Te Tibwanga ae Tabu

Tariu aika tangiraki, I tataro ibukin te Tamnei bwa e na kaira au maroro n te tairiki aei. Ti kabaeaki ni ikotaki n te karai ae ataaki. Ti a tia n onimakinaki ni uota ana nakoanibonga te Atua ao ni mwakuriia n Arana. Ngaira ti karekea te tibwanga ae tabu aei. A mwaiti bwaai aika a kantaningaaki ma iroura.

Ti wareka Doctrine ao Covenants, mwakoro 121, kibuna 36, “Inaomatan te Nakoanibonga e tomaki raoi ma mwaakan karawa” Ai tamaroara te bwaintangira ae ti a anganaki. Tibwangara bon kawakinan ao ni katana te nakoanibonga anne ao n tau ibukin kakabwaia ni kabane aika mimitong are e a tia ni katauraoi Tamara are I Karawa ibukira—ao ibukiia tabeman rinanora.

N tabo nako ake ko nako iai, te Nakoanibonga anne e iriko. Kam tei n tabo aika a tabu? Imwain ae ko toka rengerenge ao am nakoanibonga n reke n te kanganga man waaki ni katabetabe n taabo ke ni iri waaki ni kakukurei are aki tau nakoim ke te nakoanibonga, tooki ao iangoia bwa tera ae e na reke imwina. Uringnga bwa antai ngkoe ao tera ae e kantaningaia te Atua bwa ko na karekea. Ngkoe te nati ni berita. Ngkoe te mwane ae korakora. Ngkoe natin te Atua.

Te bwaintangira ae kakaawaki aei ni mwaakan te Nakoanibonga e uotii tiaki ti tibwanga aika matoatoa ma bon kakabwaia aika onoti ibukira ao ibukiia tabeman. Au kantaninga, bwa n tabo nako ake ti mena iai, ti na bon teimatoa n tainako n tau ni wetea mwaakana, bwa ti aki kona n ataia bwa nningai ae ti kainnanoia iai ke n ningai ae ti na karaoa iai tibwangara.

N tain te Kauoua ni Buaka n te Aonaaba, raraou e mwakuri n te Betebeke Maiaki ngke e katiaki ana wanikiba ni bwaka i taari. Ngaia ma raona tabeman a waekoa ni kibanako n te baeratuute man te wanikiba are e urarake, a katibua aia bwai ni kamaiu, ao a maiu ibukin teniua te bong.

N te kateniua ni bong a nora te bwai are a ataia bwa te waa ni kamaiu. E katuanakoia. Te ingabong are imwiina a manga katuanakoaki naba. A moanna ni bwarannano ngkai a ataia aio te kabanea ni bong are e kona n roko iai te waa ni kamaiu n te tabo aei.

Ngkanne te Tamnei ae Raoiroi e taetae nakon raraou: “Iai iroum te nakoanibonga. Tuua nakoia taan kamaiu bwa a na anai ngkami.”

E karaoa are e tuangaki: “N aran Iesu Kristo ao man mwaakan te Nakoanibonga, rairaki ao anaira.”

Inanon tabeua te miniti te kaibuke e a mena irarikiia, ni buokiia nako aon te teeke. Te tia uota te Nakoanibonga ae kakaonimaki ao e koro raoi, n ana kanganga ae korakora, e a tia ni kammwakura te Nakoanibonga anne, ao ni kakabwaia maiuna ao maiuia tabeman.

Ti bia nanomatoa, ikai ao ngkai, n tatauraoi ibukin ara tai ni kainnanoaki, ara tai n ibuobuoki, ara tai ni kakabwaia.

Ngkai ti kaina ara tetere n te Nakoanibonga ni kabuta aei, I taetae nakoimi bwa ngkami “te roro ae rineaki, te Nakoanibonga ae rine” (1 Betero 2:9). Au kantaninga bwa ti na bane n tau ibukin te karineaki aikai mai karawa, I tataro ma nanou ni kabane n aran Iesu Kristo, ara Tia Kamaiu, amen.