Choq’ reheb’ li ramiiw ut aj tz’ilol rix li Iglees

K’a’ut taaraj xnawb’aleb’ ru li misioneer ut rab’inkileb’ lix k’utum junaq kristiaan li maak’a’ lix ch’a’ajkilal, rajb’al ru, malaj lix patz’om? Us b’i’, choq’ we a’an kik’ulman xb’aan li rahok—li rahok choq’ re jun li saaj ixq, li xRenee xk’ab’a’. Kin’ok chixraab’al, ut kiwaj sumlaak rik’in. Kiwil naq a’an jalan ut jalan lix na’leb’ chiruheb’ chixjunileb’ li saaj ixq keb’innaw ru. Kinpatz’ re naq taasumlaaq wik’in—ut kixye we naq ink’a’!

Jalam-uuch

Li Elder ut Hermana Costa

K’a’jo’ naq kisach inch’ool. Kink’oxla naq jwal chaab’ilin choq’ re junaq ixq! Kiwan xchaq’al wu, 24 chihab’ inyu’am, ut ak kintzolok sa’ jun nimla tzoleb’aal ut wan jun inchaab’il trab’aaj. A’an ki’aatinak chirix li k’a’ru naraj sa’ lix yu’am—naq ka’ajwi’ taasumlaq rik’in junaq tixk’am sa’ li santil ochoch, naq naraj jun junkab’al maak’a’ roso’jik—ut ink’a’ kiraj sumlaak wik’in. Laa’in toj nawaj chi wank rik’in, jo’kan naq kinsume rab’inkileb’ li misioneer. Ma a’in jun chaab’il ajom re xnawb’aleb’ ru li misioneer? Choq’ we hehe’!

Naq xb’een sut kinch’utlaak rik’ineb’ li misioneer, ink’a’ nintaw chi tz’aqal k’a’ru neke’xye, ut relik chi yaal, nink’oxla naq ink’a’ nink’e inch’ool chirab’inkileb’ chi tz’aqal. Tz’aptz’o li waam chirix jun ak’ paab’aal. Ka’ajwi’ kiwaj xk’utb’aleb’ naq sachenaqeb’ ut xk’ulb’al inhoonal re xq’unb’ensinkil xch’ool li xRenee naq taasumlaaq wik’in.

Anajwan eb’ li walal ink’ajol ak ke’k’anjelak malaj toj yookeb’ chi k’anjelak sa’ lix mision, ut nintaw ru li mayejak neke’xb’aanu li saaj winq ut ixq a’in re xk’utb’al lix evangelio li Jesukristo. Anajwan, li wajom a’an naq kink’e raj inxik chirab’inkileb’ li chaab’il misioneer li kine’xtzol junxil, a’aneb’ li Elder Richardson, li Elder Farrell, ut li Elder Hyland.

Jo’kan ut, re xb’een lin na’leb’, ninye eere ex ramiiw ut aj tz’ilol rix li Iglees: naq taanaweb’ ru li misioneer, b’aanu usilal, k’e aach’ool chirab’inkileb’; eb’ a’an yookeb’ chixk’eeb’al aawe chihab’ re lix yu’ameb’ li aajeleb’ ru.

Naq kinwulak xb’een sut sa’ jun ch’utam re li Iglees, kiwab’i naab’aleb’ li aatin li ink’a’ keb’intaw ru. Aniheb’ li Abejita? K’a’ru li Tijonelil re Aaron? li Komonil re Tenq’ank?

Wi a’in li xb’een sut wankat sa’ jun ch’utam re li Iglees ut nasach aana’leb’ rik’in k’a’ruhaq ink’a’ nakataw ru, matk’oxlak! Laa’in ajwi’ kisach inna’leb’! A’b’an toj nanaq sa’ lin ch’ool li k’a’ru kiweek’a, eb’ li ak’ eek’ahom re tuqtuukilal ut sahil ch’oolej li kinnumsi. Toj maji’ kinnaw sa’ li kutan a’an, a’ut li Santil Musiq’ej yoo chi hasb’ak sa’ lin xik ut re li waam: “A’an a’in us.”

Jo’kan b’i’, nawaj xyeeb’al li na’leb’ a’in sa’ jun raqal chi aatin: wi ink’a’ nakataw ru, matk’oxlak—jultikaheb’ li eek’ahom aanumsihom; neke’chal rik’in li Dios.

Chirix junjunqeb’ ch’utam rik’ineb’ li misioneer, ink’a’ mas yookin chi xik chi uub’ej. Kiweek’a naq maji’ nink’ul jun xk’ojob’ankil inch’ool chirix lix yaalalil li evangelio.

Sa’ jun kutan li xRenee kixpatz’ we, “Ma yookat chirilb’al ru lix Hu laj Mormon?”

Kinsume, “Ink’a’.” Ak yookin chirab’inkileb’ li misioneer—ma ink’a’ tz’aqal a’an?

Rik’in xya’al li ru, li xRenee kixye we naq a’an naxnaw naq yaal lix Hu laj Mormon ut naq wi laa’in ajwi’ tinwaj xnawb’al lix yaalalil, ka’ajwi’ tinnaw rik’in naq tinwil ru! Toja’ ut naq tinpatz’oq.

Cheril ru, chetz’il rix sa’ eech’ool, ut “chepatz’ re li Dios, li junelik Yuwa’b’ej, sa’ lix k’ab’a’ li Kristo, … rik’in x’anchalil eech’ool, chi tiik eerajom, chi wank’ eepaab’aal chirix li Kristo” (Moroni 10:4) wi yaal lix Hu laj Mormon, wi yaal li Iglees a’in.

Li rox na’leb’, chi k’osb’al ru sa’ jun aatin: naq aq taak’ul li k’a’aq re ru a’in—lix Hu laj Mormon—ut naq b’oqb’ileat chirilb’al ru ut chixpatz’bal re li Dios ma yaal, b’aanu usilal, b’aanu b’i’!

Li na’leb’ aj ch’otonel li nawaj xwotzb’al na’aatinak chirix li jalb’a-k’a’uxlej. Chirix naq kiwab’i chixjunileb’ lix k’utumeb’ li misioneer, toj maji’ naweek’a naq tento tinjaltesi chanru ninb’eresi lin yu’am. A’an li Elder Cutler, jun saaj misioneer, k’eek’o xch’ool ut b’ayaq ajwi’ naxnaw li español, li sa’ jun kutan kixye, “At Joaquin, qilaq sa’ wiib’al li hu Alma 42, ut taqoksi laa k’ab’a’ naq yooqo chirilb’al ru.”

Jo’ maajo’il li na’leb’ a’in jo’ kink’oxla, a’b’an kinb’aanu li k’a’ru kixpatz’ we li Elder Cutler ut kinwil sa’ li raqal 1: “Ut anajwan, at walal, [laj Joaquin], nink’e reetal naq wan chik k’a’ruhaq li naxik wi’ aach’ool chi k’oxlak, li ink’a’ nakatru chixtawb’al ru.” Ay! Li hu yoo chinwaatinankil!

Ut kiqil sa’ li raqal 2: “Anajwan k’e reetal, at walal [laj Joaquin], tinch’olob’ chawu li na’leb’ a’in,” toja’ naq ch’olob’anb’il lix T’anik laj Adan.

Ut sa’ li raqal 4: “Ut chi jo’kan naqil, naq kiwan jun kutan k’eeb’il re [laj Joaquin] re tixjal xk’a’uxl.”

Toj yooko chirilb’al li hu, timil timil, raqal chirix raqal, toj reetal koowulak sa’ li oxib’ raqal aj ch’otoneleb’. Toja’ naq kitoche’ inwaam xb’aan jun metz’ew q’axal kaw rib’. Li hu ki’aatinak chi tiik wik’in, ut kin’ok chi yaab’ak naq kinwil ru, “Ut anajwan, at walal [laj Joaquin], nawaj naq ink’a’ chik taakanab’ li k’a’aq re ru a’in chach’a’ajkilankil, ut ka’ajwi’ laa maak chakanab’ chach’a’ajkilankil, rik’in li ch’a’ajkilank a’an li taakub’sinq aawe sa’ li jalb’a-k’a’uxlej” (raqal 29).

Anajwan nink’e reetal naq yookin chiroyb’eninkil xk’ulb’al li k’utb’esinb’il na’leb’ chi ink’a’ tintoj lix tz’aq. Toj sa’ li hoonal a’an, maajun wa kin’aatinak chi yaal rik’in li Dios, ut xk’oxlankil naq tin’aatinaq rik’in junaq li maa’ani wan chiwu maak’a’ xyaalal chiwu. Teneb’anb’ilin chaq chixtuulanob’resinkil wib’ ut chixb’aanunkil li k’a’ru patz’b’il we, us ta lin ruchich’och’il k’a’uxl ink’a’ naxtaw xyaalal.

Sa’ li kutan a’an kinte li waam chiru li Santil Musiq’ej, kiwaj xjalb’al ink’a’uxl, ut kiwaj kub’eek inha’! Rub’elaj li hoonal a’an, ink’oxlahom naq li jalb’a-k’a’uxlej a’an k’a’ruhaq moko us ta ut b’ak’b’il rib’ rik’in li maak ut li q’etok aatin, a’b’an sa’ junpaat kiwil sa’ jun ak saqen—jo’ k’a’ruhaq chaab’il li naxte li b’e re ninqank ut sahil ch’oolejil.

Li Elder Cutler wan arin anajwan, ut nawaj xb’antioxinkil re xb’aan naq kixte xnaq’ li wu. Chalen chaq li hoonal a’an, chixjunil li ninsik’ xb’aanunkil sa’ inyu’am naxtaw xwankil xb’aan li hoonal naq kintuulanob’resi wib’ ut kintijok re xpatz’b’al xkuyb’al inmaak, ut naq lix yaalalil li tojb’al rix li maak kixb’aanu li Jesukristo choq’ we kikana jo’ jun raqal lin yu’am.

Jo’kan ut li na’leb’ aj ch’otonel, sa’ jun aatin: yu’ami li jalb’a-k’a’uxlej; maak’a’ chik mas nakatxjilosi chixk’atq li Qaawa’ Jesukristo chiru li ajom re jalok.

At inraarookil aj tz’ilol rix ut ramiiw li Iglees, wi yookat chi ab’ink anajwan, jwal nach’ wankat re xtawb’al li sahil ch’oolej nim wi’chik ru! Jwal nach’ wankat!

Nawaj aab’oqb’al, rik’in chixjunil lix metz’ew lin ch’ool ut toj sa’ xchamal li waam: ayu ut kub’si aaha’! A’an li jwal us taab’aanu sa’ laa yu’am! Moko ka’aj ta wi’ tixjal laa yu’am, tixjal b’an ajwi’ xyu’ameb’ laa walal aak’ajol ut laa wimam.

Jalam-uuch

Xkutankil lix sumlajik li Elder ut li Hermana Costa

Li Qaawa’ kinrosob’tesi rik’in jun junkab’al. Kinsumla rik’in li xRenee ut wan qe kaahib’eb’ li qalal qak’ajol chaq’aleb’ ru. Ut xb’aan naq kikub’e inha’, laa’in ninru, jo’ chanru ajwi’ li profeet aj Lehi re li najter kutan, chixb’oqb’aleb’ chixyalb’al ru li che’ re li yu’am, a’ lix rahom li Dios (chi’ilmanq 1 Nefi 8:15; 11:25). Ninru chixtenq’ankileb’ chi chalk rik’in li Kristo.

Jo’kan ut, b’aanu usilal ut tz’il rix sa’ laa ch’ool li k’a’ru kink’ul chaq, ut (1) ab’iheb’ chi tiik ru li misioneer, (2) ayu sa’ li Iglees ut jultika li musiq’ejil eek’ahom, (3) il ru lix Hu laj Mormon ut patz’ re li Qaawa’ ma yaal, ut (4) jal laa k’a’uxl ut kub’si aaha’.

Ninch’olob’ xyaalal naq wi nakattoj lix tz’aq li k’utb’esinb’il na’leb’, nakatuulanob’resi aawib’, nakawil ru hu, nakattijok, ut nakajal aak’a’uxl, taateemanq li choxa ut taanaw, jo’ chanru ninnaw laa’in, naq li Jesus a’an li Kristo. A’an laj Kolol we, uta a’an laj Kolol aawe. Sa’ xk’ab’a’ li Jesukristo, amen.