2010–2019
Mi Plis long Ol Sista blong Mi
Oktoba 2015

Mi Plis long Ol Sista blong Mi

I Kam long Presiden Rasel M. Nelson

Presiden blong Kworom blong Olgeta Twelef Aposol

Pikja

Mifala i nidim paoa, jenis blong hat, strong tingting, mo paoa blong save lidim man, waes tingting mo voes blong yufala.

Ol Dia Elda Rasban, Stivenson, mo Renlan, mifala Ol Brata blong yufala, i welkamem yufala long Kworom blong Olgeta Twelef Aposol. Mifala i talem tangkyu long God from ol revelesen we Hem i givim long profet blong Hem, Presiden Tomas S. Monson.

Ol brata mo sista. Taem yumi mit long jeneral konfrens sikis manis i pas, i no gat wan long yumi i no gat wan se ol jenis we bae i kam bae i tajem bigwan ful Jos. Elda L. Tom Peri i givim wan strong mesej abaot rol we oli no save riplesem, we mared mo famli i gat long plan blong Lod. Mifala i sek, taem mifala i lanem afta, se kansa bae i tekem hem i go.

Nomata we helt blong Presiden Boed K. Peka i stap godaon, hem i gohed blong stap soldia blong mekem wok blong Lod. Hem i no bin strong long las Epril, be yet, i gat strong tingting blong talem witnes blong hem from se hem i laef yet i stap. Afta, jes 34 dei afta we Elda Peri i lus, Presiden Peka tu i go krosem vel.

Yumi bin misim Elda Rijad G. Skot long las jeneral konfrens, be yumi bin tingtingbak long strong witnes abaot Sevya we hem i bin talem long plante konfrens bifo. Mo jes 12 dei i pas, God i singaotem Elda Skot i go hom, i joen bakegen wetem Janin we hem i lavem tumas.

Mi bin gat spesel janis blong stap wetem evri brata ia long ol las dei blong olgeta, mo tu, mi joenem ol memba blong famli blong Presiden Peka mo Elda Skot jes bifo oli ded. I bin had long mi blong bilivim se ol gudgudfala fren blong mi ia, ol gudfala wokman blong Lod ia, oli go wantaem Mi misim olgeta moa bitim we mi save talem.

Taem mi lukbak long ol samting we oli jes hapen, wan long ol tingting we i stap long mi we mi bin luk long ol waef blong olgeta we oli laef i stap. Insaed long maen blong mi, i gat pikja blong Sista Dona Smit Peka, mo Sista Babra Deiton Peri long saed blong bed blong hasban blong olgeta; tufala woman ia we i fulap long lav, trutok mo klin fet.

Taem Sista Peka i sidaon long saed blong hasban blong hem long ol las aoa blong hem, hem i saenem pis we i bitim save blong man.1 Nomata hem i luksave se kompanion we hem i lavem blong kolosap 70 yia bae i go i no longtaem, hem i soem se hem i gat pis blong wan woman we i fulap long fet. I luk olsem wan enjel, semmak olsem we hem i stap long foto ia blong tufala long dedikesen blong Brigham Siti Yuta Tempol.

Pikja
Presiden mo Sista Peka long Brigham Siti Yuta Tempol

Mi luk sem kaen lav mo fet ia we i kamaot long Sista Peri. Strong tingting we hem i givim long hasban blong hem mo long Lod i kamaot klia, mo i tajem mi bigwan.

Pikja
Elda mo Sista Peri

Tru ol las aoa blong hasban blong olgeta go kasem tedei, tufala hae woman ia i soem paoa mo strong paoa long tingting we ol kavenan woman oli soem oltaem.2 Bae i no posibol blong skelem paoa we ol woman olsem oli gat, i no long famli nomo, be tu, long Jos blong Lod, olsem ol waef, ol mama, mo ol bubuwoman; olsem ol sista mo ol anti; olsem ol tija mo ol lida; mo speseli olsem ol eksampol mo strong difenda blong fet.3

Hemia i tru long evri gospel dispensesen stat long taem blong Adam mo Iv. Yet, ol woman blong dispensesen ia oli defren evriwan long ol woman blong eni nara dispensesen from se dispensesen ia i defren long eni narawan.4 Wanem i defren ia, i tekem ol spesel janis mo ol responsabiliti.

Pikja
Pikja blong Fes blong Spensa W. Kimbol

Teti sikis yia i pas, long 1979, Presiden Spensa W. Kimbol i talem wan bigfala profesi abaot fos we ol woman we oli kipim kavenan bae oli mekem long fiuja blong Jos blong Lod. Hem i profesae i talem: “Plante bigfala wok we i mekem Jos i gro long ol las dei, bae i kam from plante long ol gudfala woman blong wol … bae oli kam long Jos long bigfala namba. Hemia bae i hapen folem hamas ol woman blong Jos bae oli soemaot stret mo gud fasin mo klia tingting long laef blong olgeta, mo bae i folem hamas bae oli luk se ol woman blong Jos oli defren mo spesel—long ol hapi wei—long ol woman blong wol ia.”5

Ol dia sista blong mi. Yufala i stamba wokfren blong mifala long taem ia, dei ia we Presiden Kimbol i bin luk finis, hem i tedei. !Yufala nao ol woman we hem i bin luk! !Klin fasin, laet, lav, save, strong paoa long tingting, fasin, fet mo stret mo gud laef blong yufala bae i pulum ol gudfala woman blong wol wetem famle blong olgeta i kam long Jos long bigfala namba!6

Mifala, ol brata blong yufala, i nidim paoa, jenis blong hat, strong tingting, mo paoa blong save lidim man, waes tingting mo voes blong yufala. Kingdom blong God i no, mo i no save fulwan sapos i no gat ol woman we oli mekem ol tabu kavenan, mo afta, stap kipim olgeta; !ol woman we oli save toktok wetem paoa mo atoriti blong God!7

Presiden Peka i talem:

“Yumi nidim ol woman we oli oganaes, mo ol woman we oli save oganaesem samting. Yumi nidim ol woman we oli gat skil blong lidim wok long ofis, we oli save plan mo lukaotem wok; ol woman we oli save tij, ol woman we oli save toktok.

“Yumi nidim ol woman we oli gat presen blong luksave samting, we oli save luksave ol fasin we i stap gohed long wol mo faenem olgeta fasin ia, we nomata oli popula, oli emti o gat denja long olgeta.”8

Tedei, bae mi ademap se yumi nidim ol woman we oli save olsem wanem blong mekem ol impoten samting oli hapen tru long fet blong olgeta, we oli gat strong paoa long tingting blong difendem gudfala fasin mo ol famli long wan wol we i sik long sin. Yumi nidim ol woman we oli givim tingting blong olgeta blong lukaot gud long ol pikinini blong God folem rod ia blong kavenan we i go blong kam olsem god; ol woman we oli save olsem wanem blong kasem revelesen blong olgetawan, we oli andastanem paoa mo pis blong tempol endaomen; ol woman we oli save olsem wanem blong singaotem ol paoa blong heven blong protektem mo mekem strong moa ol pikinini mo famli; ol woman we oli tij we oli no fraet.

Long laef blong mi, mi gat blesing blong gat ol woman olsem. Waef blong mi we i ded finis, Dansel, i wan woman olsem. Bae mi glad oltaem from paoa blong jenisim man we hem i gat long mi long evri saed blong laef blong mi, wetem tu ol fas wok blong mi long wok blong operetem hat blong man.

Fifti yia i pas, oli askem mi blong operetem wan smol gel, we i sik bigwan from wan problem long hat. Bigfala brata blong hem i ded finis from semfala problem. Papa mo mama blong gel ia i plis blong askem help. Mi no gat hop long risal be mi promes blong mekem evri samting we mi save mekem blong sevem laef blong gel ia. Nomata ol gud wok blong mi, gel ia i ded. Afta long hemia, ol semfala papa mo mama oli tekem wan nara gel i kam long mi we i 16 manis nomo, we hat blong hem i no kam gud. Bakegen, tufala i askem se bae mi mekem operesen. Pikinini ia tu i ded. Nambatri ded long wan famli ia i mekem mi harem nogud tumas.

Mi gobak long haos, mi harem nogud evriwan. Mi sakem mi long floa long living rum mo krae ful naet. Dansel i stap long saed blong mi, i lisin, we mi stap ripitim se bae mi neva operetem man bakegen long hat. Afta, samples long 5 klok moning, Dansel i luk mi, mo wetem lav i askem: “?Yu finis blong krae? !Nao yu dresap. Gobak long hospital. Go long wok! Yu nid blong lanem moa. Sapos yu givap naoia, ol narawan bae oli lanem nomo wanem we yu yu save finis.”

!O yes, mi nidim visen, paoa mo lav blong waef blong mi! Mi gobak long wok mo lanem sam moa. Sapos i insperesen blong Dansel, bae mi no gohed blong operetem hat blong man, mo bae mi no rere blong mekem operesen long 1972 we i bin sevem laef blong Presiden Spensa W. Kimbol.9

Ol sista. ?Yu yu luksave hamas paoa nao yu gat blong lidim tingting taem yu talem ol samting ia we oli kam long hat mo maen blong yu olsem we Spirit i stap talem long yu? Wan gud stek presiden i talem long mi abaot wan stek kaonsel miting we oli stap traehad wetem wan had jalenj. Nao, hem i kam blong luksave se stek Praemeri presiden i no toktok, mekem se hem i askem sapos hem i gat tingting blong serem. Hem i se: “yes mi gat” afta i gohed blong serem tingting we i jenisim daereksen blong miting ia. Stek presiden i gohed: “Taem sista i toktok, Spirit i testifae long mi se hem i givim voes blong revelesen we yumi bin stap lukaotem olsem wan kaonsel.”

Ol dia sista blong mi, nomata wanem koling blong yu, nomata wanem situesen blong yu, mifala i nidim ol filing, ol tingting, mo insperesen blong yufala. Mifala i nidim yufala blong toktok, mo toktok long ol wod mo stek kaonsel blong yufala. Mifala i nidim wanwan mared sista blong stap olsem wan we i givim tingting fulwan mo stap olsem wan ful patna”10taem yufala i kam wan wetem hasban blong yumi blong lidim famle blong yufala. Mared o singgel, ol sista oli gat ol defren skil mo spesel filing we yufala i kasem olsem ol presen we oli kam long God. Mifala, ol brata, i no save mekem wanem yufala i mekem.

Mifala i save en blong evri kriesen, !i kriesen blong woman!11 !Mifala i nidim paoa blong yufala!

Ol atak agensem Jos, doktrin blong hem, mo wei blong laef blong yumi bae i kam antap. From hemia, yumi nidim ol woman we oli gat wan ston bed blong save abaot doktrin blong Kraes, mo bae oli yusum save ia blong tijim mo help blong lukaotem wan jeneresen we i save stanap agensem sin.12 Yumi nidim ol woman we oli save luksave giaman samting long eni kaen. Yumi nidim woman we i save olsem wanem blong kasem paoa we God i putum i stap long olgeta we oli kipim kavenan, mo oli talem bilif blong olgeta wetem tras long olgetawan mo wetem jareti. Yumi nidim ol woman we oli gat strong paoa long tingting mo oli gat visen blong Mama Iv.

Ol dia sista. I no gat wan samting we i moa impoten long laef blong yu we i no save finis bitim jenis blong yu long laef. Oli ol woman we oli jenisim laef, we oli kipim kavenan—mo mi kaontem dia kompanion blong mi, Wendi—we laef blong olgeta i stret mo gud we bae oli stanap long wan wol we i stap godaon, mo bae oli luk olgeta se oli spesel mo defren long ol hapiwei.

So tedei, !mi plis long yufala, ol sista blong mi blong Jos blong Jisas Kraes blong Ol Lata-dei Sent blong kam fored! Tekem stret blong yu long hom olsem we i nid, insaed long komuniti blong yu mo insaed long kingdom blong God—i bitim we yu bin mekem bifo. Mi plis long yufala blong mekem profesi blong Presiden Kimbol i kamtru. Mo mi promesem yufala, long nem blong Jisas Kraes, se taem bae yufala i mekem olsem, !bae Tabu Spirit i mekem yufala i gat moa paoa blong lidim tingting bitim we i bin hapen bifo.!

Mi talem witnes se Lod Jisas Kraes i tru, mo paoa blong Hem we i pem praes, blong pemaot man, mo blong mekem man i kam tabu i tru. Mo olsem wan long ol Aposol blong Hem, mi talem tangkyu, ol dia sista, mo blesem yufala blong girap kam kasem ples blong yu antap, kasem ful mak blong kriesen blong yu, taem yumi stap wokbaot we yumi holholem han long tabu wok ia. Tugeta, bae yumi mekem wol i rere from Seken Kaming blong Lod. Long hemia, mi testifae, olsem brata blong yu, long nem blong Jisas Kraes, amen.

Ol Not

  1. Luk long Filipae 4:7.

  2. Hemia i tekem tu wota blong ae—blong obei ol komanmen, blong krae from olgeta we yumi lavem taem oli finis long laef ia (luk long Doctrine and Covenants 42:45).

  3. Luk long paoa we Rebeka i gat long tingting blong Aesak mo boe blong tufala, Jekob, long Jenesis 27:46; 28:1–4.

  4. Luk long Joseph Fielding Smith, Answers to Gospel Questions, komp. Joseph Fielding Smith Jr., 5 vols. (1957–66), 4:166. Not: Evri dispensesen we i bin pas, oli hapen long wan smol pat blong wol mo apostasi i endem taem blong olgeta. Be, long dispensesen ia, hem i no gat limit long taem o ples. Bae i fulumap wol mo joen long Seken Kaming blong Lod.

  5. Teachings of Presidents of the Church: Spencer W. Kimball (2006), 222–23.

  6. Taem mi bon i kam long wol, namba blong ol memba blong Jos i no kasem yet 600,000. Tedei, i gat moa bitim 15 milian. Namba ia i gohed blong kam antap.

  7. Presiden Josef Filding Smit i talem ol sista blong Rilif Sosaeti, “Yufala i save toktok wetem atoriti, from se Lod i givim atoriti long yufala.” Hem i talem tu se Rilif Sosaeti i bin kasem “paoa mo atoriti blong mekem plante bigfala samting. Wok we oli stap mekem, oli stap mekem wetem atoriti we i kam long heven” (“Relief Society—an Aid to the Priesthood,” Relief Society Magazine, Jan. 1959, 4, 5). Olgeta toktok ia, Elda Dallin H. Oaks i bin kwotem olgeta long wan konfrens toktok, “The Keys and Authority of the Priesthood,” Liahona, Mei 2014, 51.

  8. Boyd K. Packer, “The Relief Society,” Ensign, Nov. 1978, 8; luk tu long M. Russell Ballard, Counseling with Our Councils: Learning to Minister Together in the Church and in the Family (1997), 93.

  9. Luk long Spensa J. Kondi, Russell M. Nelson: Papa, Dokta blong Katem Man, Aposol (2003), 146, 153–56. Not: Long 1964, Presiden Kimbol i setem mi apat olsem wan stek presiden mo i blesem mi se namba blong ol ded bae i kamdaon taem bae mi wokhad moa long saed blong ol operesen blong paep blong hat blong man. Mitufala i no bin save se eit yia afta, bae mi operetem Presiden Kimbol, long hat blong hem mo bae mi riplesem wan paep blong hat blong hem.

  10. “Taem yumi tokbaot mared, olsem wan wei blong kam patna, bae yumi tokbaot mared olsem blong kam patna fulwan. !Yumi no wantem ol LDS woman blong yumi blong stap ol patna we oli sarem maot o kam ol limit patna long wok ia we i no save finis in that eternal assignment! Plis kam wan patna we i tekpatmo i fulwan ” (Spencer W. Kimball, “Privileges and Responsibilities of Sisters,” Ensign, Nov. 61978, 106).

  11. “Evri stamba tingting blong wol mo evri samting we i stap insaed long wol bae i go nating sapos i no gat woman—hem i ki ston long ak blong kriesen” (Russell M. Nelson, “Lessons from Eve,” Ensign, Nov. 1987, 87). “Iv i kam las kriesen blong God, las wok blong evri gudfala wok we Hem i bin mekem bifo” (Gordon B. Hinckley, “The Women in Our Lives,” Liahona, Nov. 2004, 83).

  12. Luk long Russell M. Nelson, “Children of the Covenant,” Ensign, Mei 1995, 33.