Eo Eļap Tata Ilubwilijimi
Menin nōbar eo an Anij eļaptata ej ilo̧k n̄an ro rej jerbal ilo ejjeļo̧k kōtmene kōn nōbar.
M̧aan ro jeiū im jatū, ro m̧ōtta jitōnbōro, eļap aō kam̧oolol n̄an pād ippāmi ilo kweilo̧k in em̧we an priesthood aolepān laļ in. Būreejtōn Monson, kom̧ool kōn ennaan im kōjeraam̧m̧an eo am̧. Būreejtōn, kōm naaj iien otemjej likūt ilo būruwōm naan in tōl ko am̧, kapilōk, im māletlet. Kōmij iakwe im rejtake eok; im kōmij jar kōn kwe iien otemjej. Kwoj ilo m̧ool rikanaan an Irooj. Kwoj Būreejtōn eo am. Kōmij rie, kōmij iakwe eok.
Enan̄in ron̄oul iiō ko remootlo̧k, Madrid Spain Tampeļ eo eaar aje im jino jerbal eo an āinwōt juon im̧ōn Irooj ekwojarjar. Ekanooj em̧m̧an am̧ro Harriet im n̄a keememej kōnke iaar jerbal ilo Būreejtōnji eo an Europe Area ilo tōre eo. Ippān bar ro jet rellōn̄, kōm kar joļo̧k elōn̄ awa ko pād ilo iien ļōmņake im karōk iien eo m̧okta jān aje eo.
Ke raan in aje eo eaar epaaktok, iaar kile bwe ijjan̄in kar bōk juon kūr n̄an pād ie. Menin eaar bwe aō jab kōtmene. Ālkin men otemjej, ilo eddo eo aō āinwōt juon Eria Būreejtōn, iaar kanooj bōk kuņaō ilo tampeļ būroojāāk in im kar en̄jake bwe eaar dik aō bōk kuņaō.
Iaar kajjitōk ippān Harriet eļan̄n̄e enan̄in elolo juon aō kūr. Ejjan̄in kar elolo.
Raan ko raar eļļāļo̧k im aō ļōkatūb eaar ļapļo̧k. Iaar ļōmņak eļan̄n̄e kūr eo am eaar jōbwābwe—bōlen eaar pād ikōtaan matmat ko ilo sofa eo am. Bōlen epeljoļo̧k ippān māeļ ko ilo junk māle ko im em̧ōj joļo̧ke ilo kopej. Ro riturim ewōr juon nejier kuuj eudiakiak, im em̧ool eaar jino aō ekkōljake.
Āliktata iaar en̄jake ke em̧ool: Rej jan̄in karuwaineneiki n̄an pād ie.
Ak ekōjkan an menin maron̄? Ewōr men eo iaar kōm̧m̧ane enana? Ewōr juon eaar ļōmņak ekanooj ettoļo̧k n̄an am etal n̄ane ke? Remeļo̧kļo̧k n̄a ke?
Ālkiktata, iaar kile bwe etal wōt ilo kain ļōmņak in enaaj bōkļo̧k eō n̄an ejake juon en̄jake eo me ijjab kōņaan bōke.
Harriet im n̄a kōm̧ro kar keememej bwe aje eo an tampeļ eo eaar jab kōn kōm. Eaar jab kōn wōn eo kar aikuj kūri ak wōn eo kar jab kūri. Eaar jab kōn en̄jake ko am ak ļōmņak eo bwe ewōr am jim̧we n̄an pād lo aje eo.
Eaar kōn aje eo an juon em̧ eļap an ekwojarjar, juon tam̧peļ an Anij Eutiej Pōtata. Eaar juon raan in lan̄lōn̄ n̄an membōr ro an Kabun̄ in ilo Spain.
Eļan̄n̄e kar kūrļo̧k eō n̄an pād, inaaj kar kōm̧m̧ane ilo kanooj m̧ōņōņō. Bōtaab eļan̄n̄e kar jab kūrļo̧k eō, lan̄lōn̄ eo aō eban kar dikļo̧k an en̄jake. Harriet im n̄a kar ļem̧ōņōņō ippān ro m̧ōttam, ro jeim im jatim rejitōnbōro, jān ettoļo̧k. Kōm naaj kar nōbar Anij kōn kōjeraam̧m̧an in eaiboojoj ejja āinwōt laudin̄din̄ eo am jān kapijuknen eo am ilo Frankfurt āinwōt kōm kar jān Madrid.
Ro Nejin Jourur
Ilubwilijin Jon̄oulruo ro me Jisōs eaar kūr im kapiti eaar wōr ruo jem̧jān jemjati, Jemes im Jon. Kwōj keememej ke etan kōjak eo Eaar leļo̧k n̄an er?
Ro Nejin Jourur (Boanerjis).1
Kwojjab bōk juon etan kōjak ilo an ejjeļo̧k juon un. Ejerata jeje ko rekwojarjar rejjab letok eļap kōmeļeļe kōn uo eo kar leļo̧k etan kōjak eo. Mekarta, jeje ko rekwojarjar ej letok jidik bwebwenato kōn Jemes im Jon. Ejja jem̧jān jemjatin rein wōt me kar ļōmņak in kūr kijeek jān lan̄ ilo juon jikin ilo Samaria kōn kar jab kūrļo̧k erro n̄an bukwōn eo.2
Jemes im Jon raar rieon̄ad—maron̄ lāj jidik—bōtaab raar jeļā paotok im jum̧ae ko. Aaet, raar em̧m̧aan in jerbal.
Ilo juon iien, ke Rilo̧mo̧o̧r eo eaar kōppopo n̄an em̧m̧akūt eo An āliktata n̄an Jerusalem, Jemes im Jon raar jibadōkļo̧k E kōn ejjeļo̧k juon kajjitōk āinjuon—juon bōlen kōn aorōk eo an etan kōjak eo aero.
“Kōmro kōņaan bwe Kwōn kōm̧m̧an n̄an kōm men eo jabdewōt kōm̧ naaj kajjitōk kake,” raar ba.
Ij pijaikļo̧k an Jisōs ettōn̄ dikdik ilo An kar uwaak, “Ta eo kom̧ kōņaan?”
“Kwōn letok n̄an kōmro bwe kōmin jijet, juon ianmooņōm, im juon I anmiin̄ōm̧, ilo Am aiboojoj.”
Rilo̧mo̧o̧r eo eaar idajon̄jon̄e erro n̄an kam̧wilaļļo̧k jidik aero ļōmņak kōn ta eo raar kajjitōk kake innām kar ba, “A kōn jijet i anmin̄iō, e jab Aō bwe in lewōj; a an ro ar kōppojak e n̄an er.”3
Ilo bar juon wāween ba, kwojjab maron̄ bōk utiej eo ilo aelōn̄ in kiin̄ eo an lan̄ kōn kareelel kake. Kwojjab maron̄ “bōk kajoor” ilo jekjek eo am̧ n̄an aiboojoj indeeo.
Ke Rijilōk ro jet jon̄oul raar ron̄ kōn kajjitōk in jān Ro Nejin Jourur, raar jab lukkuun m̧ōņōņō. Jisōs eaar jeļā iien eo An eaar jab aitok, im lo iakwelel eo ilubwilijin ro me raar tōn bōk jerbal eo An kar aikuj in kainepataik E.
Eaar kōnono n̄an er kōn paotok eo an kajoor im ekōjkan an jelet ro me rej pukote im dāpiji. “Armej ro eļap kilaer ilo laļ in,” Eaar ba, “rej kōjerbal maron̄ eo aer n̄an kōjerbal kajoor ioon ro jet.”
Imaron̄ in lo Rilo̧moo̧r eo, kalimjōk turin mejān rikaļoor ro retiljek im tōmak kōn iakwe eo ejjeļo̧k jem̧ļo̧kin. Imaron̄ in ron̄ ainikien akweļap eo An: “Ejjab wāween eo in ej aikuj in ilubwilijin. Ijello̧kin, jabdewōt eo iaami enaaj kōņaan bwe en ļaptata ilubwilijimi, enaaj rikarejerami: Im jabdewōt iaami enaaj irooj, enaaj rijerbal an aolep.”4
Ilo aelōn̄ in kiin̄ an Anij, ļaptata im ritōl ej meļeļe in kalimjōk ro jet āinwōt aer lukkuun—āinwōt an Anij kalimjōk er—innām pukotļo̧k er im kwaļo̧k n̄an er. Ej meļeļe in lan̄lōn̄ ippān ro rej m̧ōņōņō, jan̄ ippān ro rej būrom̧ōj, kotak ro rej ilo inepata, im iakwe ro riturid āinwōt an Kraist iakwe kōj. Rilo̧mo̧o̧r eo ej iakwe aolep ro nejin Anij jekdo̧o̧n ewi kōjellier aer jeraam̧m̧an, armej in ia, kajin, tōmak ilo kien, ak rilaļ ta. Im kōn menin jej aikuj in!
Menin nōbar eo an Anij eļaptata ej ilo̧k n̄an ro rej jerbal ilo ejjeļo̧k kōtmene kōn nōbar. Ej ilo̧k n̄an ro rej jerbal ilo ejjeļo̧k nōbar jān jukjukinpād; ro rej etal im pukot wāween ko n̄an jipan̄ ro jet; ro rej kwaļo̧k n̄an ro jet kōnke rej iakwe Anij im ro nejin Anij.5
Jab Ajeļo̧k Eok
Ejjab to ālkin kūr eo aō āinwōt juon Rutiej an Kabun̄ ekāāl, iaar maron̄ etal ippān Būreejtōn James E. Faust n̄an bar ejaake juon stake. Ke iaar ettōr n̄an ijjitōn̄ eo amro ilo Iturōkin Utah ijin eaiboojoj, Būreejtōn Faust eaar kanooj jouj n̄an kōjerbal iien eo n̄an kōmeļeļeik im katakin eō. Juon katak ijjamin naaj meļo̧kļo̧ke. Eaar ba, “membōr ro an Kabun̄ in rej jouj n̄an Riutiej ro an Kabun̄ in. Renaaj kōm̧m̧an n̄an eok ilo jouj im ba men ko rem̧m̧an kōn kwe.” Innām eaar ikōn̄ jidik im ba, “Dieter, iien otemjej kam̧oolol kōn menin, bōtaab jab n̄an jidik ajeļo̧k eok.”
Katak in eaorōk kōn jerbal in Kabun̄ ej jerbal n̄an aolep rikabwijer priesthood eo ilo aolep doulul ko an Kabun̄. Ej jerbal n̄an aolepād wōj ilo Kabun̄ in.
Ke Būreejtōn J. Reuben Clark kar kapilōk ro kar kūr n̄an jerbal ko an ritōl routiej an Kabun̄ in, eaar jiron̄ er n̄an jab meļo̧kļo̧k kien jiljino.
Ilo jab pere, armej emaron̄ kajjitōk, “Ta kien jiljino?”
“Jab lukkuun inepata kōn ta ro jet rej ba,” ekōn ba.
Aaet, menin ej bōkļo̧k n̄an juon bar kajjitōk: “Ta kien ko ļalem jet?”
Kōn juon eromrom ilo mejān, Būreejtōn Clark ekōn ba, “Ejjeļo̧k.”6
N̄an erom ritōl ro rewejepedik an Kabun̄ in, jej aikuj katak katakin eaorōk: tōl ilo Kabun̄ in ejjab kanooj kōn kōjbwebweik ro jet āinwōt kōn m̧ōņōņō eo ad n̄an kōjbwebwe jān Anij n̄an jipan̄ ro jet.
Kūr ko rej āinwōt Iien ko Rem̧m̧an n̄an Jerbal in Jipan̄
Āinwōt ro Rekwojarjar an Anij Utiej Pōtata, jej aikuj “keememej ilo aolep men otemjeļo̧k ro rijeram̧ōl im riaikuj, rinan̄inmej im riban, bwe eo ej jab kōm̧m̧ani men kein, ejja in wōt e ej jab Aō rikaļoor.”7 Iien ko rem̧m̧an n̄an etal im kōm̧m̧an em̧m̧an im n̄an jerbal n̄an ro jet ejjeļo̧k jon̄aer. Jemaron̄ lo er ilo jukjukinpād ko ad, ilo ward im branch ko ad, im em̧ool ilo m̧ōko im̧ōd.
Ilo kakobaba, aolep membōr an Kabun̄ in rej leļo̧k iien ko rem̧m̧an n̄an jerbal ilo juon jekjek eo āinjuon. Jej ņa etan iien kein rem̧m̧ān āinwōt “kūr ko”—juon tōre me aikuj kakeememej kōj kōn wōn eo me ej kūr kōj n̄an jerbal. Ilo ad kejōkļo̧kjeņ kōn kūr ko ad āinwōt iien ko rem̧m̧an n̄an jerbal n̄an Anij im jerbal n̄an ro jet kōn tōmak im ettā, aolep m̧akūtkūt in jerbal renaaj erom juon bun̄tōn ilo iaļ eo an rikaļoor. Ilo wāween in, Anij eban wōt kalōk Kabun̄ eo An ak barāinwōt kalōk ro Rikarejeran. Kabun̄ in kar āje n̄an jipan̄ kōj erom rikaļoor ro an Kraist rem̧ool im tiljek, m̧aan ro nejin Anij rem̧m̧an im wōj. Menin ej waļo̧k ejjab n̄e jej ilo̧k n̄an kweilo̧k ko im ron̄jake kōnono ko, ak n̄e jej ļōmņak kōn ro jet im jerbal n̄an er. En̄in ej wāween ad erom “ļap” ilo aelōn̄ in kiin̄ an Anij.
Jej bōk kūr ko kōn jouj, ettā, im kam̧oolol. N̄e kōtļo̧k kōj jān kūr kein, jej bōk oktak eo kōn ejja jouj, ettā im kam̧oolol in wōt.
Ilo jekjek eo an Anij ejjeļo̧k juon kūr ilo aelōn̄ in kiin̄ eo me ej ļapļo̧k an aorōk jān ko jet. Jerbal in jipan̄ eo ad—men̄e ekilep ak edik—ej kōkōm̧anm̧an jetōb ko ad, kōpeļļo̧k wintō ko an lan̄, im kōtļo̧k tok kōjeraam̧m̧an ko an Anij ejjab wōt ioon ro jej jerbal n̄an er ak iood barāinwōt. Im n̄e jej pukotļo̧k ro jet, jemaron̄ jeļā kōn lōke bwe Anij ej kile jerbal in jipan̄ eo ad kōn kōmālim im jim̧we. Ej etōn̄ dikdik iood ilo ad leļo̧k jerbal in retenwadik im retūriam̧o̧, eļaptata jerbal ko me jab loi im ro jet rejjab kili.8
Kajjojo iien jej ajeļo̧k kōj make n̄an ro jet, jej bōk juon bun̄tōn epaakeļo̧k n̄an erom rikaļoor ro rem̧m̧an im m̧ool an Juon eo eaar letok aolepān An n̄an kōj.
Jān Tōl n̄an Būreet
Ilo tōre in kememe 150th iiō an kar pioneer ro itak tok ilo Salt Lake Valley, Būratōr Myron Richins eaar jerbal āinwōt juon stake būreejtōn ilo Henefer, Utah. Kememe eo eaar koba juon bar iien kōkāāl iaļ eo an pioneer ro ilo jikin eo an.
Būreejtōn Richins eaar kanooj ļap an bōk kuņaan ilo karōk ko n̄an kōjeraam̧m̧an eo, im eaar pād ilo elōn̄ kweilo̧k ko ippān Ritōl ro Routiej an Kabun̄ in im opija ro jet n̄an ekōnono kōn m̧akūtkūt ko. Eaar kanooj lukkuun bōk kuņaan.
M̧okta wōt jān lukkuun iien kōjeraam̧m̧an eo, stake eo an Būreejtōn Richins ekar bar ejaake, im kar kōtļo̧k e āinwōt kar būreejtōn eo. Ilo juon Jabōt tokālik, eaar pād ilo kweilo̧k eo an priesthood eo an ward eo an ke ritōl ro rekar kajjitōk baļintier n̄an jipan̄ ilo kōjeraam̧m̧an eo. Būreejtōn Richins, ippān ro jet, ekar kajutak pein im kar leļo̧k kōmeļeļe n̄an ekkōņak nuknuk in jerbal im bōktok tūrak eo waan im juon jabōļ.
Āliktata, jibbon̄ in iien m̧akūtkūt eo eļap eaar waļo̧k, im Būreejtōn Richins eaar ilo̧k n̄an jerbal in baļintier.
Jejjo wōt wiik m̧oktaļo̧k, eaar juon rijipan̄ eo eļap kilan n̄an karōk im mije m̧akūtkūt in eļap. Ilo raan eo, mekarta, jerbal eo an eaar n̄an anōk kidia ko ilo būreet eo im karreoik er.
Būreejtōn Richins eaar kōm̧m̧ane ilo m̧ōņōņō.
Eaar meļeļe bwe juon kain jerbal in jipan̄ ejjab utiej jān bar juon.
Eaar jeļā im likūt ilo jerbal naan ko an Rilo̧mo̧o̧r eo: “A eo eļaptata iaami, enaaj ri karijerami.”9
Kōm̧m̧ane Jerbal eo an Rikaļoor ilo Jejjet
Jet iien, āinwōt Ro Nejin Jourur, jej ikdeelel n̄an jerbal ko rebun̄bun̄. Jej kajjieon̄ bwe ren kile kōj. Jej pukot n̄an tōl im n̄an kōm̧m̧ane juon jipan̄ eo naaj kememeje.
Ejjeļo̧k jorrāān kōn kōņaan jerbal n̄an Irooj, bōtaab n̄e jej pukōt n̄an bōk nōbar ilo Kabun̄ in n̄an em̧m̧an eo ad make—n̄an maron̄ bōk nōbar im kile an armej—ewōr ad nōbar. N̄e jej “ajeļo̧k” n̄an nōbar an ro jet, nōbar jab in enaaj eo wōņāād.
Ta kūr eo eaorōk tata ilo Kabun̄ in? Ej eo me kwōj pād ie kiiō. Jekdo̧o̧n ewi jon̄an ettā ak bun̄bun̄ eo emaron̄ in erom, kūr eo epād ippam̧ kiiō ej juon eo me enaaj kōm̧m̧an bwe kwon jab wōt ļōn̄aj ro jet ak barāinwōt erom armej in Anij eo kwar kōm̧anm̧an n̄an erom.
Ro m̧ōttan im m̧aan ro jitōnbōro ilo priesthood eo, kōm̧m̧ān ijo em̧m̧an tata ippam̧ ijo kwoj pād ie!
Paul eaar katakin RiPilippai ro, “Kom̧win jab kōm̧m̧an jabdewōt kōn kūbboņ ak utiej bōro, ak kōn ettā būruōmi jabdewōt en ļōmņak ro jet rem̧m̧an jān e.”10
Jerbal kōn Utiej
Kappukot utiej im bun̄bun̄ ilo Kabun̄ in ijello̧kin kwaļo̧k m̧ool im ettā eo an jerbal in jipan̄ eo n̄an ro jet ejja āinwōt jekjek eo an Ijo.11 Kōm̧m̧an bwe jān bōk nōbar an laļ, bōtaab en itok ilo jekjek eo eļap jerata ie—an jako mālim eo an lan̄.
Jān ļoor waanjon̄ak eo an Rilo̧mo̧o̧r eo, eo eaar meanwōd im ettā, eo eaar jab pukōt nōbar an armej ak n̄an kōm̧m̧ane ankilan Jemen.12
Jān jerbal n̄an ro jet ilo ettā—kōn kajoor, kam̧oolol, im utiej. Men̄e m̧akūtkūt in jerbal in jipan̄ eo ad emaron̄ ettā, karbōb, ak dik an aorōk, ro rej pukōtļo̧k ilo jouj im tenkwadik n̄an ro jet naaj juon raan jeļā aorōk eo an jerbal in jipan̄ eo aer jān indeeo im kōjeram̧m̧an an jouj an Anij Kajoor Pōtata.13
Em̧m̧aan ro rejitōn bōro, ro m̧ōtta, kōm̧m̧an bwe jān kejōkļo̧kjeņ ilo, meļeļe, im mour kōn katak in ekanooj aorōk kōn ekōjkan an priesthood eo jerbal: “A eo eļaptata iaami, enaaj ri karijerami.” En̄in ej jar eo aō im kōjeram̧m̧an eo ilo etan M̧aajtan eo ekwojarjar, ad Rilo̧mo̧o̧r, ilo etan Jisōs Kraist, amen.