Im En̄in Mour Indeeo

Jodikdik ro m̧ōtta, jemaron̄ jeļā Anij jān ad jar.

Ilo Eprōļ 7, 1829, Oliver Cowdery eo 22 an iiō ekar jino jerbal āinwōt juon rijeje n̄an Josep Smith eo 23 an iiō. Rekar iddik—āinwōt kom̧. Oliver ekar kajjitōk kōn juon kam̧ool jān Anij kōn Jepļaaktok eo im jerbal eo an ie. Ilo juon uwaak, ekar bōk revelesōn in:

“Lo, kwo jeļā bwe kwaar kajjitōk jān Eō im Iaar kōmeramļo̧k am ļōmņak. …

“Aaet, Ij ba n̄an eok, bwe kwōn maron̄ jeļā bwe ejjeļo̧k bar juon ijello̧kun wōt Anij ejeļā koļmānļo̧kijeņ ko am im kōttōpar ko an būruōm̧. …

“… Eļan̄n̄e kwōj kōņaan juon kam̧ool eļapļo̧k, keememej ilo ļōmņak bon̄ōn eo kwaar kūr n̄an Eō ilo būruōm̧. …

“Iaar jab kwaļo̧k aenōm̧m̧an n̄an am ļōmņak kōn menin ke … ? Ta kam̧ool eļapļo̧k kwo maron̄ bōke jān jān Anij?”³

N̄e kom̧ij jar kōn tōmak, kom̧ naaj en̄jake iakwe eo an Anij āinwōt an Jetōb eo An kōnono n̄an jetōb eo ami. Mekarta ewi jon̄an ad make iaad ak jab lukkuun jeļā ilo iien ko jemaron̄ en̄jake, kom̧ij jab make iami ilo laļ in. Anij ejeļā wōn, kwe. Ilo am jar, kom̧ naaj jeļa Kajjen.

Ilo ami ekkatak jeje ko rekwojarjar, kom̧ ban wōt ekkatak kōn Rilo̧mo̧o̧r eo, ak kom̧ maron̄ lukkuun jeļā Rilo̧mo̧o̧r eo.

Ilo Eprōļ 1985, Elder Bruce R. McConkie ekar kōnono ilo kweilo̧k eo eļap—baj 13 raan ko m̧okta jān an kar mej. Ekar kōjem̧ļo̧k kōnono eo an kōn naan in kam̧ool in:

“Ij juon iaan rikam̧ool ro, im ilo raan eo ej itok inej en̄jake jenkwan dila ko ilo Pein im ilo Neen im Neen enaaj tutu kōn dānin kōmjaļaaļ in meja.

“Bōtaab Ijjamin jeļā em̧m̧anļo̧k jān in bwe Ijeļā kiiō bwe E ej Nejin Anij Kajoor Pōtata, bwe E ej ad Rilo̧mo̧o̧r im Ripinmuur, im bwe lo̧mo̧o̧r ej itok im kōn bōtōktōk in pinmuur eo An im ilo ejjeļo̧k bar iaļ.”⁴

Kōjro me jekar ron̄ an Elder McConkie kōnono raan ņe rej jāmin meļo̧kļo̧k aer kar en̄jake. Ilo an kar jino kōnono eo an, ekar kwaļo̧k etke kam̧ool eo an ekar lukkuun kajoor. Eaar ba:

“Ilo kōnono kōn men kein rekabwilōn̄lōn̄, inaaj kōjerbal naan ko aō make, men̄e kom̧ maron̄ ļōmņak rej naan ko an jeje ko rekwojarjar. …

“Em̧ool bwe er eo raar m̧oktata kwaļo̧k jān ro jet, bōtaab kiiō rej aō, bwe Jetōb Kwojarjar an Anij eaar kam̧ool n̄an eō bwe rej m̧ool, im kiiō āinwōt n̄e Irooj eaar kwaļo̧ki n̄an eō ilo jinoin tata. Kōn mein iaar ron̄ Ainikien im jeļā naan ko an.”⁵

Ilo am̧ katak im kejōkļo̧kjeņ kōn jeje ko rekwojarjar, kwonaaj ron̄ ainikien Anij, jeļā An naan, im jeļā E. Anij enaaj kwaļo̧k mool eo ejjelok jemeļo̧kin n̄an kwe make. Katak im pedped kein renaaj m̧ōttan mour eo am̧ im renaaj waļo̧k jān aolepān am̧.

N̄an kakkobaba n̄an jar ko ad im ad ekkatak jeje ko rekwojarjar, jej aikuj in kōm̧m̧ane Ankilaan.

Ilo m̧ōko im̧ōd, jekōņaan bwe ajri ro nejid ren ekkatak n̄an kile ainikien Jetōb eo. Jej tōmak bwe menin ej waļo̧k n̄e jej katak Bok in Mormon eo kajjojo raan āinwōt juon baam̧le. Naan in kam̧ool ko ad rekar kajoorļo̧k ilo ad kōnono kōn m̧ool ko rekwojarjar.

Katak kōn jeje ko rekwojarjar emaron̄ erom juon wāween Jetōb eo ej letok n̄an kōj kajjojo iien ekkatak. Ilo am katak jeje ko rekwojarjar kajjojo raan, ippem̧ make im ippān baam̧le eo am̧, kwonaaj ekkatak n̄an kile ainikien Jetōb eo im kom̧ naaj jeļā Anij.

N̄an kakkobaba n̄an jar ko ad im ad ekkatak jeje ko rekwojarjar, jej aikuj in kōm̧m̧ane Ankilaan.

Rilo̧mo̧o̧r eo ej waanjon̄ak eo em̧m̧antata. Ekar ba, “Bwe Iar itok jān lan̄, jab bwe In kōm̧anm̧an ankil Aō, a ankilaan Eo ear jilkintok Eō.”⁶

Ke Rilo̧mo̧o̧r eo ekar waļo̧k ļo̧k n̄an RiNipai ro, Ekar ba, “Lo, N̄aij meram eo im mour eo an laļ; im Iaar idaak jān kap meo̧ eo Jema eaar letok n̄an Eō, im kar kaiboojoj Jema ilo bōk Ioō jero̧wiwi ko an laļ, eo ilo e Iaar pokake ankilaan Jema ilo men otemjeļo̧k jān jino in.”⁷

Kwe im n̄a naaj kōm̧m̧ane ankilaan Jemen jān ad kautiej bujen ko ad, kōjparok kien ko, im jerbal n̄an Anij im ro riturir.

Kōrā eo pāleeō, Rhonda, im n̄a ewōr ro jinem im jemem armej ro rem̧m̧an—āinļo̧k wōt ro jinemi im jememi. Ak juon men me ij iakwe kōn ro jinō im jema ej bwe relukkuun wūjlepļo̧k mour ko aer n̄an jerbal n̄an Anij, im rekar katakin kōm̧ menin.

Ke jinen im jemān Rhonda rekar m̧are ium̧win jejjo iiō, jemān eo me 23 an iiō ekar etal im jerbale juon mijen. Ekar likūt kōrā eo pāleen edik im leddik eo nejin ruo an iiō. Innām kōrā eo pāleen ekar bōk kūr n̄an jerbal ippān ilo allōn̄ ko jiljilimjuon āliktata an mijen eo an—etal jān leddik eo nejin ium̧win kōjparok an ro nukin.

Ālkin jejjo iiō tokālik, kiiō ewōr emān nejier ajri, rekar em̧m̧akūt n̄an Missoula, Montana, bwe jemān en jikuuļ in university. Bōtaab, rekar pād ijeņ ium̧win jejjo wōt allōn̄ ke Būreejtōn Spencer W. Kimball im Elder Mark E. Petersen rekar leļo̧k juon kūr n̄an em̧m̧aan in jemān kōrā eo pāleeō bwe en erom būreejtōn eo ekāāl an Missoula stake. Ekar 34 wōt an iiō. Ļōmņak ko kōn university rekar jako, ke ekar pukot n̄an kōm̧m̧ane ankilaan Irooj—im jab eo an make.

Ro jinō im jema rekar jerbal ilo tampeļ ium̧win elōn̄ļo̧k jān 30 iiō ko—Jema ekar āinwōt juon ej kōm̧m̧ani jerbal in kain̄i in liāp ko, im jinō āinwōt juon ej jerbal e kain̄i ko. Rekar barāinwōt jerbal ļalem mijen ko, Riverside, California; Ulaanbaatar, Mongolia; Nairobi, Kenya; Nauvoo Illinois Temple; im Monterrey Mexico Temple. Ilo Mexico, rekar lukkuun jerbal n̄an katak bar juon kajin, eo ekar jab pidodo n̄an ro 80 aer iiō. Ak erro kar kōņaan kōm̧m̧ane ankilaan Irooj ijjelo̧kin wōnm̧aanļo̧k im kōm̧m̧ani men ko rekōņaan.

N̄an baj aolep Armej ro Rekwojarjar ilo Raan-ko Āliktata retiljek ipeļaakin laļ in, ikōņaan āliji naan kein Irooj ekar kōnono kaki n̄an rikanaan Nipai: “M̧ōņōņō n̄an kwe, … kōn men ko kwaar kōm̧m̧ani kōn ejjeļo̧k ebbeer …[bwe kwe] kwaar jab pukot mour eo am̧ make ak kwaar pukot Ankilaō, im n̄an kōjparok kien ko Aō.”⁸

Ilo ad kappukot n̄an kōm̧anm̧an ankilaan Anij ilo tiljek jerbal n̄an E im ro riturir, jej en̄jake mālim im em̧ool itok n̄an E.

Rilo̧mo̧o̧r eo ej jiron̄ kōj bwe wāween eo em̧m̧antata n̄an jeļā Anij ej erom āinwōt E. Eaar katakin: “Armej rot kom̧ij aikuj in āinwōt? Em̧ool ij ba n̄an kom̧, em̧ool āinwōt N̄aij.”⁹

Lukkuun erreo eaorōk n̄an erom āinwōt E. Ekar kean̄ kōj “kokwōjarjar kom̧ make; aaet, karreoik būruōmi, im kwaļ pā ko peimi, … bwe In maron̄ karreoik kom̧.”¹⁰ Jino ilo iaļ eo n̄an erom āinwōt E, jej ukweļo̧k, bōk jeorļo̧k bōd jān E, im Ej kareeoik jetōb ko ad.

N̄an jipan̄ kōj āinwōt ad eddōkļo̧k n̄an Jemād, Irooj ekar letok n̄an kōj kallim̧ur in: “Jabdewōt armej eo ej eļļo̧k jān jero̧wiwi ko an im itok n̄an Eō, im kūr ioon Eta, im pokake Ainikiō, im kōjparok kien ko Aō, enaaj lo turun Meja im jeļā bwe N̄aij mour.”¹¹

Jān tōmak eo ad ilo en̄taan in pinmuur eo An, Rilo̧mo̧o̧r eo ej karreoik kōj, kōmour kōj, im kōmaron̄ kōj n̄an jeļā E jān jipan̄ kōj āinwōt E. Mormon ekar katakin, “Jar n̄an Jemād kōn aolep kajoor in bōro, … bwe kom̧in maron̄ erom m̧aan [im leddik] ro nejin Anij; bwe n̄e Enaaj waļo̧k jenaaj āinwōt E.”¹² Ilo ad kajjieon̄ erom āinwōt Anij, Emaron̄ kōm̧m̧an bwe jen ļapļo̧k jān jon̄an eo jeban kar maron̄ kōm̧m̧ane n̄an kōj make.

N̄an jipan̄ kōj ilo ad kajjieon̄, Anij ekar letok n̄an kōj ritōl ro im rikatakin ro. Ikōņaan kwaļo̧k en̄jake ko aō kōn juon iaan ro aō, Elder Neal A Maxwell. Ekar lukkuun pukot n̄an leļo̧k ankilaan n̄an ankilaan Jemān ilo kijejeto ko an n̄an erom āinwōt E.

Emootļo̧k 20 iiō ko, ekar kwaļo̧k en̄jake in an ippa ālkin an kar nan̄inmej kōn kāānjer. Ekar ba n̄an n̄a, “Ikōņaan bwe in pād ilo tiim eo, ilo turājet eo [an rōn̄ōl] eo ak side in. Ijjab kōņaan jijet ilo tūrājet eo juon. Ikōņaan ikkure ilo ikkure eo.”¹³

Ium̧win wiik kein tok, ekar jānliklik n̄an kajjitōk ippān Anij n̄an kōmour e; ebaj kōņaan wōt kōm̧m̧ane ankilaan Anij. Kōra eo pāleen, Colleen, kar kwaļo̧k bwe jan̄ eo an Jisōs jinointata ilo Jikin Kallib Gethsemane ekar “Eļan̄n̄e e maron̄e en ilo̧k kab in jān Eō.” Innām menin wōt Rilo̧mo̧o̧r eo eba,“A en jab ankil Aō, a ankil Am̧.¹⁴ Ekar rōjan̄ Elder Maxwell n̄an ļoor waanjon̄ak eo an Rilo̧mo̧o̧r eo, n̄an kajjitōk kōn rōļo̧k, innām leļo̧k ankilaan n̄an ankilaan Anij, eo ekar kōm̧m̧ane.¹⁵

Alkin an kar pād ilo kōm̧adm̧ad eļap, m̧ōjņo̧ ium̧win enan̄in juon iiō, ekar bar lukkuun jepļaaktok “ikkure eo.” Ekar jerbal bar 7 iiō ko.

Ekar wōr jet aō jerbal ko ippān ilo ālkin iiō kein. Ikar en̄jake An jouj, tūriam̧o̧, im iakwe. Ikar kam̧ool an eddōkļo̧k jetōb eo an jān an kar ioon en̄taan im an wōnm̧aanļo̧k im jerbal, ilo an kajjieon̄ erom āinwōt Rilo̧mo̧o̧r eo.

Ritōl eo eļap im rikatakin eo, ej pād n̄an kōj aolep, ej ad Irooj im Rilo̧mo̧o̧r, Jisōs Kraist, eo ekar ba: “N̄a iaļ, im m̧ool, im mour. Ejjeļo̧k armej ej itok n̄an Jema, eļan̄n̄e jab kōn Eō.”¹⁶ Itok im Ļoor Eō.”¹⁷

Ro jeiū im jatū, jeļā Anij ej kijejeto an mour in. “Im men in ej mour indeeo, bwe [kōj] jen jeļā Kwe juon wōt Anij e m̧ool, im Jisōs Kraist, eo [Jemān] Kwaar jilkintok.”¹⁸

“Ta jeban bun̄m̧aanļo̧k ilo juon jibadbad eļap ke? … Peran, ro [m̧ōtta reddik] im wōnm̧aanļo̧k, wōnm̧aanļo̧k n̄an anjo̧!”¹⁹

Anij ejeļā wōn kwe, im Ej karuwaineneiktok eok n̄an am̧ jeļā kōn E. Jar n̄an Jemed, katak jeje ko rekwojarjar, pukot n̄an kōm̧m̧ane ankilaan Anij, kajjieon̄ erom āinwōt Rilo̧mo̧o̧r eo, im ļoor rikatakin ro rewāppen. Ilo am̧ kōm̧m̧an āindein, kwonaaj jeļā Anij im Jisōs Kraist, im kwōnaaj bōk mour indeeo. En̄in ej kūr eo aō n̄an kom̧, āinwōt juon rikam̧ool em̧ōj kapiti kōn Er. Rej Mour Rej iakwe kom̧. Ij kamool ilo etan Jisōs Kraist, amen.