Jouj, Iakwe-em̧ool, im Iakwe

Em̧m̧aan ro jeiū im jatū, ij utiej kōn kōjeraam̧m̧an in em̧ōj letok bwe in kōnono n̄an kom̧ ilo kobatok in ipeļaakin laļ in an rikabwijer ro retiljek an priesthood eo an Anij. Joteen in, ij kwaļo̧k kōn juon unin kōnono ikar kōnono kake m̧okta.

Rikanaan Mormon ekar kōlaajrake juon iaan kadkad ko raorōk an Rilo̧mo̧o̧r eo im bwe rikaļoor ro An rej aikuj in ļoore. Ekar ba:

“Eļan̄n̄e armej eo ej ineem̧m̧an im ettā ilo bōro, im kwaļo̧k būruōn jān kajoor eo an Jetōb Kwōjarjar bwe Jisōs ej Kraist eo, eaikuj wōr an iakwe-em̧ool; bwe eļan̄n̄e ejjeļo̧k an iakwe-em̧ool e ejjeļo̧k tokjān; kōn menin eaikuj wōr an iakwe-em̧ool.

“Im iakwe-em̧ool ej meanwōd im e jouj, im ej jab juunm̧aade, ej jab kappukot men ko an. …

“Kōn menin, ro jeiū im jatū re jitōnbōro, eļan̄n̄e ejjeļo̧k ami iakwe-em̧ool, kom̧jekdo̧o̧n. Kōn menin, kom̧in eddāp n̄an iakwe-em̧ool, eo ej ļaptata jān men otemjej, bwe men otemjej renaaj jem̧ļo̧k—

“A iakwe-em̧ool ej iakwe eo erreo an Kraist, im e kijejeto indeeo, im jabdewōt eo lo e ippān ilo raan eo āliktata, enaaj em̧m̧an ippān.”¹

Em̧m̧aan ro rejitōn bōro, jejjab kautiej priesthood eo an Anij eļan̄n̄e jejjab jouj n̄an ro jet.

Ro jera im m̧ōtta Elder Joseph B. Wirthlin em̧ool ekar juon em̧m̧aan ejouj. Ekar ba:

“Jouj eaorōk ilo mour eo ilo celestial. Jouj ej wāween an armej eo kajjieon̄e erom āinwōt Kraist ilo an kar kōm̧anm̧an n̄an ro jet. Jouj ej aikuj waļo̧k ilo aolepān naan ko ad kōm̧m̧an ko ad ilo jikin jerbal, ilo jikin jikuuļ, im ilo kabun̄ in, im eļaptata ilo m̧ōko im̧ōd.

“Jisōs, ad Rilo̧mo̧o̧r, ekar waanjon̄ak eo ilōn̄tata kōn jouj im tūriam̧o̧.”²

Jeje ko Rekwojarjar rej katakin bwe kōm̧m̧an ko rejim̧we an priesthood eo ej pedped wōt ioon ad mour kōn pedped in katak ko kōn jouj, iakwe-em̧ool, im iakwe. Ilo Katak im Bujen ko jej riit:

“Ejjeļo̧k kajoor ak jelōt emaron̄ ak aikuj in dāpiji jān wōt priesthood eo, en jān wōt jeļā ņae, jān meoeo im ettā bōro, im jān iakwe jab ankilaan riab;

“Jān jouj, im lukkuun jeļāļo̧kjeņ, eo enaaj kanooj kōļapļo̧k jetōb eo ilo ejjeļo̧k m̧oņ, im ilo ejjeļo̧k etao.”³

Em̧m̧aan ro rejitōn bōro, jen etale mour ko ad im ļōmņake wāween ad ļoor waanjon̄ak ko an Rilo̧mo̧o̧r eo ilo ad jouj, iakwe, im ļap tūriam̧o̧. Im ilo ad kōm̧m̧an āindein, jenaaj pād ilo juon wāween em̧m̧an n̄an kūr laļ tak kajoor ko an lan̄ n̄an kōj make, n̄an baam̧le ko ad, im n̄an riito itak ro m̧ōttad ilo iaļ in jet iien epen n̄an bar jepļaakļo̧k n̄an kapijuknen eo ad ilan̄. Ij jar ilo etan Jisōs Kraist, amen.