Nej Yuav Zoo Siab Kawg Nkaus Li

Peb yuav ua li cas kom los cuag Nws? Lub Plaub Hlis Ntuj tas los, Thawj Tswj Hwm Russell M. Nelson thiab Thawj Tswj Hwm M. Russell Ballard hais kom peb kawm txog “Tus Khetos uas Muaj txoj Sia Nyob”⁷ thaum peb kawm txog tus Cawm Seej. Ntau tus twb ua raws li nkawd hais thiab tau koob hmoov. Tsis ntev tas los ib tug phooj ywg zoo muab nws cov me nyuam uas twb loj lawm daim no uas muaj cov duab txog txoj moo zoo rau txhua kab lus. Nws yaum nws cov me nyuam kom pab nws cov xeeb leej xeeb ntxwv to taub thiab cim ntsoov. Tsis ntev tom qab ntawd kuv tus phooj ywg muab ib daim video rau kuv saib uas yog nws tus xeeb ntxwv uas muaj rau xyoos xwb, Laynie, uas rau siab hais tej uas nws twb cim ntsoov. Kuv paub hais tias yog ib tug uas muaj rau xyoo xwb ua tau, ces kuv yeej ua tau thiab!

Daim Duab

Laynie, uas cim ntsoov “Tus Khetos uas Muaj txoj Sia Nyob”

Thaum kuv tau tsom ntsoov kawm txog Yexus Khetos lub neej thiab tej lus qhia thiab cim ntsoov “Tus Khetos uas Muaj txoj Sia Nyob,” ces kuv txoj kev ris txiaj thiab kev hlub rau peb tus Cawm Seej twb loj tuaj. Txhua kab lus ntawm daim ntawv tseem ceeb no muaj kev cob qhia uas pab kuv to taub Nws lub luag hauj lwm saum ntuj thiab nyob hauv lub ntiaj teb. Tej yam uas kuv tau kawm thiab xav thaum lub sij hawm no yeej pom zoo tias Yexus yog “qhov kaj, yog txoj sia, thiab kev cia siab rau lub ntiaj teb.”⁸ Cov vaj lug kub puag thaum ub thiab cov yaj saub tej lus uas sau los sis hais niaj hnub nim no uas qhua Nws ua tim khawv tias “Nws txoj kev yeej yog txoj kev uas coj peb mus rau txoj kev zoo siab hauv lub neej no thiab rau txoj sia nyob mus ib txhis hauv lub neej tom ntej no.”⁹

Thaum nej ua ntau yam kom kawm txog Yexus Khetos lub neej thiab tej lus qhia, nej txoj kev ntseeg Nws yuav loj tuaj. Nej yuav paub tias Nws hlub nej tus kheej thiab to taub nej zoo tag nrho. Thaum nws ua neej nyob hauv lub ntiaj teb no tau 33 xyoo, Nws raug kev xyeej; kev tsim txom; kev tshaib; kev nqhis; thiab kev mob kev nkees;¹⁰ kev kho siab; kev lim hiam; thiab thaum kawg, neeg txhaum muab nws tua tuag uas mob heev.¹¹ Nyob hauv lub Vaj Khexemanes thiab nyob saum tus ntoo khaub lig ntawm Khaulakhauthas, Nws tau raug tag nrho peb txoj kev mob kev nkees, kev txom nyem, kev ntxias, thiab kev qaug zog.¹²

Txawm yog peb raug dab tsi los, Nws yog lub hauv paus ntawm kev kho mob. Cov uas raug ntaus, uas xiam ib tug uas lawv hlub, muaj kev mob kev nkees sab heev, raug liam uas tsis muaj tseeb, raug kev ua lim hiam, los yog raug mob ntawm sab ntsuj plig thaum ua txhaum los sis tsis muaj leej twg to taub lawv los tus Txhiv Dim ntawm lub ntiaj teb yeej kho tau txhua leej txhua tus kom zoo. Tiam sis, Nws yuav tsis los yog tsis muaj leej twg caw Nws los. Peb yuav tsum los cuag Nws thiab cia Nws ua Nws tej txuj ci tseem ceeb.

Muaj ib hnub thaum lub caij nplooj ntoo hlav kuv qhib qhov rooj kom muaj cov huab cua zoo. Ib tug noog me me ya los rau haud ces pom tias nws tsis xav nyob ntawd. Nws ya mus ya los nyob hauv chav ntawd, nws pheej ya mus rau ntawm iav qhov rais seb ya puas tau tawm. Kuv twb sim ua rau nws ya mus rau lub qhov rooj, tiam sis nws ntshai heev thiab ya mus lwm qhov. Thaum kawg nws tsaws saum cov ntaub thaiv qhov rais; nws tsis to taub thiab sab heev. Kuv nqa ib tug khaub ruab thiab muab cev mus siab kom ze rau ntawm qhov chaw uas tus noog tau tsaws lawm. Thaum kuv muab tus khaub ruab cev mus ze rau nws txhais ko taw, tus noog ceev faj dhia saum tus khaub ruab. Kuv maj mam, maj mam, mus rau lub qhov rooj, tuav nkaus tus khaub ruab ruaj nrees. Thaum kuv los txog lub qhov rooj, tus noog ya ceev mus kom dim tau.

Ib yam li tus noog, tej lub sij hawm peb ntshai tso siab vim peb tsis to taub Vajtswv txoj kev hlub thiab Nws txoj kev xav pab peb. Tiam sis thaum peb kawm txog Leej Txiv Saum Ntuj Ceeb Tsheej txoj hau kev thiab Yexus Khetos lub luag hauj lwm, peb to taub tias Nkawd lub hom phiaj tsuas yog peb txoj kev zoo siab thiab kev vam meej mus ib txhis xwb.¹³ Nkawd zoo siab pab peb thaum peb thov, nrhiav, thiab khob.¹⁴ Thaum peb muab siab rau ntseeg thiab txo hwj chim txais Nkawd tej lus teb, peb dim tau tej yam uas peb tsis to taub thiab peb tej kev xav, thiab Nkawd qhia tau peb kom paub mus qhov twg.

Yexus Khetos kuj yog lub hauv paus ntawm kev kaj siab lug. Nws caw peb kom tso siab rau Nws¹⁵ thiab cog lus tias peb yuav txais kev kaj siab lug uas tsis muaj leej twg to taub¹⁶ uas yog qhov uas peb xav thaum Nws tus Ntsuj Plig “hais txoj kev kaj siab lug rau peb lub siab”¹⁷ txawm yog peb raug tej teeb meem twg los xij. Txawm yog tej teeb meem ntawd yog tej yam nyuaj rau peb tus kheej, teeb meem hauv tsev neeg, los yog tej xwm txheej hauv peb zej zog, yuav muaj kev kaj siab lug thaum peb ntseeg tias Vajtswv Tib leeg Tub muaj hwj chim nplij peb lub siab uas mob heev.

Daim Duab

Snježana Podvinski, ib tug mej zeej nyob hauv Croatia

Snježana Podvinski, ib tug ntawm Tsoom Haiv Neeg Ntseeg tsawg tsawg nyob hauv Karlovac, Croatia, twb tso siab rau tus Cawm Seej thaum nws tus txiv thiab nws niam thiab txiv tas sim neej ua ntej dhau rau lub hlis xyoo tas los no. Nws nyuaj siab kawg, tiam sis vim nws muaj ib zaj lus tim khawv paub tias nws tsev neeg nyob tau mus ib txhis, nws twb siv tag nrho nws cov nyiaj uas nws ceev cia kom mus rau lub tuam tsev, es nyob ntawd nws ua kev sib khi rau nws tus txiv thiab nws niam nws txiv. Nws qhia hais tias ob peb hnub nyob hauv lub tuam tsev yeej yog ib lub sij hawm tseem ceeb tshaj hauv nws lub neej. Vim nws paub tseeb txog Yexus Khetos thiab Nws txoj Kev Theej Txhoj, nws nyob kaj siab lug thiab txais kev kho mob uas ntxiv dag zog rau cov nyob ib puag ncig nws thiab.

Kev ntseeg Yexus Khetos ua rau peb txais tau tej txiaj ntsim ntxiv rau kev kho mob thiab kev kaj siab lug. Zoo li Thawj Tswj Hwm Henry B. Eyring qhia: “Ib yam li nej, kuv ua Vajtswv tsaug rau tej lub sij hawm uas tus Tswv xa tus Ntsuj Plig tuaj xyuas kuv thaum kuv xav tau kev kaj siab. Tiam sis peb Leej Txiv Saum Ntuj Ceeb Tsheej tsis txhawj txog peb txoj kev nplij siab xwb, Nws kuj xav txog peb txoj kev vam meej.”¹⁸

Vim peb muaj Yexus Khetos txoj Kev Theej Txhoj, uas yog lub txiaj ntsim kev txhiv dim thiab kev sawv rov los, peb thiaj li muaj peev xwm hloov siab lees txim, hloov peb lub neej, thiab vam meej mus ib txhis li. Vim yog los ntawm lub hwj chim uas Nws muab rau peb thaum peb mloog lus, peb muaj peev xwm hloov los ua neeg zoo dua li peb ua tau peb tus kheej xwb. Tej zaum peb tsis to taub tag nrho, tiam sis peb txhua tus uas paub tias peb txoj kev ntseeg Khetos twb loj tuaj kuj to taub ntxiv txog qhov uas peb yog los ntawm Vajtswv los thiab peb lub hom phiaj, ua rau peb xaiv tej yam uas sib haum nrog txoj kev paub li ntawd.

Txawm yog neeg ntiaj teb xav qhia rau peb hais tias peb yeej zoo li “cov tsiaj xwb,”¹⁹ qhov uas peb paub tias Vajtswv yog peb Leej Txiv qhia peb tias peb muaj peev xwm ua neeg zoo li Vajtswv. Txawm yog neeg ntiaj teb qhia peb tias tsis muaj dab tsi tom qab lub neej no, qhov uas peb paub tias Vajtswv Tib Leeg Tub twb qhib kev rau peb txais kev txhiv dim thiab sawv rov los ua rau peb cia siab tias peb yuav vam meej mus ib txhis.

Thaum peb kawm txog Yexus Khetos ntxiv, peb haj yam ntseeg Nws thiab ua rau peb xav coj raws li Nws tus yam ntxwv. Ua rau peb xav xav ua raws li Nws cov lus txib. Peb lub siab xav pab lwm tus kom txhob raug txom nyem ib yam li Nws, thiab peb xav kom lawv nyob kaj siab lug thiab muaj kev zoo siab ib yam li peb.

Vim li cas kev ua li Nws tau ua muaj hwj chim npaum li no? Vim hais tias thaum peb rau siab ntseeg, tus Vaj Ntsuj Plig Dawb Huv ua tim khawv txog qhov tseeb uas nyob mus ib txhis.²⁰ Yexus qhia Nws cov thwj tim kom ua raws li Nws cov lus txib vim Nws paub hais tias thaum peb ua raws li Nws tus yam ntxwv, peb yuav pib muaj kev xyiv fab, thiab thaum peb taug Nws txoj kev mus ntxiv, peb yuav muaj kev xyiv fab puv npo. Nws piav hais tias, “Kuv hais tej no rau nej kom nej zoo siab ib yam li kuv zoo siab, thiab nej yuav zoo siab kawg nkaus li.”²¹

Peb puas tau muab peb zaj lus tim khawv tsa saum lub hauv paus ruaj khov uas yog Yexus Khetos thiab Nws txoj moo zoo? Thaum tej cua daj cua dub ntawm lub neej no nplawm peb, peb puas nrhiav ib phau ntawv los yog cov lus hauv Internet kom pab peb? Kev siv sij hawm kom txhawb nqa thiab ntxiv dag zog rau peb txoj kev paub thiab zaj lus tim khawv txog Yexus Khetos yuav pab peb ntau heev thaum peb raug kev sim siab thiab tej teeb meem. Kev nyeem vaj lug kub txhua hnub thiab kev xav txog cov yaj saub cov lus, kev thov Vajtswv uas muaj nuj nqis, kev ua tib zoo txais lub cim nco txog txhua lub lim tiam, kev pab lwm tus ib yam li tus Cawm Seej yuav ua—txhua yam no yeej yog ib qho uas pab yus muaj ib lub neej xyiv fab.

Dab tsi ua rau nej xyiv fab? Puas yog thaum nej pom cov uas nej hlub tom qab ib hnub ntev? Puas yog thaum nej txaus siab vim nej ua hauj lwm zoo? Puas yog qhov kaj hauv ib tug neeg qhov muag thaum nej pab nws ris nra hnyav? Puas yog cov lus ntawm ib zaj nkauj qhuas Vajtswv uas tshoov nej lub siab heev? Puas yog ib tug phooj ywg txoj kev tuav nej tes? Cial i siv sij hawm nyob nej tus kheej xav txog nej cov koob hmoov, ces nrhiav kev qhia lwm tus txog tej ntawd. Thaum nej ncav tes pab thiab txhawb nqa nej cov kwv tij nus muag nyob hauv nej zej zog thiab nyob thoob plaws lub ntiaj teb, nej yuav nyob kaj siab lug thiab txais kev kho mob thiab kev vam meej.

Los cuag Nws. Kuv ua tim khawv hais tias thaum nej ua neej tsom ntsoov rau Yexus Khetos, nej yuav muaj kev xyiv fab, txawm yog nej raug xwm txheej dab tsi los xij. Muaj tseeb tiag, “Nws tib leeg xwb,”²² yeej yog lus teb. Tseg sij hawm thiab siv sij hawm kom paub Yexus Khetos los ntawm kev rau siab kawm, kev txhawb kev ntseeg Nws ntxiv, thiab kev siv zog ua neeg zoo li Nws. Thaum peb ua li ntawd, peb kuj yuav txais kev tshoov siab, ib yam li Laynie, hais tias, “Ua Vajtswv tsaug rau lub txiaj ntsim zoo tshaj txhua yam uas yog Nws Leej Tub.”²³ Los ntawm Yexus Khetos lub npe uas dawb huv thiab dawb ceev, amees.