ສັດທາ, ຄວາມອົດທົນ, ຄວາມເພິ່ງພໍໃຈ: ຂ່າວສານຕໍ່ພໍ່ແມ່ຜູ້ລ້ຽງລູກດ້ວຍຕົວຄົນດຽວ
ໂດຍ ແອວເດີ ເດວິດ ແອັສ ແບ໊ກສເຕີ
ແຫ່ງສາວົກເຈັດສິບ
ທ່ານໄດ້ພະຍາຍາມລ້ຽງດູລູກໆໃນຄວາມຊອບທຳ ແລະ ຄວາມຈິງ, ໂດຍທີ່ຮູ້ວ່າ ທ່ານບໍ່ສາມາດປ່ຽນອາດີດ, ແຕ່ທ່ານສາມາດຫລໍ່ຫລອມອະນາຄົດໄດ້.
ຂ່າວສານຂອງຂ້າພະເຈົ້າແມ່ນສຳລັບພໍ່ແມ່ໃນສາດສະໜາຈັກຜູ້ລ້ຽງລູກດ້ວຍຕົວຄົນດຽວ, ຊຶ່ງສ່ວນຫລາຍເປັນແມ່—ທ່ານຜູ້ເປັນສະຕີທີ່ກ້າຫານ ຜູ້ຊຶ່ງຜ່ານຜ່າສະພາບການຫລາຍຢ່າງຂອງຊີວິດ, ພົບເຫັນຕົນເອງລ້ຽງລູກ ແລະ ດູແລບ້ານເຮືອນດ້ວຍຕົວຄົນດຽວ. ບາງທີທ່ານເປັນແມ່ໝ້າຍ ຫລື ແມ່ຮ້າງ. ທ່ານອາດປະເຊີນກັບການທ້າທາຍຂອງການເປັນແມ່ຜູ້ລ້ຽງລູກດ້ວຍຕົວຄົນດຽວເນື່ອງມາຈາກການເດີນໄປໃນທາງຜິດນອກການແຕ່ງງານ, ແຕ່ຕອນນີ້ທ່ານໄດ້ມາຫາພຣະກິດຕິຄຸນແລ້ວ, ໂດຍໄດ້ປ່ຽນແປງຊີວິດ. ທ່ານໄດ້ຮັບພອນແລ້ວ ທີ່ໄດ້ຫລີກເວັ້ນຈາກການມີເພື່ອນເຊັ່ນນັ້ນ ອັນທີ່ທຳລາຍຄຸນງາມຄວາມດີ ແລະ ການເປັນສານຸສິດ. ມັນເປັນຄວາມສູນເສຍອັນຍິ່ງໃຫຍ່.
ເຖິງແມ່ນວ່າບາງເທື່ອທ່ານຈະຖາມວ່າ, “ເປັນຫຍັງຈຶ່ງເປັນເຮົາ? ຄວາມຫຍຸ້ງຍາກນີ້ແຫລະທີ່ຊ່ອຍເຫລືອເຮົາໃຫ້ເຕີບໂຕໄປສູ່ການເປັນເໝືອນດັ່ງພຣະເຈົ້າ ເມື່ອເຮົາຖືກຫລໍ່ຫລອມຢູ່ໃນອ່າງແຫ່ງຄວາມທຸກທໍລະມານ, ເມື່ອເຫດການໃນຊີວິດເກີດຂຶ້ນ ໃນຂະນະທີ່ພຣະເຈົ້າໃຫ້ໂອກາດມະນຸດໃຊ້ອຳເພີໃຈ. ດັ່ງທີ່ແອວເດີ ນຽວ ເອ ແມ໊ກສະແວວ ໄດ້ກ່າວໄປນັ້ນ, ເຮົາບໍ່ສາມາດເຮັດທຸກສິ່ງທຸກຢ່າງໄດ້ ຫລື ສົມເລກທັງປວງເຂົ້າກັນ ເພາະວ່າ “ເຮົາບໍ່ມີເລກທັງໝົດ.”1
ບໍ່ວ່າສະພາບການ ຫລື ເຫດຜົນຂອງທ່ານຈະເປັນແນວໃດກໍຕາມ, ທ່ານເປັນຄົນດີແທ້ໆ. ທຸກມື້ທ່ານຈະປະເຊີນກັບບັນຫາໃນຊີວິດ, ເຮັດໜ້າທີ່ສຳລັບສອງຄົນທີ່ຈະເຮັດ. ທ່ານຕ້ອງໄດ້ເປັນພໍ່ ແລະ ເປັນແມ່ນຳອີກ. ທ່ານເຮັດທຸກສິ່ງໃນບ້ານ, ເບິ່ງແຍງຄອບຄົວ, ບາງເທື່ອກໍຂາດເຂີດເລື່ອງການເງິນ, ແລະ ດ້ວຍຄວາມອັດສະຈັນໃຈ ທ່ານຍັງມີເວລາພໍທີ່ຈະຊ່ອຍຮັບໃຊ້ ຢູ່ໃນໂບດອີກໃນວິທີທາງທີ່ສຳຄັນ. ທ່ານບຳລຸງລ້ຽງລູກໆຂອງທ່ານ. ທ່ານຮ້ອງໄຫ້ ແລະ ອະທິຖານກັບເຂົາ ແລະ ເພື່ອເຂົາ. ທ່ານຢາກໃຫ້ເຂົາມີຊີວິດທີ່ດີທີ່ສຸດ, ແຕ່ເປັນຫ່ວງທຸກຄືນ ຢ້ານວ່າທ່ານເຮັດບໍ່ດີພໍ.
ໃນຂະນະທີ່ບໍ່ຢາກໃຫ້ເລື່ອງນີ້ເປັນເລື່ອງສ່ວນຕົວ, ຂ້າພະເຈົ້າຂໍບອກວ່າ ຂ້າພະເຈົ້າກໍມາຈາກຄອບຄົວເຊັ່ນນັ້ນ. ເພາະຕອນຂ້າພະເຈົ້າຍັງນ້ອຍ ແລະ ຕອນເປັນໄວລຸ້ນ, ແມ່ຂອງຂ້າພະເຈົ້າໄດ້ລ້ຽງລູກດ້ວຍຕົວຄົນດຽວ ໃນສະພາບທີ່ທຸກຍາກລຳບາກ. ຕ້ອງໄດ້ປະຢັດເງິນແທ້ໆ. ເພິ່ນໄດ້ປະເຊີນກັບຄວາມເປົ່າປ່ຽວດຽວດາຍ, ບາງເທື່ອໝົດຫວັງທີ່ຈະລ້ຽງດູລູກ ແລະ ບໍ່ມີຄູ່ຄອງ. ເຖິງແມ່ນເປັນເຊັ່ນນັ້ນ, ແຕ່ເພິ່ນຍັງເປັນແມ່ທີ່ມີສັກສີ, ມີຄວາມຕັ້ງໃຈ ແລະ ເປັນຫີນອັນແຂງແກ່ນຂອງປະເທດສະກ໊ອດ.
ໂຊກດີທີ່ເພິ່ນໄດ້ຮັບພອນໃນຕອນເຖົ້າແກ່ຫລາຍກວ່າຕອນເປັນໜຸ່ມ. ເພິ່ນໄດ້ແຕ່ງງານກັບພໍ່ໝ້າຍຄົນໜຶ່ງຜູ້ໄດ້ປ່ຽນໃຈເຫລື້ອມໃສ; ເຂົາເຈົ້າໄດ້ຜະນຶກເຂົ້າກັນຢູ່ພຣະວິຫານລອນດອນ ອັງກິດ ແລະ ຕໍ່ມາໄດ້ເປັນພະນັກງານຢູ່ໃນພຣະວິຫານນັ້ນ. ເຂົາເຈົ້າໄດ້ໃຊ້ຊີວິດນຳກັນເກືອບເຖິງຊາວຫ້າປີ—ມີຄວາມສຸກ, ເພິ່ງພໍໃຈ, ແລະ ມີທຸກຢ່າງຈົນກວ່າໄດ້ຈາກໂລກນີ້ໄປ.
ມີສະຕີຫລາຍຄົນທີ່ດີເລີດຢູ່ໃນສາດສະໜາຈັກຕະຫລອດທົ່ວໂລກ ຜູ້ໄດ້ປະເຊີນກັບສະພາບການທີ່ຄ້າຍຄືກັນນີ້ ແລະ ຜູ້ໄດ້ສະແດງຄວາມສາມາດປີແລ້ວປີເລົ່າ.
ນີ້ບໍ່ໄດ້ເປັນສິ່ງທີ່ທ່ານຫວັງ ແລະ ວາງແຜນ, ອະທິຖານ ຫລື ຄາດໝາຍເມື່ອທ່ານໄດ້ເລີ່ມຕົ້ນຫລາຍປີກ່ອນ. ເສັ້ນທາງຊີວິດຂອງທ່ານຈະມີບ່ອນຫລຸບໂນນ, ທາງອ້ອມ, ທາງຄົດ, ແລະ ທາງລ້ຽວ, ສ່ວນຫລາຍແລ້ວ ເປັນເພາະສາເຫດຂອງຊີວິດຢູ່ໃນໂລກທີ່ເສື່ອມໂຊມລົງ ຊຶ່ງເປັນບ່ອນພິສູດ ແລະ ທົດສອບທ່ານ.
ໃນຂະນະດຽວກັນ, ທ່ານໄດ້ພະຍາຍາມລ້ຽງດູລູກໆໃນຄວາມຊອບທຳ ແລະ ຄວາມຈິງ, ໂດຍທີ່ຮູ້ວ່າ ທ່ານບໍ່ສາມາດປ່ຽນອາດີດ, ແຕ່ທ່ານສາມາດຫລໍ່ຫລອມອະນາຄົດໄດ້. ໃນເສັ້ນທາງນັ້ນ ທ່ານຈະໄດ້ຮັບພອນທົດແທນ, ເຖິງແມ່ນຈະບໍ່ໄດ້ຮັບໃນທັນທີທັນໃດກໍຕາມ.
ດ້ວຍຄວາມຊ່ອຍເຫລືອຂອງພຣະເຈົ້າ, ທ່ານບໍ່ຕ້ອງຢ້ານເລື່ອງອະນາຄົດ. ລູກໆຂອງທ່ານຈະເຕີບໂຕຂຶ້ນ ແລະ ກ່າວວ່າທ່ານເປັນພອນແກ່ເຂົາ, ແລະ ຄວາມສຳເລັດຜົນທັງຫລາຍໃນຊີວິດຂອງເຂົາ, ເຂົາຈະກ່າວສັນລະເສີນທ່ານ.
ຢ່າຮູ້ສຶກວ່າທ່ານເປັນຄົນໜ້ອຍໜ້າ, ຫລື ເປັນພາກສ່ວນນ້ອຍໃນສາດສະໜາຈັກ, ຫລື ຄິດວ່າຕົນເອງມີສິດໄດ້ຮັບພອນຂອງພຣະຜູ້ເປັນເຈົ້າໜ້ອຍກວ່າຄົນອື່ນ. ໃນອານາຈັກຂອງພຣະເຈົ້າ ບໍ່ມີຄົນໃດທີ່ໜ້ອຍໜ້າໄປກວ່າຄົນອື່ນ.
ພວກເຮົາຫວັງວ່າ ເມື່ອທ່ານໄປຮ່ວມປະຊຸມໂບດ ແລະ ເຫັນຄອບຄົວອື່ນທີ່ສົມບູນ ແລະ ມີຄວາມສຸກ ຫລື ໄດ້ຍິນບາງຄົນເວົ້າເລື່ອງຄອບຄົວ, ໃຫ້ທ່ານມີຄວາມພາກພູມໃຈເດີ້ທີ່ໄດ້ເປັນສະມາຊິກຂອງສາດສະໜາຈັກ ທີ່ສາດສະໜາຈັກເອົາໃຈໃສ່ເລື່ອງຄອບຄົວ ສອນບົດບາດຂອງແຜນຂອງພຣະບິດາເທິງສະຫວັນສຳລັບຄວາມສຸກຂອງລູກໆຂອງພຣະອົງ; ວ່າໃນທ່າມກາງຄວາມຫຍຸ້ງເຫຍີງ ແລະ ຄວາມເສື່ອມໂຊມເລື່ອງສິນທຳ, ເຮົາຍັງມີຄຳສອນ, ສິດອຳນາດ, ພິທີການ, ແລະ ພັນທະສັນຍາ ທີ່ໃຫ້ຄວາມຫວັງແກ່ໂລກ, ແກ່ຄວາມຜາສຸກໃນອະນາຄົດຂອງລູກໆຂອງທ່ານ ແລະ ຄອບຄົວທີ່ເຂົາຈະມີໃນພາຍໜ້າ.
ໃນກອງປະຊຸມສະມາຄົມສະຕີສົງເຄາະສາມັນ ເດືອນກັນຍາ ປີ 2006, ປະທານກໍດອນ ບີ ຮິງລີ ໄດ້ກ່າວເຖິງປະສົບການໜຶ່ງ ຈາກແມ່ຄົນໜຶ່ງທີ່ລ້ຽງລູກເຈັດຄົນ ອາຍຸ 7 ຫາ 16 ປີດ້ວຍຕົວຄົນດຽວ. ນາງໄດ້ເອົາບາງສິ່ງໄປໃຫ້ຄົນຂ້າງບ້ານ. ນາງເວົ້າວ່າ:
“ໃນຂະນະທີ່ຂ້າພະເຈົ້າຍ່າງກັບບ້ານ, ຂ້າພະເຈົ້າເຫັນໄຟຢູ່ບ້ານສະຫວ່າງສະໄຫວ. ຂ້າພະເຈົ້າໄດ້ຍິນສຽງລູກໆດັງກ້ອງຢູ່ໃນຫູ ໃນຂະນະທີ່ຂ້າພະເຈົ້າຍ່າງອອກຈາກເຮືອນວ່າ: ‘ແມ່, ມື້ແລງນີ້ພວກເຮົາຊິກິນຫຍັງ?’ ‘ແມ່ພາລູກໄປຫໍສະໝຸດໄດ້ບໍ່?’ ‘ລູກຕ້ອງຊື້ກະດາດໂປສະເຕີຄືນນີ້.’ ຂ້າພະເຈົ້າໄດ້ຫລຽວເບິ່ງບ້ານຫລັງນັ້ນດ້ວຍຄວາມເມື່ອຍອ່ອນ ແລະ ເຫັນແສງໄຟໃນແຕ່ລະຫ້ອງ. ຂ້າພະເຈົ້າໄດ້ນຶກເຖິງລູກທຸກຄົນຜູ້ກຳລັງຄອຍຖ້າຂ້າພະເຈົ້າກັບໄປເພື່ອຈັດຫາສິ່ງທີ່ພວກເຂົາຕ້ອງການ. ຂ້າພະເຈົ້າຮູ້ສຶກວ່າມີພາລະໜັກໜ່ວງເກີນກວ່າຈະແບກຫາບໄດ້.
“ຂ້າພະເຈົ້າຈື່ໄດ້ວ່າ ໄດ້ຫລຽວຂຶ້ນທ້ອງຟ້າສະຫວັນດ້ວຍນ້ຳຕາ ແລະ ກ່າວວ່າ, ‘ໂອ້ ພຣະບິດາເອີຍ, ລູກເຮັດບໍ່ໄດ້ຄືນນີ້, ລູກເມື່ອຍຫລາຍ. ລູກຮັບບໍ່ໄຫວແລ້ວ. ລູກບໍ່ສາມາດກັບບ້ານໄປດູແລລູກໆຄົນດຽວໄດ້. ຂໍໃຫ້ລູກໄປຫາພຣະອົງ ແລະ ຢູ່ກັບພຣະອົງຈັກຄືນໜຶ່ງໄດ້ບໍ່? …’
“ຂ້າພະເຈົ້າບໍ່ໄດ້ຍິນຄຳຕອບເປັນສຽງ, ແຕ່ໄດ້ຍິນຢູ່ໃນໃຈວ່າ: ‘ບໍ່ໄດ້, ລູກຮັກ, ລູກຈະກັບມາຫາພໍ່ຕອນນີ້ບໍ່ໄດ້. … ແຕ່ພໍ່ຈະມາຫາລູກ.’”2
ຂອບໃຈຫລາຍໆເດີ້, ເອື້ອຍນ້ອງທັງຫລາຍ, ສຳລັບທຸກສິ່ງທີ່ທ່ານໄດ້ເຮັດເພື່ອລ້ຽງດູຄອບຄົວ ແລະ ເຮັດໃຫ້ບ້ານເຮືອນເຕັມໄປດ້ວຍຄວາມຮັກ ບ່ອນທີ່ມີຄວາມດີ, ສັນຕິສຸກ, ແລະ ໂອກາດ.
ເຖິງແມ່ນວ່າທ່ານຈະຮູ້ສຶກເປົ່າປ່ຽວດຽວດາຍເລື້ອຍໆ, ແຕ່ຄວາມຈິງແລ້ວ ທ່ານບໍ່ໄດ້ຢູ່ຕາມລຳພັງຈັກເທື່ອ ເມື່ອທ່ານເດີນໄປດ້ວຍຄວາມອົດທົນ ແລະ ດ້ວຍສັດທາ, ພຣະເຈົ້າຈະສະຖິດຢູ່ນຳທ່ານ; ສະຫວັນຈະປະທານພອນທີ່ຈຳເປັນໃຫ້ທ່ານ.
ທັດສະນະ ແລະ ພາບຂອງຊີວິດຈະປ່ຽນໄປ, ແທນທີ່ຈະຖືກໂຍນລົງ, ແຕ່ທ່ານຈະຫລຽວຂຶ້ນ.
ຫລາຍຄົນພວກທ່ານກໍໄດ້ພົບເຫັນຄວາມຈິງອັນຍິ່ງໃຫຍ່ ແລະ ປ່ຽນແປງນີ້ແລ້ວ ເມື່ອທ່ານໃຊ້ຊີວິດໃນການແບ່ງເບົາພາລະຂອງຄົນອື່ນ, ແລ້ວພາລະຂອງທ່ານກໍຈະເບົາບາງລົງ. ເຖິງແມ່ນວ່າ ສະພາບການອາດບໍ່ປ່ຽນແປງ, ແຕ່ຄຸນສົມບັດຂອງທ່ານຈະປ່ຽນແປງ. ທ່ານຈະສາມາດປະເຊີນກັບບັນຫາ ແລະ ຍອມຮັບເອົາມັນ, ເຂົ້າໃຈ, ແລະ ມີຄວາມກະຕັນຍູອັນເລິກຊຶ້ງຕໍ່ສິ່ງທີ່ທ່ານມີ, ແທນທີ່ຈະເຫັນແຕ່ຄວາມຂາດຕົກບົກພ່ອງຂອງຕົນ.
ທ່ານໄດ້ພົບເຫັນວ່າ ເມື່ອທ່ານເອື້ອມອອກໄປຊ່ອຍເຫລືອຄົນທີ່ຂັດສົນ, ແລ້ວບັນຫາຂອງທ່ານກໍຈະໄດ້ຮັບຄວາມຊ່ອຍເຫລືອຄືກັນ; ຈອກຂອງທ່ານຈະ “ລົ້ນ” (ເພງສັນລະເສີນ 23:5).
ໂດຍການດຳລົງຊີວິດຢ່າງຊອບທຳ, ທ່ານ ແລະ ລູກໆຂອງທ່ານຈະໄດ້ຮັບພອນຂອງການເປັນພາກສ່ວນໜຶ່ງໃນຄອບຄົວນິລັນດອນໃນມື້ໜຶ່ງ.
ສະມາຊິກ ແລະ ຜູ້ນຳທັງຫລາຍ, ມີສິ່ງອື່ນອີກບໍ່ທີ່ທ່ານສາມາດຊ່ອຍເຫລືອພໍ່ແມ່ຜູ້ລ້ຽງລູກດ້ວຍຕົວຄົນດຽວ ໂດຍປາດສະຈາກການຕັດສິນ ຫລື ການກ່າວຫາ? ທ່ານຈະເປັນຜູ້ປຶກສາໃຫ້ຄົນໜຸ່ມໄດ້ບໍໃນຄອບຄົວດັ່ງກ່າວ, ໂດຍສະເພາະຊ່ອຍໃຫ້ຊາຍໜຸ່ມເຫັນຕົວຢ່າງເຖິງສິ່ງທີ່ຊາຍທີ່ດີເຮັດ ແລະ ວິທີທີ່ຊາຍທີ່ດີດຳລົງຊີວິດ? ໃນບ້ານທີ່ບໍ່ມີພໍ່, ທ່ານໄດ້ເປັນແບບຢ່າງທີ່ດີພໍແລ້ວບໍເພື່ອໃຫ້ເຂົາເຮັດຕາມ?
ແນ່ນອນ, ຈະມີຄອບຄົວທີ່ພໍ່ເປັນຜູ້ລ້ຽງລູກດ້ວຍຕົວຄົນດຽວ. ອ້າຍນ້ອງທັງຫລາຍ, ພວກເຮົາກໍໄດ້ອະທິຖານເພື່ອທ່ານຄືກັນ. ຂ່າວສານນີ້ກໍແມ່ນສຳລັບທ່ານດ້ວຍ.
ພໍ່ແມ່ຜູ້ລ້ຽງລູກດ້ວຍຕົນເອງທັງຫລາຍ, ຂ້າພະເຈົ້າຂໍເປັນພະຍານວ່າ ເມື່ອທ່ານໄດ້ເຮັດຈົນສຸດຄວາມສາມາດຂອງທ່ານແລ້ວ ກັບການທ້າທາຍອັນຫຍຸ້ງຍາກທີ່ສຸດ, ແລ້ວສະຫວັນຈະຍິ້ມໃຫ້ທ່ານ. ທ່ານບໍ່ໄດ້ຢູ່ຕາມລຳພັງ. ຂໍໃຫ້ການໄຖ່, ອຳນາດແຫ່ງຄວາມຮັກຂອງພຣະເຢຊູຄຣິດຈົ່ງເຍືອງທາງຊີວິດຂອງທ່ານໃນຕອນນີ້ ແລະ ເຮັດໃຫ້ທ່ານເຕັມໄປດ້ວຍຄວາມຫວັງກັບຄຳສັນຍານິລັນດອນ. ຈົ່ງກ້າຫານ. ຈົ່ງມີສັດທາ ແລະ ຄວາມຫວັງ. ຈົ່ງອົດທົນກັບປະຈຸບັນ ແລະ ເບິ່ງອະນາຄົດດ້ວຍຄວາມໝັ້ນໃຈ. ໃນພຣະນາມຂອງພຣະເຢຊູຄຣິດ, ອາແມນ.