Bwe Ad Meram En Maron̄ Erom Juon Jon̄ak n̄an Laļ ko

Iiō ko remootļo̧k, ke ikar jerbal āinwōt juon rūkaki in jemenere, ikar ron̄ bwe juon iaan rijerbal ro mōtta ekar kajjitōk ippān rijikuuļ ro n̄an kejōkļo̧kjeņ kōn kajjitōk in: N̄e kwōn kar mour ilo raan ko an Rilo̧mo̧o̧r, etke kwōj ļōmņak bwe kwōnaaj kar ļoor E āinwōt juon An rikaļoor? Rekar tōpar jem̧ļo̧k eo bwe ro otemjej rej ļoor Rilo̧mo̧o̧r ilo raan kein im rej kajjieon̄ erom An rikaļoor renaaj bōlen kar barāinwōt kōm̧m̧an āindein ilo tōre ko.

Jān tōre eo, ikar kejōkļo̧kjeņ kōn kajjitōk in im uwaak eo aer. Emakijkij aō ļōmņak kōn ewi wāween aō naaj kar en̄jake jān aō ron̄jake an Rilo̧mo̧o̧r eo Make ekar ba naan kein ilo Kwaļo̧k eo An Ioon Toļ eo:

“Kom̧ meram eo an Laļ. Jikin kweilo̧k eo ej pād ioon toļ, re ban ņooje.

Armej re jab tile lamp im likūt e ium̧win jāpe, a ioon jikin lamp; im ej kameramļo̧k ro otemjej ilowaan im.

“Āindein en romak ami meram im̧an mejān armej, bwe ren lo jerbal ko ami rem̧m̧an im nōbar Jememi i lan̄” (Matu 5:14–16).

Kom̧ maron̄ ke pijaikļo̧k wāween ami en̄jake n̄e kom̧in kar ron̄jake ainikien Rilo̧mo̧o̧r? Ilo m̧ool, jej jab aikuj in kar pijaikļo̧k. Bwe menin em̧ōj an erom juon en̄jake emakijkij an waļo̧k n̄an kōj jān ad ron̄jake ainikien Irooj kōnke n̄e jej ron̄jake ainikien rikarejar ro An, ej āindein ejjeļo̧k oktak.

Ilo 1838, ejja kain ennaan in ilo kar Kwaļo̧k eo ioon Toļ eo, Irooj ekar kwaļo̧k ennaan kein n̄an Rikanaan Josep Smith:

“Bwe āindein naaj etan Kabun̄ eo Aō ilo raan ko āliktata, em̧ool Kabun̄ eo An Jisōs Kraist im Armej Ro Rekwōjarjar ilo Raan-ko Āliktata.

“Em̧ool Ij ba n̄an kom̧ aolep: Kom̧in jerkak im erromaakļo̧k, bwe meram eo ami en juon jon̄ok n̄an laļ ko” (K&B 115:4–5).

Raan kein ad relukkuun āinjuon bwe aaet rekar waļo̧k ilo juon visōn n̄an rikanaan Aiseia; e ekar barāinwōt loi im kar kanaan kake raan in Jepļaaktok eo an Kabun̄ eo an Jisōs Kraist im jibadbad eo an, ej ba, “Im Enaaj lelōn̄ļo̧k juon flag n̄an ri aelōn̄ ko, im Enaaj kokweilo̧ktok ro ri jeplōklōk in Israel, im ān̄intok ro ri jeplōklōk in Juda jān kona ko emān an laļ in” (Aiseia 11:12).

Ilo meļeļein eoon in, juon flag, ak juon jon̄ok, ej juon flag eo me armej ro renaaj kweilo̧ktok iturin ippān doon kōn juon wōt un. Ilo tōre ko etto, juon jon̄ok ej jerbal āinwōt juon jikin aiindoon an ritariņae ro ilo juon kōbata. Kōnono kōn kōkkaļļe, Bok in Mormon eo im jepļaaktok eo an Kabun̄ eo an Jisōs Kraist rej jon̄ok ko n̄an aolep laļ ko. (Lale Unin Tōl N̄an Jeje Ko Rekwōjarjar, “jar,” scriptures.lds.org.)

Ilo ejjeļo̧k pere, juon iaan jon̄ok ko reļļap an armej ro rekwojarjar ilo raan kein āliktata ej kweilo̧k in eļap ekabwilōn̄lōn̄, ijo me jerbal in eļap im karōk eo an Jemedwōj Ilan̄ “n̄an kakūrm̧ool jab wabanban im mour indeeo an armej” (Moses 1:39) ej wōnm̧aanļo̧k im ajedeed.

An wōnm̧aanļo̧k wōt kweilo̧k eo eļap ej juon iaan naan in kam̧ool ko reļļap n̄an m̧ool in bwe kōj Armej ro Rekwojarjar ilo Raan-ko Āliktata rej “tōmak aolep men ko em̧ōj an Anij kwaļo̧ki, aolep men ko E ej kwaļo̧ki kiiō, im kōmij tōmak bwe Enaaj kwaļo̧k elōn̄ men ko reļļap im aorōk im rej ekkejelļo̧k n̄an Aelōn̄ in Anij” (Laajrak in Tōmak Ko 1:9).

Innām, ta eo, Irooj ekar kwaļo̧ke n̄an Būreejtōn Monson bwe jej aikuj in wōnm̧aanļo̧k wōt im kōm̧m̧an āindein bwe meram ko ad ren erom juon jon̄ok n̄an aolep laļ ko? Ta jet iaan men ko raorōk rej aikuj in kōm̧m̧an ilo iien aorōkrōk in n̄an kalōk Zaion im aiintok Israel?

Aolep iien Irooj ej kwaļo̧k Ankilaan n̄an kōj “lain im bar lain, naan in kain̄i im bar naan in kain̄i, ijin jidik im ijjuweo jidik” (2 Nipai 28:30). Kōn menin, jejjab aikuj in ilbōk kōn ta ko remaron̄ āinwōt men ko reddik kōn piktokier aer iddik im ekkā aer waļo̧k elōn̄ kōttan, bwe Irooj ekar ko̧o̧njeļ e kōj, jiron̄ tok kōj bwe “em̧ōņōņō ro rej eo̧ron̄ naan in kain̄i ko Aō, im wūjleptok lo̧jiln̄ier n̄an Aō kōkapilōklōk, bwe renaaj jeļā mālōtlōt; bwe n̄an eo ej bōk Inaaj leļo̧k eļapļo̧k” (2 Nipai 28:30).

Ij kam̧ool bwe jān “lain im bar lain, naan in kain̄i im bar naan in kain̄i, ijin jidik im ijjuweo jidik;” im jān eo̧ron̄ naan in kapilōk an ritōl ro ad, jenaaj illik wāiļ n̄an ļaam ko ad bwe ren maron̄ letok n̄an kōj meram n̄an ad kōmeram ro jet āinwōt an kean̄ kōj.

Iien in me elōn̄ men ko jemaron̄ kōm̧m̧ani n̄an erom juon meram im juon flag n̄an ro jet, ikōņaan kōnono wōt kōn men kein jilu: kōjparok raan in Jabōt; kōm̧ōkajļo̧k jerbal in lo̧mo̧o̧r jim̧or ijin im iturājet in rōn̄ōl eo; im katakin ilo wāween eo an Rilo̧mo̧o̧r.

Meram in me jej kōnono kake ej itok jān wūjlepļo̧k eo me jej leļo̧k n̄an kōjparok raan in Jabōt, ilo Kabun̄ eo im barāinwōt ilo m̧weo imōd; ej meram eo me ej eddōkļo̧k ilo ad kōjparok kōj jān libijinjin an laļ in; ej meram eo me ej itok jān ad leļo̧k ad n̄an kwojkwoj eo ilo raan eo An ekwojarjar im jān wūjlepļo̧k ko ad n̄an eo Eutiejtata, aolep men ko rej kōmaron̄ kōj bwe jetōb eo An en maron̄ pād ippād iien otemjej. Ej meram eo me ej eddōkļo̧k im maron̄ waļo̧k n̄e jej jepļaakļo̧k n̄an kapijuknen eo ad kōn juon en̄jake in jeorļo̧k bōd eo Būreejtōn Henry B. Eyring ekar kōnono kake ilo Oktoba kweilo̧k eo eļap ke ekar ba: “Jān aolep kōjeraam̧m̧an kein jemaron̄ bwine, men eo eļaptata ej en̄jake in jeorļo̧k bōd eo ej itok ilo ad bōk m̧ōttan kwojkwoj eo. Jenaaj en̄jake iakwe eo eļapļo̧k im kam̧m̧oolol kōn Rilo̧mo̧o̧r,eo katok eo an eļap ekar kōm̧m̧ane bwe jen maron̄ erreo jān jerawiwi” (“Jen Mour im Kabun̄-jar kōn Kam̧m̧olool,”Liahona, Oktoba. 2016, 100).

Ilo ad kōjparok raan in Jabōt im ko̧kwojarjar e im bōk m̧ōttan kwojkwoj eo, jejjab wōt erreo, ak meram eo ad ej ļapļo̧k an meram.

Meram eo ad ej barāinwōt meramļo̧k ilo ad wūjlepļo̧k im ajeļo̧k iien ko ad n̄an pukot āt ko etan ro jibūd im jim̧aad, bōk etāer n̄an tampeļ eo, im katakin baam̧le eo ad im ro jet kōm̧m̧an ejja wāween in wōt.

Jerbal in ekwojarjar an tampeļ im menmenbwij me jej jaketo jaketak ippān Armej ro Rekwojarjar jim̧or ilo turājet kein ruo an rōn̄ōl eo ej wōnm̧aanļo̧k wōt jān tōre eo tampeļ kein an Irooj rekar jino ekkal. Kiiō bwe tampeļ ko ewōr aer jikejuuļ ko rejenolo̧k n̄an kurub in baam̧le ko rej itok ippān card in baam̧le ko aer make, kōrā eo pāleeō im n̄a kar lukkuun m̧ōņōņō ke kōm̧ro kar jerbal ilo tampeļ eo ippān ajri ro nejimro im ajri ro jibūm̧ro.

N̄e jej pukot im bōk āt ko n̄an tampeļ eo im katakin ro jet wāween in barāinwōt, ippān doon, jej romaak āinwōt juon flag ak jon̄ok.

Ekkatak n̄an katakin āinwōt Rilo̧mo̧o̧r ear katakin ej bar juon wāween ad maron̄ kwaļo̧k im romaak. Ij lan̄lōn̄ ippān aolep ro rej ekkatak wāween katakin ilo wāween eo an Irooj. Kōtļo̧k ad riit jān kōbar eo an bok in katakin in: “Kōttōbar eo an aolep rūkaki ro an gospel—aolep ro jinen im jemān, aolep rūkaki ro kar kūr er, aolep rūkaki in loļo̧k mōko an em̧m̧aan im kōrā ro, im aolep rikaļoor ro an Kraist—ej n̄an katakin katak eo erreo an gospel eo, jān Jetōb eo, … n̄an jipan̄ ajri ro nejin Anij kalōk tōmak eo aer ilo Rilo̧mo̧o̧r eo im erom eļapļo̧k āinwōt E” (Teaching in the Savior’s Way [2016]).

Kiiō, taujin rūkaki ro retiljek rej kotak juon meram ilo aer ekkatak wāween katakin ilo wāween eo an Rilo̧mo̧o̧r. Ilo meļeļe in, kweilo̧k in ko̧o̧njeļ eo an rūkaki ro rekāāl ej juon wāween n̄an waļo̧k im romaak ilo an rijikuuļ mour kōn jon̄ok in katak ko an Kraist, n̄an “aorōk eo n̄an katakin āinwōt an Rilo̧mo̧o̧r kar katakin ej n̄an mour āinwōt an Rilo̧mo̧o̧r kar mour” Teaching in the Savior’s Way, 4).

Ilo ad katakin im ekkatak ilo wāween eo An im erom āinwōt E, meram ko ad rej romaakļo̧k im rejjab maron̄ ņoojak im rej erom juon jon̄ok n̄an ro otemjej rej pukot meram eo an Rilo̧mo̧o̧r eo.

Ro jeiū im jatū, jejjab aikuj ņooje meram eo ad. Kean̄ eo an Rilo̧mo̧o̧r n̄an kotak meram eo ad āinwōt juon jikin kweilo̧k ej pād ioon toļ ak āinwōt juon meram jān juon ļaam. Ilo ad kōm̧m̧an āindein, jenaaj kaiboojoj Jemed ilo Lan̄. Gospel eo an Rilo̧mo̧o̧r eo im jepļaaktok in Kabun̄ eo An rej letok elōn̄ iien ko rem̧m̧an n̄an ad m̧ōttan jon̄ak in eļap n̄an laļ ko.

Ij kam̧ool bwe Jisōs Kraist ej meram eo me jej aikuj kwaļo̧k, ilo etan Jisōs Kraist, amen.