Sinulat sa Kamot diha sa Bongbong

Sa ting-init sa 1858, sa mga takna nga ang kasundalohan milabay sa Siyudad sa Salt Lake, usa ka magtutudlo nga ginganlan og Karl Maeser nakadawat og makalipay nga tanyag gikan sa pamilya ni John Tyler, usa ka presidente kaniadto sa Estados Unidos. Sa mga bulan nga nanglabay nagtudlo si Karl og mga leksyon sa musika ngadto sa mga anak ni John ug Julia Tyler diha sa usa ka lapad nga umahan habagatan sa Estados Unidos. Usa ka German nga langyaw, nakadani si Karl sa mga Tyler sa iyang maayo nga edukasyon, matinahurong mga pamatasan, ug maayong buot. Karon gusto nilang sweldohan siya sa pagpuyo duol kanila ug magpadayon sa pagtudlo sa ilang mga anak.¹

Ang tanyag hapit sobra sa pagkamahinatagon nga balibaran. Usa ka krisis sa panalapi mipiang sa ekonomiya wala madugay human si Karl ug ang iyang asawa, si Anna, miabut gikan sa Germany. Napulo ka liboang mga tawo ang nawad-an sa ilang mga trabaho sa siyudad sa tibuok Estados Unidos, Canada, ug Uropa. Sa mubo nga panahon, si Karl ug Anna nanlimbasog sa pagpangita og trabaho ug makabutang og pagkaon sa lamesa. Ang pagtudlo sa mga bata nga Tyler mihatag sa mga Maeser ug sa ilang tres anyos ang panuigon nga anak nga lalaki, si Reinhard, og pipila ka pinansyal nga kalig-on.²

Apan dili tuyo ni Karl ang pagdawat sa tanyag sa mga Tyler. Makausa gisultihan niya si Julia Tyler nga ang gikinahanglan lamang niya nga malipay mao ang usa ka gamay nga balay ug usa ka tanaman alang sa iyang pamilya. Unsa ang wala niya isulti kaniya mao nga siya ug si Anna mga Santos sa Ulahing mga Adlaw kinsa mianha sa Estados Unidos aron magpundok ngadto sa Zion. Usa ka rason nga si Karl nangita og trabaho sa Habagatan, gawas sa pagbuhi sa iyang pamilya, mao ang pagpangita og igo nga kwarta aron molangyaw sa kasadpan.³

Unang nahibaloan ni Karl ang mahitungod sa Simbahan samtang nagpuyo sa Germany. Human mabasa ang usa ka basahon nga kaaway sa Simbahan ug sa mensahe niini, nakigsulti siya sa mga pangulo sa misyon sa Uropa. Si Apostol Franklin Richards ug usa ka misyonaryo nga ginganlan og William Budge miadto sa Germany ug gitudloan ang iyang pamilya sa ebanghelyo. Gidawat dayon kini ni Karl ug Anna.

Tungod kay ang pagpasakop sa Simbahan ilegal sa Germany, gibunyagan ni Franklin ang magtutudlo sa gabii. Sa dihang mihaw-as sa tubig si Karl, gipataas niya ang iyang kamot ngadto sa langit ug nag-ampo, “Amahan, kon unsa ang akong gibuhat karon lang nakapahimuot nganha Kanimo, hatagi ako og pagpamatuod, ug bisan unsa ang Imong gikinahanglan sa akong mga kamot akong buhaton.”⁴

Si Karl niana nga panahon dili kahibalo og Iningles, busa siya ug si Franklin nakig-istorya pinaagi sa usa ka tighubad. Apan sa diha nga sila mibalik ngadto sa siyudad, si Karl ug si Franklin kalit nga misugod sa pagsinabtanay sa usag usa, ingon og ang duha nagsulti og parehas nga pinulongan. Kini nga pagpakita sa gasa sa mga pinulongan mao ang saksi nga gipaninguha ni Karl, ug tuyo niyang magpabiling tinuod sa iyang pulong, walay pagsapayan sa bili.⁵

Karon, human milabay ang tulo ka tuig, naningkamot gihapon siya sa paghupot sa saad nga iyang nahimo sa iyang bunyag. Determinado nga moadto sa Zion, gibalibaran ni Karl ang tanyag sa mga Tyler ug gibalhin ang iyang pamilya ngadto sa Philadelphia, usa ka dakong siyudad sa amihanang-silangan nga mga estado, diin siya gitawag wala madugay sa pagdumala sa usa ka gamay nga branch sa Simbahan.⁶

Sa wala pa ang bag-ohay nga krisis sa Utah, ang sama nga mga branch mihimo og usa ka importante nga tahas sa pagsuporta sa buhat sa misyonaryo ug paglangyaw, nagdepensa sa Simbahan batok sa mga kritiko, ug naghangyo sa gobyerno alang sa Simbahan. Apan human tawga ni Brigham Young ang mga misyonaryo sa pagpauli ug giaghat ang silangang mga Santos sa pag-adto sa kasadapan, daghan sa silangang mga branch nagkulang og igo nga mga miyembro o mga pundo sa pagdala niini nga mga kalihokan.⁷

Ang pagka-Santos sa Ulahing mga Adlaw mahimong mahagiton didto sa Silangan. Ang dungog sa Simbahan diha sa rehiyon mihagsa sa milabay nga dekada. Daghang mga tawo ang mipadayon sa pagtuo nga ang mga Santos masukulon ug walay paghigugma sa yutang natawhan. Usa ka pangulo sa Simbahan nakadawat og hulga sa kamatayon didto sa Siyudad sa New York, ug ang pipila sa mga Santos gibulitan og alkitran ug balhibo tungod sa ilang mga tinuohan. Ang uban mipabilin sa ilang pagkamiyembro sa Simbahan nga sekreto aron sa paglikay og dugang nga pagpanggukod.⁸

Sa Philadelphia, si Anna nakapangwarta isip usa ka mananahi ug tiglimpyo sa balay samtang si Karl nangalagad sa mga miyembro sa branch, mitambong og rehiyonal nga mga komperensya sa Simbahan, ug mitabang sa pagplano alang sa sunod nga panahon sa paglangyaw. Gibuhat nila kutob sa unsay ilang mahimo sa paglig-on sa ilang gamay nga branch.⁹ Apan aron sa pag-uswag sa Simbahan didto ug sa tibuok kalibutan, ang mga Santos gikinahanglan nga mosupak sa dili tinuod nga mga ideya ug sayop nga mga pagsabut mahitungod kanila nga nagkadaghan.

Ug nagkinahanglan pa sila og mga misyonaryo nga mobalik sa mga dapit ug mopadayon sa buhat sa kaluwasan.

---

Sayo sa Septyembre 1858, gimantala ni George Q. Cannon ang Deseret News diha sa usa ka sentral nga lungsod sa Utah nga gitawag og Fillmore. Ang pamantalaan sagad may punoang buhatan sa Siyudad sa Salt Lake, apan sa dihang ang mga Santos mibalhin sa habagatan sayo nianang tuiga, si George ug ang iyang pamilya namutos sa bug-at nga ekipo sa pang-imprinta ug gidala kini mga 150 ka milya [240 ka kilometro] ngadto sa Fillmore.¹⁰

Karon nga luwas na ang pagbalik ngadto sa Siyudad sa Salt Lake, mihukom si George sa pagdala sa pang-imprinta balik sa amihanan. Sa Septyember 9, siya ug ang iyang manghud nga lalaki si David mikarga sa mga ekipo sa pang-imprinta ngadto sa mga karomata ug mipadulong balik ngadto sa siyudad kauban sa nagkadako nga pamilya ni George. Si George ug Elizabeth karon aduna nay usa ka-tuig ang panuigon nga anak nga lalaki, si John, ug lain nga bata ang umaabut. Nangasawa usab si George og ikaduhang asawa, si Sarah Jane Jenne, ug siya usab manganakay.

Upat ka adlaw human mibiya sa Fillmore, ang mga Cannon mipahulay sa usa ka lungsod mga setenta ka milya [sento dose ka kilometro] gikan sa Siyudad sa Salt Lake. Samtang nangbadbad sa higot si George sa iyang panon, usa ka lalaki nga sakay og karwahe nga gibira og laki nga asno mihunong tupad niya. Usa siya ka mensahero gikan ni Brigham Young ug nangita ni George sukad sa miaging gabii. Miingon siya nga si Brigham nagpaabut ni George nga maana na sa siyudad. Ang Simbahan nagpadala na usab og mga misyonaryo, ug usa ka panon sa mga elder naghulat nga mobiya uban ni George sa iyang misyon ngadto sa silangang Estados Unidos.

Naglibug si George. Unsa nga misyon ngadto sa Silangan? Sulod sa tunga ka oras, siya ug si Elizabeth miimpake og gamay nga maleta ug midali ngadto sa Siyudad sa Salt Lake uban ni John samtang si David misunod dayon uban ni Sarah Jane ug sa ekipo sa pag-imprinta. Miabut si George sa siyudad pagkasunod buntag sa alas singko ug dayon miadto sa opisina ni Brigham human sa pamahaw. Giabi-abi siya ni Brigham ug gipangutana, “Andam ka na ba?”

“Ako andam,” miingon si George.

Miatubang si Brigham ngadto sa usa sa mga lalaki nga tupad niya. “Gisultihan ko kamo nga kini mao,” miingon siya. Dayon usa ka klerk mitunol ni George sa mga panudlo alang sa iyang misyon.¹¹

Sa makausa na usab, ang teretoryal nga magbabalaod sa Utah naghangyo sa Kongreso sa Estados Unidos alang sa pagka-estado ug sa katungod sa pagpili o pagtudlo sa tanang lokal nga mga opisyal sa gobyerno. Nahibalo nga laing pagka-estado nga hangyo mapakyas kon ang opinyon sa publiko mahitungod sa Simbahan magpabiling ubos, gusto ni Brigham nga si George moadto og linaing misyon sa pagdumala sa mga Santos sa silangan, magmantala og positibo nga mga artikulo sa pamantalaan, ug sa pagpalambo sa dungog niini sa tibuok nasud.¹²

Gibati dihadiha dayon ni George ang gibug-aton sa misyon. Kinahanglan siyang mogikan sa pagkasunod nga adlaw, hapit wala maghatag kaniya sa pagpahimutang sa iyang pamilya diha sa walog. Apan siya nagtuo nga ang Ginoo mohatag og paagi sa pagpahinabo sa Iyang kabubut-on. Ang mga kasinatian ni George sa Hawaii ug California miandam kaniya alang sa usa ka misyon ug responsibilidad ingon niini ka dako. Ug nahibalo siya nga ang iyang mga igsoon ug ubang mga paryente, lakip ang iyang iyaan ug uyoan si Leonora ug John Taylor, makatabang sa iyang mga asawa ug mga anak.

Gipanalanginan ni Brigham si George ug gi-set apart siya isip usa ka misyonaryo. Dayon gipanalanginan ni George si Elizabeth ug John ug mipasalig kanila ug ni Sarah Jane, kinsa nagbiyahe pa paingon sa amihanan, ngadto sa pag-amuma sa Ginoo. Sa pagkasunod hapon siya ug usa ka gamay nga pundok sa mga misyonaryo mipaingon sa silangan tabok sa Rocky Mountains.¹³

---

Sa samang higayon, sa Fort Ephraim sa Walog sa Sanpete, diha na ni Augusta Dorius Stevens sa katapusan ang kadaghanan sa iyang pamilya duol kaniya. Ang iyang bayaw nga mga babaye si Elen ug Karen misunod sa iyang amahan, si Nicolai, ngadto sa Fort Ephraim sa dihang ang mga Santos mibalhin sa habagatan. Ang magulang nga mga lalaki ni Augusta si Carl ug Johan miabut sa wala madugay human gi-release sa katungdanan sa pagkagwardiya sa Siyudad sa Salt Lake. Ang iyang manghud nga babaye si Rebekke mipuyo usab sa lungsod. Ang ilang inahan lamang, si Ane Sophie, ang didto pa sa Denmark ug dili miyembro sa Simbahan.¹⁴

Sukad naminyo ni Henry Stevens upat ka tuig ang milabay, gipadagan ni Augusta ang panimalay ug giamumahan ang unang asawa ni Henry nga masakiton, si Mary Ann, kinsa iyang gimahal pag-ayo.¹⁵ Sa edad nga disenwebe, nahimo usab si Augusta nga unang presidente sa Fort Ephraim Female Relief Society. Uban sa pag-amuma sa mga masakiton ug sa nag-antus, siya ug ang iyang mga sister sa Relief Society naglala og panapton, naghimo og mga quilt, naghatag og pagkaon ug kapasilongan sa mga timawa, ug nag-amuma sa mga walay ginikanan. Kon adunay mamatay sa lungsod, ilang trapuhan ug sul-uban ang patay, himoan og mga saput panglubong, hupayon ang mga nagbangutan, ug preserbahon ang lawas sa dili pa ilubong og ice nga gikan sa Suba sa San Pitch.¹⁶

Sa hapit na magkahiusa ang pamilyang Darius, nanganak si Augusta og batang lalaki nga ginganlan og Jason, kinsa namatay atol sa sakit nga midagsang sa wala pa siyay usa ka tuig ang edad. Bisan pa sa iyang kaguol, nakakaplag si Augusta og panimalay ug sa tinuod kahupay sulod sa dako nga komunidad sa mga Santos nga Scandinavian sa Walog sa Sanpete, kinsa nagkahiusa sa gipakigbahin nga mga kinaiyahan, mga tradisyon, ug mga pinulongan aron sa paglahutay sa mga pagsulay sa ilang bag-ong panimalay. Samtang diha sa ilang mga misyon, ang iyang mga igsoong lalaki mitudlo ug mibunyag og daghan niini nga mga Santos, nga sa walay pagduda milig-on sa iyang mga relasyon ngadto kanila.

Sa dihang miabut si Karl ug Johan sa Fort Ephraim kaniadtong 1858, misulay sila sa pag-uma, pero ang mga apan-apan midaut sa ilang mga tanom. Mas may kasinatian nga mga mamumuyo sama ni Augusta ug Henry nag-antus og susama nga mga hagit samtang nag-uma sa Walog sa Sanpete. Ang unang mga Santos kinsa miabut niini nga dapit miatubang og daghang katuigan sa makaguba nga bagtik nga mga yelo ug paghugpa sa mga insekto. Aron mabuhi, nagtipon sila og puyo sa duha ka kota, nag-uma sa samang umahan ug nakigbahin og palatubigan. Sa dihang maayo nga bunga sa katapusan miabut, gipuno nila ang ilang mga kamalig ug mitipig og ubang mga pagkaon.¹⁷

Sa ting-init sa 1859, nausab ang kinabuhi ni Augusta sa dihang mitawag si Brigham og daghang mga pamilya sa Sanpete sa pagpuyo duol sa daang pamuy-anan sa Spring Town, diin si Augusta sa makadiyot mipuyo sa una niyang pag-abut sa walog. Mibalhin didto si Augusta ug Henry sa wala magdugay nga panahon. Gisuta sa mga kalalakin-an ang usa ka dapit sa lungsod ug ang 640 ka akre [259 ka ektarya] alang sa pag-uma. Ang umahan dayon gibahin ngadto sa 2- ug 4-ka ektarya nga mga lote ug gibahin sa mga pamilya. Wala madugay mga balay, mga payag nga troso, ug usa ka meetinghouse nagbarug sa bag-ong pamuy-anan. Sa daghang mga Dane nga nagpuyo sa dapit ang mga lumulupyo miangga niini og Gamay nga Denmark.¹⁸

Human manimuyo sa Spring Town, misugod si Henry pagtukod og galingan. Samtang namutol ug nagguroy og mga kahoy sa bukid nianang tingtugnaw, natakbuyan siya og grabe nga sip-on ug sa wala madugay nahimong gahi nga ubo. Ang ubo nahimong hubak, naghimo ni Henry nga maglisud sa pagtrabaho. Walay mga doktor sa lungsod, busa gisulayan ni Augusta ang tanang tambal nga iyang makaplagan aron sa pagpagaan sa pagginhawa ni Henry. Walay nakaayo.¹⁹

Pagkahuman sa mga usa ka tuig mibalhin si Augusta ug Henry ngadto sa Spring Town, gitawag sa Unang Kapangulohan ang mga igsoong lalaki ni Augusta nga si Johan ug Carl sa pagbalik og mga misyon ngadto sa Scandinavia. Tungod kay ni usa sa igsoong lalaki ang adunay kwarta nga ikabiyahe, ang mga Santos sa Fort Ephraim ug Spring Town mihatag kanila og karomata, kabayo, ug laki nga asno.²⁰

---

Sa ting-init sa 1860, pipila ka bulan human ang magsoong lalaki nga Dorius milarga sa ilang mga misyon, gipapauli si George Q. Cannon gikan sa iyang misyon sa Silangan.²¹ Sulod sa milabay nga duha ka tuig, siya ug ang dugay nang kaalyado sa mga Santos nga si Thomas Kane nakamantala og daghang positibo nga mga artikulo mahitungod sa Simbahan diha sa mga pamantalaan ug nanghangyo alang sa Simbahan. Nakigtambayayong og maayo ni Karl Maeser ug sa ubang mga lider sa Simbahan, nalig-on usab ni George ang mga Santos sa New York, Boston, Philadelphia, ug sa uban nga silangang mga branch.²²

Apan ang opinyon sa publiko nagpabiling lig-on batok sa Simbahan. Usa ka bag-ong partido sa politika, ang mga Republican, bag-ong naporma aron sa pagtapos sa pagkaulipon ug sa daghan og asawa, nagsaway niini nga mga buhat ingon og “kaluha nga mga handumanan sa pagkaluog.”²³ Gilambigit sa mga Republican ang duha ka mga buhat tungod kay sayop nilang gihunahuna nga ang mga babaye gipugos ngadto sa dinaghang kaminyoon nga walay paagi sa pag-eskapo. Sa duha ka isyu, hinoon, ang pagkaulipon ang naghimo og mas dako nga kasamok sa nasud, naggiya sa mga katawhan, lakip ni George, sa pagtagna og usa ka nasudnong kalamidad.

“Walay tawo kinsa nahigugma og kagawasan ug libre ug dili higpit nga mga institusyon ang makasaksi niining mga butang nga dili mobati nga ang himaya sa atong nasud kusog nga nagkawala,” misulat si George ngadto ni Brigham Young. “Ang pagkaguba sa gobyerno sa Estados Unidos dili malikayan. Ang pangutana niini mao lamang ang panahon.”²⁴

Sa panahon sa iyang misyon, nakadawat usab si George og sulat mahitungod sa bag-ohay nga desisyon sa Unang Kapangulohan ug sa Korum sa Napulog Duha. Sa usa ka miting kaniadtong Oktubre 1859, misugyot si Brigham sa pagtawag og bag-ong apostol aron sa pagpuli ni Parley Pratt. Mihangyo siya sa Napulog Duha sa paghimo og mga rekomendasyon. “Bisan kinsa nga tawo nga magmatinud-anon makabaton og igo nga salabutan sa pagpalambo sa iyang calling,” misulti si Brigham ngadto sa Napulog Duha.

“Gusto ko nga mahibalo kon sa unsa nga baruganan ang mga lalaki pagapilion,” miingon si Orson Pratt, manghud nga lalaki ni Parley.

“Kon ang usa ka lalaki gisugyot ngari kanako nga maayo og kinaiyanhong paghukom, walay giangkon nga mas taas nga mga kwalipikasyon gawas sa pagkamatinud-anon ug pagkamapainubsanon igo sa paghangyo sa Ginoo alang sa tanan niyang kahibalo ug kinsa mosalig diha Kaniya alang sa iyang kalig-on,” mitubag si Brigham, “pilion ko siya kay sa may kahibalo ug talento.”

“Kon ang Ginoo motudlo og usa ka batang lalaki nga dose anyos ang panuigon, siya mao ang tawo nga kitang tanan andam sa pagpaluyo,” miingon si Orson. “Apan kon ako pasagdan sa akong kaugalingong paghukom sa pagpili, pilion ko ang usa ka lalaki nga may kasinatian kinsa nasulayan sa daghang mga dapit, matinud-anon, ug kugihan, ug usa ka lalaki nga may talento kinsa makadepensa sa Simbahan sa bisan unsa nga posisyon siya mahimong ibutang.”

Naminaw si Brigham samtang ang mga apostoles mirekomendar og daghang mga lalaki alang sa posisyon. “Akong ituboy si George Q. Cannon alang sa usa sa mga Napulog Duha,” siya dayon miingon. “Siya ligdong, apan ako dili maghunahuna nga himoon niya ang pagkaligdong nga mopugong sa iyang mga obligasyon sa pagbuhat sa iyang katungdanan.”²⁵

Ang call ni George gi-anunsyo diha sa tingpamulak nga kinatibuk-ang komperensya, samtang si George nangandam sa pagpauli. Nadawat niya ang pagkatudlo uban sa usa ka pagbati sa iyang kaugalingong kahuyang ug pagkadili takus. “Nangurog ako sa kahadlok ug kakuyaw,” misulat ang treynta anyos ang panuigon ngadto ni Brigham human dayon mahibalo sa call, “ug ang hingpit nga kalipay sa paghunahuna sa kamaayo ug kalooy sa Ginoo ug sa gugma ug pagsalig sa akong mga kaigsoonan.”²⁶

Samtang siya mibiyahe pauli human sa pipila ka bulan, giunhan og dali ni George ang pipila ka mga panon sa karomata ug duha ka mga panon sa kariton, nga iyang gi-organisar uban sa mga Santos gikan sa silangang mga branch, Uropa, ug Habagatang Aprika.²⁷

Naghunahuna sa trahedya sa kariton kaniadtong 1856, maalamong gipadala ni George ang katapusang panon sa kariton og una sa daghang nagsunod-sunod nga mga karomata. “Akong gipaningkamutan ang paghimo sa tanang posible nga mga lakang sa paglikay sa bisan unsa nga aksidente,” gipahibalo niya si Brigham, “ug sinserong nagsalig nga uban sa panalangin sa Ginoo silang tanan moabut sa ilang mga destinasyon nga luwas.”²⁸

---

Usa sa mga Santos nga nagbiyahe sa kasadpan kauban ni George niana nga panahon mao ang patriyarka sa Simbahan nga si John Smith. Si John miabut sa silangan sa hinapos sa 1859 aron sa pagsulay og makausa pa sa pagtabang sa iyang igsoong babaye nga si Lovina sa pagpundok sa iyang pamilya ngadto sa Utah. Samtang sila mihulat sa pagsugod sa panahon sa paglangyaw, siya ug si Lovina miduaw sa ilang mga paryente nga Smith sa Nauvoo, lakip ang ilang iyaan nga si Emma ug ang iyang mga anak.²⁹

Si Emma nangulo sa usa ka malinawon nga kinabuhi didto sa Nauvoo. Nagpuyo gihapon siya sa Mansion sa Nauvoo ug nanag-iya og kabtangan nga kanhi sa Simbahan, nga gihatag ni Joseph kaniya sa wala pa ang iyang kamatayon niadtong 1844. Iyang gipangalan ang yuta ngadto kaniya sa maayong kabubut-on, apan ang pipila sa nagpautang niya sa kadugayan mibungat niining kabtangan nga ibaligya aron mabayaran sila og usab, nagtuo nga giilad sila. Napakyas sila sa pagmatuod sa mga akosasyon. Ang maong butang nahapsay ra niadtong 1852 sa dihang ang huwes sa federal mipakanaog og balaod nga ang tanang yuta ni Joseph gihuptan isip trustee alang sa Simbahan agig subra sa napulo ka acre nga ibaligya para ibayad sa iyang utang. Isip biyuda ni Joseph, si Emma gigantihan sa ika-unom nga bahin sa halin, nga gigamit niya sa pagpalit og balik sa pipila ka yuta alang sa pagsuporta sa iyang pamilya.³⁰

Nakita ni John ug Lovina ang ilang mga paryente nga maayo apan nabahin sa mga butang kalabut sa relihiyon. Ang ilang ig-agaw nga si Julia naminyo og Katoliko ug nakabig ngadto sa relihiyon sa iyang bana. Ang upat ka mga anak nga lalaki ni Joseph ug Emma, hinoon, naghunahuna gihapon sa ilang mga kaugalingon nga Santos sa Ulahing mga Adlaw, bisan tuod ilang gisalikway ang pipila sa mga baruganan nga gitudlo sa ilang amahan didto sa Nauvoo, ilabi na ang dinaghang kaminyoon.³¹

Kini dili ikatingala ngadto ni John. Bisan tuod og nahibalo si Emma nga ang iyang bana sa pribadong paagi mitudlo ug mihimo sa dinaghang kaminyoon, ang iyang anak nga lalaki si Joseph Smith III mituo nga gipaila ni Brigham Young ang baruganan ngadto sa mga Santos human si propeta Joseph namatay. Sa dihang ang pamilya ni John mibiya sa Nauvoo sa 1848, misulay si John sa pagkumbinsir ni Joseph lll sa pag-adto sa kasadpan uban kaniya ug sa pagpadayon sa buhat sa ilang mga amahan. Hugot ang pagbalibad ni Joseph III.

“Kon imong gipasabut nga ako kinahanglan gayud mosuporta sa espiritwal nga pagpangasawa ug sa ubang mga institusyon nga gitukod sukad sa ilang mga kamatayon,” mitubag si Joseph III, “akong paniguroon og maayo nga ako ang mahimo nimong labing lawom nga migamot nga kaaway.”³²

Sulod sa daghang mga katuigan, nagpakita si Joseph III og gamay nga tinguha sa pagpangulo og usa ka simbahan. Apan sa pagka-Abril 6, 1860, human sa pagbisita ni John ug Lovina, si Joseph III ug Emma mitambong og usa ka komperensya sa usa ka “Bag-ong Organisasyon” sa mga Santos kinsa misalikway sa pagkapangulo ni Brigham Young ug mipabilin sa Midwest. Atol niana nga miting, si Joseph III midawat og pagkapangulo sa Bag-ong Organisasyon ug mipalayo sa iyang kaugalingon gikan sa mga Santos sa Utah pinaagi sa pagpanghimaraut sa dinaghang kaminyoon.³³

Pipila ka mga bulan human niana, mipadulong si John sa kasadpan uban ni Lovina ug sa iyang pamilya. Nagbiyahe uban sa ilang panon mao sila si Karl ug Ana Maeser. Wala maanad sa kinabuhi sa gansangon nga dalan-dalan, ang batan-ong maestro mihimo sa iyang labing maayo sa pagmaneho og panon sa mga baka, apan sa kadugayan misuhol og tigmaneho sa paghimo sa trabaho alang kaniya. Ang hutoy nga ubo midagsang sa mga bata diha sa panon sulod sa pila ka bahin sa ilang panaw, apan ang dalan-dalan walay panghitabo sa kasagaran sa panahon.³⁴

Sa Agosto 17, mga 160 ka milya [mga 256 ka kilometro] gikan sa Siyudad sa Salt Lake, ang katorse anyos ang panuigon nga anak nga lalaki ni Lovina, si Hyrum Walker, wala tuyoa napusil ang iyang kaugalingon diha sa bukton. Naglaum sa pagluwas sa kinabuhi sa iyang pag-umangkong lalaki, kon dili man sa iyang bukton, dali si John nga mibutang og laing tawo sa pagbantay sa panon, mibutang ni Hyrum sa usa ka karitela sa laki nga asno, ug gidali siya ug si Lovina pagdala og una ngadto sa walog.

Ang karitela sa laki nga asno miabut sa Siyudad sa Salt Lake human sa siyam ka adlaw, ug usa ka doktor ang nakahimo sa pagtahi sa bukton ni Hyrum. Uban sa iyang pag-umangkon nga lalaki nga luwas, mibalik si John ngadto sa iyang panon ug migiya kanila ngadto sa siyudad kaniadtong Septyembre 1.³⁵

---

Sa pagka-Nobyembre 4, 1860, si Wilford Woodruff miabi-abi og usa ka lalaki nga ginganlan og Walter Gibson balik ngadto sa Siyudad sa Salt Lake. Si Walter usa ka biyahedor sa kalibutan ug tigpanimpalad. Isip usa ka batan-ong lalaki, mibiyahe siya ngadto sa Mehiko ug Habagatang Amerika, milayag sa mga lawod, ug naka-eskapo sa bilanggoan sa Dutch diha sa isla sa Java.³⁶

Sumala ni Walter, nakadungog siya og tingog sa prisohan nag-aghat kaniya sa pagtukod og gamhanang gingharian diha sa Pasipiko. Sulod sa mga katuigan nangita siya og mga tawo aron sa pagtabang kaniya niini nga misyon, apan dili gayud niya makit-an ang husto nga grupo hangtud nga nadunggan niya ang mahitungod sa mga Santos sa Ulahing mga Adlaw. Sa pagka-Mayo 1859, misulat siya ngadto ni Brigham Young ug misugyot og plano sa pagpapundok sa Simbahan sa mga Isla sa Pasipiko. Mibiyahe siya ngadto sa Siyudad sa Salt Lake kauban sa iyang tulo ka anak human sa mubo nga panahon ug mipasakop sa Simbahan sa Enero 1860.³⁷

Giamigo ni Wilford si Walter nianang tingtugnaw, kasagaran nagtambong og mga lecture nga iyang gihatag sa iyang mga pagbiyahe o sa pakigkita kaniya sa mga sosyal nga mga panagtigum.³⁸ Walay interes si Brigham sa gisugyot ni Walter alang sa usa ka bag-ong pundokanan nga dapit, apan iyang naila ang potensyal sa bag-ong kinabig.³⁹ Ingon og daghang nahibaloan, maayong manulti, ug mahinamong moserbisyo sa Simbahan si Walter. Sa pagka-Abril 1860, ang Unang Kapangulohan mitawag kaniya og mubo nga misyon ngadto sa Silangan, nga malipayong gidawat ni Walter.⁴⁰

Karon, human sa unom ka bulan, mipauli si Walter ngadto sa Utah uban sa makapaukyab nga mga balita. Samtang didto sa Siyudad sa New York, iyang nasultihan ang usa ka opisyal sa embahada sa Hapon mahitungod sa mga Santos ug nakadawat og imbitasyon sa pag-adto sa Japan. Nagtuo nga makahimo siya og maayong relasyon ngadto sa mga Hapon, gusto ni Walter nga dawaton ang imbitasyon ug andamon ang paagi alang sa misyonaryo nga buhat niana nga yuta. Gikan didto, nagtuo siya, ang gipahiuli nga ebanghelyo mokaylap ngadto sa Siam ug sa ubang mga nasud diha sa rehiyon.

“Ako pagadumalaon, ingon nga ako gitudloan, sa hingpit pinaagi sa Espiritu sa Dios,” gisultihan niya ang mga Santos sa usa ka miting kaniadtong Nobyembre 18. “Akong gibati nga ako anaa sa panimalay uban sa tanang mga nasud sa mga kabataan sa tawhanong pamilya.”⁴¹

Ang purohan nga ipadala si Walter ngadto sa Asia nakapaukyab ni Wilford. “Ang Ginoo miabli sa pultahan sa iyang atubangan sa kahibulongang paagi,” iyang gisulat diha sa iyang journal.⁴²

Miuyon si Brigham. “Si Igsoong Gibson mobiya kanato karon aron sa pag-adto og misyon,” gisultihan niya ang mga Santos diha sa miting. “Kutob sa akong nahibaloan, mianhi siya dinhi tungod kay gigiyahan siya sa Ginoo dinhi.”⁴³

Sa pagkasunod adlaw, si Heber Kimball ug Brigham mipatong sa ilang mga kamot diha sa ulo ni Walter. “Tungod kay ang imong katuyoan usa ngadto sa himaya sa Dios, ug motawag diha sa Iyang ngalan, ug motinguha sa Iyang kaalam, ug motinguha nga magpaubos ug magmaaghup diha sa atubangan sa Ginoo, ug ang imong mata mohimo sa imong katuyoan alang sa kaayohan ug kahupayan sa mga katawhan,” mipahayag si Heber, “ikaw mapanalanginan og dako kaayo, ug ikaw mopundok sa balay ni Israel ug modala og daghan ngadto sa paghinulsol ug pagpabunyag ug mokumpirma diha kanila sa Espiritu Santo.”⁴⁴

Si Walter ug ang iyang anak nga babaye, si Talula, milarga sa Pasipiko human sa duha ka adlaw.⁴⁵

---

Usa ka bulan human mibiya si Walter, ang Habagatang Carolina, usa ka estado sa habagatang Estados Unidos, mibiya gikan sa nasud, nahadlok sa bag-ohay nga pagkapili ni Abraham Lincoln ngadto sa presidensya sa E.U. [Estados Unidos] mousab sa katimbangan sa gahum sa ekonomiya ug sa politika sa nasud ug mosangput ngadto sa paghunong sa pagkaulipon. Nakaila dayon si Wilford Woodruff sa makuyaw nga hitabo isip katumanan sa usa ka pagpadayag nga nadawat ni Joseph Smith beynte otso ka tuig ang milabay. Sa Adlaw sa Pasko 1832, mipahimangno ang Ginoo sa propeta nga usa ka rebelyon sa dili madugay mosugod sa Habagatang Carolina ug motapos sa kamatayon ug pagkaalaot sa daghang mga tawo.⁴⁶

“Uban sa espada ug pinaagi sa pagpaagas sa dugo ang mga lumulupyo sa yuta magbangutan,” mipahayag ang Ginoo, “ug uban sa gutom, ug sa sakit, ug sa linog, ug sa dugdog sa langit, ug sa mabangis ug masiga nga kilat usab, mohimo diin ang mga lumulupyo sa yuta mahimo nga mobati sa kasuko, ug kaligutgut, ug sa mapantunong mga kamot sa Makagagahum nga Dios, hangtud sa gikatakda nga hingpit nga kalaglagan sa tanan nga mga nasud.”⁴⁷

“Mahimo kitang mangandam sa atong mga kaugalingon alang sa makalilisang nga panahon sa Estados Unidos,” misulat si Wilford sa iyang journal kaniadtong Enero 1, 1861. “Ang sinulat sa kamot nakita diha sa bongbong, ug ang atong nasud gipahamtangan og hukom ngadto sa kalaglagan.”⁴⁸