Mi Sapraes Tumas

Ol dia brata mo sista blong mi truaot long wol, mi glad mo talem tangkyu tumas long Fas Presidensi blong invaetem mi blong serem testemoni blong mi wetem tingting i stap daon long Sabat dei ia. Ol toktok blong wan Lata-dei Sent Hym i tokbaot gud filing we mi gat naoia.

Sam dei i pas, mi bin gat spesel janis blong mit wetem Fas Presidensi mo kasem koling ia we i kam long dia profet blong yumi, Presiden Tomas S. Monson. Mi wantem stap witnes long yufala evriwan from paoa mo lav we Presiden Monson i gat taem hem i talem long mi, “Koling ia i kam long Lod Jisas Kraes.”

Toktok ia i bin gat paoa mo i tajem mi bigwan taem mi tingbaot hamas oli impoten mo olsem wanem profet blong yumi we yumi lavem i talem. Presiden Monson, Presiden Aering, Presiden Ukdof, mi lavem yufala mo bae mi givim seves long Lod mo yufala wetem evri hat, strong, tingting mo paoa blong mi.

O, mi lavem tumas Presiden Boed K. Peka, mo tufala Elda ia L. Tom Peri mo Rijad G. Skot. Mi misim olgeta tumas. Hem i wan blesing blong mi blong kasem trening mo tijing long leg blong ol dia Brata ia. Mi no kwalifae nating blong riplesem wan long olgeta, be mi gat hona yet blong save kam long kworom ia we oli bin wok long hem mo gohed wetem wok blong Lod.

Taem mi tingbaot olgeta we oli bin help blong mekem huia mi, fastaem mi tingbaot swit kompanion blong mi we i no save finis mo i no selfis, Melani. Truaot ol yia, hem i bin help blong mekem mi olsem sopsop graon blong pot i kam moa olsem wan disaepol blong Kraes. Lav mo sapot blong hem, mo hemia blong ol 5 pikinini blong mitufala, ol patna blong olgeta, mo ol 24 apu pikinini blong mitufala, i sastenem mi. Long ol dia famli blong mi, mi lavem yufala.

Olsem Nifae blong bifo, mi bin bon long wan gud papa mo mama long gospel mo olgeta oli bin ol gud papa mo mama blong sikis jeneresen i pas. Ol fas bubu blong mi we oli bin joenem Jos oli blong Inglan mo Denmak. Ol paeonia ia oli bin givim evri samting we oli gat blong laef folem gospel blong Jisas Kraes mo lego wan histri blong olgeta we oli kam afta. Mi glad mo talem tangkyu tumas from plante jeneresen famli ia blong Lata-dei Sent, mo mi save se hemia i wan gol we i klin inaf blong yumi evriwan blong traehad from.

Plante narawan i bin kontribiut blong rere long laef blong mi from niufala koling ia. I gat ol fren mo famli blong mi taem mi smol, ol lida fastaem, ol tija mo ol sapot han we i stap strong mo laef yet. Mi mas putum olgeta tu blong fas misin blong mi i go long ol Is stet mo ol misinari we mifala i lavem blong Niu Yok Not Misin. From plante long olgeta ia i givim paoa mo sepem laef blong mi, mi glad mo tangkyu tumas.

Mi bin laekem blong wok wetem ol brata blong mi long Seventi. Blong 15 yia, mi bin stap long wan gud kworom mo wetem olgeta brata blong Jos we mi lavem. Tangkyu ol dia wokman blong mi. Naoia mi luk fored blong joenem wan niu kworom. Presiden Rasel M. Nelson, lav blong mi long yu i dip tumas mo wanwan memba blong Kworom blong Olgeta Twelef Aposol.

Hem i wan blesing blong mi mo Sista Rasban blong visitim ol memba long taem oli givim wok long mi insaed jos plante taem wetem ol memba mo ol misin raon long wol. !Mifala i lavem Ol Lata-dei Sent long evri ples! Fet blong yufala i leftemap hemia blong mifala; ol testemoni blong yufala i mekem blong mifala i kam antap.

Sapos mi save livim wan smol mesej wetem yufala tedei, bae i hemia: Lod i talem se, ‘Yufala i mas lavlavem yufala.’ Olsem we mi mi lavem yufala.’² Mi trastem se bae i nogat joes, sin, o mistek we yu o eni man i save mekem we bae i jenisim lav blong Hem we Hem i gat long yu o long olgeta. Hemia i no minim se hem i mekem eskius o akseptem ol fasin blong sin—mi sua Hem i no minim olsem—be i minim blong yumi givhan long ol brata mo sista blong yumi wetem lav blong invaetem, talemaot, givim seves, mo sevem wan. Jisas Kraes i luk bitim level mo situesen we pipol i stap long hem, blong save tijim olgeta bigfala trutok ia.

Oli bin askem mi plante taem, wetaem nao mi bin kasem testemoni blong mi.

Mi no save tingbaot wetaem mi no biliv long Papa long Heven mo Jisas Kraes. Mi bin lavem Tufala stat long taem we mi bin lanem abaot Tufala long saed blong leg blong enjel mama blong mi, stap ridim skripja mo ol gospel stori. Fas bilif ia, naoia i kam wan save mo wan witnes blong wan Papa long Heven we i gat lav, we i harem mo ansarem ol prea blong yumi. Testemoni blong mi abaot Jisas Kraes, i bin kam antap tru plante spesel eksperiens, we i mekem mi kam blong save bigfala lav blong Hem blong wanwan long yumi.

Mi glad mo talem tangkyu long Atonmen blong Sevya blong yumi mo hop olsem Alma blong singaot wetem wan trampet blong God.³ Mi save se Josef Smit i profet blong God blong Restoresen mo Buk blong Momon i toktok blong God. Mo mi save se Presiden Tomas S. Monson i tru wokman blong God mo profet long wol tedei.

Taem yumi folem profet blong yumi, mi pea se yumi save gat jareti long ol hat blong yumi blong ol narafala man mo we bae yumi kam ol laef witnes mo tu “stap sapraes tumas we Jisas Hem i lavem [yumi].” O bae “i gud tumas, gud tumas long [yu mo long] mi.” long nem blong Jisas Kraes, amen.