Tus Tswv lub Suab
Kuv ua tim khawv tias nyob hauv lub rooj sab laj no peb twb hnov tus Tswv lub suab. Kev sim siab rau peb txhua tus yog qhov uas peb yuav ua li cas.
Ua ntej xav hais ib lo lus zoo rau cov me nyuam yaus. Nov yog tuas kawg, thiab kuv yeej yog tus hais lus kawg.
Tsis ntev tas los, thaum kuv mus xyuas lub Tuam Tsev Provo City Center, kuv pom ib daim duab hu ua Thawj Zaug Ua Yog Toog Pom, Nyob Deb. Daim duab no muab qhov kaj thiab lub hwj chim uas los saum ntuj los thaum Leej Txiv thiab Leej Tub mus xyuas tus tub hluas Yauxej Xamiv.
Kuv tsis muab piv rau lub sij hawm dawb ceev uas qhib Kev Muab txoj Moo Zoo Txum Tim Rov Qab Los, tiam sis kuv xav tias qhov kaj thiab lub hwj chim ntawm sab ntsuj plig yuav zoo ib yam li ntawd thaum nqis los rau lub tuam rooj sab laj no thiab, lub hwj chim thiab qhov kaj ntawd yuav nchav mus thoob plaws lub ntiaj teb.
Kuv ua tim khawv hais tias Yexus yog tus Khetos, Nws coj txoj hauj lwm dawb ceev no, thiab lub tuam rooj sab laj yog ib lub sij hawm tseem ceeb uas Nws qhia Nws lub Koom Txoos thiab qhia peb tus kheej.
Kev Qhia Los Saum Ntuj Ceeb Tsheej Los
Muaj ib hnub thaum tau muab lub Koom Txoos txhim tsa, tus Tswv pom zoo rau Yauxej Xamiv ua tus yaj saub, tus pom tau, thiab tus thwj tim ntawm tus Tswv Yexus Khetos1 thiab hais rau cov Ntseeg hais tias:
“Vim nej yuav tau txais nws txoj lus, zoo ib yam li los kiag ntawm kuv lub qhov ncauj los, nrog tag nrho txoj kev ua siab ntev thiab kev ntseeg.
“Vim los ntawm kev ua tej yam no ces tej qhov rooj ntawm ntuj txiag teb tsaus yuav kov tsis yeej nej; … thiab tus Tswv Vajtswv yuav ua kom tej hwj chim ntawm txoj kev tsaus ntuj yaj ploj ntawm nej mus, thiab ua kom lub ntuj co nto kom zoo rau nej, thiab nws lub npe lub yeeb koob.”2
Tom qab ntawd, lawv tau txhawb nqa pom zoo thiab tsa Thawj Pawg Thawj Tswj Hwm thiab Pawg Kaum Ob tug Thwj Tim ua cov yaj saub, cov pom tau, thiab cov txais kev tshwm sim.3
Nim no, thaum peb sib ntsib raws li Thawj Tswj Hwm Thomas S. Monson coj, peb zoo hnov “tus Tswv lub siab nyiam, … qhov tus Tswv xav, … tus Tswv lub suab, thiab Vajtswv lub hwj chim rau kev cawm seej.”4 Peb tso siab rau Nws cov lus cog tseg: “Txawm yog los ntawm kuv lub suab los sis los ntawm kuv cov tub qhe lub suab, yeej zoo ib yam.”5
Nyob hauv peb lub ntiaj teb txoj kev ntxhov hnyo thiab kev tsis paub tseeb, peb yuav tsum tso siab rau Thawj Pawg Thawj Tswj Hwm thiab Pawg Kaum Ob tug Thwj Tim tej lus kom peb nyiaj tau thiab loj hlob ntawm sab ntsuj plig.6
Peb tau koom ua ke rau hauv lub rooj sab laj zoo kawg no. Tsoom Haiv Neeg Ntseeg hauv Hnub Nyoog Kawg coob thiab cov neeg ntawm lwm txoj kev teev ntuj nyob hauv 200 tawm lub teb chaws, uas hais 93 tawm yam lus, koom tej tuas no los yog nyeem tej zaj lus los ntawm lub tuam rooj sab laj no.
Peb twb thov Vajtswv thiab npaj siab tuaj. Rau peb neeg coob, peb muaj tej kev txhawj thiab tej lus nug. Peb xav txhawb peb txoj kev ntseeg peb tus Cawm Seej, Yexus Khetos, thiab haj yam muaj zog thaum peb tiv kev ntxias thiab tiv thaiv kom txhob ua tej yam tsis tseem ceeb. Peb tuaj kom lub ntuj ceeb tsheej qhia peb.
Tus Tswv lub Siab Nyiam
Hais txog Thawj Pawg Thawj Tswj Hwm thiab Pawg Kaum Ob tug Thwj Tim, uas hais lus txhua lub tuam rooj sab laj, qhov uas lawv yuav tsum npaj lawv tej zaj lus yog ib lub nra tseem ceeb thiab ib txoj kev dawb ceev uas Vajtswv tso siab muab rau lawv.
Ntau xyoo tas los, ua ntej kuv yog ib tug Tuam Thawj Coj, kuv nug Txwj Laug Dallin H. Oaks yog tias nws npaj ib zaj lus rau txhua ceg txheem ntseeg lub rooj sab laj. Nws teb hais tias nws tsis tau ua li ntawd tiam sis nws hais tias, “Kuv tej zaj lus rau lub tuam rooj sab laj tsis yog li ntawd. Tej zaum kuv kho kuv zaj 12 mus txog 15 zaus kom ua tib zoo hais tej uas tus Tswv xav kom kuv hais.”7
Ib tug uas hais lus hauv lub tuam rooj sab laj txais kev tshoov siab li cas thiab txais thaum twg?
Vim tsis muaj kev txib yuav tsum hais txog dab tsi, qhov uas peb pom Vajtswv coj kev hais lus txog tej lub ntsiab ntawm qhov tseeb uas nyob mus ib txhis txhua lub tuam rooj sab laj yog ib qho zoo kawg nkaus.
Ib tug ntawm kuv cov Kwv Tij qhia kuv tias nws paub hais lus txog dab tsi tom qab kiag nws hais tas thaum lub Plaub Hlis Ntuj tas los. Ib tug ntxiv hais tias peb lub lim tiam tas los xwb, nws tseem thov Vajtswv thiab tos ntsoov tus Tswv. Thaum kuv nug txog qhov uas ib tug ntxiv tau siv ntev li cas npaj rau ib zaj lus uas hais txog ib yam nyuaj heev, nws teb hais tias, “Nees nkaum tsib xyoos.”
Tej lub sij hawm lub ntsiab yuav los sai sai, tiam sis tej yam uas yuav hais thiab tej yam me los tseem yuav tsum siv zog ntawm sab ntsuj plig. Kev yoo mov thiab kev thov Vajtswv, kev kawm ntawv thiab kev ntseeg, yeej yog ib feem ntawm tus txheej txheem no. Tus Tswv tsis xav muaj kev ua txuj uas yuav ua rau Nws lub suab tsis muaj kuab thaum hais rau Nws Haiv Neeg Ntseeg.
Feem ntau yus txais kev tshoov siab yuav hais li cas hauv lub tuam rooj sab laj thaum lig heev los yog thaum sawv ntxov, thaum lub sij hawm uas yus tsis xav txog yus zaj lus ntau. Ces, ua ciav, yus txais kev tshoov siab, thiab tej lub sij hawm, muaj tej lus thiab kab lus uas los ntawm kev tshwm sim los rau yus lub siab.8
Thaum nej mloog, tej zaj lus uas nej txais tej zaum yog raws nraim li tau hais los yog tej zaum tau muab hloov rau nej.
Thaum kuv hais lus hauv lub tuam rooj sab laj ntau xyoo tas los, kuv tau hais txog ib kab lus uas nkag rau hauv kuv lub siab thaum kuv xav paub seb kuv puas tau npaj ua ib tug tub txib. Kab lus ntawd yog “Koj tsis paub tag nrho, tiam sis koj paub txaus!”9 Ib tug ntxhais hluas uas koom lub tuam rooj sab laj hnub ntawd qhia kuv tias nws thov Vajtswv txog qhov uas ib tug tub hluas thov yuav nws, tiam sis nws xav paub seb nws paub tus tub hluas ntawd zoo li cas. Thaum kuv hais tej lus ntawd, “Koj tsis paub tag nrho, tiam sis koj paub txaus,” tus Ntsuj Plig pom zoo rau nws hais tias nws twb paub tus tub hluas ntawd txaus lawm. Nkawd twb sib yuav tau ntau xyoo lawm.
Kuv cog lus rau nej hais tias thaum nej npaj nej sab ntsuj plig, thiab xav hais tias nej yuav hnov tus Tswv lub suab thaum nej los, ces yuav muaj tej kev xav nkag los rau hauv nej lub siab uas yuav hais rau nej xwb. Nej twb hnov tej ntawd nyob hauv lub rooj sab laj no, los sis nej yeej yuav hnov yog tias nej kawm tej zaj lus thaum yav tom ntej.
Nim No thiab tej lub Hli Tom Ntej
Thawj Tswj Hwm Monson tau hais tias:
“Siv sij hawm nyeem tej zaj lus los ntawm lub rooj sab laj thaum twg tso tawm.”10
“Cia li xav txog [tej ntawd]. … Kuv tau kawm … hais tias thaum kuv yim kawm tej zaj lus no zoo zoo ces kuv yim loj hlob ntawm sab ntsuj plig xwb.”11
Tej lus qhia hauv lub tuam rooj sab laj yog tej yam uas tus Tswv xav kom peb xav txog thaum yav tom ntej.
Tus tswv yug yaj “mus ua pab yaj ntej thiab pab yaj raws nws qab: rau qhov pab yaj paub nws lub suab.”12
Feem ntau Nws lub suab hais kom peb hloov peb lub neej. Nws caw peb hloov siab lees txim. Nws caw peb kom coj raws li Nws.
Cia li xav txog tej lus no los ntawm lub tuam rooj sab laj no:
Thawj Tswj Hwm Henry B. Eyring: “Kuv ua tim khawv hais tias Vajtswv Leej Txiv muaj txoj sia nyob thiab xav kom nej rov qab los cuag Nws. Nov yog tus Tswv Yexus Khetos lub Koom Txoos tseeb. Nws paub nej, Nws hlub nej, thiab Nws saib xyuas nej.”13
Thawj Tswj Hwm Dieter F. Uchtdorf hais nag hmo: “Kuv ua tim khawv hais tias thaum peb pib los yog taug txoj kev mus cuag Vajtswv mus ntxiv, peb lub neej yuav zoo dua … thiab tus Tswv yuav siv peb ua tej yam zoo kom foom koob hmoov rau cov neeg nyob ib puag ncig peb thiab kom muaj raws li Nws tej lub hom phiaj uas nyob mus ib txhis.”14
Thawj Tswj Hwm Russell M. Nelson: “Kuv cog lus hais tias thaum nej rau rau siab nyeem Phau Ntawv Maumoos, nej yuav tiv thaiv nej tus kheej tawm ntawm tej kev phem uas muaj niaj hnub nim no, suav tus kab mob ntawm kev saib duab liab qab thiab lwm yam muaj yees taus.”15
Txwj Laug Dallin H. Oaks nag hmo hais tias: “Kuv ua tim khawv hais tias txoj kev tshaj tawm txog tsev neeg yog ib txoj lus tseeb nyob mus ib txhis li, thiab yog tus Tswv lub siab xav rau Nws cov me nyuam uas nrhiav txoj sia nyob mus ib txhis.”16
Thiab Txwj Laug M. Russell Ballard hais tsis ntev tas los tias: “Peb yuav tsum hlub tshua Vajtswv cov me nyuam thiab tso tej kev ntxub ntxaug tseg, tsis hais kev ntxub vim yog ib haiv neeg twg, yog poj niam los txiv neej, thiab peb koom lub teb chaws twg.”17
Vim peb tshuav ob peb feeb, kuv xav hais lus me ntsis txog Txwj Laug Robert D. Hales. Thawj Pawg Thawj Tswj Hwm tau qhia Txwj Laug Hales tias nws hais tau ib zaj lus luv hauv tuas Hnub Sunday sawv ntxov yog tias nws noj qab nyob zoo. Vim nws tsis xis nyob thaum ntawd, nws twb npaj ib zaj lus, uas nws sau tiav lub lim tiam tas los thiab qhia rau kuv. Vim nws tso lub ntiaj teb no tseg peb teev tas los xwb, kuv yuav hais peb kab lus los ntawm nws zaj.
Txwj Laug Hales hais tias: “Thaum peb xaiv kom muaj kev ntseeg, peb thiaj npaj los sawv ntawm Vajtswv lub xub ntiag. … Tom qab muab tus Cawm Seej raug Ntsia Saum Ntoo Khaub Lig, Nws tsuas tshwm sim los rau cov ‘uas tau rau siab ntseeg txoj lus tim khawv txog [Nws] thaum lawv tseem nyob hauv lub ntiaj teb uas txawj tuag no.’ [Q&K 138:12.] Cov uas ‘tau xyeej tej lus tim khawv … ntawm cov yaj saub yav thaum ub kuj [pom tsis tau tus Cawm Seej] lub yeeb haum, thiab tsis tau ntsia nws lub ntsej muag.’ [Q&K 138:21.] … Peb txoj kev ntseeg npaj peb lub siab kom nyob tau rau ntawm tus Tswv lub xub ntiag.”
Tus Tswv yeej muaj siab zoo vim Nws tshoov Thawj Tswj Hwm Russell M. Nelson lub siab thaum tuas sawv ntxov no tiav lawm kom nws tawm lub tsev no sai sai, tsis noj su, thiab khiav mus rau Txwj Laug Hales lub txaj, nws, uas yog Txwj Laug Hales pawg tus thawj tswj hwm, thiaj tuaj txog thiab nyob ntawd, nrog tus uas zoo li ib tug tim tswv Mary Hales thaum Txwj Laug Hales tau tas sim neej no.
Teb tus Tswv lub Suab
Kuv ua tim khawv tias nyob hauv lub rooj sab laj no peb twb hnov tus Tswv lub suab.
Peb yuav tsum tsis txhob xav li cas thaum tus Tswv cov tub qhe tej lus tsis yog raws li neeg ntiaj teb thiab, tej lub sij hawm, peb tus kheej tej kev xav. Yeej ib txwm zoo li no. Kuv txhos caug hauv lub tuam tsev nrog kuv cov Kwv Tij no. Kuv ua tim khawv txog lawv txoj kev zoo. Lawv xav xav kom tus Tswv zoo siab thiab pab Vajtswv cov me nyuam rov qab mus cuag Nws.
Pawg Xya Caum; Pawg Npisov; Koom Haum Niam Tsev, Koom Haum Ntxhais Hluas, lub Koom Haum Me Nyuam Yaus, thiab lwm koom haum pab cov thawj coj tau tshoov peb lub siab hauv lub rooj sab laj no, tsis hais cov nkauj zoo mloog thiab cov uas tau ua tib zoo thov Vajtswv.
Muaj lub ntuj ceeb tsheej tej lus qhia uas nyob tos kom nej nrhiav tau nyob hauv tej zaj ntawm lub tuam rooj sab laj. Kev sim siab rau peb txhua tus yog qhov uas peb yuav ua li cas thaum peb hnov, nyeem, thiab xav txog tej no.
Cia kuv hais ib zaj txog kev ua raws li tus yaj saub tej lus tej lus los ntawm Thawj Tswj Hwm Russell M. Nelson:
Thaum xyoo 1979, tsib xyoos ua ntej tau hu nws ua ib tug Tuam Thawj Coj, Tij Laug Nelson mus rau ib txoj kev sib ntsib ua ntej lub tuam rooj sab laj. “Thawj Tswj Hwm Spencer W. Kimball “twv kom txhua tus nyob ntawd rau siab ntxiv kom tshaj tawm txoj moo zoo rau lub ntiaj teb. Tej teb chaws uas Thawj Tswj Hwm Kimball hais kiag txog mas ib lub teb chaws yog Suav Teb, es nws hais tias, ‘Peb yuav tsum ua hauj lwm pab cov Neeg Suav. Peb yuav tsum kawm lawv yam lus. Peb yuav tsum thov Vajtswv rau lawv thiab pab lawv.’”18
Thaum nws muaj 54 xyoos, Tij Laug Nelson xav hauv kev sib ntsib ntawd hais tias nws yuav tsum kawm lus Suav. Txawm yog nws yog ib tug kws phais mob uas ua hauj lwm ntau, nws ntiav ib tug kws qhia.
Tsis ntev tom qab nws pib kawm ntawv, tus Kws Kho Mob Nelson, thaum nws mus rau kev sib ntsib, nws ho zaum ua ke nrog ib tug “kws phais mob Suav, Dr. Wu Yingkai. … Vim [Tij Laug Nelson] tab tom kawm Lus Suav, nws pib sib tham [nrog Dr. Wu].”19
Dr. Nelson txoj kev xav ua raws li tus yaj saub hais ua rau Dr. Wu tuaj xyuas Salt Lake City thiab Dr. Nelson tau mus rau Suav Teb kom hais lus thiab phais mob.
Nws txoj kev hlub cov Neeg Suav, thiab lawv txoj kev hlub thiab kev hwm nws loj tuaj ntxiv.
Thaum Ob Hlis Ntuj xyoo 1985, kaum lub hli tom qab nws nyob hauv Pawg Kaum Ob tug Thwj Tim, Txwj Laug Nelson tau txais kev hu xov tooj thov kom Dr. Nelson los rau Beijing phais lub plawv ntawm ib tug uas txawj hu nkauj zoo tshaj plaws nyob hauv Suav Teb. Thawj Tswj Hwm Gordon B. Hinckley txhawb nqa nws ua li ntawd, ces Txwj Laug Nelson rov qab mus rau Suav Teb. Kev phais mob kawg uas nws ua yeej yog nyob Suav Teb nyob hauv People’s Republic of China.
Ob xyoos tas los xwb, thaum Kaum Hli Ntuj xyoo 2015, Thawj Tswj Hwm Russell M. Nelson twb txais kev qhuas raug cai, lawv hu nws ua “Suav Teb tus laus phooj ywg.”
Ces nag hmo peb hnov hais tias Thawj Tswj Hwm Russell M. Nelson, uas muaj 93 xyoos, hais lus txog Thawj Tswj Hwm Thomas S. Monson txoj kev thov “[nyob hauv lub rooj sab laj thaum lub Plaub Hlis Ntuj tas los] kom peb txhua tus yuav mob siab thov Vajtswv thaum kawm thiab ntsuam xav txog Phau Ntawv Maumoos txhua txhua hnub.”
Ib yam li nws ua thaum nws yog ib tug kws phais mob, thaum nws ntiav kiag ib tus kws qhia lus Suav, Thawj Tswj Hwm Nelson ua raws nraim li Thawj Tswj Hwm Monson tej lus ntuas hauv nws lub neej. Tsis yog nws nyeem ntawv xwb, nws hais tias, nws “sau tej yam uas qhia tias Phau Ntawv Maumoos yog dab tsi, pom zoo rau dab tsi, tsis pom zoo rau dab tsi, hais yav tom ntej yuav muaj li cas, qhia meej txog dab tsi, thiab muab kev tshwm sim txog dab tsi.”20
Ces, tag kis no xwb, Thawj Tswj Hwm Henry B. Eyring kuj ua tus thib ob ua tim khawv txog tej yam uas nws ua vim Thawj Tswj Hwm Monson hais li no. Nej puas nco qab tej lus no? “Zoo ib yam li nej feem coob, kuv twb mloog tus yaj saub tej lus zoo li yog tus Tswv lub suab hais lus rau kuv. Thiab, ib yam li nej feem coob, kuv tau txiav txim siab ua raws li tej lus ntawd.”21
Thov kom peb yuav coj raws li tej yam ntxwv no hauv peb lub neej.
Kev Cog Lus thiab Ib txoj Koob Hmoov
Kuv cog lus rau nej tias thaum nej mloog tus Tswv lub suab nyob hauv tej lus qhia ntawm lub tuam rooj sab laj no, ces ua raws li nej tau txais kev tshoov siab ua, ces nej yuav paub Vajtswv saib xyuas nej, thiab nej thiab cov uas nyob ib puag ncig nej lub neej yuav tau koob hmoov.22
Nyob hauv lub rooj sab laj no, peb twb xav txog peb tus yaj saub. Peb hlub koj, Thawj Tswj Hwm Monson. Kuv xaus lus nrog nws tej lus uas nws hais nyob ntawm lub sam thiaj no. Kuv ntseeg tias yog ib txoj koob hmoov uas nws yeej xav foom rau peb txhua tus hnub no, yog tias nws nyob tau nrog peb. Nws hais tias; “Nim no thaum peb tawm ntawm lub rooj sab laj no kuv thov kom nej txhua tus yuav tau lub ntuj ceeb tsheej tej koob hmoov. … Kuv thov kom peb Leej Txiv Saum Ntuj Ceeb Tsheej foom koob hmoov rau nej thiab nej tsev neeg. Thov kom tej zaj lus thiab tus ntsuj plig ntawm lub rooj sab laj no nkag rau hauv nej lub neej—nyob hauv nej tsev, nej qhov chaw ua hauj lwm, hauv nej tej kev sib ntsib, thiab thaum nej mus mus los los.”
Nws xaus lus tias: “Kuv hlub nej. Kuv thov Vajtswv pab nej. Thov Vajtswv foom koob hmoov rau nej. Thov kom Nws txoj kev kaj siab lug yuav nrog nraim nej tam sim no thiab tas mus li.”23
Los ntawm Yexus Khetos lub npe, amees.