Yumi Kasem Ol Tes Mo Temtesen—Be Yumi Kasem help

Long laef blong yumi, yumi go tru long ol tes mo temtesen. Yumi gat janis ia blong yusum fridom blong joes mo blong helpem wan narawan. Ol trutok ia oli ol pat blong naesfala mo stret plan blong Papa blong yumi long Heven.

Presiden Jon Teila i bin tijim: “Mi bin harem Profet Josef i talem, toktok ia taem hem i stap toktok long Olgeta Twelef long wan taem: ‘Bae yu go tru long evri kaen tes. i nid blong Lod i traem yu, semmak olsem i traem Ebraham mo ol nara man blong God, mo (hem i talem) God bae i testem yu kasem ful mak we yu save kasem.’’’¹

Taem we yumi kasem yia we yumi save stap akaontebol, ol tes mo temtesen i blong evriwan long wol. Samtaem bae oli save kam olsem ol hevi trabol, be bae oli givim yumi strong paoa mo mekem yumi gro taem yumi winim.

Nomata long hemia, ol hevi trabol ia oli no blong yumi karem olgeta yumiwan nomo. Alma i bin tijim se: “Yufala i glad blong karem ol hevi samting blong wanwan long yufala, blong mekem se oli nomo hevi.”² Ol toktok ia i soem se yumi gat responsabiliti blong helpem wanwan long yumi. Responsabiliti ia i save kam tru long Jos koling, wan wok, wan gudfala rilesensip, o pat blong tabu wok olsem wan papa mo mama, hasban mo waef, o ol famle memba—o from nomo yu pat long famle blong God.

Bae mi soem fo wei we ol hevi trabol blong yumi bae oli nomo hevi blong karem taem yumi stap helhelpem yumi.

1. Sevya i talem: “Sapos man i fosem yu blong yu karem basket blong hem wan kilometa, olsem we hem i gat raet blong mekem, be yu mas karem i go wan kilometa bakegen.” ³ Olsem wan eksampol: oli askem yumi blong go long tempol evri taem, taem we i posibol. Blong go long tempol i nidim yumi sakrifaes long taem mo mane, mo moa nao long olgeta we oli mas travel longwe. Nomata long hemia, sakrifaes ia i save stap olsem wan pat blong fas kilometa.

Yumi stat wokbaot long seken kilometa taem yumi andastanem ol toktok ia: “faenem, tekem, mo tijim,” ⁴ taem yumi lukaotem mo rere long ol nem blong ol bubu blong yumi, blong mekem ol odinens, taem yumi help taepem rekod, taem yumi givim seves long tempol, mo taem yumi lukaotem ol wei blong helpem ol narafala blong oli gat wan gudfala eksperiens long tempol.

Taem mi stap olsem wan Eria Seventi, wan long ol stek insaed long kodineting kaonsel i pat blong wan bigfala tempol trip. Tempol we ol memba i go long hem i smol, mo sam long ol memba, we nomata oli mekem wan 12 aoa trip, oli no save go insaed long tempol from we namba i go bitim namba we tempol i save tekem evri dei.

Samfala dei afta long trip ia, mi visitim stek ia mo askem presiden sapos mi save toktok wetem sam long ol memba we oli no bin save go insaed long temple long dei ia. Wan long ol brata we mi visitim i talem long mi se: “Elda, yu no wari. Mi bin stap long haos blong Lod. Mi sidaon long wan stul long garen blong flaoa mo tingting hevi long ol odinens long maen blong mi. Afta oli givim mi janis ia blong go insaed, be mi letem narafala brata i go long ples blong mi. Hem i kam long tempol blong fas taem blong sil wetem waef blong hem. Tufala i bin gat janis ia blong stap long tu sesen long dei ia. Lod i save mi, mo Hem i bin blesem mi, mo mifala i oraet.”

2. Smael. Smol aksen ia i save helpem olgeta we oli wari o oli gat plante trabol. Long taem blong prishud sesen long las Epril jeneral konfrens, mi bin stap sidaon long fored wetem faef niufala Jeneral Atoriti we oli jes jusum. Mifala i stap sidaon long ples we ol sista blong okseleri presidensi oli stap sidaon long hem naoia. Mi bin filing fraet mo wari wetem niu koling blong mi.

Taem we yumi stap singsing long seken hym, mi filim save se wan man i stap lukluk mi. Mi tingting long miwan se: “i gat moa long 20,000 pipol insaed long bilding ia, mo plante long olgeta i stap lukluk i kam ia nao. Yes, wan man i stap lukluk yu.”

Taem mi stap gohed blong singsing, mi filim bakegen se wan man i stap lukluk mi. Mi lukluk i go long laen jea we ol Twelef Aposol oli stap sidaon mo luk se Presiden Rasel M. Nelson i bin tanem raon, mo stap lukluk i kam long ol jea we mifala i stap sidaon. Ae blong mi i kasem ae blong hem, mo hem i givim mi wan bigfala smael. Smael ia i givim mi pis long wari hat blong mi.

Afta we Jisas Kraes i laef bakegen long ded, Hem i bin visitim ol narafala sipsip blong Hem. Hem i jusum mo odenem twelef disaepol, mo wetem atoriti ia, olgeta oli lukaot long ol pipol. Lod Jisas Kraes Hemwan i stanap long medel blong olgeta. Lod i askem olgeta blong nildaon mo prea. Mi no save gud se ol niufala twelef disaepol we oli bin jusum mo odenem oli bin wari wetem koling blong olgeta o no, be skripja i talem se: “Mo i bin hapen se Jisas i bin blesem olgeta taem we oli stap prea long hem; mo fes blong hem i bin smael long olgeta, mo laet blong fes blong hem i saen long olgeta.”⁵ Long las jeneral konfrens, wan smael nomo i mekem trabol blong mi i nomo hevi, kwiktaem nomo mo long wan sapraes wei.

3. Talemaot lav mo sore filing blong yu long ol narawan. Sapos yu holem prishud paoa, plis, yusum paoa ia long bihaf blong ol pikinini blong God, givim blesing long olgeta. Talem ol toktok blong kamfot long pipol we oli stap safa o stap go tru long ol hadtaem.

4. Stamba long plan blong God, hem i Atonmen blong Lod Jisas Kraes. Tekem wan taem long wan wik, blong tingting kwaet blong longtaem, olsem we Presiden Josef  F. Smit i bin mekem blong tingbaot “Lav, we i bigwan mo i mekem man i sapraes, we Papa mo Pikinini i bin soemaot tru long taem we Ridima i bin kam long wol”⁶ Invaetem ol narawan blong kam long jos mo stap klin blong save tekem sakramen; hemia i mekem se moa pikinini blong Papa long Heven oli tingtingbak long Atonmen. Mo, sapos yumi no klin inaf, yumi save sakem sin. Tingbaot se Pikinini blong Hae God i kamdaon bitim evri samting mo tekem long Hem ol rong fasin blong yumi, ol sin, fasin blong brekem loa, ol sik, ol sobodi, ol hadtaem, mo wari. Skripja i tijim se, “Hem we i go antap i go long heven, mo tu, hem we i bin go daon, daon bitim evri samting, mekem se hem i andastanem gud evri samting.”⁷

I nomata wanem nao traehad blong yumi wanwan—sapos hem i wan sik o harem nogud we i stap longtaem o ol safaring blong temtesen mo tes blong enemi — Gudfala man blong lukaot long sipsip i stap. Hem i singaotem yumi long nem mo talem: “Yufala evriwan we i stap wok had tumas, mo we yufala i stap karem ol hevi samting, yufala i kam long mi, [bambae] mi mekem yufala i spel gud.”⁸

Mi wantem talem sot ol fo poen ia:

Faswan—go wan kilometa bakegen moa.

Nambatu—plis smael. Smael blong yu bae i helpem ol narawan.

Nambatri—talemaot lav mo sore blong yu.

Nambafo—invaetem ol narawan blong kam long Jos.

Mi testifae abaot Sevya. Jisas hem i Kraes, Pikinini blong God we i stap laef, mo Hem tu i stap laef. Mi save se Hem i sastenem, wetem ful paoa blong bodi mo paoa blong Hem, plan ia blong Papa. Mi save se Presiden Tomas  S. Monson hem i wan profet we i stap laef. Hem i stap holem ol ki blong mekem wok blong God long wol ia. Mi save se yumi save helhelpem yumi olsem ol pikinini blong Papa long Heven long taem blong ol tes mo temtesen, long nem blong Jisas Kraes, amen.