Olgeta we Oli Stap Obei long Ol Komanmen blong God Oli Gat Blesing mo Oli Hapi

Sam taem i pas, taem mi stap visitim Ostrelia, mi bin go long wan naesfala bei, we plante man oli save from ol bigfala wef blong hem. Taem mi stap wokbaot folem sanbij, mi bin sapraes tumas long ol naesfala bigfala wef we i stap brok aotsaed long bei mo ol smolsmol wef we i stap rol i kam kolosap long so.

Taem mi gohed long wokbaot blong mi, mi mitim sam wan grup blong ol man Amerika we oli stap sef. Mi luksave se oli no glad long wan samting, oli stap toktok bigwan mo stap poen i go long solwota. Taem mi askem long olgeta se wanem i rong, oli poen i go aotsaed long bei long ples we ol bigfala wef i stap brok long hem.

“Luk i go longwe,” wan i talem long mi wetem kros. “?Yu save luk fanis ia?” Taem mi lukluk gud, mi save luksave fanis ia we i krosem fulwan maot blong bei, stret long ples we ol bigfala, naesfala we via oli stap brok long hem. I luk olsem se fanis ia oli mekem long ol hevi waea mo oli sapotem wetem ol flota antap long wota. Ol man blong sef ia, oli talem se fanis ia i go olwe daon kasem sanbij andanit.

Man blong sef blong Amerika ia i gohed, “Mifala i kam wan trip ia we bae mifala i save mekem wan taem nomo long laef blong mifala, bong sef long ol bigfala we ia. Mifala i save sef long ol smolsmol  wef ia we oli stap brok insaed long bei, be fanis ia i mekem i had blong mifala i save sef long ol bigfala we via. Mifala i no save from wanem fanis ia i stap long we. Mifala i save nomo se hem i spolem trip blong mifala.”

Taem ol man blong serf blong Amerika ia oli stap gohed blong harem nogud moa, lukluk blong mi i go long wan nara man blong sef we i stap kolosap—wan olfala man mo wan man ples ia nomo—we i stap nildaon long sanbij, i stap putum waks long serfbod blong hem. Luk olsem se hem i stap harem gud taem hem i stap lisin long ol komplen we i stap kam antap from fanis ia.

Hem i girap mo i wokbaot i go long grup ia. Hem i no talem wan samting, i pulumaot wan spaeglas long hanbag blong hem mo i givim long wan long ol man blong sef ia, i poen i go long fanis ia. Wanwan long ol man ia i lukluk tru long spae klas ia. Naoia taem blong mi. Wetem help blong save lukluk i moa klia, mi save luk wan samting we mi no bin luk bifo: fin blong ol bigfala fis—ol bigfala sak we oli stap kakae long rif narasaed long fanis.

Wan taem nomo grup ia i kwaet. Olfala man blong sef ia i karem bak spae glas blong hem mo i tanem raon i wokbaot i go bak. Taem hem i stap go, hem i talem ol toktok we bae mi neva fogetem: “No komplen tumas from fanis ia. Hem nomo i blokem yu blong oli no kakae yu.”

Mifala i stanap long naesfala sanbij ia mo stap lukluk mifala bakegen. Lukluk blong mifala i jenis wantaem. Fanis ia we mifala i luk se i strong mo i stap blokem ples—we mifala i luk se bae i blokem mifala blong harem gud blong sef long ol bigfala we ia—I kam wan defren samting Olgeta. Wetem niufala save ia long denja we i stap andanit long wota, fanis ia naoia i givim proteksen, sefti. mo pis.

Taem yu mo mi i stap wokbaot folem ol rod blong laef ia mo stap folem ol drim blong yumitu, ol komanmen mo standet blong Lod—olsem fanis ia—samtaem i had blong yumitu save andastanem. Bae yumi luk se oli strong, mo stap blokem wan rod we i naes mo plante nara man i stap folem. Olsem we Aposol Pol i tokbaot: “Yumi stap luk long wan glas we i no klia gud,”¹  wetem wan sotfala lukluk, yumi no save andastanem ol bigfala denja we i haed i stap andanit.

Be Hem we i “save evri samting”² i save stret wea ples ol denja Ia i stap long hem. Hem i givim long yumi wan tabu rod, tru long ol komanmen mo lav blong Hem, blong yumi save kamaot long ol denja ia—blong yumi save folem wan rod long laef blong yumi we i gat proteksen long ol samting we i save kilim spirit blong yumi mo ol sin we i save spolem yumi.³

Yumi soemaot lav blong yumi long God—mo fet blong yumi long Hem—taem yumi stap traem bes blong yumi evri dei blong stap folem rod we Hem i jusum blong yumi mo blong stap folem ol komanmen we Hem i bin givim long yumi. Yumi soemaot klia fet mo lav ia long ol taem we yumi no andastanem fulwan risen blong komanmen blong Lod o from wanem yumi mas folem rod we Hem i stap talem long yumi blong folem. Hem i moa isi blong yumi folem wan rod insaed long fanis taem yumi save se i gat ol sap tut blong we i save kilim yumi i stap swim aotsaed. Hem i moa had blong yumi stap insaed long fanis taem yumi save luk nomo ol naesfala wef long narasaed. Mo hem i long ol taem ia nao—ol taem we yumi jus blong praktisim fet blong yumi, putum tras blong yumi long Lod, mo soem lav blong yumi long Hem—we bae yumi save gro mo kasem plante moa samting.

Long Niu Testeman, Ananias i no save andastanem oda blong Lod blong lukaotem mo blesem Sol—wan man we i gat wan pepa blong putum evriwan we i bilif long Kraes i go long kalabus. Be yet, from se hem i bin obei long oda blong God, Ananias i wan tul blong Aposol Pol i bon bakegen long saed blong spirit. ⁴

Taem yumi gat tras long Lod, praktisim fet blong yumi, obei long ol komanmen blong Hem, mo folem rod we hem i putum blong yumi—taem yumi givim evri samting we yumi gat blong mekem wanem we hem i wantem—bambae yumi save kam plante moa olsem man we Lod i wantem yumi blong kam. Hem i fasin ia blong “stap kam olsem”—jenis blong hat long yu—we hem i impoten tumas. Olsem we Elda Dalin H. Oks i bin tijim yumi, “Faenol Jajmen hem i no jes wan totol blong ol gud mo nogud fasin—we yumi bin mekem. Hem i blong luksave se ol aksen mo tingting blong yumi—I bin mekem yumi kam olsem wanem kaen man. Hem i no naf blong jes mekem ol raet samting be; nogat gudfala filing blong mekem ol samting ia. Ol komanmen, odinens, mo kavenan blong gospel oli no olsem sam mane we bae yumi mas deposit long wan bank akaon long heven. Gospel blong Jisas Kraes hem i wan plan blong soem long yumi olsem wanem nao yumi save kam man we Lod i wantem yumi blong kam.”⁵

From hemia, stret fasin blong stap obei, hem i blong givim evri samting we yumi gat long Hem mo letem Hem i makemaot rod blong yumi long ol kwaet mo raf wota, andastanem se Hem i save mekem yumi kam moa gud bitim we bae yumi save mekem yumiwan.

Taem yumi givim evri samting long wil blong Hem, yumi gat moa pis mo glad. King Benjamin i bin tijim se Olgeta we oli stap kipim ol komanmen blong Lod—we oli folem Hem i go long ples we Hem i stap lidim olgeta—“Lod i blesem olgeta” long “evri samting, ol samting blong wol tugeta wetem blong spirit.”⁶ God i wantem yumi blong gat bigfala glad. Hem i wantem yumi blong stap sef mo blong gat proteksen agensem ol samting blong wol raon long yumi—ol samting we bae oli save kakae yumi isi nomo sapos yumi jus blong swim wetem Olgeta.

Putum long wan nara wei, komanmen blong Lod i no olsem ol fanis we i stap andanit long wota we bae yumi mas lan blong swim aot long hem blong save kam olsem wan god long nekis laef. Be ol fanis we Lod i putum hem i blong kipim yumi stap sef long devel mo ol rabis fasin we bae i save pulum yumi go daon long bigfala harem nogud. Lod i givim ol komanmen blong Hem wetem lav mo kea, hem i blong bigfala glad blong yumi long wol ia⁷ semmak olsem we hem i blong bigfala glad mo laef blong yumi olsem wan god long nekis laef. Oli makem rod we yumi mas folem—moa impoten nao, oli huia nao yumi mas kam olsem.

Olsem we long evri samting we i gud mo tru, Jisas Kraes Hem i stap olsem bigfala eksampol. Bigfala aksen blong fasin blong stap obei, we bae i save stap oltaem, hem i taem we Pikinini hem i givim Hemwan blong mekem wanem we papa i wantem. Wetem bigfala tingting we i stap daon Hem i bin askem se bae oli karemaot kap ia long Hem—se bae Hem i folem wan nara rod be i no hemia we oli bin makem aot blong Hem—Kraes i bin givim Hemwan blong folem rod we Papa i wantem Hem blong folem. Hem i wan rod we i lidim Hem i go tru long Garen blong Getsemane mo Golgota, ples we Hem i bin go tru long bigfala harem nogud mo ples we Spirit blong Papa blong Hem i bin kamaot mo hem i bin stap Hemwan nomo. Be semak rod ia i go kasem wan emti tum we long nambatri dei ol krae blong “!Hem i girap!”⁸ i ring long ol sora mo hat blong evriwan we oli lavem Hem. Hemia tu i ingkludum bigfala joy mo kamfot we i stamba blong Atonmen blong Hem blong evri Pikinini blong God truaot long ol taem we i no save finis. Taem Hem i stap letem wil blong Papa blong Hem i solem daon wil blong Hem—taem hem i stap folem komanmen blong Papa—Kraes i givim long yumi janis blong gat pis we i no save finis, bigfala glad we i no save finis, mo laef we i no save finis.

Mi testifae se yumi ol pikinini blong wan God we i gat lav. Mi witness se Hem i wantem yumi blong stap hapi mo sef mo kasem ol blessing. Blong yumi save gat “bodi we i no mo save ded mo laef we i no save finis” hem i bigfala “wok” mo “glory” blong Hem. From hemia, Hem i bin makemaot wan rod blong yumi folem we i lid i go bak long Hem, mo hem i putum ol fanis blong protektem yumi long rod ia. Mi testifae se taem yumi stap trae had blong folem rod ia, bambae yumi save faenem stret ples blong stap sef, mo gat tru happiness mo pis. Mo taem yumi givim yumi blong mekem wanem we Hem i wantem, yumi kam olsem we Hem i wantem yumi blong kam. Long nem blong Jisas Kraes, amen.