Kanab’ aawib’ chiru li Dios chi xaqxookat tz’aqal

Ex raarookil was wiitz’in, re xtikib’ankil li waatin anajwan nawaj xch’olob’ankil xyaalal naq li Awa’b’ej Thomas S. Monson a’an lix profeet li Dios sa’ li qakutan a’in. Lix tenq’ aj k’ehol na’leb’ sa’ li Xb’eenil Awa’b’ejil ut eb’ li Kab’laju chi apostol a’aneb’ ajwi’ profeet, aj ilol na’leb’, ut aj k’utb’esinel. A’aneb’ neke’xk’e ruuchil li Qaawa’ Jesukristo ut wankeb’ xk’ulub’ xjultikankil lix na’leb’ ut li rajom li Dios jo’ k’utb’esinb’il chiruheb’. Ninch’olob’ xyaalal naq wan rusilal xtaaqenkil li na’leb’ neke’xk’e. Li Qaawa’ yoo chixmusiq’ankileb’ re te’xyab’asi x’aajelil ru xkawob’resinkil li qapaab’aal chirix li qaChoxahil Yuwa’ ut chirix li Ralal, Jesukristo, ut chirix lix tojb’al rix li maak li kixb’aanu re naq ink’a’ too’ek’asiiq sa’ xnumsinkil li ch’a’jkilal sa’ li qakutan.

Sa’ lix Hu laj Mormon, naqil ru resil jun li winq aj Ammon xk’ab’a’ li kitaqlaak chi elk Tzarahemla re xik sa’ li ch’och’ re laj Lehi-Nefi re xtawb’al xyaalaleb’ li ras riitz’in. Aran kixtaw li rey aj Limhi ut lix tenamit, li wankeb’ chi preexil xb’aaneb’ laj Lamanita. Li rey aj Limhi kiniman xch’ool xb’aan li kiyehe’ re xb’aan laj Ammon chirix lix tenamit aran Tzarahemla. Kinujak li raam rik’in jun oyb’enihom ut jun sahil ch’oolej jwal nim toj reetal naq kixch’utub’eb’ lix tenamit chiru li santil ochoch ut kixye:

“Jo’kan ut, taqsihomaq lee jolom, ut chisaho’q sa’ eech’ool, ut kanab’omaq eerib’ chiru li Dios. …

“A’b’anan wi texsutq’iiq rik’in li Qaawa’ chi anchal li rajom eech’ool, … ut texk’anjelaq chiru chi yalb’il anchal xq’e lee k’a’uxl, … a’an, jo’ chanru li naraj ut li nasaho’ wi’ xch’ool, texxkol chiru li moosil.”¹

Li raatin laj Ammon tz’aql ki’ok sa’ xchamal lix paab’aaleb’ lix tenamit li rey Limhi, jo’kan naq ke’xb’aanu jun li sumwank rik’in li Dios re k’anjelak chiru ut ab’ink chiru lix taqlahom, us ta li ch’a’ajkilal wankeb’ wi’. B’antiox re lix paab’aaleb’, ke’ru chixk’oxlankil jun li k’uub’anb’il na’leb’ re eelelik sa’ ruq’eb’ laj Lamanita.²

Ex was wiitz’in, chek’ehaq reetal lix aajelil ru li b’oqom li kixk’e li rey aj Limhi reheb’ lix tenamit ut chanru wan rilom qe. A’an kixye, “Jo’kan ut, taqsihomaq lee jolom, ut chisaho’q sa’ eech’ool, ut kanab’omaq eerib’ chiru li Dios.” Rik’ineb’ li aatin a’an, laj Limhi kixb’oqeb’ lix tenamit naq te’ril li toj taachalq rik’in li rilob’aal li paab’aal; naq te’xjal ru lix xxiweb’ rik’in kawil ch’oolej re oybenink li nayo’la rik’in li paab’aal; ut naq ink’a’ te’wiib’anq xch’ooleb’ sa’ xkanab’ankil rib’ chiru li Dios, maak’a’ naxye li wankeb’ wi’.

Li yu’am sa’ ruchich’och’ a’an jun hoonal b’ar wi’ taayale’q qix re rilb’al ma taqab’aanu chixjunil li tixtaqla li Qaawa’ li qaDios.³ A’an naraj ru jun li paab’aal li xaqxo tz’aqal chirix li Kristo, sa’ ajwi’ li hoonal jwal ch’a’aj. Taaraj ru naq too’iloq chi uub’ej rik’in tiikil paab’aal chirix li Kristo, chi b’eresinb’ilaqo xb’aan li Musiq’ej ut chixpaab’ankil naq li Dios tixk’e qe li taak’anjelaq qe sa’ rajb’al qu.⁴

Sa’ xraqik lix k’anjel sa’ li ruchich’och’, naq maji’ kik’ame’ chi preexil, li Kolonel kixk’ut chiruheb’ lix tzolom, “Sa’ li ruchich’och’ teek’ul li rahilal, a’b’anan kawaq eech’ool; laa’in xinq’ax ru xwankil li ruchich’och’.”⁵

K’oxlahomaq junpaataq’ wik’in—li Jesukristo, li Ralal Junaj Chirib’il chiru li Yuwa’b’ej, kixyu’ami xyu’am chi maak’a’ xmaak ut kixq’ax ru chixjunil li aaleek, rahilal, yale’k, ut ch’a’ajkilal sa’ li ruchich’och’. Kixtz’uq li kik’ aran sa’ Getsemani; kixk’ul jun xnimal rahilal moko naru ta chi yeemak chanru xrahil. Kixk’ul sa’ xb’een chixjunil li qarahilal ut li qayajel. A’an kawal wan re qatenq’ankil—chiqajunjunqal—rik’in chixjunil li qiiq. Chiru lix yu’am, lix rahilal, lix kamik, ut lix waklijik chi yo’yo, a’an kirisi chixjunil li naramok qe chi saho’k qach’ool ut chixtawb’al li tuqtuukilal sa’ li ruchich’och’. Li rusilal lix mayej aj tojol-ix nawulak rik’in chixjunileb’ li neke’k’ulub’an re ut te’xq’ajsi rib’ chiru, jo’ ajwi’ li te’xchap lix krus ut te’xtaaqe jo’ tz’aqal tzolom.⁶ Jo’kan ut, naq taqak’anjela li qapaab’aal chirix li Jesukristo ut lix tojb’al rix li maak li kixb’aanu, tookawob’resiiq, taaseeb’o’q li qiiq, ut rik’in li Jesukristo taqaq’ax ru li ruchich’och’.

Ex was wiitz’in, rik’in rilb’al li kawilal ut li oyb’enink naru naqak’ul rik’in li Kolonel, wan rajb’al xwaklesinkil li qajolom ut saho’k li qach’ool, ut xik chi uub’ej rik’in paab’aal chi ink’a’ nawiib’ank qach’ool, “xb’aan naq li ani nawiib’ank xch’ool, a’an chanchan xkaw oq li palaw eek’asinb’il xb’aan li iq’ ut nak’ame’ yalaq b’ar. … Li winq nawiib’an xch’ool moko ch’olch’o ta ru lix b’e.”⁷

Li rey aj Limhi chi jo’kan ajwi’ kib’oqok, “Texsutq’iiq rik’in li Qaawa’ chi anchal li rajom eech’ool, … k’anjelanqex chiru chi yalb’il anchal xq’e lee k’a’uxl, wi nekeb’aanu a’in, a’an, jo’ chanru li naraj ut li nasaho’ wi’ xch’ool, texxkol chiru li moosil.”⁸

Ab’ihomaq li raatin li Kolonel naq naxtz’aama qe:

“Misach eech’ool chi k’oxlak; chepaab’ li Dios ut chineepaab ajwi laa’in. …

“Wi nikineera, teepaab’ lin taqlahom. …

“Ani aj ik’in wankeb’ lin taqlahom, wi naxpaab’ li neke’xye, a’an li narahok we; ut li narahok we, taarahe’q xb’aan lin Yuwa’; ut laa’in ajwi’ tinra ut tink’ut wib’ chiru.”⁹

Li Dios nokorosob’tesi a’ yaal jo’ chanru li qapaab’aal.¹⁰ Li paab’aal a’an lix yo’leb’aal li wank rik’in jun choxahil ajom ut jun li junelikil ilob’aal. Li paab’aal a’an jun xb’eenil na’leb’ li namusiq’an chi yalok q’e. A’an jun li yo’yookil metz’ew aajel ru ut naxk’ut rib’ sa’ li qawanjik ut sa’ li qajom re xb’aanunkil chixjunil li k’a’ru neke’xpatz’ qe li Dios ut li Jesukristo. Nokoxk’e chixwiq’ib’ankil qib’ re xtz’aamankil chiru li Qaawa’ qab’eresinkil ut re wakliik ut k’anjelak rik’in xkawilal qach’ool re xtz’aqob’resinkil qak’anjel a’ yaal jo’ chanru li rajom a’an.

Naab’al chihab’ chaq anajwan, naq yookin chaq chi k’anjelak jo’ awa’b’ej re mision, kink’ul jun li b’oqom re jun li qaraarookil misioneer b’ar wi’ kiyehe’ we naq kikam li ranab’. Jultik we, sa’ xrahilal li hoonal a’an, naq li misioneer a’an ut laa’in koo’aatinak chirix lix chaq’al ru k’uub’anb’il na’leb’ li Dios choq’ reheb’ li ralaj xk’ajol ut chanru naq li nawom a’an tixk’ojob’ xch’ool.

Us ta jwal ra lix ch’ool xb’aan li rahilal a’an, li misioneer—rik’in xya’al li ru ut rik’in lix paab’aal chirix li Dios—kisaho’ xch’ool chirix lix yu’am li ranab’. Kixk’ut xkanab’ankil rib’ chiru lix chaab’il uxtaan li Qaawa’. Rik’in kawil ch’oolej kixye we naq taakanaaq chi k’anjelak sa’ lix mission rik’in chixjunil lix paab’aal ut lix yalb’al xq’e re naq k’ulub’ejaq choq’ re lix yeechi’ihom li Dios choq’ re a’an ut lix junkab’al. Sa’ li hoonal a’an re rajb’al ru, li misioneer a’an tiik chi paab’ank kixkanab’ li raam chiru li Dios, kixkanab’ rib’ chiru a’an ut kirak’ob’resi lix teneb’ankil rib’ chi k’anjelak chiru li Qaawa’ rik’in paab’aal ut chi yalb’il xq’e.

Ex was wiitz’in, wi ink’a’ chapchooko rik’in jun kawil kanab’ank-ib’ chiru li Dios ut li rajb’al re k’anjelak chiru, li rahilal naqak’ul sa’ li yu’am a’in naru nokoxk’am reek’ankil naq chanchan ta wi’ naqak’am jun li iiq jwal aal; ut naru naqatz’eq li qajom re xyu’aminkil chi tz’aqal li evangelio. Wi maak’a’ li qapaab’aal, taqakanab’ roxloq’inkil li rajom li Dios rik’in li k’a’ru taak’ulmanq moqon sa’ li qayu’am.¹¹

Sa’ li hoonal a’an re yale’k, laj tza—li junelik yoo chi yo’lek—naxyal roksinkil li qak’a’uxleb’aal re qasachb’al. Naxyal xq’unb’esinkil qach’ool naq maak’a’ aj-e xyu’aminkil li xb’eenileb’ na’leb’ re li evangelio. Chijultiko’q eere naq lix k’a’uxleb’aal li ruchich’och’il winq “moko naxk’ulub’an ta li k’aru nachal rik’in xMusiq’ li Dios; memil na’leb’ b’an cho’q re.”¹² Chijultiko’q eere naq laj Satanas “xik’ naril li Dios, ut rajlal naxpleeti, ut [nokoxb’oq] ut naq’unb’esink ch’oolej chi maakob’k ut chixb’aanunkil rajlal li k’a’ru ink’a’ us.”¹³ Miqakanab’ naq toxb’alaq’i; xb’aan naq, naq naqab’aanu, li qapaab’aal naq’una ut naqatz’eq li wankilal re xk’ulb’al li rosob’tesihom li Dios.

Wi xaqxooko ut ink’a’ noko’eek’asiik sa’ li qapaab’aal, li Qaawa’ tixk’e xkomon li qametz’ew re xtaqsinkil qib’ sa’ xb’een lix ch’a’ajkilal li yu’am. Tookawresiiq re xkanab’ankil xb’aanunkil li ink’a’ us, ut taanimanq qametz’ew re xq’axb’al ru li xninqal ru ch’a’ajkilal. A’an a’in li kixk’e xwankil lix tenamit li rey aj Limhi chi eelelik chiru li preexil chiruheb’ laj Lamanita.

Ex was wiitz’in, nekexinb’oq chixkanab’ankil eerib’ chiru li Dios ut chiruheb’ lix k’utumeb’ lix profeet. Nekexinb’oq chi ak’ob’resink re lee sumwank rik’in li Dios ut k’anjelak chiru rik’in chixjunil lee raam, maak’a’ naxye chanru xch’a’ajkilal li yu’amej. Ninch’olob’ xyaalal naq rik’in xwankilal li paab’aal jwal kaw chirix li Kristo tex’ach’ab’aaq chiru xpreexil li maak, li wiib’ank ch’oolej, lix majelal li paab’aal, li rahil ch’oolej, li rahilal; ut teek’ul chixjunil li osob’tesink yeechi’inb’il xb’aan li qaChoxahil Yuwa’ aj rahonel.

Ninch’olob’ xyaalal naq wan tz’aqal li Dios. A’an yo’yo. A’an nokoxra. Narab’i li qatij naq sa qach’ool ut jo’kan ajwi’ naq nawiib’an li qach’ool ut naq ra li qach’ool. Ninch’olob’ xyaalal naq li Jesukristo a’an laj Kolol re li ruchich’och’. A’an aj Tojol-ix.

Ninraq li waatin sa’ li kutan a’in rik’in raatinul jun li b’ich “Anajwan ink’a’, chi seeb’ b’an,” li natawman sa’ li b’ichleb’aal sa’ portugués:

Ninye a’in sa’ lix loq’laj k’ab’a’ li Jesukristo, amen.