Kūr n̄an Jerbal in

Aolep iiō taujin likao im jiron̄ ro, im elōn̄ ripālele ro rerūtto, rej ikdeleel n̄an bōk koņaer ilo aer bōk kūr ko aer jān Salt Lake City. Kobban leta in ej un̄ur būruōn armej eo me etan epād ie, barāinwōt ro uwaan baam̧le eo an im elōn̄ armej ro jet. Ilo an tōparļo̧k leta in, leta in emaron̄ kar lukkuun tiljek im ļap kijenmej ilo aer kōpeļļoke ak potake kōn m̧ōņōņō im kōn eļap kaiur. Itok n̄an riiti leta in ej juon en̄jake eo me rejamin meļo̧kļo̧k.

Leta in ej jain jān Būreejtōn eo an Kabun̄ eo an Jisōs Kraist im Armej ro Rekwojajar ilo Raan-ko Āliktata, im jentōj ko ruo jinointata ilo aer riiti āindein: “Kiiō em̧ōj kūr eok n̄an jerbal āinwōt juon mijinede ilo Kabun̄ eo an Jisōs Kraist im Armej ro Rekwojarjar ilo Raan-ko Āliktata. Em̧ōj kappeik eok n̄an jerbal ilo ______ Mission .”

Keemeemej bwe jentōj eo jinointata ej kūr eo n̄an jerbal āinwōt juon mijinede eo ej jerbal aolep raan ilo Kabun̄ eo an Irooj me em̧ōj an jepļaaktok. Jentōj ņe kein karuo ej kappe n̄an jerbal ilo juon jikin im juon mijen. Eaorōk n̄an kōj bwe jen meļeļe aorōkin an lōn̄ oktak ikōtaan jentōj kein ruo.

Ilo iminene an Kabun̄ in, ekkā ad kōnono kōn aer kūr kōj n̄an jerbal ilo juon laļ āinwōt Argentina, Poland, Korea, ak United States. Ak juon mijinede ejjab kūr n̄an juon jikin; ijjeļo̧kin, ej kūr n̄an jerbal in. Āinwōt an kar Irooj kalikkar n̄an Rikanaan Josep Smith ilo 1829, “Eļan̄n̄e ewōr ami ikdeelel n̄an jerbal n̄an Anij ej kūr kom̧ n̄an jerbal in.”²

Kajjojo kūr an juon mijen ak kappe, ak kappe bar juon alen, ej itok āinwōt juon revelesōn jān rikarejaran Irooj. Juon kūr n̄an jerbal in ej itok jān Anij n̄an Būreejtōn eo an Kabun̄ in. Kappe n̄an juon ak elōn̄ļo̧k jān 400 mijen ko me rej pelļo̧k ilo aolepen laļ in rej itok jān Anij n̄an juon eo uwaan Doulul eo an Jon̄oulruo Rijilōk ro, ium̧win mālim eo an rikanaan eo an Irooj emour rainin. Menin letok ko an Jetōb ekkar n̄an jitōbōn kanaan im revelesōn epād ilo aolep kūr im kappe n̄an juon mijen.

Jekjōn 80 ilo Katak im Bujen ko ej juon rekoot kōn kūr eo an Stephen Burnett n̄an juon mijen kar leļo̧k jān Rikanaan Josep Smith ilo 1832. Ekkatak kōn kūr in Brother Burnett emaron̄ jipan̄ kōj (1) meļeļe oktak eo ikōtaan “kūr n̄an jerbal in” āinwōt juon mijinede im “kappe n̄an jerbal” ilo juon jikin im (2) m̧ōņōņō kōn eddo ko ad kajjojo rekwojarjar n̄an kajedeed gospel eo.

Eoon 1 ilo jekjōn in ej juon kūr n̄an jerbal in: “Em̧ool, āindein Irooj ej ba n̄an eok rikarejera Stipen Burnett: Kwōn ilo̧k, kwōn ilo̧k ilo laļ im kwaļo̧k naan kōn gospel eo Aō n̄an armej otemjej ej itok ium̧win n̄irļo̧k in ainikiōm.”³

Men eo ekabwilōn̄lōn̄, verse 2 ej kalikkar n̄an Brother Burnett kōn mijinede eo mōttan em̧ōj kappeiki: “Im toun wōt am kōņaan juon m̧ōttam, Inaaj lewōj n̄an eok rikarejera Iden Smith.”⁴

Eoon 3 ej kwaļo̧k ijo mijinede rein ruo rej etal n̄an kōm̧m̧an jerbal eo ie: “Kōn menin, kom̧in ilo̧k im kwaļo̧k naan kōn gospel eo Aō, jekdo̧o̧n n̄e n̄an iōn̄ ak n̄an rak, n̄an rear ak n̄an rilik, ej jab aorōk, bwe kom̧ jamin bōd.”⁵

Ijjab tōmak bwe naan in “ej jab aorōk,” āinwōt an Irooj kōjerbale ilo eoon in ej kwaļo̧k bwe Ejjab kea ijo rikarejeran rej jerbal ie. Ilo m̧ool, Ej lukkuun kea ilo tum̧ūlaļ in būruōn. Ak kōnke jerbal in n̄an kajedeed gospel eo ej jerbal an Irooj, Ej im̧we, tōl, im kajeikiik ro rikarejeran ro ewōr aer mālim. N̄e mijinede ro rej kajjieon̄ wōnm̧aanļo̧k wōt im mour erreo im remaron̄e āinwōt kein jerbal ko ilo Pein im kōm̧m̧ane jon̄an wōt aer maron̄ n̄an kakūrm̧ool ilo tiljek eddo ko aer, innem kōn jipan̄ eo An rej “jam̧in bōd”—jabdewōt jikin rej jerbal ie. Bōlen juon iaan katak ko an Rilo̧mo̧o̧r ej katakin kōj ilo revelesōn in ej bwe kappe n̄an jerbal ilo juon jikin ekkar im eaorōk ak ejjab lukkuun aorōk jān kūr n̄an jerbal in.

Eoon eo tok juon ej kalikkar aorōkin in men ko ewōr ippān aolep mijinede n̄an aer maron̄ pād ilo jerbal in: “Kōn menin, kabun̄bun̄ļo̧k men ko me kom̧ ar ron̄, im em̧ool tōmaki, im jeļā ke rem̧ool.”⁶

Eoon eo āliktata ej kakeememej Brother Burnett im kōj aolep kōn wōn eo me kūr kein rej lukkuun itok jāne: “Lo, en̄in ej ankilaan E eo eaar kūr kom̧, ami Ripinmuur, em̧ool Jisōs Kraist. Amen.”⁷

Jet iaami remaron̄ kar kajjitōkin er make etke iaar kālōt bwe in kōnono ilo m̧wen̄an eo an priesthood ilo kweilo̧k eo eļap ke menin elukkuun alikkar oktak eo ikōtaan kūr n̄an jerbal in im kappe n̄an jerbal.Uwaak eo aō n̄an kajjitōk in elukkuun alikkar: en̄jake eo aō em̧ōj an katakin eō bwe katak kein rejjab lukkuun alikkar ippān elōn̄ membōr ilo Kabun̄ in.

Lukkuun unin aō kōnono kōn unin kōnono in ej kōn ta eo em̧ōj aō ekkatak kake elōn̄ kōttan ikkijen pok, inepata, im an elōn̄ mijinede ajļo̧k kōn jet un ko raar bar kappeik er n̄an bar juon jikin ilo iien aer kōm̧m̧ane jerbal in. Bar kappe juon alen jet iien remenin aikuj kōnke ekkar n̄an makūtkūt ko im jekjek ko āinwōt jorrāān im ikinejnej ilo ānbwin, rum̧ujļo̧k im apan̄ in ebbōk visa, okoktak in kien ko, ejaak im kajjejet oran armej n̄an jerbal ilo juon jikin, ak okoktakin aikuj ko ipeļaakin laļ in ilo jerbal in kajedeed gospel eo.⁸

N̄e juon mijinede ej bar bōk kappe juon alen n̄an juon jikin eo eoktak n̄an jerbal, wāween aer kūri ejjeļo̧k bar oktak jān kar kappe eo jinion. Ro uwaan Doulul eo an Jon̄oulruo Rijilōk ro rej pukot im̧we im tōl n̄an kōm̧m̧ane aolep kappe ko bar bōke juon alen.

Iaar kōnono ippān juon em̧m̧aan etiljek im ej kwaļo̧k n̄an eō en̄jake eo an jān tumuļaļ in būruōn. Ilo juon kweilo̧k, ej kab mōj aō kōm̧eļeļeiki oktak eo ikōtaan kūr n̄an jerbal in im bōk kappe n̄an jerbal. Em̧m̧aan in ejouj ej iakiakweik eō im kōn dān in kōmjaļaaļ eaar ba n̄an eō, “Men ko kwar katakin rainin eaar jipan̄ eō kōmeraikļo̧k aolep eddo im inepata ko aō me eto aō baj edodo kaki elōn̄ļo̧k jān 30 iiō. Ke iaar juon mijinede eo em̧m̧an dettan, kappe eo aō iaar bōke jinointata kar n̄an juon mijen ilo Turōk in Amedka. Ak eaar jab maron̄ tōprak visa eo aō, kōn menin kappe eo aō ekar oktak n̄an Amedka. Aolepen iiō ko iaar ļōmņak etke iaar jab maron̄ jerbal ilo jikin eo raar kūr eō n̄an e. Kiiō ijeļā bwe iar bōk kappe eo n̄an jerbal ejjab n̄an jikin eo. Ijjab maron̄ jiron̄ kom̧ ewi jon̄an an m̧eļeļe in kōn gospel eo kar jipan̄ eō.”

Iaar lukkuun būromōj kōn em̧m̧aan in ejouj. Ilo aō kar katakin kōn katak kein ipeļaakin laļ in, elōn̄ armej ro rej itok ippa im kajjitōk ejja en̄jake in wōt me em̧m̧aan in eaar en̄jake eo me ij kōnnaan kake. Ij kwaļo̧k unin kōnono in kōnke ejjeļo̧k juon iaan membōr ilo Kabun̄ in ej aikuj edodo kōn likjab in meļeļe in, pere, būrom̧ōj, im ajļo̧k kōn juon kappe n̄an kōm̧m̧ane jerbal in.

“Kōn menin, kom̧in ilo̧k im kwaļo̧k naan kōn gospel eo Aō, jekdo̧o̧n n̄e n̄an iōn̄ ak n̄an rak, n̄an rear ak n̄an rilik, ej jab aorōk, bwe kom̧ jamin bōd.”⁹ N̄e kwōj kājokļo̧kjeņ kake naan ko ilo eoon in im kōpeļļo̧k būruōm, ij kōjatdikdik im jar bwe jetōb enaaj bōkļo̧k an innaan n̄an būruōm meļeļe eo, bōk jipan̄, im kōm̧anm̧an aolep men ko kwōj aikuji.

Bar juon un iaar en̄jake ke ij kōnono kōn un in kōnono in ej en̄jake eo aō make ilo aō kappeik mijinede ro ium̧win elōn̄ iiō ko. Ippān Jon̄oulruo Rijilōk ro, ejjeļo̧k men ej kapene m̧ool eo kōn revelesōn ko ejjeļo̧k jem̧ļo̧kier me eļapļo̧k aer kajoor ijjelo̧kin ad jeļā oktak eo kōn ankilaan Irooj n̄e kōm ej kakūrm̧ool eddo ko am̧i n̄an kappeik mijinede ro n̄an jikin ko emōj kūr er n̄an jerbal ie. Ij kam̧ool bwe Rilo̧moo̧r ejeļā kōn kōj kajjojo juon ilo̧k juon im ejeļā etad.

Kiiō ikōņaan kōnono ilo tukaduin kōn aorōkin ak ikutkut in ad etale wāween kōpopo n̄an juon kūr n̄an jerbal in.

Naan ko jilu rej iook doon rej kōmeļeļe juon iaļan kōpopo im eddōkļo̧k n̄an ļaddik ro nejin Anij: priesthood, tampeļ, mijen. Jet iien eddo an ro jinen im jemān, ro mōttad, im ro uwaan Kabun̄ in, eļap aer mijōk wōt kōpopo an mijinede n̄an likao ro me jemaron̄ kajejtokjen bun̄tōn̄ ko jet raorōk ippānļo̧k kōjparok bujen ko me rej aikuj kūrm̧ool m̧okta jān am kōm̧m̧ane jerbal in mijinede aolep raan. Jerbal āinwōt juon mijinede em̧ool ej juon ak ejjab juon wāween eddōkļo̧k eppen tata n̄an ejaake juon pedped ekajoor n̄an eddōkļo̧k im jipan̄ ilo jetōb. Priesthood im kōjeraam̧m̧an ko an tampeļ, jim̧or ilo am tōparļo̧k jikin eo em̧ōj kappeik eok n̄an kōmm̧ane jerbal in, rej barāinwōt menin aikuj n̄an jipan̄ im kakajoorļo̧k kōj ilo jetōb ilo aolepān mour ko ad.

Likao ran, ilo am kakūrm̧ool eddo ko am im kautiej Aaronic priesthood eo, kwōj kōpopo n̄an bōk im kōļapļo̧k bujen ko an Melkesidek priesthood ak priesthood eo eutiejtata.¹⁰ Mour erreo an juon make ej make wōt aorōk n̄an maron̄ bōk priesthood eo eutiej tata. Juon jerbal in jipan̄ an priesthood ej pojak n̄an kwe. Kōpopo kiiō am kakutkut am kōm̧m̧ane jerbal in jipan̄ ko. Jouj im kajjieon̄ iakwe mour erreo im dāpdep ilo mour erreo. Mour erreo. Dāpdep ilo mour erreo.

Ālikin bōk Melkesidek Priesthood eo im bōk juon kūr n̄an jerbal in, juon likao emaron̄ pālpel kōn kajoor¹¹ kōn bujen im kain̄i ko an tampeļ eo ekwojarjar. Etal n̄an tampeļ im bōk en̄jake ko an tampeļ ej kwaļo̧k juon jerbal em̧m̧an āinwōt juon mijinede eo ej jerbal aolep raan. Mour erreo an juon make ej make wōt aorōk n̄an bōk kōjeraam̧m̧an ko an tampeļ n̄an likao ro im aolep membōr ro ilo kabun̄ in. Ilo am mour ekkar n̄an jon̄ak ko an gospel, komaron̄ delo̧n̄e m̧weo imōn Irooj im bōk koņaam ilo kain̄i ko rekwojarjar ilo aolep iien in jodikdik ko am. Iakwe eo am im am meļeļe kōn kain̄i ko an tampeļ renaaj kōkajoor eok im kōjeraam̧m̧ān eok ilo aolepān mour eo am. Jouj im kajjieon̄ iakwe mour erreo im dāpdep ilo mour erreo. Mour erreo Dāpdep ilo mour erreo.

Elōn̄ likao ro im jiron̄ ro em̧ōj kadede an lōn̄ aer peba in mālim n̄an delo̧n̄e tampeļ. Āinwōt juon rikabjer Aaronic priesthood kwōj pukot etan baam̧le eo am make im kōm̧m̧ane peptaij ko aer im aer kapen er n̄an baam̧le eo am ilo tampeļ. Kōkāāl wōt mālim in delo̧n̄e tampeļ ej kwaļo̧k am erreo, im jerbal n̄an ro jet ilo tampeļ ej juon mōttan eo eaorōk tata n̄an kōpopo n̄an bōk Melkesidek Priesthood.

Likao ran, kajjojo iaami ej juon mijinede kiiō. Ipeļaakimi, aolep raan, rej ro mōttami im ro ritūrūmi “ro dāpiji er jān m̧ool eo kōnke rej jab jeļā ia eo ren pukote ie.”¹² Ilo am bōk tōl jān Jetōb, kom̧ maron̄ kwaļo̧k ami ļōmņak, juon kūr, jeje ilo taļboon ak imejatoto me enaaj kwaļo̧k ro mōttami kōn m̧ool ko em̧ōj aer jepļaaktok. Kwojjab aikuj kōttar kūr eo am n̄an erom juon eo ej bōk koņaan ilo jerbal in mijinede.”

Āinwōt kōjeraam̧m̧an ko an priesthood, tampeļ, im mijen rej ippān doon “kobain men ko otemjej … in Kraist”¹³ im ilo an mour kaki ilo būruōn, kōļmenļo̧kjeņ, im jetōb an juon mijinede em̧m̧an dettan, emaron̄ karbōb n̄an jerbal in.¹⁴ An maron̄ ej ļapļo̧k n̄an kakūrm̧ool eddo ko n̄an bōk jikin Irooj Jisōs Kraist kōn mālim. Kajoor an jetōb ekoba kautiej priesthood eo im bujen ko an tampeļ, bōk “kajoor in āinwōt anij”¹⁵ kōn kain̄i ko an priesthood,¹⁶ jipan̄ eo ejjeļo̧k wōneen, im kwaļo̧k gospel eo ejjeļo̧k jem̧ļo̧kin n̄an ajri ro nejin Anij emaron̄ kōm̧m̧an bwe juon likao en “pen im dim ilo tōmak”¹⁷ im “likūt okram̧ ilo E im kalōk kom̧ ilo [Kraist].”¹⁸

Ilo mōko mōd im ilo mōnjar ko, jej aikuj kajejjet ad kwaļo̧k kōn jilu men ko raorōk ilo jon̄ak ko an Irooj n̄an kōpopo im eddōkļo̧k āinwōt ļaddik ro nejin Anij retiljek: priesthood, tampeļ, mijen. Aolep men kein jilu remenin aikuj bwe jen iakwe mour erreo im dāpdep wōt ie. Mour erreo Dāpdep ilo mour erreo.

Em̧m̧aan ro jeiū im jatū rejitōn bōro, ij kalim̧m̧ur bwe menin letok eo an jetōb kōn revelesōn enaaj pād ilo kūr ko ami n̄an jerbal in kajedeed gospel in im ijjitōn ko ami n̄an juon jikin ak jikin ko n̄an jerbal ie. Ilo ami kōpopo ilo tiljek kiiō ilo ami kōmoururi priesthood eo ami im jerbal ilo tampeļ, am kam̧ool kōn Irooj enaaj kajoorļo̧k. Iakwe eo ami n̄an E im jerbal in An enaaj kōbrak būruōmi. Ilo ami katak n̄an iakwe mour erreo, kom̧ naaj erom juon kein jerbal ekajoor ilo pein Irooj n̄an kōjeraam̧m̧an im jerbal n̄an elōn̄ armej ro.

Kōn lan̄lōn̄, ij kwaļo̧k aō kam̧ool bwe Jemādwōj Ilan̄ im Nejin Jitōn bōro, Jisōs Kraist, rej mour. Ilo ad bōk koņaer ilo jerbal in Aer ej juon kōjeraam̧m̧an eļap jemaron̄ bōke. Ij kōm̧m̧ane āindein ilo etan ekwojarjar Jisōs Kraist, amen.