Lōke Anij ilo Ejjeļo̧k Pere

Ro jeiū im jatū, ikōņaan jino ennaan in aō rainin ilo aō kam̧ool ke ijeļā bwe Būreejtōn Thomas S. Monson ej rikanaan eo an Anij rainin ilo raan kein ad. Rikakpilōklōk ro an ilo Būreejtōnji eo Kein Kajuōn im Rijilōk ro Jon̄oulruo rej barāinwōt, ilo m̧ool, rej rikanaan, rej riloloro, im rikwaļo̧k revelesōn ro. Er rej pinej jenkwan Irooj Jisōs Kraist im ewōr aer jim̧we n̄an kwaļo̧k ļōmņak eo An im Ankilaan āinwōt an kwaļo̧k n̄an er. Ij kam̧ool bwe jej pād ilo kōjparok ilo ad ļoor ko̧o̧njeļ ko aer. Irooj ej im̧we er bwe ren kōkajoorļo̧k tōmak ko ad ilo Jemedwōj Ilan̄ im ilo Nejin, Jisōs Kraist, im ilo Pinmuur eo An bwe jen jab maron̄ ebbeer ilo ad jelm̧ae apan̄ ko ad rainin.

Ilo Bok in Mormon eo, jej riit kōn juon em̧m̧aan etan Ammōn kar jilkinļo̧k e jān āneen Zaraemla n̄an āneen Liai-Nipai n̄an an jeļā kōn armej ro an. Ijin ekar loe Kiin̄ Limai im armej ro an, ro rekar pād ilo kōm̧akoko n̄an RiLeman ro. Kiin̄ Limai ekar bōk kakpilōklōk jān men ko Ammōn ekar kwaļo̧ki ippān kōn armej ro an ilo Zarahemla. Būruwōn ekar obrak kōn kōjatdikdik eļap im lan̄lōn̄ jon̄an ekar kakuktok armej ro an n̄an tampeļ im ba:

“Kōn menin, kom̧in kotak bōrami, im lan̄lōn̄, im likūt ami kōjatdikdik ilo Anij.…

“… A eļan̄n̄e kom̧ naaj oktak tok n̄an Irooj kōn aolepān m̧wilaļ in būruōmi,… im jerbal n̄an e kōn aolep niknik in ļōmņak,… Enaaj, ekkar n̄an ankilaan im An kōņaan, kōtļo̧k kom̧ jān ineen kōm̧akoko.”¹

Tōmak eo an armej ro an Kiin̄ Limai rekar lukkuun in jelōt er jān naan ko an Ammōn jon̄an rekar kōm̧m̧ane juon bujen ippān Anij n̄an jerbal n̄an E im n̄an kōjparok kien ko An mekarta jekjek ko reppen. Kōn tōmak eo aer, rekar maron̄ in jino ejaake juon karōk n̄an ko jān pein RiLeman ro.²

Ro jeiū im jatū, jouj im ļōmņak kōn aorōk in kajjitōk in Kiin̄ Limai ekar leļo̧k n̄an armej ro an im ejejjet n̄an kōj. Ekar ba, “Kom̧in kotak bōrami, im lan̄lōn̄, im likūt ami kōjatdikdik ilo Anij.” Ippān naan kein, Limai ekar kajjitōk ippān armej ro an n̄an reim̧aanļo̧k n̄an ilju im jekļaj kōn mej ko mejān tōmak; n̄an joļo̧k mijak im bōk kōjatdikdik ļo̧tak jān tōmak, im n̄an jab ebbeer ilo aer likūt aer lōke ilo Anij mekarta jekjek ko aer.

Mour in kanniōk in ej juon iien mālijjon̄ ijo jenaaj kwaļo̧k n̄e jenaaj kōm̧m̧an aolep men ko me Irooj ad Anij enaaj kean̄ e kōj.³ Menin enaaj aikuji juon tōmak ekajoor ilo Kraist men̄e ilo iien ko relukkuun eppen. Enaaj aikuji bwe jen bun̄ m̧aanļo̧k kōn dim tōmak ilo Kraist, bōk tōl jān Jetōb im lōke bwe Anij enaaj kake aikuj ko ad.⁴

Ilo jem̧ļo̧kin kwaļo̧k eo an ioon laļ in, m̧okta jān aer kar bōke im kalbuuji, Rilo̧mo̧o̧r ekar katakin rikaļoor ro An, “Ilo laļ kom̧ij en̄taan, a kom̧win m̧ōņōņō; N̄a Iar bōk anjo̧ ioon laļ.”⁵

Bōk jidik iien ippa im kejōkļo̧kjeņ—Jisōs Kraist, E Wōt Nejin Jemān Ejitōn bōro, ekar ejjeļo̧k an jerawiwi im ekar anjo̧ jān aolep kapo, metak, apan̄, im en̄taan ko an laļ in. Ekar to̧o̧rļo̧k bilin̄lin̄ in bōtōktōkin ilo Getsemane; Ekar en̄taan kōn eļap metak ko ban maron̄ kōmeļeļeiki. Ekar bōk Ioon Make aolep metak im nan̄inmej ko. Ej jutak im pojak n̄an jipan̄—n̄an jipan̄ kōj kajjojo—kōn aolep eddodo. Kōn mour eo An, en̄taan eo An, mej eo An, im jerkakpeje eo An, Ekar bōkļo̧k aolep apan̄ n̄an lan̄lōn̄ eo ad im n̄an lo aenōm̧m̧an ioon laļ in. Kōjeraam̧m̧an ko an pinmuur eo An rej ilo̧k n̄an aolep ro rej bōk E im kaarmejete er make im ro otemjej rej kotak dōbwāāl eo An im ļoor E āinwōt rikam̧ool ro An rem̧ool.⁶ Kōn menin, ilo ad kōjerbal tōmak ilo Jisōs Kraist im Pinmuur eo An, jenaaj kajoorļo̧k, eddodo ko ad renaaj jako, im kōn E jenaaj anjo̧ jān laļ in.

Ro jeiū im jatū, ilo ad ļōmņak kōn kajoor im kōjatdikdik eo me jemaron̄ bōke jān Rilo̧mo̧o̧r, ewōr unin bwe jen kotak bōrad, lan̄lōn̄, im bun̄ m̧aanļo̧k ilo tōmak ilo ejjeļo̧k pere, “bwe eo ej pere ej āinwōt ņo in lo̧meto e m̧akūtkūt im lim̧aajņoņo in kōto. … Armej būruon ruo im e kijon̄ oktak ilo iaļ ko an otemjej.”⁷

Kiin̄ Limai ekar rōjan̄, “oktak tok n̄an Irooj kōn aolepān m̧wilaļ in būruōmi, … jerbal n̄an e kōn aolep niknik in ļōmņak, eļan̄n̄e kom̧ij kōm̧m̧an e men in, Enaaj, ekkar n̄an ankilaan im An kōņaan, kōtļo̧k kom̧ jān ineen kōm̧akoko.”⁸

Ron̄jake naan ko make an Rilo̧mo̧o̧r ilo an tūbļo̧take kōj:

“En jab pok būruemi, kom̧win lōke Anij, kom̧win barāinwōt lōke Eō.…

“Eļan̄n̄e kom̧ij iakwe Eō, kōjparoki kien ko Aō.…

“Eo kien ko Aō ippān, im ej kōjparoki, e in ej iakwe Eō. Im eo ej yokwe Eō Jema enaaj yokwe e im inaaj yokwe e im Inaaj kwaļok Eō n̄an e.”⁹

Anij ej kōjeraam̧m̧an kōj ekkar n̄an tōmak eo ad.¹⁰ Tōmak ej kein jipan̄ eo n̄an mour kōn un ko rekwojarjar im jibadbad ko n̄an mour indeeo. Tōmak ej juon pedped in jerbal eo ej im̧we kōj n̄an niknik. Elukkun aorōk, kajoor in mour ej waļo̧k ilo m̧wil ko ad rem̧m̧an im ad ikdeelel im m̧ōņōņō in kōm̧m̧ani men ko otemjej Anij im Jisōs Kraist rej kajjitōk ippād. Ej kōm̧m̧an bwe jen būkwelōlō n̄an pukot Irooj kōn jipan̄ im jutak im m̧akūtkūt kōn lōke n̄an bōk men ko rej jokkun wōt ippān Ankilaan.

Iiō ko ļo̧k ke ikar jerbal āinwōt juon mijen būreejtōn, ikar bōk juon phone call jān jinen im jemān juon iaan mijenede ro im rekar karon̄ tok eō kōn jako eo an leddik eo jatin. Ij keememej, ilo iien in epen n̄an mijenede in im n̄a kōm̧ro kar kōnono kōn aiboojoj eo an karōk in lo̧mo̧o̧r eo n̄an ajri ro nejin im wāween an jeļāļo̧kjeņ in maron̄ kaenōm̧m̧an e.

Mekarta, ļaddik in ekar ilbōk im būrom̧ōj kōn wāween in epen, mijenede in—kōn kōmjaļaaļ in mejān im kōn tōmak ilo Anij—ekar lan̄lōn̄ kōn mour eo an leddik eo jatin. Ej kwaļo̧k kōn lōke eo ejjeļo̧k pere ie ilo tūriam̧o ko an Irooj. Kōn kajoor, ekar jiron̄ eō bwe enaaj wōnm̧aanļo̧k im jerbale mijen eo an kōn aolep an tōmak im tiljek bwe en maron̄ erreo n̄an kallim̧ur ko an Anij n̄an e im baam̧le eo an. Ilo tōre in aikuj in, mijenede in etiljek ekar leļo̧k būruwōn n̄an Anij, likūt aolep an lōke ilo E, im kōkāāl kallim̧ur eo an n̄an jerbal n̄an Irooj kōn tōmak im kōn aolep tiljek.

Ro jeiū im jatū, eļan̄n̄e ejjeļo̧k ippād lōke eo edim ilo Anij im ikdeelel n̄an jerbal n̄an E, en̄jake ko ad rekōmetak ilo mour in kanniōk emaron̄ tōlļo̧k kōj n̄an en̄jake āinwōt n̄e jej eddodo kōn juon ine eddo; emaron̄ kōm̧m̧an bwe jen luuji ikdeelel ko ad n̄an ad lukkuun mour kōn gospel eo. Eļan̄n̄e ejjeļo̧k tōmak, jenaaj luuji jon̄ak eo n̄an kam̧oolol kōn kōm̧anm̧an ko an Anij kōn men ko me renaaj waļo̧k tokālik ilo mour ko ad.¹¹

Ilo iien mālijjon̄ kein, rikapo eo—eo aolep iien ej pukot ro emaron̄ kapoik er—kajjieon̄ n̄an kōjerbal meļeļe ko ad im ekajet ko ad ņae kōj. Ej kajjieon̄ in kareel kōj bwe ejjeļo̧k tokjān bwe jen mour kōn pedped in gospel eo. Jouj im keememej bwe meļeļe ko an armej ilo piktokin “A armej kōn biktoken e jab bōk men ko an Jetōb an Anij, bwe re men in bwebwe ippān.”¹² Keememej bwe Setan “ej rikōjdat [an] Anij, im [e] ej jum̧ae E iien otemjej, im karuwainene im karreel [kōj] n̄an jero̧wiwi, im n̄an kōm̧m̧an men eo enana iien otemjej.”¹³ Jejjab aikuj kōtļo̧k an moņe kōj; bwe n̄e jenej kōtļo̧k, jej wōtlo̧k ilo ad tōmak im jej luuji kajoor eo n̄an bōk kōjeraam̧m̧an ko an Anij.

Eļan̄n̄e jej dim im jab ebbeer ilo ad tōmak, Irooj enaaj kōļapļo̧k maron̄ ko ad n̄an ļōn̄aj kōj make ilōn̄ in apan̄ ko an mour in. Jenaaj maron̄ anjo̧ ioon kōņaan ko renana im jenaaj ejaake maron̄ eo n̄an anjo̧ mekarta ta ko rej waļo̧k maron̄ men ko reppen. En̄in ej wāween eo ekar kōmaron̄ armej ro an Kiin̄ Limai n̄an kōm̧m̧ane juon iaļan jo̧o̧r em̧m̧an n̄an ellā jān kōm̧akoko an RiLeman ro.

Ro jeiū im jatū, ij kajjitōk ippem bwe kom̧win likūt ami lōke ilo Anij im ilo katak ko an rikanaan ro An. Ij kajjitōk ippemi bwe kom̧win kōkāāle bujen ko ami ippān Anij, n̄an jerbal n̄an E kōn aolepān būruwōm̧i, mekarta jekjek ko rekapokpok an mour in. Ij kam̧ool bwe jān ami kajoor in tōmak eo ejjeļo̧k pere ie ilo Kraist, kom̧ naaj anemkwoj jān kōm̧akoko an jerawiwi, pere, jab tōmak, im būromōj, en̄taan; im kom̧ naaj bōk aolep kōjeraam̧m̧an ko kar kallim̧ur kaki jān Jemedwōj Ilan̄ eo ej iakwe kōj.

Ij kam̧ool bwe Anij em̧ool. Ej mour. E ej io̧kwe kōj. Ej ron̄jake jar ko ad ilo iien ko jej m̧ōņōņō im ilo iien ko jej pere, būrom̧ōj, im ebbeer. Ij kam̧ool bwe Jisōs Kraist eo ej Rilo̧mo̧o̧r eo an laļ. E ej Ripinmuur eo.

Ij kiili kōnono in aō rainin kōn naan ko an al in “Jab Kiiō ak ilo Iiō ko rej Itok,” ej waļo̧k ilo bok in al eo an RiPortuguese:

Ij ba men kein ilo et eo ekwojarjar etan Jisōs Kraist, amen.