ជាព្រះនៃអព្ភូតហេតុទាំងឡាយ ។ ២៩ នៅក្នុងព្រះនាមដ៏អស្ចារ្យនៃព្រះយេស៊ូវគ្រីស្ទ អាម៉ែន ៕