Li tz’aqal rahok narisi li xiw

Wiib’ oxib’ cient chihab’ chaq sa’ Norte America, jun li k’anjel li “nimla ajsink” yeeb’il re kipuktesiik sa’ li tenamit. Jun reheb’ lix nimla ajom, a’an rajsinkileb’ ru li ani anchal yookeb’ chi wark chirix li k’a’ru re musiq’ej.

Li saaj aj Jose Smith kitoch’e’ xb’aan li k’a’ru kirab’i rik’ineb’ aj jultikanel li yookeb’ chi tz’qonk sa’ li ajsink a’in. Xb’aan a’in ut xb’aan k’a’aq chik re ru, kixye naq tixsik’ rajom li Qaawa’ sa’ tijok.

Eb’ laj jultikanel a’in neke’jultikank chi jwal b’aanunb’il li k’utb’esink, ut na’no ru raatineb’ sa’ xk’ab’a’ xyeeb’al resil li xam sa’ xb’alb’a li naroyb’eni laj maak.¹ Li raatineb’ ink’a’ naxwartesiheb’ li komon—a’b’an maare naxk’eheb’ chi xuwak sa’ xmatk’ moqon. Anchal tuqub’anb’il li k’anjel a’in choq’ re xxib’esinkileb’ li komon chi wulak sa’ iglees.

Chalen chaq junxil, li xib’esink nab’aanuman re xk’eeb’aleb’ li kristiaan chi k’anjelak. Li na’b’ej yuwa’b’ej neke’xb’aanu rik’ineb’ xkok’al, li patron rik’ineb’ laj k’anjel, ut li awa’b’ej rik’ineb’ li tenamit.

Eb’ li seeb’eb’ sa’ nimla k’ayink neke’xtaw ru xwankil li xiw, ut neke’roksi. Jo’kan naq wankeb’ li eetalil li anchal neke’xye naq wi toopalto’q sa’ xloqb’al junaq li cereal malaj taqasach xloq’b’al junaq li b’atzul malaj jun li celular, maare taqanumsi qayu’am sa’ rahilal, ut tookamq sa’ junataal chi ra qach’ool.

Naqase’e a’in ut naqak’oxla naq maajo’q’e raj taqapaab’ a’an, a’ut wan naq naqapaab’. Jo’kan ajwi’, wan naq laa’o naqoksi li xiw re xk’eeb’aleb’ jalan chixb’aanunkil li naqaj laa’o.

Li waatin anajwan wan wiib’ xk’anjel: Li xb’een, a’an qatenq’ankil chixtz’ilb’al rix toj b’ar naqoksi laa’o li xib’esink rik’ineb’ jalan—ut qik’in ajwi’ qib’. Li xkab’, a’an xk’utb’al jalan chik li b’e jwal us wi’chik.

Xb’een, qilaq xmajelal li xiw. Yaal ajwi’, ani ink’a’ ak x’eek’asiik xb’aan li xiw chixkanab’ankil li wa ink’a’ us, chiroksinkil li cinturon, chixkawob’resinkil rib’, chixk’uulankil li tumin, malaj chixjalb’al xk’a’uxl chirix li maak?

Tz’aqal yaal naq li xiw naru taawanq xwankil sa’ li k’a’ru naqab’aanu. A’ut li wankilal a’an wan xraqik ut moko najt ta nawulak. Li xiw anchal maajo’q’e naru tixjal li qaam, ut maajo’q’e toxjaltesi jo’ komon li naqara li tiikilal ut li naqaj ab’ink chiru li qaChoxahil Yuwa’.

Li ani neke’xuwak naru te’xye ut te’xb’aanu li k’a’ru tiik, a’ut ink’a’ neke’reek’a li k’a’ru tiik. K’iila sut neke’reek’a xjunaatal, li po’ok, ut li josq’il. Moqon, na’ok a’in jo’ wech’ok-ib’, q’etq’etil, ut po’resink ch’oolej ajwi’.

Jun li rahilal, a’an naq li na’leb’ a’in ink’a’ nataliman ka’ajwi’ sa’ xk’anjel li ruchich’och’. Ninraho’ naq ninwab’i resileb’ xkomon li Iglees li neke’xk’anjela li awa’b’ejil moko tiik ta—ma sa’ rochochnal, sa’ lix b’oqb’aleb’ sa’ Iglees, sa’ xtrab’aaj, malaj rik’ineb’ li ras riitz’in sa’ b’e.

K’iila sut, wankeb’ li te’xjit li minok-u, a’ut ink’a’ te’ril naq a’aneb’ ajwi’ aj b’aanuhom re. Neke’xtaqla xpaab’ankil li chaq’rab’ yal xe’xyoob’, a’b’an naq wan ani li ink’a’ tixpaab’, neke’xch’iila sa’ kawil aatin, sa’ rahil ch’oolej, ut wan ajwi’ sa’ tib’elej.

Li Qaawa’ kixye naq “wi naqayal … xk’anjelankil li taqlank malaj li awa’b’ejink, malaj li minok-u sa’ xb’eeneb’ li raameb’ li ralal xk’ajoleb’ li winq, rik’in yal ta jun raqalaq li maa’usilal … li choxa narisi rib’; [ut] naraho’ xch’ool lix Musiq’ li Qaawa’.”²

Wan naq naru too’aleeq chixyeeb’al naq us li qab’aanuhom xb’aan naq li k’a’ru xchal sa’ xraqik naxtiikob’resi ru li xqab’aanu. Naru ajwi’ taqak’oxla naq li minok-u malaj li kawil taqlank taawanq choq’ xtenq’ankileb’ jalan. Moko jo’kan ta, xb’aan naq li Qaawa’ xye naq “li naruuchin li Musiq’ej, a’an li rahok, sahil ch’oolej, tuqtuukilal, kuyuk, chaab’ilal, usilal, paab’aal, tuulanil, [ut] kuyuk-ib’.”³

Naq ninwulak chixnawb’al ru lin Choxahil Yuwa’, aran nawil chanru naxmusiq’aheb’ ut naxk’ameb’ xb’e li ralal xk’ajol. Moko josq’ ta, ut ink’a’ napleetik chi moko na’eeqajunk.⁴ Tz’aqal li naraj—lix k’anjel ut lix loq’al—a’an qatenq’ankil, qataqsinkil, ut xk’amb’al qab’e sa’ lix tz’aqalil.⁵

Li Dios kixk’utb’esi rib’ chiru laj Moises jo’ jun li “Dios aj uxtaan ut tuulan, li nab’ayk chi josq’o’k ut maak’a’ch’in lix rahom ut lix tiikilal xch’ool.”⁶

Lix rahom li qaYuwa’ choq’ qe, li ralal xk’ajol, naxq’ax chi us li k’a’ru naqanaw xtawb’al ru.⁷

Ma naraj naxye a’in naq li Dios naxk’ulub’a naq taqab’aanu li k’a’ru naxq’et lix taqlahom? Ink’a’. Maajo’q’e!

A’b’an ink’a’ naraj xjalb’al ka’ajwi’ li k’a’ru naqab’aanu. Naraj xjalb’al tz’aqal chanru wanko. Naraj xjalb’al li qaam.

Naraj naq taqaye’ li quq’ re taqachap li b’arb’ookil ch’iich’, taqak’e reetal qaxiw, ut chi kaw qach’ool tooxik chi uub’ej sa’ li laatz’ ut ka’ch’in ruhil b’e. Naraj a’in xb’aan naq nokoxra ut xb’aan naq a’an a’in xb’eehil li sahil ch’oolejil.

Jo’kan ut, chan ru naq li Dios nareek’asiheb’ ralal xk’ajol chixtaaqenkil sa’ qakutankil laa’o?

Kixtaqla li Ralal!

Li Dios kixtaqla li Ralal Junaj Chirib’il, li Jesukristo, re xk’utb’al chiqu li chaab’il b’e.

Li Dios nokoreek’asi rik’in li q’unb’esink ch’oolej, li najtil oyb’enink, li q’unal ch’oolej, li tuulanil, ut li rahok chi moko pak’b’il ta.⁸ Li Dios wan qochb’een. Nokoxra, ut naq nokot’ane’, naraj naq toowakliiq, naq taqayal wi’chik, ut naq taanimanq qametz’ew.

A’an aj k’utunel choq’ qe.

A’an li qayo’onihom jwal nim ut raaro.

Naraj rajsinkil qu rik’in paab’aal.

Naxnaw naq tooruuq chixtawb’al qana’leb’ chirix li qat’anik ut taqasik’ ru li us.

Wan jun li b’e jwal us wi’chik!⁹

Jun li na’leb’ li naroksi laj Satanas re reek’asinkileb’ jalan, a’an xk’oxlankil junes li maa’usilal sa’ ruchich’och’, ut xyeeb’al naq jwal nim.

Tz’aqal yaal naq li ruchich’och’ junelik wanjenaq ut toj taawanq sa’ majelal. Wankeb’ naab’al li neke’rahob’tesiik xb’aan li k’a’ru yal na’ux sa’ ruchich’och’ jo’ ajwi’ xb’aaneb’ li winq. Li po’b’il na’leb’ ut li maa’usilal anajwan neke’xwaklesi li qak’a’uxl.

A’b’an us ta wan chi jo’kan, ink’a’ raj tinjal ru lin wanjik sa’ li kutankil a’in rik’in jalanaq chik li kutankil. Jwal nim li qosob’tesinkil naq wanko sa’ jun kutankil re nimla usaak, saqenob’resinb’il na’leb’, ut li taqenaqil wanjik. Li jwal nim wi’chik, a’an li qosob’tesinkil naq wan xtz’aqalil lix evangelio li Jesukristo, li naxk’e jun qana’leb’ chirix li k’a’ru xuwajel, ut naxk’ut chiqu chanru taqasach malaj taqakuy li wank sa’ li xuwajel.

Naq nink’oxla li osob’tesink a’in, nawaj tinwiqib’ wib’ ut tinye li b’antioxink re li qaChoxahil Yuwa’ choq’ re lix rahom choq’ re chixjunileb’ li ralal xk’ajol.

Ink’a’ ninpaab’ naq li Dios naraj naq eb’ li ralal xk’ajol te’xuwaq malaj te’xk’e reetal junes li ink’a’ us re li ruchich’och’. “Xb’aan naq moko li xiwak ta xqamaatani chaq rik’in li Dios, a’b’an li wankilal, li rahok, ut li tuqtuukil k’a’uxlej.”¹⁰

Kixk’e naab’al li taasaho’q wi’ qach’ool. Yal tento taqataw ut taqak’e reetaleb’. K’iila sut, li Qaawa’ naxye qe “mexxuwak,” ut “chiwanq xsahil eech’ool,”¹¹ ut “mexxuwak, ex ch’ina teep inkarneer.”¹²

Ex was wiitz’in, laa’o lix “ch’ina teep” li Qaawa’. Laa’o laj Santil Paab’anel sa’ Roso’jikeb’ li Kutan. Ak naxye sa’ qak’ab’a’ naq laa’o taqoyb’eni lix sutq’ijik li Kolonel ut taqakawresi qib’ ut li ruchich’och’ chixk’ulb’al. Chi jo’kan, chook’anjelaq chiru li Dios ut chiqara li qas qiitz’in. Chiqab’aanu taxaq a’in chi kaw qach’ool, chi tuulan qach’ool, ut chi ink’a’ xik’ taqil yalaq chik chi paab’aal malaj ch’uut. Ex was wiitz’in, k’eeb’il qak’anjel re taqatzol raatin li Dios ut too’ab’inq chiru lix yaab’ xkux li Musiq’ej, re taaruuq taqanaw “li reetalileb’ li kutan, ut eb’ li reetalil lix k’ulunik li Ralal li Winq.”¹³

Jo’kan naq ink’a’ naqasach xnawb’al chirix lix ch’a’ajkilal li ruchich’och’, chi moko naqasach xnawb’al li ch’a’aj sa’ qakutankil. A’b’an ink’a’ naraj naxye naq tento raj taqakub’si qib’ ut jalaneb’ rik’in li xiwak. Jo’ ruuchil xk’oxlankil xnimal li qach’a’ajkilal, ma ink’a’ raj jwal us wi’chik xk’oxlankil lix nimal, xchaab’ilal, ut tz’aqal xwankil li qaDios, chi k’ojk’o qach’ool rik’in, ut sa’ sahil ch’oolejil choq’ re lix sutq’ijik li Jesukristo?

Jo’ lix tenamit re li sumwank, ink’a’ raj taarame’q qu xb’aan li xiw naq yoo ta li ink’a’ us. Naru b’an tooxik chi uub’ej rik’in paab’al, kawil ch’oolej, ut xk’ojob’ankil qach’ool rik’in li Dios naq toonach’o’q rik’in li ch’a’ajkilal ut li usilal li wankeb’ chiqu.¹⁴

Ink’a’ nokob’eek jo’ tzolom sa’ qajunes. “Li Qaawa’ lee Dios … naxik eerochb’een; ink’a’ texxkanab’ eejunes.”¹⁵

“Li Qaawa’ taayaloq cherix. Mexk’oxlak.”¹⁶

Naq li xiw nokoxka’ya, kawaq qach’ool, qaxokaq qapaab’aal, ut k’oojk’ooq qach’ool sa’ li aatin naq “maajun k’anjeleb’aal li yiib’anb’il re aapleetinkil taa’usaaq.”¹⁷

Ma wanko sa’ jun kutan xuwajel ut re pleetik? Yaal, wanko.

Li Dios ajwi’ kixye, “Sa’ li ruchich’och’ teek’ul rahilal, a’b’anan kawaq eech’ool; Laa’in xinq’ax ru xwankil li ruchich’och’.”¹⁸

Ma naru taqoksi li paab’aal re took’anjelaq chi jo’kan? Ma naru taqapaab’ li qateneb’ankil ut li qasumwank? Ma naru taqapaab’eb’ lix taqlahom li Dios us ta ch’a’aj li wanko wi’? Yaal, naru!

Naru taqab’aanu xb’aan naq li Dios kixye, “Chixjunil li k’a’aq re ru taak’anjelaq sa’ junajil choq’ re lee chaab’ilal, wi nekexb’eek chi tiik.”¹⁹ Jo’kan ut, chiqakanab’ li qaxiw ut choowanq sa’ sahil ch’oolej, tuulanil, yo’onink, ut chi kaw qanawom naq li Qaawa’ wan qik’in.

Ex wochb’een, ex inkomon winq ut inkomon ixq sa’ li Kristo, wi wanko sa’ li xiwak malaj li k’oxlak, malaj wi naqil naq li qaatin, li qana’leb’, malaj li qab’aanuhom yoo chixxib’esinkileb’ jalan, nintz’aama chi anchal xmetz’ew li waam naq too’ach’ab’aaq rik’in li xiw a’in xb’aan li b’an xaqab’anb’il sa’ choxa choq’ re li xiw: lix saq ruhil rahom li Kristo, xb’aan naq “li tz’aqal rahok narisi li xiw.”²⁰

Lix tz’aqal rahom li Kristo naxq’ax ru li qaalenkil chi rahob’tesink, chi minok-u, malaj chixkub’sinkil junaq.

Lix tz’aqal rahom li Kristo nokoxkanab’ chi b’eek sa’ tuulanil, tiikilal, ut chi kaw qanawom sa’ xtaaqenkil laj Kolol qe. Lix tz’aqal rahom li Kristo naxk’ojob’ qanawom re naq tooruuq chixtiikisinkil qib’ sa’ qaxiw ut taqak’ojob’ qach’ool sa’ xwankil ut xchaab’ilal li qaYuwa’ ut li Ralal, li Jesukristo.

Sa’ qochochnal, sa’ xna’aj li qatrab’aaj, sa’ qak’anjel sa’ Iglees, sa’ qach’ool, chiqajal li xiw rik’in lix tz’aqal rahom li Kristo. Lix rahom li Kristo tixjal li xiw rik’in li paab’aal!

Lix rahom toxtenq’a chixnawb’al ru ut chixpaab’ankil lix chaab’ilal li qaChoxahil Yuwa’, lix k’uub’anb’il na’leb’, lix evangelio, ut eb’ lix taqlahom.²¹ Lix raab’al li Dios ut li qas qiitz’in tixjal li ab’ink chiru xtaqlahom li Dios jo’ jun li osob’tesink ut ink’a’ jo’ jun li iiq. Lix rahom li Kristo toxtenq’a chi q’uno’k sa’ qach’ool, chi kuyuk maak, chixk’oxlankileb’ jalan, ut chixq’axtesinkil qib’ sa’ xk’anjel.

Naq naqanujob’resi qach’ool rik’in xrahom li Kristo, taa’ajsiiq li qu sa’ jun li ak’ musiq’ej ut toob’eeq chi sa ut chi k’ojk’o qach’ool, chi ajo qu ut chi yo’yooko sa’ xsaqen ut xloq’al laj Kolol qe, li Jesukristo.

Ninch’olob’ xyaalal, wochb’een li Apostol Jwan, “Maak’a’ li xiw sa’ [xrahom li Kristo].”²² Ex was wiitz’in, ex wochb’een, li Dios naxnaw eeru chi tz’aqal. Nekexxra chi tz’aqal. Naxnaw k’a’ru toj taak’ul. Naraj naq ink’a’ tatxiwaq, “ka’ajwi’ naq wanq aapaab’aal”²³ ut naq tatkanaaq “sa’ lix [tz’aqal] rahom.”²⁴ A’an a’in lin tz’aam ut li osob’tesink ninkanab’, sa’ lix k’ab’a’ li Jesukristo, amen.