Klin mo Tabu Trutok

Ol dia brata mo sista, hem i bin plante yia nao kasem tedei we taem wan jeneral konfrens i tekem ples, wan long olgeta Presiden ia, Boed K. Peka, Elda L. Tom Peri o Rijad G. Skot bae i no mestem blong tekem jea kwik taem nomo biaen long stan ia mo toktok long wan long ol sesen ia. Ol memori blong yumi long olgeta i fulap wetem sore, mo mi onarem olgeta, wanwan long olgeta i spesel tumas be oli stap wan, long witness mo testemoni blong olgeta long Jisas Kraes mo Atonmen blong Hem.

Mo tu, olsem yufala, mi kasem fulpaoa insaed mo sastenem Presiden Tomas S. Monson olsem profet, sia, mo reveleta, mi filim glad long fet mo diuti blong hem long seves olsem wan aposol blong 50 yia.

Mo folem hemia, long Tiusdei moning long wik ia, stret afta long 9:00 long moning taem ol Bishopric i statem wan miting wetem Esia Eria Presidensi, we oli stap ia from konfrens, mi kasem wan kol blong mitim Presiden Monson, folem wetem ol kaonsela blong hem. Samtaem afta, taem mi wokbaot i go long miting rom we i stap tugeta wetem ofis blong hem, ating mi bin soem se mi fraet long taem ia we mi sidaon narasaed long tebol, taem hem i stap toktok long wan sopsop voes blong wari blong mi i go daon. Hemi komen, long yia blong mi, hemi luk olsem mi yangfala smol mo yang bitim yia blong mi.

Afta samtaem i pas, Presiden Monson i talem se hem i stap wok folem wil blong Lod, mo hem i stap givim koling ia blong mi givim seves insaed long Kworom blong olgeta Twelef. Hem i askem mi sapos mi akseptem koling ia, we mi bin ansa se mi akseptem koling ia, afta mi bin stap pulum nogud win blong mi, wetem bigfala sapraes. Mi ansa se mi akseptem koling ia. Mo afta, bifo mi talemaot fulwan filing blong mi, plante oli filing se mi no save mekem, Presiden Monson i toktok long mi long wan kwaet wei, hemi tokbaot filing blong hem long taem we oli bin singaotem hem plante yia i pas olsem wan Aposol blong Presiden Deved O. MaKei, we long taem ia tu hem i filim se hem i no inaf. Hem i givim instraksen long mi kwaet nomo se, “Bisop Stivenson, Lod i kwalifaem olgeta we Hem i singaotem.” Ol kwaet toktok blong profet i bin stamba blong pis, i stamba blong kwaet filing ia taem mi lukluk miwan wetem plante harem nogud mo wan stamba blong kamfot long taem blong wari aoa we i stap pas dei mo naet stad long taem ia.

Mi talem wanem we mi jes talem long yufala long swit waef blong mi, Lisa, afta long dei ia, mitufala sidaon long wan kona long Tempol Skwea, wetem kwaet lukluk long tempol mo histri Tabenakol we i ledaon long fored blong mitufala. Taem mitufala i stap traem blong andastanem mo wokemaot ol taem long dei ia, mifala i faenem stamba long fet blong mitufala long Jisas Kraes mo save blong mitufala long bigfala plan blong glad. Hemia i lidim mi blong talemaot bigfala lav blong mi long Lisa. Hem i stamba blong glad long laef blong mi mo wan gudfala pikinini gel blong God. Laef blong hem i fulap long kaen seves mo lav we i nogat kondisen long evriwan. Mi bae traehad blong stap klin inaf from blesing blong stap wetem hem long laef we i no save finis.

Mi talemaot dip lav blong mi long ol fo pikinini boe blong mifala mo ol famle blong olgeta, tri long olgeta i stap ia wetem ol naesfala waef blong olgeta, mama blong sikis apu pikinini; namba fo, wan misinari, i kasem wan spesel raet blong stap bitim taem we ol misinari i sapos blong slip blong wajem miting ia wetem misin presiden mo waef blong misin presiden long misin hom long Taewan. Mi lavem wanwan long olgeta mo lavem olsem wanem olgeta i lavem Sevya mo gospel ia.

Mi talemaot lav blong mi long wanwan memba blong famle blong mi: long dia mama mo papa blong mi, we oli ded las yia, we oli helpem mi blong gat wan testimony we i luk olsem i stap yet folem ol fas memori blong mi. Mi talem bigfala tangkyu long brata, mo ol sista blong mi mo ol fetful patna blong olgeta, hemia wetem famle blong Lisa, we plante i stap ia tedei. Mi talem tangkyu long plante nara famle, ol fren, ol misinari, ol lida, mo ol tija we mi save long laef long mi.

Mi bin gat blesing blong wok kolosap wetem memba blong Fas Presidensi, olgeta Twelef, olgeta Seventi, mo olgeta okseleri presidensi. Mi talemaot bigfala lav mo respek blong mi long wanwan long yufala ol sista mo brata mo bae yufala i traehad blong stap klin blong yumi gohed long frensip ia. Prisaeding Bisoprik i yunaet wetem yuniti long heven. Mi bae misim evri dei frensip blong mi, blong wok wetem Bisop Kose mo Bisop Devis.

Mi stanap long fored blong yufala olsem wan saen blong ol toktok blong Lod we i stap long rekod insaed fas seksen blong Doktrin mo Kavenan: “Blong olgeta we oli no strong mo oli simpol bae oli talemaot ful gospel blong mi kasem evri en blong wol, mo long fored blong ol king mo ol man blong rul.”¹ Hemia ol toktok we Lod i talemaot we i soem lav blong wan Papa long Ol pikinini blong Hem. “Taswe, Mi Lod, we mi save bigfala trabol we bae i kam long ol man we oli stap laef long wol, mi bin singaotem wokman blong mi, Josef Smit Junia, mo mi stap long heven mo toktok long hem, mo givim ol komanmen long hem.”²

Laving Papa blong yumi long Heven mo Pikinini boe blong Hem, Jehova, we i gat save long en stat long stat finis,³ i bin openem ol heven mo wan niu dispensesen blong pemaot disasta ia we Olgeta i save se bae i kam. Aposol Pol i tokbaot disasta ia olsem wan “taem we i nogud tumas.”⁴ Blong mi, hemia i stap talem se praes we Papa long Heven i bin pem blong nogud taem ia i blong yumi tu yumi save laef long dispensesen ia.

Taem mi stap harem nogud se mi no save mekem long wik ia, mi kam blong luk wan klia bilif we i mekem mi gat wan tingting i stap daon mo kamfot: blong no lukluk long wanem we mi no save mekem be long wanem mi save mekem. Mi save testifae long klia mo tabu tru tok blong gospel ia.

Hemia i ol toktok we mi serem handred taem wetem ol man, we i stap long Jos mo plante we oli no memba: “God i papa blong yumi long heven. Yumi ol pikinini blong Hem…Hem i krae wetem yumi taem yumi safa mo glad taem yumi mekem wanem we i raet. Hem i wantem toktok wetem yumi, mo yumi save toktok wetem Hem tru long ones prea…

Papa long Heven i givim long yumi, ol pikinini blong Hem, wan wei blong…gobak stap wetem Hem. Stamba blong plan blong Papa long Heven i Atonmen blong Jisas Kraes.”⁵

Papa long Heven i sendem Pikinini blong Hem blong pem praes from ol sin blong evri man. From ol klin mo tabu tru tok, mi talemaot testemoni blong mi, mo mi mekem olsem long nem blong Jisas Kraes, amen.