N̄an ro Mōttam̧ im Rikatak ro an Kabun̄ in
Eļan̄n̄e kom̧ naaj leļo̧k ami n̄an m̧adenļo̧k ko, kōttāik kom̧make, riit, jar, im ukweļo̧k, lan̄ ko renaaj peļļo̧k im kom̧ naaj jeļā, bwe Jisōs ej RiKraist eo.
Juon rālep in Bōļaide, Jeptōm̧ba16, 1988, ilo m̧ōnjar eo ilo Vicente López Ward ilo Buenos Aires, Argentina, iaar peptaij āinwōt juon membōr in Kabun̄ eo an Jisōs Kraist im Armej ro Rekwojarjar ilo Raan ko Āliktata. Eo m̧ōtta em̧m̧an, Alin Spannaus, eaar peptaiji eō raan eo, im iaar m̧ōņōņō, laudin̄din̄, im kijōjōr in katak eļapļo̧k.
Rainin, ikōņaan kwaļo̧k jet katak ko iaar katak ilo iaļ in oktak in aō—katak ko me ij kōjatdikdik remaron̄ jipan̄ ro rej ron̄jake me rejjab membōr in Kabun̄ in. Ij jar bwe Jetōb en im̧we būruōmi, āinwōt an kar im̧we būruwō.
Moktata, Ioon Mijinede ro
Etke juon armej eo ejjeļo̧k an idajon̄jon̄ ko reppen, aikuj ko, ak kajjitōk ko n̄an an itok limo in ioon mijenede ro im ron̄jake katak ko aer? Ekwe, n̄an n̄a ekar iakwe—iakwe n̄an juon leddik, juon leddik kar etan Renee. Iaar mej ļo̧kanļo̧k, im iaar kōņaan m̧areki. Eaar oktak im jon̄ok ko an reoktak jen leddik ro jet. Bōtaab iaar mej ļo̧kanļo̧k im kar kajjitōk ippān n̄an m̧areik n̄a—im eaar ba jaab!
Iaar tarpok. Iaar ļōmņak eaar bwe aō itok laļ tok! Iaar wulio, 24 iiō dettan, im juon rikadiwōjļo̧k in kaļōj kōn juon jerbal em̧m̧an. Eaar kōnono kōn kōttōbar ko an—n̄an m̧areik juon eo me enaaj bōk e n̄an tampeļ, n̄an juon baam̧le indeeo—ak eaar jab uwaake kajjitōk eo aō. Iaar kōņaan bwe jemjerā eo am en wōnm̧aanļo̧k wōt, kōn menin iaar errā bwe in katak ippān mijinede ro. Eaar ke juon jibadbad em̧m̧an bwe in ioon mijinede ro? Em̧m̧an, ippa.
Jinoin aō kar ioon mijinede ro, iaar jab meļeļe eļap kōn ta eo raar ba, ak in ba juon men em̧ool n̄an kom̧, iaar jab lukkuun eļļo̧k n̄an er. Eaar jab itok lim̧ou n̄an bar katak kōn juon kabun̄. Iaar kōņaan wōt etale n̄e rebōd ak iaar bōk iien n̄an kwaļo̧k n̄an Renee bwe en m̧areik eō.
Rainin ajri ro neju raar im rej jerbale mijen ko aer, im ij meļeļe bwe wūjļepļo̧k ko me ļaddik im leddik rein rej kōm̧m̧ane n̄an kwaļo̧k gospel eo an Jisōs Kraist. Kiiō iakwe n̄e en kar ļapļo̧k aō leļo̧k aō n̄an Elder Richardson, Elder Farrell, im Elder Hyland, mijenede ro rem̧m̧an me rekar katakin iō.
Kōn menin, jen katak eo aō jinointata: Ij ba n̄an kom̧ ro m̧ōttam̧ im rikatak ro an Kabun̄ in, ilo iien eo kwoj ioon mijinede ro, jouj lukkuun bwebwenato ippāer; rej juļo̧k iiō ko raorōk ilo mour ko aer kōn wōt kwe.
Kein karuo, Itok n̄an Jar
Jinoin aō kar etal n̄an jar, iaar ron̄ elōn̄ naan ko iaar jab meļeļe. Wōn kar Beehive ro? Ta eo kar Priesthood eo an Aaron? Ak Doulul eo an Kōrā?
Eļan̄n̄e ej kab kein kajuon am̧ pād ilo jar im kwōj en̄jake am̧ ļo̧kjenam̧ kōn men ko kwojjab meļeļe, jab inepata! Iaar jab bar meļeļe. Ak iaar keememej wōt en̄jake ko, en̄jake an ineem̧m̧an im m̧ōņōņō eo iaar en̄jake. Iaar jab jeļā kaki m̧okta, ak Jetōb Kwojarjar eaar unojdikdik n̄an lo̧jiln̄u, “Ejim̧we.”
Kōn menin kōtļo̧k bwe in likūt katak in ilo juon jentōōj: Eļan̄n̄e kwoj lakjenam̧, jab inepata—keememej en̄jake ko kwar en̄jaki; rej jān Anij.
Kein kajilu, Riiti Bok in Mormon
Ālkin jet ioon doon ko ippān mijinede ro, Iaar jab lukkuun kōm̧m̧an wōnm̧aanļo̧k. Iaar en̄jake bwe iaar jab bōk juon kam̧ool kōn m̧ool eo an gospel in.
Juon raan, Renee eaar kajjitōk ippa, “Kwoj ke riiti Bok in Mormon?”
Iaar uwaak, “Jaab.” Ij katak ippān mijinede ro—ejjab bwe ke?
Kōn dānnin kōmjaaļal ilo mejen, Renee eaar jirōn̄ eō bwe ejeļā bwe Bok in Mormon ej m̧ool im kar kwaļo̧k bwe, eļan̄n̄e ikōnaan bwe in jeļā, wāween de eo ej—kwojeļā ta—riiti! Innām kajjitōk!
Riit, kōļmenļo̧kjeņ ilo būruwōmi, im “kajjitōk ippān Anij, Jemed Indeeo, ilo etan Kraist, … kōn juon bōro em̧ool, kōn lukkuun kōttōpar, im wōr tōmak ilo Kraist” (Moronai 10:4) eļan̄n̄e Bok in Mormon ej m̧ool, eļan̄n̄e Kabun̄ in ej m̧ool.
Kōn menin, katak eo kein kajilu, ilo juon naan: N̄e kwoj būki men kein—Bok in Mormon—im kwoj kijōrjōr in riiti im kajjitōk ippān Anij eļan̄n̄e rej m̧ool, baj kōm̧m̧ane!
Āliktata, Ukweļo̧k
En̄jake eo āliktata ij kōņaan kwaļo̧k ej kōn ukwelo̧k. Ālkin aō būki katak ko ippān mijinede ro, iaar jab kōņaan kōm̧m̧an jabdewōt oktak ilo mour eo aō. Ekar Elder Cutler, eo edik, eo ebwe kajin Spanish ippān, juon raan eaar ba, “Joaquin, jen riit ippān doon Alma 42, im jenaaj likūt etam̧ ilo ad riiti.”
Iaar ļōmņak ejej tokjeņ, ak iaar kōm̧m̧an āinwōt an Elder Cutler kar ba bwe in riiti eoon 1: “Im kiiō, nejū m̧aan [Joaquin], ij kile ke ej ļap wōt ijo kwōj inepata kake ilo koļmenļo̧kjeņ eo am̧, eo kwōj jab maron̄ meļeļe.” Oo! Bok in eaar kōnono n̄an eō.
Im kōm ad riit ilo eoon 2: “Im kiiō, nejū m̧aan [Joaquin], inaaj kōmmeļeļeik men in n̄an eok,” innām Kōm̧anm̧an eo im Wōtļo̧k eo an Adam kar kōmmeļeļeiki.
Innām ilo eoon 4: “Im āindein jej lo, bwe eaar wōr juon iien kar leļo̧k n̄an [Joaquin n̄an ukeļo̧k.”
Eaar jidik wōt am̧ riit m̧aanļo̧k, jen eoon n̄an eoon, m̧ae iien kōm̧ ar tōpar eoon ko jilu āliktata. Innām iaar em̧akūt kōn juon kajoor eļap. Bok in eaar kajju kōnono n̄an eō, im iaar jino jan̄ ke ij riiti, “Im kiiō, nejū m̧aan [Joaquin], ikōņaan bwe kwōn kōtļo̧k bwe men kein rejjab bar kainepataik eok, im kōtļo̧k wōt bwe jero̧wiwi ko am̧ ren kainepataik eok, kōn inepata eo enaaj bōk laļļo̧k eok … n̄an ukeļo̧k” (eoon 29).
Iaar kile kiiō bwe iaar maron̄ in bōk m̧adenļo̧k ilo ejjeļo̧k wōnāān. Mokta iaar jab lukkuun jar n̄an Anij, im eaar menin bwebwe n̄an jar n̄an eo ejjab waļo̧k. Iaar aikuj in kōttāik eō make im kōm̧m̧ane ta eo kar ba bwe in kōm̧m̧ane men̄e, ilo kōm̧m̧an, ko aō rejej tokjān.
Raan eo iaar kōpeļļo̧k būruwō n̄an Jetōb eo, ikdeelel n̄an ukweļo̧k, im kar kōņaan peptaij! Mokta jen iien eo, iaar ļōmņak bwe ukweļo̧k ej juon men enana, eo ej iokļo̧k wōt jerawiwi im kōm̧m̧an bōd, ak kiiō imeļeļe ilo juon errem̧aanļo̧k eo eoktak—āinwōt juon men eo em̧m̧an me ekalikar iaļen eddōk ļo̧k im m̧ōņōņō.
Elder Cutler epād ijin rainin, im ij kōņaan kam̧m̧oolol e bwe ekar jipan̄ eō bwe in jeļā. Aolep jokālet iaar kōm̧m̧ani ilo mour e aō jān tōre eo kar im̧we jān iien eo ke iaar kōttāk eō, jar kōn jeorļo̧k bōd, im Pinmuur eo an Jisōs Kraist ilo eta kar erom m̧ōttan mour e aō.
Kōn menin katak eo āliktata, ilo juon ennaan: En̄jake ukweļo̧k; ejjeļo̧k juon men enaaj kepaakļo̧k eok n̄an Irooj Jisōs Kraist ijello̧kin juon ikdeelel in oktak.
Rikatak ro rejitōn bōro, ro m̧ōttam̧ ilo Kabun̄ in, eļan̄n̄e kwōj ron̄jake rainin, kwolukkuun epaak n̄an tōpar m̧ōņōņō eo eļap. Kwepaak!
In karuwaineneik kom̧, kōn aolepān būruwō im kōn aolepen aō: itok im peptaij! Ej men eo emmantata kwon kōm̧m̧ane. Eban ukōt wōt mour eo am ak enaaj bar ilo mour ko an ro nejum̧ im jibum̧.
Irooj eaar kōjeraam̧m̧an eō kōn juon baam̧le. Iaar m̧areki Renee, im ewōr emān nejūm̧ ajri ro rem̧m̧an. Im kōn peptaij eo aō, imaron̄, āinwōt rikanaan Liai eo etto, ekar kūr tok er n̄an bōk m̧ōttan leen wōjke in mour, eo ej iakwe eo an Anij (lale 1 Nipai 8:15; 11:25). Imaron̄ jipan̄ er itok n̄an Kraist.
Kōn menin ļōmņak kōn en̄jake eo aō, im (1) lukkuun bwebwenato ippān mijinede ro, (2)etal im jar im keememej en̄jake, (3) riiti Bok in Mormon im kajjitōk ippān Irooj eļan̄n̄e ej m̧ool, im (4) en̄jake ukweļo̧k im peptaij.
Ij kam̧ool n̄an kom̧ bwe eļan̄n̄e kom̧ naaj leļo̧k ami n̄an m̧adenļo̧k ko, kōttāik kom̧make, riit, jar, im ukweļo̧k, lan̄ ko renaaj peļļo̧k im kom̧ naaj jeļā, bwe Jisōs ej RiKraist eo, im bwe E ej aō im am̧ Rilo̧mo̧o̧r. Ilo etan Jisōs Kraist, amen.