Kev Txais tus Tswv thiab Nej Tsev Neeg txoj Kev Tso Siab

Cov kwv tij, tej zaum tsis muaj lus qhuas los ntawm tus Tswv uas zoo tshaj qhov uas peb paub tias Nws tso siab rau peb ua neeg tsim nyog tuav lub pov thawj hwj thiab ua cov txiv tsev zoo.

Ib qho muaj tseeb tiag: kev txais tus Tswv txoj kev tso siab yog ib txoj koob hmoov uas peb yuav tsum siv zog thiaj txais tau. Kev tso siab yog ib txoj koob hmoov uas nyob ntawm qhov uas peb ua raws li Vajtswv tej kev cai. Peb txais tau tus Tswv txoj kev tso siab thaum peb ua raws li peb tej kev khi lus uas peb tau ua thaum peb ua kev cai raus dej thiab mus rau hauv lub tuam tsev dawb huv. Thaum peb ua raws li peb tau cog lus rau tus Tswv, Nws txoj kev tso siab rau peb loj tuaj.

Kuv nyiam cov vaj lug kub puag thaum ub thiab niaj hnub nim no uas siv kab lus “muaj lub siab xav coj zoo” thaum piav txog ib tug neeg ncaj ncees tus cwj pwm.¹ Kev coj zoo los yog kev coj tsis zoo yeej yog ib qho tseem ceeb ntawm ib tug neeg tus cwj pwm. Cov neeg uas muaj “lub siab xav coj zoo” yog cov txiv neej uas yus ntseeg tau—vim kev tso siab nyob ntawm kev coj zoo.

Qhov uas yus ua ib tug txiv neej uas coj zoo txhais hais tias yus tej kev xav, thiab tej yam yus ua, yog tej yam dawb huv thiab ncaj ncees, nyob hauv nej lub neej tag nrho, tsis hais tab meeg sawv daws thiab thaum tsis muaj leej twg pom. Txhua zaus peb txiav txim siab, peb tsim nyog txais tau Vajtswv txoj kev tso siab los sis ua rau Nws txoj kev tso siab ploj zuj zus. Tej zaum peb pom tau lub ntsiab cai muaj tseeb thaum xav txog kev lav ris uas Vajtswv muab rau peb ua cov txiv tsev.

Ua cov txiv tsev, cov yaj saub, cov pom tau, thiab cov txais kev tshwm sim niaj hnub nim no twb txib peb nyob hauv daim ntawv “Tsev Neeg: Ib zaj Lus Tshaj Tawm rau lub Ntiaj Teb.” Daim ntawv no qhia peb hais tias (1) “cov txiv tsev yuav tsum kav lawv tej tsev neeg los ntawm kev hlub thiab kev ncaj ncees,” (2) cov txiv tsev “lav ris npaj ua kom muaj tej yam uas lawv tsev neeg yuav tsum muaj kom thiaj ua neej tau,” thiab (3) cov txiv tsev lav ris kev pov hwm rau lawv tsev neeg.²

Yog peb xav txais tau Vajtswv txoj kev tso siab, peb yuav tsum ua raws li peb qho kev lav ris rau peb tsev neeg no raws li tus Tswv txoj kev. Raws li tau hais ntxiv nyob hauv zaj lus tshaj tawm txog tsev neeg, tus Tswv txoj kev yog kev ua raws li tej kev lav ris no nrog rau peb cov poj niam “sib pab xws li … nyob sib txig.”³ Kuv xav hais tias qhov no txhais tias peb tsis txiav txim siab txog ib yam dab tsi tseem ceeb hais txog peb qho kev lav ris no yog tsis ua ib lub siab nrog peb cov poj niam.

Qhov thib ib peb yuav tsum ua kom txais tau tus Tswv txoj kev tso siab yog qhov uas peb yuav tsum tso siab rau Nws. Tus yaj saub Nifais coj yam ntxwv txog kev rau siab ua li no thaum nws thov Vajtswv: “Auj tus Tswv es, kuv tau tso siab rau koj, thiab kuv yuav tso siab rau koj mus ib txhis li. Kuv yuav tsis tso siab rau neeg lub hwj chim li.”⁴ Nifais yeej rau siab tag nrho ua raws li tus Tswv lub siab nyiam. Ntxiv rau qhov uas nws hais tias nws yuav “mus thiab ua tej uas tus Tswv tau txib kom ua,” Nifais yeej rau siab tsis tu tsis tseg kom ua tej yam uas tus Tswv tau txib nws ua, zoo li hais nyob hauv cov lus no: “Ib yam li tus Tswv muaj txoj sia nyob, thiab ib yam li peb muaj txoj sia nyob, peb yuav tsis rov qab mus cuag peb txiv nram roob moj sab qhua, kom txog thaum peb ua tiav yam uas tus Tswv tau txib kom peb ua lawm tso.”⁵

Vim hais tias Nifais tso siab rau Vajtswv ua ntej, Vajtswv twb tso siab plhuav rau Nifais. Tus Tswv foom koob hmoov rau nws kom nws muaj tus Ntsuj Plig ntau nplua mias foom koob hmoov rau nws nyob hauv nws lub neej, nws tsev neeg lub neej, thiab nws cov neeg lub neej. Vim Nifais tswj hwm nrog kev hlub thiab kev ncaj ncees thiab nrhiav noj nrhiav haus thiab pov hwm nws tsev neeg thiab cov neeg, nws sau hais tias, “Thiab tau muaj tias peb tau ua neej nyob zoo siab.”⁶

Xwv kom paub ib tug poj niam xav li cas txog qhov no, kuv thov kuv ob tug ntxhais uas twb yuav txiv lawm pab kuv. Kuv nug nkawd seb nkawd puas kam sau ob peb kab lus txog qhov uas kev tso siab tseem ceeb npaum li cas rau nkawd txoj kev sib yuav thiab tsev neeg. Lara Harris thiab Christina Hansen twb xav li no.

Tus thib ib yog Lara: “Ib yam tseem ceeb tshaj plaws rau kuv yog qhov uas kuv paub tias thaum kuv tus txiv ua tej yam txhua hnub, nws txiav txim siab ua tej yam uas saib kuv rau nqi thiab hlub kuv. Thaum wb ib leeg tso siab rau ib leeg zoo li no, ua rau wb lub tsev muaj kev kaj siab lug, qhov chaw uas wb zoo siab tu wb tsev neeg ua ke.”

Christina xav hais tias: “Kev tso siab rau ib tug neeg yeej zoo li yus ntseeg nws. Yog tsis muaj kev tso siab thiab kev ntseeg, ces muaj kev ntshai thiab kev ua xyem xyav. Ib txoj koob hmoov loj tshaj plaws uas los ntawm qhov uas kuv txaus siab tso siab plhuav rau kuv tus txiv yog kev kaj siab lug—kev kaj siab lug vim kuv paub tias nws yuav ua raws nraim li nws hais nws mam li ua. Kev tso siab ua rau yus muaj kev kaj siab lug, kev hlub, thiab tej uas ua rau txoj kev hlub ntawd loj tuaj.”

Lara thiab Christina ib leeg tsis tau pom qhov uas ib leeg tau sau. Ua rau kuv xav tsis thoob vim nkawd ob leeg xav hais tias txoj koob hmoov uas yog kev kaj siab lug hauv tsev yeej yog los ntawm qhov uas nkawd muaj ib tug txiv uas nkawd tso siab tau. Raws li kuv ob tug ntxhais tau hais, lub ntsiab cai ntawm kev tso siab yog ib qho tseem ceeb heev rau ib lub tsev uas tsom ntsoov rau Khetos.

Kuv kuj loj hlob nyob hauv ib tsev neeg uas tsom ntsoov rau Khetos vim kuv txiv saib nws lub pov thawj hwj rau nqi thiab txais tau nws tsev neeg txoj kev tso siab vim hais tias nws muaj “lub siab xav coj zoo.”⁷ Cia kuv qhia nej txog ib zaj thaum kuv yog ib tug tub hluas uas yog ib zaj lus piv txwv txog qhov uas thaum yus muaj ib leej txiv uas to taub thiab ua neej raws li lub ntsiab cai ntawm kev tso siab vim nws muaj lub siab xav coj zoo ces qhov ntawd yuav ua rau yus tsev neeg tau zoo.

Thaum kuv hluas heev, kuv txiv tsim ib lub koom haum uas pab cov chaw ua hauj lwm tsim ub tsim no. Kev ua lag luam no tsim, ua, thiab tso tej lub tshuab kom tsim ub tsim no nyob thoob plaws lub ntiaj teb.

Thaum kuv kawm ntawv middle school, kuv txiv xav kom kuv kawm paub ua hauj lwm. Nws kuj xav kom kuv kawm txog lub koom haum ua lag luam no thoob plaws. Kuv txoj hauj lwm thib ib yog kev tu nyom thiab pleev xim rau tej qhov chaw ntawm lub tsev ua hauj lwm uas tib neeg sab nraud tsis pom.

Thaum kuv pib kawm ntawv qib siab high school, ces kuv nce theem siab zog ua hauj lwm rau hauv qhov chaw tsim ub tsim no. Kuv kawm paub nyeem tej daim phiaj hauj lwm thiab siv cov tshuab loj heev uas kho hlau. Tom qab kuv kawm ntawv tiav, kuv mus rau lub tsev kawm ntawv qib siab ces kuv tau mus ua tub txib. Tom qab kuv tau ua tub txib rov qab los tsev, kuv ncaj qha mus ua hauj lwm. Kuv xav tau khaws nyiaj kom them nqi kawm ntawv.

Muaj ib hnub tsis ntev tom qab kuv ua tub txib tiav, kuv tau ua hauj lwm hauv lub tsev tsim ub tsim no thaum kuv txiv hu kuv los rau hauv nws hoob kas thiab nug seb kuv puas xav nrog nws mus rau Los Angeles ua lag luam. Nov yog thawj zaug uas kuv txiv tau caw kuv nrog nws mus ua li no. Nws twb yuav cia kuv mus tab meeg txhua tus pab sawv cev rau lub koom haum.

Ua ntej wb mus, nws tau pab kuv npaj thaum nws qhia kuv ob peb yam txog lub koom haum uas tej zaum mam li yuav peb cov khoom. Qhov thib ib, lub koom haum yeej nyob hauv ntau lub teb chaws. Qhov thib ob, lawv xav yuav cov tshuab tshiab tso rau hauv lawv tej qhov chaw ua hauj lwm nyob thoob plaws lub ntiaj teb Qhov thib peb, peb lub koom haum yeej tsis tau muab kev pab cuam los yog cov tshuab tsim ub tsim no ua ntej lub sij hawm no. Thiab qhov kawg, tus thawj coj uas saib xyuas kev yuav khoom twb xav muaj kev sib ntsib kom sib tham txog qhov uas peb hais tias yuav tsum them nqi npaum li cas ua ib lub hom phiaj tshiab. Kev sib ntsib no yeej yog ib lub cib fim tshiab thiab tseem ceeb rau peb lub koom haum.

Tom qab wb los txog Los Angeles, kuv txiv thiab kuv wb tau mus rau tus thawj coj lub tsev ntiav pw rau kev sib ntsib ntawd. Qhov thib ib peb tau sib tham thiab soj ntsuam tej kev teev tseg ua tshuab rau lub hom phiaj ntawd. Ces peb sib tham txog tej kev ua hauj lwm, tsis hais yuav xa khoom li cas thiab xa thaum twg. Ces peb xaus kev sib ntsib thaum peb sib tham txog kev them nqi, them li cas thiab thaum twg. Yog lub sij hawm no uas yeej ntxim mloog.

Tus thawj coj ntawm lub koom haum no piav rau peb hais tias peb tau hais tias peb tus nqi yog tus nqi pheej yig tshaj txhua tus uas twv hauj lwm no. Ces, xyov ua ca, nws qhia peb txog tus nqi ntawm lub koom haum thib ob uas twv hauj lwm. Ces nws nug seb wb puas kam thim wb daim qhia nqi thiab rov qab xa tuaj. Nws hais tias yuav tsum qhia tias yuav tsum them tus nqi siab dua yuav luag npaum li lub koom haum thib ob. Ces nws piav hais tias cov nyiaj uas yuav them los yuav muab faib 50-50 rau nws thiab wb. Nws daws nws tus kheej vim hais tias txhua leej txhua tus yuav yeej. Peb lub koom haum yuav yeej vim hais tias peb yuav tau nyiaj ntau tshaj qhov uas peb twv hauj lwm ua ntej. Nws lub koom haum yuav yeej vim hais tias lawv tseem ua lag ua luam nrog tus uas pheej yig tshaj. Thiab, nws kuj yuav yeej vim hais tias nws yuav txiav nqi rau nws tus kheej vim nws yog tus uas tau ua li no rau nws lub koom haum.

Ces nws muab ib tus naj npawb rau lub tsev xav ntawv lub phij xab uas wb xa tau cov nyiaj uas nws xav tau. Thiab tom qab hais tas li no, nws ntsia kuv txiv thiab nug hais tias, “Yog li ntawd, ces koj puas pom zoo?” Ua ciav, kuv txiv sawv, tuav nws tes, thiab qhia nws tias nws mam li hais thaum yav tom ntej.

Tom qab kev sib ntsib no, peb tau nkag hauv tsheb xauj, thiab kuv txiv tig los rau kuv thiab nug tias, “Nim no, koj xav tias wb yuav tsum ua li cas?”

Kuv teb hais tias kuv tsis tau xav tias tsim nyog uas peb ua raws li qhov tus ntawd tau hais.

Ces kuv txiv nug hais tias, “Koj tsis xav tias peb muaj kev lav ris rau tag nrho cov uas peb ntiav ua hauj lwm kom muaj hauj lwm ntau ua los?”

Thaum kuv xav txog nws lo lus nug thiab ua ntej kuv teb taus, nws teb nws tus kheej. Nws hais tias, “Rick, cia li mloog, thawj zaug uas yus txais kev xiab nyiaj los yog tsis coj zoo, yeej nyuaj kom rov qab muaj lub siab uas xav coj zoo. Tsis txhob ua li ntawd, tsis txhob ua ib zaug xwb.”

Qhov uas kuv hais zaj no rau nej txhais hais tias kuv yeej nco ntsoov qhov uas kuv txiv qhia kuv thaum thawj zaug uas kuv mus nrog nws ua lag ua luam. Kuv qhia zaj no kom ua ib zaj lus piv txwv txog peb cov txiv tsev lub hwj huam uas kav ntev. Nej yeej paub tias kuv twb tso siab rau kuv txiv vim nws lub siab xav coj zoo. Nws tau ua raws nraim li tej ntsiab cai no nyob hauv nws lub neej nrog kuv niam, nws cov me nyuam, thiab tag nrho cov uas nws paub.

Cov kwv tij, hmo no kuv thov Vajtswv hais tias peb yuav tso siab rau tus Tswv ua ntej, ib yam li Nifais ua, ces los ntawm peb lub siab uas xav coj zoo peb yuav txais tau tus Tswv txoj kev tso siab rau peb, tsis hais peb cov poj niam thiab me nyuam txoj kev tso siab. Thaum peb to taub thiab ua raws li lub ntsiab cai dawb ceev uas yog kev tso siab uas los ntawm kev xav coj zoo, ces peb yuav ua raws nraim li peb tej kev khi lus dawb ceev. Peb kuj yuav tswj hwm peb tsev neeg nrog kev hlub thiab kev ncaj ncees, nrhiav noj nrhiav haus rau lawv, thiab pov hwm peb tsev neeg kom txhob raug tej kev phem ntawm lub ntiaj teb. Kuv txo hwj chim ua tim khawv txog tej yam tseeb no los ntawm Yexus Khetos lub npe, amees.