Stap long Rod blong Yu

Long 11 Maj 2011, mi bin stap stanap long ples blong tren long Tokio Sinagawa tren stesen blong go visitim Japan Kobe Misin. Samples long 2:46 aftenun, wan 9.0 etkwek i kam. Mi no save stanap from graon i seksek bigwan, mo mi holemtaet rel blong step. Ol laet long ol siling kolosap oli stat foldaon. Ful Tokio i stap long bigfala fraet.

Laki tumas, mi no kasem kil, mo fo aoa afta, mi glad blong harem se ful famli i stap sef.

Long televisen oli stap soem ol pikja we oli mekem man i fraet mo i sek. Wan bigfala tsunami i kamaot long Sendae misin eria—i swipim evri samting long rod blong hem: ol trak, ol haos, ol faktri, mo ol plantesen. Mi sapraes long ol pikja blong trabol taem ia mo mi krae. Mo mi prea strong se Papa blong yumi long Heven i protektem mo helpem ol pipol we oli stap long ples ia we mi lavem tumas.

Samtaem afta, oli konfemem se evri misinari mo ol memba blong Jos oli sef i stap. Be, plante memba i kasem trabol, oli lusum famli, hom, mo ol samting blong haos. Ova long 20 taosen man i ded, ol komuniti oli lus, mo plante pipol oli mas aot long haos blong olgeta from aksiden blong nuklia faktri.

Ol disasta olsem, oli spolem gud evri samting long plante pat blong wol tedei, mekem se plante laef i lus. Yumi gat woning se ol disasta, ol wo, mo plante hadtaem long wol bae oli hapen.

Taem ol tes olsem oli kam wantaem long yumi, yumi save askem kwestin: “?From wanem ol samting ia oli hapen long mi?” o “?From wanem mi mas safa?”

Blong wan longfala taem, afta we mi konvet long gospel, mi no bin gat wan klia ansa long kwestin ia: “?From wanem bae mi gat ol tes?” Mi andastanem pat blong plan blong fasin blong sevem man se bae yumi fesem tes. Be, long ril laef, taem kwestin ia i kam, mi no ting se hemia i strong inaf blong ansarem kwestin ia. Be i bin gat wan taem long laef blong mi, we mi tu, mi gat wan bigfala tes.

Taem mi gat 30 yia, mi stap visitim Nagoya misin olsem pat blong wok blong mi. Afta long miting, misin presiden i mekem se ol elda bae oli draevem mi i go long eapot. Be, taem mifala i kasem krosrod daon long wan longfala hil, wan bigfala kamiong i spid biaen long mifala i kamdaon. I fas long biaen blong trak mo i sakem mifala 20 mita long fored. Wanem i moa nogud i we i no gat draeva. Biaen long trak i kam insaed hafwei long nomol saes blong hem. Laki tumas, tufala elda mo mi i laef nomo.

Be long nekis dei, mi stat blong harem i soa long nek blong mi, mo ol solda mo hed blong mi i soa bigwan. Stat long dei ia, mi no save slip, mo mi mas gotru evri dei wetem soa long bodi mo tingting. Mi prea long God blong hem i hilim harem nogud blong soa blong mi, be ol risal blong hem i stap blong samples 10 yia.

Long taem ia, filing blong gat tu tingting i stap kam sloslo long mean blong mi mo mi tingting, “ From wanem mi mas harem nogud olsem?” Be nomata kaen hiling ia we mi stap lukaotem i no kam, mi traehad blong stap fetful blong obei ol komanmen blong God. Mi gohed blong prea se bae mi save faenem ansa blong ol kwestin we mi gat long saed blong hadtaem blong mi.

I gat wan taem we mi stap traehad wetem wan niu samting moa, mo tingting blong mi i no spel from mi no save olsem wanem blong mekem wetem niu hadtaem ia. Mi bin stap prea from wan ansa. Be mi no kasem wan ansa kwiktaem. Mekem se mi gobak mo toktok wetem wan Jos lida we mi trastem.

Taem mifala i bin stap toktok, wetem lav long voes blong hem, hem i se: “Brata Aoyagi, ?be stamba tingting blong yu stap long wol ia i no blong yu fesem hadtaem ia? ?Bae i no nogud sapos yu akseptem nomo evri hadtaem blong laef ia olsem we oli stap, mo afta, livim haf i stap blong Lod? ?Yu no ting se problem ia bae i kam stret sapos yumi laef bakegen long ded?”

Taem mi bin harem ol toktok ia, mi filim Spirit blong Lod strong tumas. Mi bin harem doktrin ia fulap taem, be ae blong save blong mi i neva open bigwan olsem we oli bin open long tetaem ia. Mi save se hemia nao ansa we mi stap askem long Lod long prea blong mi. Mi bin save andastanem klia plan blong God blong fasin blong sevem man, mo andastanem bakegen impoten prinsipol ia.

Long Ebraham, Lod i talem: “Mo bae yumi testem olgeta long wei ia, blong luk sapos bae oli mekem evri samting we Lod, God blong olgeta bae i givim oda long olgeta.”¹

Prinsipol hem i we God we i krietem ol heven mo wol nao i save bigfala plan blong wol ia; Hem nao i rul ova long evri samting long ol heven mo long wol, mo blong mekem plan blong fasin blong sevem man i kamtru, Hem i givim yumi plante defren eksperiens—we oli ol hadtaem—taem yumi stap long wol ia.

Mo Lod i talem olsem long Josef Smit:

“Nao yu mas save, boe blong mi, se evri samting ia bae i givim eksperiens long yu, mo bae i blong gud blong yu.  …

“From hemia, yu mas stap long rod blong yu … from we God bae i stap wetem yu blong oltaem mo oltaem.”²

Ol hadtaem blong wol ia—we i tekem sik mo ded—oli pat blong plan blong fasin blong sevem man mo oli ol eksperiens we yu no save ronwe long olgeta. Hem i nid blong yumi mas stap long rod mo akseptem ol tes blong yumi wetem fet.

Be stamba tingting blong laef blong yumi i no blong stap strong long ol hadtaem blong yumi nomo. Papa long Heven i sendem Pikinini we Hem i Lavem, Jisas Kraes, olsem Sevya mo Ridima blong yumi, blong yumi save winim ol hadtaem ia we yumi fesem long wol ia; long nara toktok, Hem i mekem yumi strong long wanem yumi no strong long olgeta;³ Hem i pem praes from ol sin mo ol samting we i no stret long yumi, mo i mekem se i posibol blong yumi nomo save ded mo kasem laef we i no save finis.

Presiden Henri B. Aering i talem: “Be tes we wan God we i lavem yumi i givim long yumi i no blong luk se yumi save stap strong long hadtaem. Hem i blong luk sapos yumi save stap strong gud tru long hem. Yumi pasem tes taem yumi soem se yumi bin tingbaot Hem mo ol komanmen we Hem i givim yumi.”⁴

“Stap long rod blong yu” i wan joes we i impoten long taem blong tes. Blong tanem hat i go long God, speseli taem yumi fesem ol tes. Blong gat tingting i stap daon blong obei ol komanmen blong God. Blong soem fet blong stretem tingting blong yumi wetem hemia blong God.

Bae yumi tingting nao long aksiden long Nagoya. Mi bin save ded long aksiden ia. Be tru long gladhat blong Lod, i wan merikel mo mi no ded. Mo mi save seol safaring blong mi i blong mi lanem samting mo blong mi gro.⁵ Papa long Heven i tijim mi blong wet longtaem, blong gat sore, mo blong leftemap tingting blong olgeta we oli safa. Taem mi luksave hemia, hat blong mi i fulap long ol filing blong tangkyu long Papa long Heven from tes ia.

Putum God i kam faswan, nomata wanem tes yu fesem. Lavem God. Gat fet long Kraes mo putum yu long han blong Hem long evri samting. Moronae i mekem promes ia long ol pipol olsem: “sapos bae yufala i tanem baksaed blong yufala bakegen long evri fasin we i no olsem blong god, mo lavem God wetem ful paoa blong tingting, ful maen mo ful paoa blong yufala, afta nao, gladhat blong hem i naf blong yufala, blong tru long gladhat blong hem, yufala i save stap stret gud long Kraes.”⁶

Mi testifae wetem tru hat se God Papa mo Pikinini blong Hem we Hem i Lavem, Jisas Kraes, Tufala i stap laef mo ol promes blong God long olgeta we oli stap long rod blong olgeta mo lavem Hem bae i kamtru, iven long medel blong hadtaem, long tabu nem blong Jisas Kraes, amen.