Bar Ro̧o̧l im Bōk
N̄an bar ro̧ol n̄an im̧aan mejān Anij im n̄an bōk kōjeram̧m̧an ko indeoo me rej itok jān kōm̧m̧an im kōjparok bujen ko rej kōttōpar ko aorōk tata jemaron̄ ejaki.
Ro jeiū im jatū, ej kiiō aō jerbal n̄an kōnono n̄an kom̧ im jerbal eo ami ej n̄an ron̄jake. Kōttōpar eo aō ej n̄an kadedeļo̧k jerbal eo aō m̧okta jān am̧ kadedeļo̧k eo am̧. Inaaj kōm̧m̧ane ijo em̧m̧an tata imaron̄e.
Ium̧win iiō ko, iaar katak bwe ro me rej kōtōprak ijo eļaptata ilo laļ in er ro kōn juon visiōn n̄an mour ko aer, kōn kōttōpar ko n̄an kalimjōk wōt visiōn eo aer im karōk in kōl ko n̄an wāween kōtōpraki. Jeļā ia eo kwōj etal n̄an e im ekōjkan am̧ kōtmene n̄an tōparļo̧k ijo emaron̄ bōktok meļeļe in, unleplep eo, im tōprak eo n̄an mour.
Jet epen n̄an aer jeļā oktak eo ikōtaan juon kōttōpar im juon karōk m̧ae iien rej katak bwe juon kōttōpar en juon mejān kajjik ak juon jem̧ļo̧k, ilo an juon karōk ej juon iaļ me kwoj tōparļo̧k ijo. N̄an waanjon̄ak, emaron̄ wōr ad kōttōpar n̄an jibadōkļo̧k juon jikin eo jab jeļā kake, im ilo an jet iaami kōrā ro jeļā, kōm em̧m̧aan ro emakijkij am ļōmņak kōm jeļā kilen tōparļo̧k—emakijkij an waļo̧k ilo am ba, “Ijeļā—ej epād wōt ijuweo.” Lio pāleō ej aikuj ettōn̄ dikdik. Kōttōpar eo eaar ealikkar, bōtaab ejjab juon karōk eo em̧m̧an ebōk jikin n̄an tōparļo̧k mejān kajjik eo.
Kōm̧m̧an kōttōpar ej menin aorōk “ijjino kōn jem̧ļo̧k eo ilo ļōmņak kake.” Im karōk ej ejake juon wāween n̄an tōparļo̧k jem̧ļo̧k eo. Kii eo n̄an lem̧ōņōņō ej pedped ilo meļeļe ņa mejān kajjik ko rej lukkuun aorōk—innām kōm̧ōkajļo̧k iien eo ad, kijejeto, im m̧ōdjake eo ad ilo men ko me rej ejake wāween eo em̧ool n̄an tōpar ijo.
Anij, Jemedwōj Ilan̄, eaar letok n̄an kōj waanjon̄ak eo eweppān an kōm̧m̧an kōttōpar im karōk. Kōttōpar eo An ej “n̄an kakūrm̧ool jab wabanban im mour indeeo an armej.”1 im jibadbd ko An n̄an tōpare ej karōk in lo̧mo̧o̧r.
Karōk eo an Jemed wōj Ilan̄ ejitōnbōro ekoba letok n̄an kōj eddōkļo̧k, ererakļo̧k, katak, ānbwin wabanban eo jej maron̄ erom āinwōt E. Kanuknuk jetōb ko ad indeeo ilo ānbwin kanniōk ko, mour kōn katak ko im kien ko an Nejin, Irooj Jisōs Kraist, im ejake baam̧le ko indeeo eletok n̄an kōj, kōn Pinmuur eo an Rilo̧mo̧o̧r, n̄an kakūrm̧ool kōttōpar eo an Anij kōn mour wabanban im mour indeeo eo n̄an ro Nejin Ippān ilo aelōn̄ in jiļiejtōl eo An.
Kōm̧m̧an kōttōpar eo elo̧ļe ekoba meļeļe bwe kōttōpar ko ekadu kitier rej wejepedik wōt eļan̄n̄e rej tōlļo̧k n̄an meļeļe eo alikkar an kōttōpar ko aitok kitier. Ij tōmak bwe juon un aorōk n̄an lem̧ōņōņō ej n̄an katak ekōjkan n̄an ejaki kōttōpar ko ad make n̄an kajutak karōk ko ad make ilowaan wōt karōk indeeo an Jemedwōj Ilan̄. Eļan̄n̄e jej kalimjōk wōt iaļ in indeeo, jenaaj kanooj karbōb n̄an bar jepļaak n̄an im̧aan Mejān.
Em̧m̧an n̄an an wōr kōttōpar ko im karōk n̄an jerbalko ad, n̄an jeļāļo̧kjeņ eo ad, em̧ool n̄an limo ko ad. Ebarāinwōt arōk n̄an wōr kōttōpar ko n̄an m̧are ko ad, baam̧le ko ad, im ko̧o̧njeļ ko an Kabun̄ in im kūr ko; menin em̧ool eļaptata n̄an mijenede ro ad. Bōtaab kōttōpar ko ad reļļap tata im lukkuun in aorōk rej aikuj jejjet n̄an karōk indeeo eo an Jemād Ilan̄. Jisōs eaar ba, “A kom̧in pukot aelōn̄ eo an Anij im an wānōk, im aolep men kein renaaj lewōj n̄an kom̧.”2
Ritijm̧ļo̧k ro ilo kōm̧m̧an kōttōpar rej jiron̄ kōj bwe juon kōttōpar eo elemwaan tata im eļapļo̧k an m̧ool ej, eļapļo̧k kajoor enaaj pād ie. N̄e jemaron̄ kadikļo̧k juon kōttōpar n̄an juon pija eo ealikkar ak juon ak ruo naan ko rekajoor im alikkar, bwe kōttōpar eo en maron̄ in erom m̧ōttad im tōl enan̄in aoelp men jej ļōmņaki im kōm̧m̧ani. Ij tōmak bwe ewōr ruo naan ko me, ilo jekjek in, rej kōmeļeļik kōttōpar ko an Anij n̄an kōj im kōttōpar eo ad aorōk tata n̄an kōj make. Naan ko bar ro̧o̧l im bōk.
N̄an bar ro̧o̧l n̄an im̧aan Mejān im n̄an bōk kōjeram̧m̧an ko an indeoo me rej itok jān kōm̧m̧an im kōjparok bujen ko rej kōttōpar ko aorōk tata jemaron̄ ejaki.
Jemaron̄ bar ro̧ol im bōk ilo an wōr “tōmak edim ilo [Irooj Jisōs Kraist], atartar wōt ioon” tōllo̧ke ko an Eo, bun̄ “m̧aanļo̧k kōn dim ilo Kraist, kōn juon kōjatdikdik emeram, im juon iakwe n̄an Anij im armej otemjeļo̧k [im kōrā] … , kwōjkwōj ioon naan an Kraist, im niknik n̄an jem̧ļo̧k [in].”3
Lucifer eaar jab bōk karōk eo an Jemen me eaar kōtļo̧k bwe jān bar ro̧o̧l n̄an im̧aan Mejān im bōk bōk kōjeraam̧m̧an ko An. Ilo m̧ool, Lucifer kar jum̧ae im kajjieon̄ n̄an lukkuun ukōt karōk eo an Jemen, kōņaan bōk aiboojoj, utiej, im kajoor eo an Anij n̄an emake. Āinwōt juon tōprak, kar kadiwōjļo̧k ippān ro doon jān im̧aan mejān Anij im “eaar erom Setan, aaet, em̧ool devil eo, eo jemān aolep riab otemjeļo̧k, n̄an m̧oņ im n̄an kapiloik armej raņ [im kōr a ro], im n̄an tōlļo̧k er n̄an rikōm̧akoko ilo ankilaan, em̧ool jon̄an wōt eo enaaj jamin eo̧ron̄ Ainikiō [Irooj].”4
Kōn kar kālet ko an ilo mour eo m̧okta, Satan eban babar ro̧o̧l receiver ak bōk. Men eo deeo n̄an e ej n̄an jum̧ae karōk eo an Jemen kōn kōjerbal aolep aujiid im kapo n̄an bōk laļļo̧k kōj im kōm̧m̧an bwe jān en̄taan āinwōt e.5 Karōk eo an Saten ej n̄an kadedeļo̧k kōttōpar eo an enana tata bwe en jerbal n̄an aolep kajjojo armej, epepen, m̧anit, im jukjukinpād. Ej kōjerbal ainikien ko reļaaj—ainikien ko me pukot n̄an kadiwōjļo̧k ainikien eo edik im mera an Jetōb Kwojarjar eo me emaron̄ kwaļo̧k n̄an kōj “aolep men ko jej aikuj kōm̧m̧ani n̄an bar bar ro̧o̧l im bōk.6
Ainikien kein rej an ro me rej kowaan m̧ool an gospel eo im ro rej kōjerbal internet, social im print media ko, retio, taļpejen, im pija ko n̄an kwaļo̧k juon aujiid an mour ettoon, kakkure, kajin nana, ettoon, im jorrāān ilo juon wāween me ekapo kōj jān kōttōpar ko ad im karōk ko ad n̄an indeeo.
Ainikien kein remaron̄ barāinwōt kobaik kajjojo armej rekanooj in bun̄bun̄ me repilo jān tōmak ko an em̧m̧aan in kōrā ro im ro rej pukōt n̄an kakkure tōmak eo im kajeer kalimjōk indeeo an ro me rej kajieon̄ bar ro̧o̧l n̄an im̧aan mejān Anij im bōk “aolep men ko an [Jemād].”7
Em̧ōj aō lo bwe n̄an kalimjōk wōt bar ro̧o̧l im bōk kōjeraam̧m̧an ko kar kalim̧m̧ur kaki, ij aikuj iien otemjej bōk iien n̄an kajjitikin eō make, “Ejiet aō kōm̧m̧ane?”
Ej āinwōt n̄e ewōr juon intōrpiu an juon make, ettiņo̧ ippam̧ make. Im eļan̄n̄e āinwōt āinjuon, ļōmņak kake: wōn ilo laļ in ejeļā kōn kwe em̧m̧anļo̧k jān am jeļā kōn eok make? Kwojeļā ļōmņak ko am̧, m̧akūtkūt ko am rettūņo, ikdeelel ko am̧ im ettōņak ko am̧, kōttōpar im karōk ko. Im eļapļo̧k am̧ jeļā jān jabdewōt ekōjkan am̧ eddōkļo̧k ilo iaļ eo n̄an bar ro̧o̧l im bōk.
Āinwōt juon unin tōl n̄an n̄a ilo iien intōrpiu in eņņojak im aō make, ikōņaan riit im kejōkļo̧kjeņ kōn naan ko kejōkļo̧kjeņ kaki loi ilo ļalem jepta in Alma, ijo Alma ej kajjitōk: “kom̧ nan̄in ke ilo jetōb kar ļotak jān Anij?Kom̧ ar bōk ke nememen ilo paotok ko ami? Kom̧ ar bōk ke oktak in ekajoor ilo būruōmi?”8 Kajjitōk ko an Alma rej juon kekeememej kōn ta kōttōpar ko im karōk ko ad rej aikuj in kobatok n̄an bar ro̧o̧l im bōk.
Keememej ke kūr eo an Rilo̧mo̧or n̄an “itok n̄an ippa, kom̧ otemjej rej jerbal im ban, im Inaaj kakkijeik kom̧.
“Kom̧win bōk aō ine im likūte iaerami; im katak Ippa, bwe ij ineem̧m̧an im ettā būruō, im kom̧ naaj lo an ami kakkije.”9
Ilo ad kōļapļo̧k tōmak eo ad ilo kajoor eo an Irooj Jisōs Kraist n̄an leļo̧k kakkije n̄an jetōb ko ad kōn jeorļo̧k jerawiwi ko, lo̧mo̧o̧ren kadkad ko ad rejabwānōk, kamoik kinej ko ilo jetōb jān aer ļapļo̧k, im kōkajoorļo̧k im kōm̧aron̄ kōj n̄an kōļapļo̧k m̧wil ko an Kraist, enaaj m̧wilaļļo̧k ad kam̧oolol kōn Pinmuur eo eļāp an Irooj Jisōs Kraist.10
Ilo wiik in ej itok, pukot iien n̄an etale kōttōpar ko am̧ ilo mour im karōk ko am̧ im kanooj lale bwe rej jokkuun wōt juon ippān karōk eo eļap an Jemedwōj Ilan̄ n̄an lem̧ōņōņō eo ad. Eļan̄n̄e kwōj aikuj ukweļo̧k im oktak, innām ļōmņak in kōm̧m̧ane kiiō. Bōk iien n̄an kanooj ļōmņak kōn ta ukoktak ko rej aikuj n̄an jipan̄ eok kōjparok am “ippān erreļo̧k eo wōt n̄an aiboojoj eo an Anij.”11
Jej aikuj dāpij katak eo im gospel eo an Jisōs Kraist ilo ioļapļap in kōttōpar im karōk ko ad. Eļan̄n̄e ejjab E, ejjeļo̧k kōttōpar indeeo epidodo, im karōk ko am̧ n̄an tōpar karōk indeeo ko ad renaaj ilo m̧ool likjab.
Juon bar kakobaba n̄an jipan̄ ej “Kraist Eo Emour: Naan in Kam̧ool an Dri Jilōk ro,”12 ke kar kwaļo̧k n̄an Kabun̄ in ilo Jānwōde 1, 2000 eo. Likūt juon kape ijo komaron̄ loe, im bōk iien n̄an etale kajjojo enaan ko loi ilo naan in kam̧ool in eim̧we kōn Kraist jān rikam̧ool ro An rejeno̧lo̧k ro raar door etaer ie.
Ikōņaan libjerjer kom̧ n̄an ekkatak kake ippān “Baam̧le Eo: Juon Naan in Kean̄ N̄an Laļ In.” Emakijkij ad kōnono kōn kean̄ eo kōn baam̧ļe, bōtaab jouj im keememej n̄an riiti ilo meram in kajoor in lo̧mo̧o̧r an Kraist eo emour. An jako Kraist eo emour, kōm̧ene ko ad raorōk tata rejjamin naaj kūrm̧ool. Āinwōt an baam̧le eo juon naan in kean̄ n̄an laļ in kwaļo̧k, “Karōk in mōņōņō eo ekwojarjar ej kōmaron̄ kōtaan ko ilo baam̧le n̄an eļļā ioon lōb. Kain̄i ko im bujen ko rekwojarjar rej kōm̧m̧an ilo tampeļ ko n̄an kapidodo n̄an kajjojo n̄an aer jepļaak n̄an im̧aan mejen Anij im n̄an baam̧le ko n̄an aer koba ippāndoon n̄an indeeo.”13
Menin emaron̄ waļo̧k wōt kōnke Kraist eo Emour ej Rilo̧mo̧or im Ripinmuur eo an Laļ in.
Ilo menin, komaron̄ barāinwōt ļōmņak in etali jeje ko rekwojarjar n̄an kōdepakpakļo̧k meļeļe eo am̧ kōn m̧ool ko rejeno̧lo̧k loi ilo “Kraist eo Emour.”
Kanooj riiti “Kraist eo Emour” ej āinwōt riiti naan in kam̧ool ko an Matu, Mark, Luk, Jon, im rikanaan ro an Bok in Mormon. Enaaj kōļāpļo̧k am̧ tōmak ilo Rilo̧mo̧or im jipan̄ eok pād wōt ilo kalimjōk E ilo am̧ ļoor karōk ko am̧ n̄an tōpar kōttōpar indeeo ko am̧.
Kōjekdo̧o̧n bōd ko ad, likjab ko, jejļo̧k ko, im jerawiwi ko, Pinmuur eo an Jisōs Kraist ej kōtļo̧k bwe jān ukweļo̧k, kōppopo n̄an bar ro̧o̧l im bōk kōjeraam̧m̧an ko bar keidi Anij eaar kallim̧ur kaki—n̄an mour indeeo ippān Jemen im Nejin ilo ijo eutiej tata an aelōn̄ in kiin̄ an jiļejitōl.14
Kiiō ilo ami aolep jeļā, ejjeļo̧k juon enaaj deeor jān mej; kōn menin, kōttōpar im karōk eo ad aitok kitien ej aikuj bwe n̄e jej bar ro̧o̧l n̄an ippān Jemedwōj Ilan̄, jenaaj bōk aolep men ko ewōr Ippān kar karōki n̄an kajjojo iaad.15
Ij kam̧ool ejjeļo̧k kōttōpar eļapļo̧k ilo mour in jān mour indeeo ippān Jemed im Jined wōj Ilan̄ im ad jitōn bōro Rilo̧mo̧o̧r, Irooj Jisōs Kraist. Bōtaab eļapļo̧k jān baj adkōttōpar—ej barāinwōt aer kōttōpar. Ewōr ippāer juon iakwe eweppān n̄an kōj, ekajoorļo̧k jān ad maron̄ jino keidi n̄ane. Rej lukkuun, dedeļo̧k, indeeo ekkeijel ippād. Kōj jej Aer kein kōm̧anm̧an. Ad aiboojoj ej Aer aiboojoj. Eaorōkļo̧k jān bar jabdewōt men, Rekōņaan bwe jān jepļaak n̄an kapijuknen—n̄an bar ro̧o̧l im bōk lem̧ōņōņō eo indeeo ilo im̧aan Mejeer.
Ro jeiū im jatū, ilo juon wiik, jenaaj kemeeme Palm Sunday—keememej deļōn̄ļo̧k eo ekatūbtūb an Kraist ilo Jerusalem. Ilo ruo wiik ko, jenaaj kemeeme Ijtō Jabōt—kememej anjo̧ eo an Rilo̧mo̧o̧r ioon mej.
Ilo ad kalimjōk ad wujlepļo̧k ilo Rilo̧mo̧o̧r ilo Jabōt kein ruo raorōk, jān kememej E im bar kōkāāl kalim̧m̧ur eo ad to̧o̧n wōt ad mour n̄an kōjparok kein ko an. En m̧wilaļļo̧k ad kalimjōk mour ko ad make, kōm̧m̧ani kōttōpar ko ad make im kalimjōki karōk ko ad n̄an kōjeppani ippān eo an Anij ilo juon wāween me enaaj āliktata tōl m̧aanļo̧k n̄an utiej aorōk ad n̄an bar ro̧o̧l im bōk en̄in ej jar eo aō ilo etan Jisōs Kraist, amen.