God I Stap long Stia

Long las Oktoba jeneral konfrens, mi bin invaetem olgeta we oli lisin blong folem kaonsel blong Brigham Yang blong stap long Olfala Sip ia, Saeon, we i Jos blong Jisas Kraes blong Ol Lata-dei Sent, mo holem sip ia wetem tufala han.¹ Stat long taem ia, mi bin hapi blong save se sam long ol famli blong mi, mo sam narawan moa, oli bin stap lisin mo oli askem kwestin ia long mi: “?Wanem nao i stap long Olfala Sip ia we mifala i mas hang long hem? Mi talem bakegen toktok blong Presiden Brigham Yang: “Yumi stap long olfala sip ia, Saeon. God i stap long stia mo bae i stap ia. Hem i talem, i lidim mo givim oda. Sapos ol pipol oli gat ful tras long God blong olgeta, oli neva lego kavenan o God blong olgeta, bae Hem i lidim yumi i stret.”²

I klia we Papa blong yumi long Heven mo Lod Jisas Kraes, Tufala i rere long Olfala Sip Saeon wetem ol klia mo simpol trutok we oli no save finis we bae i helpem yumi stap long rod ia mo gotru long ol raf wota  blong laef long wol ia. Hemia sam long ol trutok ia.

Oltaem nomo, Jos blong Jisas Kraes i gat ol profet mo ol aposol we oli laef we oli lidim Jos ia. Nomata oli man we oli save ded mo oli no stret evriwan, ol wokman ia blong Lod oli kasem insperesen blong helpem yumi stap longwe long ol samting we oli putum spirit blong yumi long denja, mo blong helpem yumi blong pastru long laef long wol, i sef i go kasem las ples we i long heven.

Long ol 40 yia we mi wok kolosap wetem Ol Jeneral Atoriti, mi kam blong witnesem taem kwaet insperesen mo dip revelesen i muvum ol profet, ol aposol, ol nara Jeneral Atoriti, mo ol okseleri lida long aksen. Nomata i no gat wan i stret evriwan mo i no gat mistek, ol gudfala man mo woman ia, oli kasem wok blong lidim wok blong Lod i go fored olsem we Hem i talem.

Mo yufala i no mekem mistek: Lod i stap lidim Jos blong Hem tru long ol profet mo aposol we oli laef. Hemia nao rod we Hem i stap mekem wok blong Hem oltaem. I tru, Sevya i tijim: “ Tru, mi talem long yufala, man we i tekem man we mi mi sanem hem i kam i go insaed long haos blong hem, hem i tekem mi tu.”³ Yumi no save seperetem Kraes long ol wokman blong Hem. Sapos i no bin gat ol fasfala Aposol, bae yumi no gat wan ae witnes stori long fulap long ol tijing blong Hem, seves blong Hem, safaring blong Hem long Garen blong Getsemane, mo taem we Hem i ded long kros. Sapos i no gat ol testemoni ia, bae yumi no gat wan witnes blong wan aposol abaot emti tumb mo laef bakegen long ded.

Hem i givim oda long ol fasfala Aposol ia:

“[Yufala i mas go mo tijim evri nesen, mo baptaesem olgeta long nem blong Papa, mo Pikinini, mo Tabu Spirit.]

“Yufala i mas tijim olgeta blong oli folem olgeta tok ya we mi mi givim finis long yufala.”⁴

Wok ia, i kambak bakegen long dei blong yumi taem Lod i bin singaotem Josef Smit blong putumbak Jos, wetem Ol Aposol we Hem i odenem blong talemaot gospel blong Hem wan moa las taem bifo Hem i kambak bakegen.

Hem i oltaem bin wan jalenj blong wol blong akseptem ol profet mo ol aposol we oli stap laef, be i wan bigfala nid tu blong mekem olsem blong andastanem fulwan Atonmen mo ol tijing blong Jisas Kraes, mo blong kasem blesing blong prishud we i fulwan, we i kam long olgeta we Hem i singaotem olgeta.

Tumas pipol i ting se ol lida mo ol memba blong Jos oli mas stret evriwan mo kolosap stret evriwan. Oli fogetem se gladhat blong Lod i inaf blong mekem ol wok blong Hem tru long ol man. Ol lida blong Jos oli gat gud tingting long maen, be samtaem yumi mekem ol mistek. Hemia i no hapen long Jos nomo, i hapen tu wetem ol fren blong yumi, ol neiba, mo wokfren blong yumi, mo iven bitwin hasban mo waef mo wetem ol famli.

Blong lukaotem samting we i no strong long ol narawan, i isi tumas. Be, yumi mekem bigfala mistek blong lukluk fasin nating blong man nomo, mo afta, long nara saed, yumi no luk han blong God we i wok tru long olgeta we Hem i bin singaotem.

Blong lukluk moa long olsem wanem Lod i givim insperesen long ol lida we Hem i jusum, mo olsem wanem Hem i muvum Ol Sent blong mekem ol bigfala mo gudfala wok nating oli man nomo, i wan wei ia we yumi stap hang long gospel blong Jisas Kraes mo stap sef insaed long Olfala Sip Saeon.

Wan seken trutok i doktrin blong plan blong fasin blong sevem man. Tru long Profet Josef Smit, God i givim Buk blong Momon, Doktrin mo Ol Kavenan, mo plante moa tijing blong Jos. Hemia i tekem save long saed blong plan blong fasin blong sevem man, we i wan map we i soem ples we yumi kam long hem, stamba tingting blong yumi long wol, mo ples we yumi go afta we yumi ded. Plan ia i givim wan spesel lukluk, we i no save finis, se yumi ol spirit pikinini blong God. Taem yumi andastanem huia Papa blong yumi long Heven mo wanem i rilesensip blong yumi wetem Hem, mo wetem Pikinini blong Hem, Jisas Kraes, bae yumi akseptem komanmen blong Tufala mo mekem ol kavenan wetem Tufala we bae i lidim yumi i gobak long ples we i no save finis wetem Tufala.

Evri taem mi holem wan niubon bebi, mi stap askem miwan: “?Huia yu, smolwan? ?Hu nao bae yu kam tru long Atonmen blong Kraes?”

Yumi askem ol semfala kwestin taem wan we yumi lavem i ded: “?Oli stap wea? ?Oli stap luk wanem o gotru long wanem? ?Laef i gohed o no? ?Wanem rilesensip nao bae yumi holemtaet moa long bigfala wol blong ol spirit blong ol dedman?

Long wol ia, famle blong mifala i gat tufala smol apugel, Sera mo Emili, mo wan apuboe, Netan. Taem wanwan long ol apu ia i ded, mifala olsem wan famli, i hang long ol trutok blong gospel ia wetem tugeta han. Kwestin i gat ansa, mifala i kasem kamfot, mo stret save tru long Atonmen blong Sevya. Nomata mifala i misim ol smol apu ia, mitufala i save se oli stap laef, mo mitufala i save se bae mitufala i luk olgeta bakegen. Yumi talem tangkyu tumas from haremsave ia long saed blong spirit  we yumi gat long taem blong raf taem blong yumiwan mo famli.

Wan nara ki trutok long Jos i we Papa long Heven i krietem Adam mo Iv from wan hae stamba tingting. Hem i wok blong tufala—mo afta, wok blong laen blong tufala—blong krietem ol bodi blong mit mo bun blong ol spirit pikinini blong God, blong oli save kam long wol ia. Tru long rod ia, Papa long Heven i sendem ol spirit pikinini blong Hem long wol blong lanem mo groap tru long ol eksperiens blong laef long wol. From se Hem i lavem ol pikinini blong Hem, God i sendem ol mesenja blong heven mo ol Aposol blong tijim olgeta abaot wok blong Jisas Kraes olsem Sevya blong yumi.

Tru long plante handred yia, ol profet oli bin mekem wok blong olgeta taem oli wonem ol pipol long ol denja we oli stap. Ol Aposol blong Lod oli gat stret wok ia blong wajem, givim woning, mo go aot blong helpem olgeta we oli stap lukaotem ol ansa blong kwestin blong laef.

Twante yia i pas, Fas Presidensi mo Kworom blong Olgeta Twelef Aposol i givimaot “Famle: Wan Ofisol Toktok i go long Wol.” Long pepa ia we i kam long insperesen, mifala i bin talem: “Mifala i givim woning se, olgeta we oli stap brekem ol kavenan blong jastiti (klin laef), olgeta we oli stap mekem nogud long ol man, woman o pikinini blong olgeta, o oli no mekem evri famle wok we oli mas mekem, bambae olgeta ia oli mas lukaot from God bambae i jajem olgeta from ol samting ia. Mo tu mifala i givim woning se seraot blong famle bae i mekem se wanwan man o woman, ol komuniti, mo ol kantri bae oli fesem wan taem we i had tumas olsem we ol profet blong yumi bifo mo naoia oli stap talem.” ⁵

Olsem ol Aposol, yumi talem bakegen tabu woning ia bakegen tedei. Plis tingbaot se ol komanmen mo ol kavenan oli ol trutok mo doktrin we i no gat praes we yumi faenem insaed long Olfala Sip Saeon, we God i stap stiarem.

Wan nara impoten doktrin we yumi mas hang long hem i blong kipim Sabat dei. Hemia i wan gudfala presen we i helpem yumi stap mo no gat mak blong wol ia, we i givim spel long bodi, mo givim wanwan long yumi taem blong kam niu long saed blong spirit mo wosipim Papa mo Pikinini evri Sandei.⁶ Taem yumi stap glad long Sabat dei, hem i wan saen blong lav mo komitmen blong yumi long Tufala.⁷

Olsem pat blong ol hadwok blong yumi blong mekem Sabat i wan glad, mifala i bin askem ol lokol lida mo ol memba blong Jos blong tingbaot se sakramen miting, hem i blong Lod mo i mas tekem rus blong hem long ol tijing blong Hem. Presentesen blong odinens blong sakramen i taem yumi riniu ol kavenan blong yumi, mo konfemem bakegen lav we yumi gat long Sevya mo tingbaot sakrifaes blong Hem mo Atonmen blong Hem.

Semfala spirit blong wosip ia i mas fulumap fas mo testemoni miting blong evri manis. Sakramen miting ia, i blong ol memba oli talem long sot taem, tangkyu, lav mo glad blong olgeta from Papa long Heven, Jisas Kraes, mo gospel we i kambak, mo blong talem witnes blong olgetawan abaot ol samting ia. Fas mo testemoni miting i wan taem blong serem sot tingting, mo talem tabu testemoni. I no wan taem blong givim toktok.

Ol yang pikinini oli mas praktis blong serem testemoni blong olgeta long Praemeri mo wetem papa mo mama blong olgeta long famle haos naet kasem taem oli andastanem impoten mining blong wan testemoni.

Ol wok ia blong tokbaot plante Sabat dei olsem wan glad, i stret risal blong insperesen we i kam long Lod tru long ol lida blong Jos. Ol wod kaonsel memba oli mas helpem bisoprik plante wik bifo taem, blong luklukbak long miusik, mo ol topik blong wanwan sakramen miting.

Evriwan long yumi i kasem blesing taem Sabat i fulap wetem lav long Lod long hom mo long jos. Taem yumi tijim ol pikinini blong yumi long ol wei blong Lod, yumi lanem blong filim mo folem Spirit blong Hem. Bae yumi evriwan i wantem tumas blong kam, evri Sandei, blong tekem sakramen taem oli filim Spirit blong Lod. Mo evriwan, yangfala mo olfala, we oli stap tekem ol hevi trabol bae oli filim spirit blong olgeta i kam antap mo stap kwaet; mo hemia i kam taem oli spendem Sabat dei blong lukluk long Papa long Heven mo Lod Jisas Kraes.

Tangkyu tumas, Kraes i kolosap oltaem, i stap wet mo i wanem helpem yumi taem yumi prea from help mo yumi glad blong sakem sin mo kam long Hem.

Nao, taem yumi tingting hevi long sam long olgeta trutok ia nomo we oli stap insaed long Olfala Sip Saeon, bae yumi stap insaed long sip mo tingbaot se, wan sip i wan tul blong muvum man, mo stamba tingting blong wan tul blong muvum man i blong tekem yumi i go long wan ples.

!Ples we sip blong yumi stap go long hem i fulap long ol blesing blong gospel, kingdom blong heven, selestial glori mo stap long ples blong God!

Plan blong God i stap finis. Hem i stap long stia. Mo bigfala mo strong sip blong hem i stap ron from fasin blong sevem man mo kam olsem god. Tingbaot se yumi no save kasem ples ia taem yumi jiamaot long sip nomo mo traem swim yumiwan.

Blong kam olsem god i gol blong wokbaot blong laef long wol ia, mo i no gat man i kasem ples ia sapos hem i no gat rod we gospel blong Jisas Kraes i givim: Atonmen blong Hem, ol odinens, mo ol prinsipol we oli gaedem yumi we oli stap insaed long Jos.

Hem i Jos we yumi stap long hem we yumi lanem ol wok blong God mo akseptem gladhat blong Lod Jisas Kraes, we i sevem yumi. Insaed long Jos ia nao yumi mekem ol komitmen mo ol kavenan blong famle we i no save finis, we oli kam paspot blong yumi blong kam olsem god. Hem i Jos ia we prishud i givim paoa long hem, we i pusum yumi tru long ol wota blong laef ia we yumi no save wanem i stap long hem.

Bae yumi talem tangkyu from naesfala Olfala Sip Saeon, from sapos hem i no stap, bae yumi glis i go, yumiwan mo yumi no gat paoa, we i saksakem yumi, we yumi go raonraon wetem taed blong win mo wef blong enemi.

Hang strong, mo sel i go insaed long sip blong glori ia, we i Jos blong Jisas Kraes blong Ol Lata-dei Sent, mo bae yumi kasem fiuja ples blong yumi. Hemia i testemoni mo prea blong mi from yumi evriwan long nem blong Hem we Olfala Sip Saeon i tekem nem blong Hem, we i Lod mo Sevya blong yumi, Jisas Kraes, amen.