Letem Saon blong Klia Trampet i Kamaot

Long sama ia we i jes pas, mi mo waef i bin tekem tu long ol yang apu boe blong mitufala i kam stap wetem mifala from papa mo mama blong tufala i tekpat long wan paeonia aktiviti long stek. Gel blong mitufala i wantem mekemsua se ol boe i stap praktis piano taem oli no stap long hom. Hem i bin save se sam dei long ples blong bubuman mo bubuwoman i isi blong fogetem praktis. Wan aftenun mi disaed bong sidaon wetem 13 yia apuboe blong mi, Andru, mo lisin long hem i plei piano.

Boe ia i fulap long eneji mo i laekem go aot. Hem i save spendem fultaem blong hem blong go long bus mo go fising. Taem hem i stap praktis long piano, mi save talem se hem i wantem moa blong go fising long wan reva kolosap. Bae mi lisin taem he i stap kilim wanwan ki not blong wan singsing we mi save. Evri not we hem i plei, i gat sem saon mo paoa, i mekem i had blong harem save stret miusik. Mi sidaon long saed blong hem mo eksplenem hao i impoten blong putum moa paoa long miusik ki ia mo tajem slo nomo ol ki not ia we i go wetem miusik ia. Mifala i tokbaot piano we i moa bitim wan simpol merikel. I save kam wan samting moa olsem voes blong hemwan mo ol filing mo kam wan gudfala tul blong komunikesen. Semmak olsem wan man we i toktok mo i muvaot long wan toktok i go long narawan, miusik ia tu i mas saon olsem taem muv long wan not i go long narawan.

Mifala i laf tugeta taem hem i stap traem bakegen mo bakegen. Smael long fes blong hem i kam bigwan taem miusik i stat blong kam gud bitim wanem fas saon we i wael. Mesej i bin kam klia. “Mi pikinini blong God, Hem i sendem mi long ples ia.”¹ Mi askem Andru sapos hem i save filim se tufala mesej i defren. Hem i ansa, “!Yes, Bubu man, mi save filim!”

Aposol Pol i tijim yumi abaot harem save komunikesen long tul blong miusik taem hem i raet i go long ol man Korin:

“... ol samting olsem bambu we man i stap blu long hem, mo gita … Ol samting ya oli no laef, ol man nomo oli stap mekem olgeta oli sing. Be sapos olgeta oli no saon gud, bambae yufala i no save wanem singsing we olgeta oli stap singsing long hem.

“Mo sapos pupu i krae we i no klia gud, bambae i no gat man i save se i taem blong faet.”²

Sapos i bin gat wan taem we wol i nidim ol disaepol blong Kraes we oli save talemaot gospel mesej we i klia mo i kamaot long hat, bae hem i naoia. Yumi nidim klia saon blong trampet.

Kraes i bin stret eksampol blong yumi. Hem i oltaem soem tru strong tingting blong stanap from wanem we i raet. Sem mesej blong longtaem ia, taem Hem i invaetem yumi blong tingbaot blong lavem God mo ol brata blong yumi, blong kipim evri komanmen blong God mo stap olsem ol laet long wol. Hem i no bin fraet blong toktok agensem ol paoa blong wol o ol rula blong dei blong Hem, iven taem oli agensem misin blong Hem we i kam long Hem tru Papa. Ol toktok blong Hem i no kam blong konfiusum man be blong muvum ol hat blong ol man. Hem i save gud tingting blong Papa blong Hem long evri samting Hem i talem mo mekem.

Mi lavem tu eksampol blong Pita, we i fesem ol man blong wol wetem strong paoa long tingting mo klia toktok long dei blong Pentekos. Long dei ia, pipol i bin kam tugeta long plante kantri mo tok spolem ol Sent blong bifo from oli bin harem olgeta i toktok long lanwis blong tang mo ting se oli drong. Pita, we Spirit i stap wetem hem i girap mo stanap blong protektem Jos mo ol memba. Hem i testifae wetem ol toktok ia: “Yufala ol man Judia, mo yufala evriwan we i stap long Jerusalem, yu mas save, mo harem ol toktok blong mi.”³

Afta hem i kwot aot long ol skripja we i gat ol profesi abaot Kraes mo testifae stret olsem: “From samting ya, yumi ol laen blong Isrel evriwan, yumi mas savegud se Jisas ya we yufala i nilim hem long kros, hem nao God i mekem hem i Masta blong yumi, mo i Mesaea tu.”⁴

Plante oli harem ol toktok blong hem, filim Spirit, mo 3000 sol i bin kam memba blong Jos long taem ia. Hemia i tru mo i gat paoa from wan man o woman we i wiling blong testifae taem we wol i stat blong go rong, mo hemia i wan jenis.

Taem yumi ol memba i mekem desisen blong stanap mo witnes wetem paoa from doktrin blong God mo Jos blong Hem, samting i jenisim yumi bakegen. Yumi tekem fes blong Hem long yumi. Yumi kam kolosap long Spirit blong Hem. Hem bakegen bae i save go fastaem long yumi mo stap long raet saed mo lef saed blong yumi, mo Spirit blong Hem i save stap long ol hat blong yumi, mo ol enjel blong Hem i stap raon long yumi, blong leftemap yumi.⁵

Ol tru disaepol blong Kraes oli no stap lukaotem blong mekem eskius from doktrin, taem we i no go wetem ol praktis blong wol tedei. Pol i bin wan waes disaepol taem hem i talemaot stret se hem i no “Sem long gospel blong Kraes; from hem i paoa blong God blong sevem man mo i go long evriwan we oli bilivim.”⁶ Ol tru disaepol oli ripresentem Lod, long taem we i had. Ol tru disaepol oli wantem tumas blong tajem ol hat blong ol man, be i no blong soem olgeta nomo.

Plante taem i no isi o no filim gud blong stanap from Kraes. Mi sua i bin olsem wetem Pol taem oli singaotem hem i go long fored blong King Agripa mo askem hem blong kliarem hemwan mo talem stori blong hem. Pol, kwiktaem, talemaot bilif blong hem wetem wan paoa we i mekem king i fraet mo talemaot se “kolosap” nomo bae hem i kam wan Kristin.

Ansa blong Pol i bin wanem we hem i wantem tumas blong ol pipol blong andastanem stret wanem hem i wantem talem. Hem i bin talem long King Agripa se hem i bin wanem hem i wantem se evriwan we oli harem hem bae oli no kam ol Kristin nomo, be blong oli kam ol disaepol blong Kraes.⁷ Olgeta we oli toktok klia oli save mekem hemia i hapen.

Ova long plante yia we mi bin stadi abaot drim blong Lihae long Buk blong Momon,⁸ mi stap tingbaot bigfala haos we i gat fulap spes olsem wan ples we ol rabis man nomo oli stap long hem. Bilding ia i fulap long ol pipol, we oli stap jik mo poenem fingga long ol fetful wan we oli stap hang long rel blong aean, we i olsem toktok blong God, mo oli stap go long tri blong laef, we i ripresentem lav blong God. Sam oli no save tekem fos blong ol pipol we oli stap jikim olgeta mo oli tekem nara rod. Ol narawan oli disaed blong joenem olgeta long bilding. ?Oli no bin gat strong paoa long tingting blong tok stret agensem ol rabis toktok o ol mesej blong wol?

Taem mi stap luk wol blong tedei we i stap muvaot longwe long God, mi tingbaot bilding ia we i stap gro long saes. Plante oli faenem olgetawan oli stap wokbaot long bilding ia we i fulap long spes, mo no luksave se oli stap folem pat blong kastom ia. Plante taem oli foldaon long ol temtesen mo ol mesej. Sloslo, yumi faenem olgeta oli stap jikim o mekem noes wetem olgeta we oli stap spolem o jikim olgeta.

Blong plante yia, mi ting se olgeta we oli stap jik, oli stap pleplei nomo long olgeta we oli fetful, be ol voes we i kam long bilding tedei oli toktok mo mekem samting long wan defren fasin. Olgeta we oli jik oltaem, oli traem blong putumdaon ol simpol mesej blong gospel taem oli tajem sam pat blong Jos histri o agensem strong wan profet o ol nara lida. Oli stap agensem tu stamba blong doktrin blong yumi mo ol loa blong God, we i stap stat long Kriesen blong wol. Yumi, olsem ol disaepol blong Jisas Kraes mo ol memba blong Jos blong Hem, oli mas neva letem rel blong aean ia i go. Yumi mas letem klia trampet ia i saon strong insaed ol sol blong yumi.

Simpol mesej i we God hem i Papa blong yumi long Heven mo Jisas Kraes Pikinini blong Hem. Gospel i kambak long las dei ia tru ol profet we oli laef mo pruf blong hem i Buk blong Momon. Rod blong stap glad hem i tru famle yunit olsem we Papa long Heven i bin oganaesem bifo mo i rivilim. Hemia i miusik blong mesej we yumi save gud we plante i save, from oli bin harem bifo long laef bifo laef long wol ia.

Olsem ol Lata-dei Sent, hem i taem blong yumi blong stanap mo testifae. Hem i taem blong ol not blong miusik blong gospel blong i kam antap bitim noes blong wol. Mi ademap testemoni blong mi long mesej blong Sevya mo Ridima blong wol. !Hem i laef! Gospel blong Hem i kambak mo ol blesing blong stap glad mo pis i save stap long laef ia taem yumi folem ol komanmen blong Hem mo wokbaot long rod blong Hem. Hemia i testemoni blong mi long nem blong Jisas Kraes, amen.