ຖານະປະໂລຫິດແຫ່ງອາໂຣນ: ຈົ່ງຢືນຂຶ້ນ ແລະ ໃຊ້ອຳນາດຂອງພຣະເຈົ້າ
ໂດຍ ເອດະຣຽນ ໂອໂຈອາ
ທີ່ປຶກສາທີສອງໃນຝ່າຍປະທານອົງການຊາຍໜຸ່ມສາມັນ
ຈຳເປັນຕ້ອງໃຊ້ຖານະປະໂລຫິດ ເພື່ອຈະມີຜົນສຳເລັດໃນສິ່ງໃດກໍຕາມທີ່ດີ. ເຈົ້າຖືກເອີ້ນໃຫ້ລຸກຂຶ້ນ ແລະ ສ່ອງອອກໄປ, ຢ່າຫລົບຊ້ອນແສງໄຟຂອງເຈົ້າໃນຄວາມມືດມົວ.
ບໍ່ດົນມານີ້ຂ້າພະເຈົ້າໄປປະເທດອາຟຣິກາໃຕ້ໄດ້ຢ້ຽມຢາມຄອບຄົວໜຶ່ງນຳທາບິໂສ, ຜູ້ເປັນຜູ້ຊ່ອຍທີໜຶ່ງ ໃນກຸ່ມປະໂລຫິດຂອງຫວອດຄາກິໂສ. ທາບິໂສ ແລະ ອະທິການຂອງລາວ, ຜູ້ທີ່ຖືຂໍກະແຈ ແລະ ຜູ້ເປັນປະທານໃນກຸ່ມນັ້ນ, ໄດ້ອະທິຖານເພື່ອສະມາຊິກໃນກຸ່ມທີ່ບໍ່ເຂັ້ມແຂງປານໃດ, ສະແຫວງຫາ ການດົນໃຈວ່າຜູ້ໃດທີ່ເຂົາເຈົ້າຄວນຢ້ຽມຢາມ ແລະ ຊ່ອຍເຫລືອ. ເຂົາເຈົ້າໄດ້ຮັບການກະຕຸ້ນໃຫ້ໄປຢ້ຽມຢາມບ້ານຂອງເທເບໂລ, ແລະ ເຂົາເຈົ້າໄດ້ເຊີນຂ້າພະເຈົ້າໄປນຳ.
ເມື່ອເຮົາຜ່ານກາຍໝາເຝົ້າບ້ານໄດ້ແລ້ວ, ເຮົາໄດ້ພົບນຳເທເບໂລຢູ່ຫ້ອງຮັບແຂກ. ລາວເປັນຊາຍໜຸ່ມ ທີ່ໃຈເຢັນແຕ່ເຊົາໄປໂບດຍ້ອນວ່າມີຫລາຍສິ່ງຫລາຍຢ່າງທີ່ຕ້ອງເຮັດໃນວັນອາທິດ. ລາວຕື່ນເຕັ້ນແຕ່ກໍດີໃຈທີ່ເຮົາໄດ້ໄປຢ້ຽມຢາມລາວ ແລະ ກໍໄດ້ເຊື້ອເຊີນຄອບຄົວຂອງລາວຮ່ວມນຳລາວ. ອະທິການໄດ້ສະແດງຄວາມຮັກຕໍ່ຄອບຄົວ ແລະ ຄວາມປາຖະໜາທີ່ຈະຊ່ອຍເຫລືອເຂົາເຈົ້າໃຫ້ກາຍເປັນຄອບຄົວ ນິລັນດອນ ໂດຍການຜະນຶກໃນພຣະວິຫານ. ເຂົາເຈົ້າມີຄວາມປະທັບໃຈ ແລະ ພວກເຮົາຮູ້ສຶກເຖິງອິດທິພົນອັນເຂັ້ມແຂງແຫ່ງພຣະວິນຍານບໍລິສຸດນຳພາທຸກໆຄຳເວົ້າ ແລະ ຄວາມຮູ້ສຶກ.
ແຕ່ວ່າຄຳເວົ້າຂອງ ທາບິໂສ ນັ້ນເອງທີ່ເຮັດໃຫ້ການຢ້ຽມຢາມນີ້ພິເສດ. ສຳລັບຂ້າພະເຈົ້າແລ້ວ, ເບິ່ງຄືວ່າປະໂລຫິດໜຸ່ມຜູ້ນີ້ ປາກເວົ້າໃນພາສາຂອງທູດສະຫວັນ. ຄຳເວົ້າທີ່ເຕັມໄປດ້ວຍຄວາມຮັກທີ່ເຮົາທຸກຄົນສາມາດເຂົ້າໃຈ ແລະ ມັນປະທັບໃຈເພື່ອນຂອງລາວເປັນພິເສດ. ລາວເວົ້າວ່າ, “ຂ້ອຍມັກເວົ້າລົມນຳເຈົ້າຫລາຍຕອນຢູ່ໂບດ. ເຈົ້າເວົ້າດີນຳຂ້ອຍ. ແລະ ເຈົ້າຮູ້ບໍ, ທີມເຕະບານ ຂອງເຮົາຫລິ້ນບໍ່ເກັ່ງເພາະບໍ່ມີເຈົ້າ. ເຈົ້າຫລິ້ນເກັ່ງຫລາຍແທ້ໆ.”
ເທເບໂລຕອບຄືນວ່າ, “ຂ້ອຍເສຍໃຈ. ຂ້ອຍຈະກັບໄປໂບດອີກ.”
ທາບິໂສໄດ້ເວົ້າອີກວ່າ, “ດີຫລາຍ. ແລະ ເຈົ້າຈື່ໄດ້ບໍເຮົາໄດ້ຮຽນວິທີທີ່ເຮົາຈະຕຽມຕົວເພື່ອຈະຮັບໃຊ້ເປັນຜູ້ສອນສາດສະໜາ? ເຮົາຈະເລີ່ມເຮັດແບບນັ້ນອີກບໍ?”
ເທເບໂລຕອບວ່າ, “ເອີ, ຂ້ອຍຢາກກັບຄືນໄປໂບດ.”
ບາງທີ່ຄວາມສຸກອັນຍິ່ງໃຫຍ່ທີ່ຂ້າພະເຈົ້າໄດ້ປະສົບຕອນເປັນທີ່ປຶກສາໃນຝ່າຍປະທານຊາຍໜຸ່ມທົ່ວໄປ ແມ່ນການໄດ້ເຫັນຜູ້ດຳລົງຖານະປະໂລຫິດແຫ່ງອາໂຣນຢູ່ທົ່ວໂລກໃຊ້ອຳນາດຂອງຖານະປະໂລຫິດແຫ່ງອາໂຣນ. ແຕ່ບາງຄັ້ງຂ້າພະເຈົ້າກໍໄດ້ເປັນພະຍານດ້ວຍຈິດໃຈອັນໂສກເສົ້າທີ່ຊາຍໜຸ່ມຫລາຍໆຄົນບໍ່ ເຂົ້າໃຈວ່າເຂົາສາມາດເຮັດສິ່ງດີໄດ້ຫລາຍຂະໜາດໃດນຳອຳນາດທີ່ເຂົາດຳລົງຢູ່.
ຖານະປະໂລຫິດແມ່ນອຳນາດ ແລະ ສິດອຳນາດຂອງພຣະເຈົ້າ ເພື່ອປະຕິບັດໃນການຮັບໃຊ້ລູກໆຂອງ ພຣະອົງ. ໂອ້, ຈະວິເສດຫລາຍແທ້ໆຖ້າຊາຍໜຸ່ມທຸກຄົນ, ຜູ້ດຳລົງຖານະປະໂລຫິດແຫ່ງອາໂຣນທຸກໆຄົນ, ຈະສາມາດເຂົ້າໃຈຢ່າງແທ້ໆວ່າຖານະປະໂລຫິດຂອງເຂົາມີຂໍກະແຈແຫ່ງການປະຕິບັດຂອງທູດສະຫັວນ. ຈະດີເລີດຫລາຍຖ້າເຂົາຈະເຂົ້າໃຈວ່າເຂົາມີໜ້າທີ່ອັນສັກສິດເພື່ອຈະຊ່ອຍເຫລືອເພື່ອນຂອງເຂົາພົບເສັ້ນທາງທີ່ໄປສູ່ພຣະຜູ້ຊ່ອຍໃຫ້ລອດ. ຈະດີເລີດຫລາຍຖ້າເຂົາຮູ້ວ່າພຣະບິດາຈະມອບອຳນາດໃຫ້ເຂົາອະທິບາຍເຖິງຄວາມຈິງຂອງພຣະກິດຕິຄຸນທີ່ໄດ້ຖືກຟື້ນຟູຄືນມາໃໝ່ຢ່າງແຈ່ມແຈ້ງ ແລະ ຈິງໃຈຈົນຄົນອື່ນຈະບໍ່ສາມາດປະຕິເສດເຖິງຄວາມສົມບູນຂອງພຣະຄຳຂອງພຣະຄຣິດໄດ້.
ຊາຍໜຸ່ມທີ່ແສນຮັກຂອງສາດສະໜາຈັກ, ຂ້າພະເຈົ້າຂໍຖາມເຈົ້າຄຳຖາມຊຶ່ງຂ້າພຣະເຈົ້າຫວັງວ່າເຈົ້າຈະ ຝັງມັນໄວ້ໃນຈິດໃຈຂອງເຈົ້າຕະຫລອດຊີວິດຂອງເຈົ້າ. ຈະມີອຳນາດໃດທີ່ເຈົ້າຈະສາມາດມີໄດ້ທີ່ຍິ່ງໃຫຍ່ ໄປກວ່າຖານະປະໂລຫິດຂອງພຣະເຈົ້າບໍ? ມີອຳນາດໃດແດ່ຈະສາມາດຍິ່ງໃຫຍ່ກວ່າຄວາມສາມາດທີ່ຈະຊ່ອຍເຫລືອພຣະບິດາເທິງສະຫວັນຂອງເຮົາໃນການປ່ຽນແປງຊີວິດຂອງມະນຸດຮ່ວມຊາດຂອງເຈົ້າ, ເພື່ອຈະຊ່ອຍເຂົາໄປໃນເສັ້ນທາງແຫ່ງຄວາມສຸກອັນນິລັນດອນ ໂດຍການຊຳລະລ້າງຈາກບາບ ແລະ ຄວາມຜິດບໍ?
ເຊັ່ນດຽວກັນກັບອຳນາດອື່ນໆ, ຈຳເປັນຕ້ອງໃຊ້ຖານະປະໂລຫິດ ເພື່ອຈະມີຜົນສຳເລັດໃນສິ່ງໃດກໍຕາມທີ່ດີ. ເຈົ້າຖືກເອີ້ນໃຫ້ລຸກຂຶ້ນ ແລະ ສ່ອງອອກໄປ (ເບິ່ງ D&C 115:5), ຢ່າຫລົບຊ້ອນແສງໄຟຂອງເຈົ້າ ໃນຄວາມມືດມົວ. ມີແຕ່ຜູ້ທີ່ກ້າຫານເທົ່ານັ້ນຈະຮ່ວມຢູ່ນຳທ່າມກາງຜູ້ຖືກເລືອກ. ເມື່ອເຈົ້າໃຊ້ອຳນາດອັນ ສັກສິດຂອງຖານະປະໂລຫິຂອງເຈົ້າ, ຄວາມກ້າຫານ ແລະ ຄວາມໝັ້ນໃຈຂອງເຈົ້າຈະຂະຫຍາຍອອກ. ຊາຍໜຸ່ມທັງຫລາຍ, ເຈົ້າຮູ້ວ່າເຈົ້າເຮັດໄດ້ດີທີ່ສຸດ ເມື່ອເຈົ້າຮັບໃຊ້ພຣະເຈົ້າ. ເຈົ້າຮູ້ວ່າເຈົ້າມີຄວາມສຸກທີ່ສຸດ ເມື່ອເຈົ້າຕັ້ງໃຈເຮັດວຽກງານທີ່ດີ. ຂໍໃຫ້ຂະຫຍາຍອຳນາດແຫ່ງຖານະປະໂລຫິດຂອງເຈົ້າໂດຍການທຳຕົວໃຫ້ສະອາດ ແລະ ມີຄ່າຄວນ.
ຂ້າພະເຈົ້າຂໍກ່າວຊ້ຳ ແລະ ສົ່ງເສີມຄຳເວົ້າຂອງແອວເດີ ແຈັບຟຣີ ອາ ຮໍແລນ ທີ່ໄດ້ກ່າວຢູ່ເທິງເວທີນີ້ ຫົກເດືອນຜ່ານມາແລ້ວ. ເພິ່ນໄດ້ກ່າວວ່າ, “ຂ້າພະເຈົ້າຊອກຫາຊາຍໜຸ່ມ ແລະ ຜູ້ອະວຸໂສຜູ້ທີ່ເປັນຫວ່ງ ເປັນໄຍຢ່າງພຽງພໍທີ່ຈະເວົ້າກ່ຽວກັບສົງຄາມລະຫວ່າງຄວາມດີ ແລະ ຄວາມຊົ່ວ. ເຮົາກຳລັງຢູ່ໃນສົງຄາມ. ...” ເພິ່ນໄດ້ກ່າວຕໍ່ໄປວ່າ, “... ຂ້າພະເຈົ້າຮ້ອງຂໍໃຫ້ມີສຽງທີ່ເຂັ້ມແຂງ ແລະ ອຸທິດຕົນຫລາຍຂຶ້ນ, ສຽງທີ່ບໍ່ພຽງແຕ່ຕໍ່ຕ້ານຄວາມຊົ່ວຮ້າຍເທົ່ານັ້ນ … , ແຕ່ສຽງສຳລັບຄວາມດີງາມ, ສຽງສຳລັບພຣະກິດຕິຄຸນ ແລະ ສຽງສຳລັບພຣະເຈົ້າ” Liahona and Ensign, Nov. 2011, 44, 47).
ແມ່ນແລ້ວ, ຜູ້ດຳລົງຖານະປະໂລຫິດແຫ່ງອາໂຣນ, ເຮົາກຳລັງຢູ່ສົງຄາມ. ແລະ ໃນສົງຄາມນີ້, ວິທີທີ່ດີທີ່ສຸດ ເພື່ອຈະຕໍ່ຕ້ານຄວາມຊົ່ວຮ້າຍກໍຄືສົ່ງເສີມຄວາມຊອບທຳຢ່າງຫ້າວຫັນ. ເຈົ້າບໍ່ສາມາດ ຟັງຄວາມເວົ້າອັນເປິະເປື້ອນ ແລະ ທຳທ່າວ່າເຈົ້າບໍ່ໄດ້ຍິນ. ເຈົ້າບໍ່ສາມາດເບິ່ງຮູບພາບທີ່ເຈົ້າ ຮູ້ວ່າມັນເປິະເປື້ອນຜູ້ດຽວ ຫລື ນຳຄົນອື່ນໆ ແລະ ທຳທ່າວ່າເຈົ້າບໍ່ເຫັນ. ເຈົ້າບໍ່ສາມາດຈັບສິ່ງໃດສິ່ງໜຶ່ງ ທີ່ບໍ່ສະອາດ ແລະ ທຳທ່າວ່າບໍ່ມີຜົນຕອບສະໜອງ. ເຈົ້າບໍ່ສາມາດຢູ່ຊື່ໆເມື່ອຊາຕານຊອກທີ່ຈະທຳລາຍສິ່ງທີ່ສວຍງາມ ແລະ ສະອາດ. ໃຫ້ຢືນຂຶ້ນຕໍ່ສູ້ຢ່າງກ້າຫານຕໍ່ສິ່ງທີ່ເຈົ້າຮູ້ວ່າເປັນຈິງ! ເມື່ອເຈົ້າໄດ້ຍິນ ແລະ ເຫັນສິ່ງໃດກໍຕາມທີ່ລ່ວງເກີນມາດຕະຖານຂອງພຣະຜູ້ເປັນເຈົ້າ, ຂໍໃຫ້ຈື່ຈຳວ່າເຈົ້າແມ່ນໃຜ. ເຈົ້າ ເປັນທະຫານໃນກອງທັບຂອງພຣະເຈົ້າເອງ, ເຕັມໄປດ້ວຍອຳນາດຂອງຖານະປະໂລຫິດອັນສັກສິດຂອງພຣະອົງ. ບໍ່ມີອາວຸດໃດທີ່ຈະຕໍ່ຕ້ານກັບສັດຕູ, ຊຶ່ງແມ່ນບິດາແຫ່ງຄວາມຕົວະ, ໄດ້ຫລາຍໄປກວ່າຄວາມຈິງທີ່ອອກມາຈາກປາກຂອງເຈົ້າເມື່ອເຈົ້າໃຊ້ອຳນາດຂອງຖານະປະໂລຫິດ. ໝູ່ເພື່ອນລຸ້ນດຽວກັນກັບເຈົ້າຈະນັບຖືເຈົ້າສຳລັບຄວາມກ້າຫານ ແລະ ຄວາມສັດຊື່ຂອງເຈົ້າ. ບາງຄົນອາດຈະບໍ່. ແຕ່ມັນກໍບໍ່ແມ່ນສິ່ງສຳຄັນ. ເຈົ້າໄດ້ຮັບຄວາມນັບຖື ແລະ ຄວາມໄວ້ວາງໃຈຈາກພຣະບິດາເທິງສະຫວັນ ເພາະເຈົ້າໄດ້ໃຊ້ອຳນາດຂອງພຣະອົງເພື່ອເຮັດໃຫ້ເປົ້າໝາຍຂອງພຣະອົງສຳເລັດຜົນ.
ຂ້າພະເຈົ້າຂໍຮຽກຮ້ອງຕໍ່ຝ່າຍປະທານຂອງກຸ່ມຖານະປະໂລຫິດແຫ່ງອາໂຣນແຕ່ລະຝ່າຍໃຫ້ຍົກປ້າຍແຫ່ງເສລິພາບຂຶ້ນອີກຄັ້ງໜຶ່ງ ແລະ ຈັດຕັ້ງ ແລະ ນຳພາກຸ່ມທະຫານຂອງເຈົ້າ. ຂໍໃຫ້ໃຊ້ອຳນາດແຫ່ງຖານະປະໂລຫິດຂອງເຈົ້າໂດຍການເຊື້ອເຊີນຄົນທີ່ຢູ່ຮອບຂ້າງເຈົ້າມາສູ່ພຣະຄຣິດຜ່ານການກັບໃຈ ແລະ ການຮັບບັບຕິສະມາ. ເຈົ້າມີຄຳສັ່ງ ແລະ ອຳນາດຂອງພຣະບິດາເທິງສະຫວັນເພື່ອປະຕິບັດວຽກງານນີ້.
ສອງປີຜ່ານມາ, ຂະນະທີ່ຢ້ຽມຢາມເມືອງ ສານທິອາໂກ, ປະເທດຈີເລ, ຂ້າພະເຈົ້າມີຄວາມປະທັບໃຈນຳ ດານເຢລ ໂອແລດ, ຊາຍໜຸ່ມຄົນໜຶ່ງທີ່ຕິດຕາມໄປນຳຜູ້ສອນສາດສະໜາເປັນປະຈຳ. ຂ້າພະເຈົ້າຂໍໃຫ້ ລາວຂຽນຈົດໝາຍຫາຂ້າພະເຈົ້າ, ແລະ ດ້ວຍການໄດ້ຮັບອະນຸຍາດຈາກລາວຂ້າພະເຈົ້າຈະອ່ານສ່ວນໜຶ່ງຂອງອີເມວຂອງລາວໃຫ້ພວກທ່ານຟັງ: “ຂ້ອຍຫາກໍ່ຮອດອາຍຸ 16 ປີ, ແລ້ວວັນອາທິດນີ້ຂ້ອຍໄດ້ຮັບ ຕຳແໜ່ງເປັນປະໂລຫິດ. ວັນດຽວກັນນັ້ນຂ້ອຍໄດ້ໃຫ້ບັບຕິສະມາແກ່ເພື່ອນຜູ້ໜຶ່ງ; ນາງຊື່ ຄາໂຣໄລນາ. ຂ້ອຍໄດ້ສອນພຣະກິດຕິຄຸນໃຫ້ນາງ, ແລະ ນາງໄດ້ໄປໂບດເປັນປະຈຳ ແລະ ໄດ້ຮັບຫລຽນຄວາມ ກ້າວໜ້າສ່ວນຕົວຂອງນາງ, ແຕ່ພໍ່ແມ່ຂອງນາງບໍ່ໃຫ້ອະນຸຍາດໃຫ້ນາງຮັບບັບຕິສະມາຈົນວ່າ ເຂົາເຈົ້າຮູ້ຈັກຂ້ອຍຢ່າງດີ ແລະ ໄວ້ວາງໃຈນຳຂ້ອຍ. ນາງຢາກໃຫ້ຂ້ອຍໃຫ້ບັບຕິສະມານາງ, ສະນັ້ນເຮົາຕ້ອງລໍຖ້າເດືອນໜຶ່ງຈົນຂ້ອຍເຖິງອາຍຸ 16 ປີ ໃນວັນອາທິດນີ້. ຂ້ອຍດີໃຈຫລາຍ ຂະໜາດທີ່ໄດ້ຊ່ອຍຄົນດີເຊັ່ນນັ້ນໃຫ້ຮັບບັບຕິສະມາ, ແລະ ຂ້ອຍດີໃຈທີ່ຂ້ອຍເປັນຜູ້ໃຫ້ບັບຕິສະມາແກ່ນາງ.”
ດານເຢລເປັນຄົນໜຶ່ງໃນຈຳນວນຊາຍໜຸ່ມຫລາຍໆຄົນຢູ່ທົ່ວໂລກຜູ້ທີ່ດຳລົງຊີວິດຕາມອຳນາດທີ່ພຣະເຈົ້າ ມອບໃຫ້ເຂົາຢ່າງໄວ້ວາງໃຈ. ອີກຄົນໜຶ່ງແມ່ນ ລູອີສ ເຟຣະນັນໂດ, ມາຈາກປະເທດຮອນດູອັສ, ຜູ້ທີ່ເຫັນວ່າເພື່ອນຂອງລາວກຳລັງເຮັດການຕັດສິນໃຈອັນບໍ່ເໝາະສົມ ແລະ ລູອີສ ໄດ້ແບ່ງປັນປະຈັກພະຍານນຳໝູ່ຜູ້ນັ້ນ, ແທ້ໆແລ້ວປະຈັກພະຍານໄດ້ຊ່ອຍຊີວິດຂອງລາວ (see “A Change of Heart,” lds.org/youth/video). ໂອລາໂວ ຈາກປະເທດບຣາຊິນ, ກໍເປັນຕົວຢ່າງອີກຢ່າງໜຶ່ງ. ລາວເປັນຕົວຢ່າງທີ່ດີເລື່ອງການປະຕິບັດຢູ່ໃນຄອບຄົວ (ເບິ່ງ D&C 84:111), ໂອລາໂວເປັນແຮງດົນໃຈໃຫ້ແມ່ຂອງລາວ ກັບຄືນເຂົ້າເຮັດກິດຈະກຳຂອງໂບດອີກ (ເບິ່ງ “Reunited by Faith,” lds.org/youth/video). ທ່ານອາດຈະພົບເລື່ອງເຫລົ່ານີ້ພ້ອມດ້ວຍຫລາຍໆເລື່ອງອີກເຊັ່ນດຽວກັນນີ້ຢູ່ໃນເວບໄຊ້ youth.lds.org. ການໃຊ້ເຄື່ອງຄົ້ນພົບຂໍ້ມູນໃນອິນເຕີແນັດອັນໃດກໍຕາມ ແລະ ເທັກໂນໂລຈີຫລາຍໆຢ່າງເປັນເຄື່ອງມືທີ່ ພຣະຜູ້ເປັນເຈົ້າໄດ້ວາງໃສ່ມືຂອງທ່ານເພື່ອຈະຊ່ອຍທ່ານປະຕິບັດໜ້າທີ່ແຫ່ງຖານະປະໂລຫິດຕ່າງໆຂອງທ່ານ ແລະ ເຮັດໃຫ້ອິດທິພົນແຫ່ງຄວາມຈິງ ແລະ ຄວາມຊອບທຳຂະຫຍາຍອອກ.
ຊາຍໜຸ່ມແສນຮັກທັງຫລາຍ, ເມື່ອພວກເຈົ້າໃຊ້ຖານະປະໂລຫິດແຫ່ງອາໂຣນແບບຂ້າພະເຈົ້າໄດ້ອະທິບາຍ ແລ້ວ, ພວກເຈົ້າຈະຕຽມຕົວເພື່ອປະຕິບັດໜ້າທີ່ຕໍ່ໄປໃນອະນາຄົດ. ແຕ່ພວກເຈົ້າກຳລັງເຮັດຫລາຍກວ່ານັ້ນ. ເຊັ່ນດຽວກັນກັບໂຢຮັນບັບຕິສະໂຕ, ຜູ້ທີ່ເປັນຕົວຢ່າງຂອງການດຳລົງຖານະປະໂລຫິດແຫ່ງອາໂຣນ, ພວກເຈົ້າກໍຍັງກຳລັງຕຽມທາງແຫ່ງພຣະຜູ້ເປັນເຈົ້າ ແລະ ເຮັດໃຫ້ທາງຂອງພຣະອົງຊື່ຕົງ. ເມື່ອພວກເຈົ້າ ປະກາດພຣະກິດຕິຄຸນແຫ່ງການກັບໃຈ ແລະ ບັບຕິສະມາຢ່າງກ້າຫານ, ເຊັ່ນດຽວກັນກັບໂຢຮັນໄດ້ປະກາດ, ພວກເຈົ້າໄດ້ຕຽມຜູ້ຄົນສຳລັບການສະເດັດມາຂອງພຣະຜູ້ເປັນເຈົ້າ (ເບິ່ງ ມັດທາຍ 3:3; D&C 65:1–3; 84:26–28). ພວກເຈົ້າໄດ້ຍິນເລື້ອຍໆກ່ຽວກັບຄວາມສາມາດອັນຍິ່ງໃຫຍ່ຂອງພວກເຈົ້າ. ແມ່ນແລ້ວ, ບັດນີ້ເປັນເວລາທີ່ຈະໃຊ້ຄວາມສາມາດທີ່ພຣະເຈົ້າໄດ້ມອບໃຫ້ພວກເຈົ້າໃຫ້ເປັນຜົນເພື່ອໃຫ້ພອນແກ່ຄົນອື່ນໆ, ເພື່ອຊ່ອຍເຂົາໃຫ້ອອກຈາກຄວາມມືດເຂົ້າໄປສູ່ແສງສະຫວ່າງ, ແລະ ເພື່ອຕຽມທາງຂອງພຣະຜູ້ເປັນເຈົ້າ.
ສາດສະໜາຈັກໄດ້ເອົາປຶ້ມນ້ອຍ ໜ້າທີ່ຕໍ່ພຣະເຈົ້າ ໃຫ້ແກ່ພວກເຈົ້າເປັນແຫລ່ງຊ່ອຍເຫລືອ ເພື່ອຊ່ອຍໃຫ້ ພວກເຈົ້າຮຽນຮູ້ ແລະ ເຮັດໜ້າທີ່ຂອງພວກເຈົ້າໃຫ້ສຳເລັດ. ຈົ່ງສຶກສາມັນເປັນປະຈຳ. ຈົ່ງຄຸເຂົ່າລົງ, ອອກຈາກເທັກໂນໂລຈີ, ແລະ ສະແຫວງຫາການແນະນຳຂອງພຣະຜູ້ເປັນເຈົ້າ. ຫລັງຈາກນັ້ນຈົ່ງລຸກຂຶ້ນ ແລະ ໃຊ້ອຳນາດຂອງພຣະເຈົ້າ. ຂ້າພະເຈົ້າຂໍສັນຍາຕໍ່ພວກເຈົ້າວ່າ ພວກເຈົ້າຈະຮັບຄຳຕອບຈາກພຣະບິດາເທິງສະຫວັນກ່ຽວກັບວິທີທີ່ພວກເຈົ້າຈະດຳລົງຊີວິດຂອງພວກເຈົ້າເອງ ແລະ ວິທີທີ່ຈະຊ່ອຍຄົນອື່ນໆ.
ຂ້າພະເຈົ້າຂໍອ້າງເຖິງຄຳເວົ້າຂອງປະທານທອມມັສ ແອັສ ມອນສັນ ວ່າ: “ຢ່າປະໝາດອິດທິພົນຂອງ ປະຈັກພະຍານຂອງທ່ານ. ... ທ່ານມີຄວາມສາມາດທີ່ຈະສັງເກດເຫັນຜູ້ຄົນທີ່ຄົນອື່ນບໍ່ສັງເກດ. ເມື່ອທ່ານມີຕາເພື່ອຈະເຫັນ, ຫູເພື່ອຈະຍິນ, ແລະ ຈິດໃຈເພື່ອຈະຮູ້ສຶກ, ແລ້ວທ່ານຈະສາມາດເອື້ອມມືອອກໄປຫາຄົນອື່ນ ແລະ ຊ່ອຍຊີວິດຂອງຄົນອື່ນໆ (“Be Thou an Example,” Liahona and Ensign, May 2005, 115).
ຂ້າພະເຈົ້າເປັນພະຍານວ່າອຳນາດຂອງຖານະປະໂລຫິດເປັນຈິງ. ຂ້າພະເຈົ້າໄດ້ຮັບປະຈັກພະຍານສ່ວນຕົວຂອງຂ້າພະເຈົ້າ ເມື່ອຂ້າພະເຈົ້າໃຊ້ຖານະປະໂລຫິດດ້ວຍຕົວເອງ. ຂ້າພະເຈົ້າໄດ້ເຫັນສິ່ງມະຫັດສະຈັນຫລາຍໆຢ່າງທີ່ກະທຳໂດຍຜູ້ທີ່ມີອຳນາດຂອງຖານະປະໂລຫິດແຫ່ງອາໂຣນ. ຂ້າພະເຈົ້າໄດ້ເປັນພະຍານເຖິງອຳນາດຂອງການປະຕິບັດຂອງທູດສະຫວັນເມື່ອຜູ້ດຳລົງຖານະປະໂລຫິດແຫ່ງອາໂຣນກ່າວຄຳເວົ້າທີ່ເຕັມໄປດ້ວຍພຣະວິນຍານກ່ຽວກັບຄວາມຫວັງ ຊຶ່ງເປີດຈິດໃຈຂອງຄົນທີ່ຕ້ອງຮັບແສງສະຫວ່າງ ແລະ ຄວາມຮັກ. ໃນພຣະນາມຂອງພຣະເຢຊູຄຣິດ, ພຣະຜູ້ເປັນເຈົ້າ, ພຣະຜູ້ນຳພາ, ແລະ ພຣະຜູ້ຊ່ອຍໃຫ້ລອດ, ອາແມນ.