Cov Mov uas Los Saum Ntuj Los Cawm Neeg txoj Sia
Yog peb xav nrog Khetos koom ib txoj sia thiab Nws nrog peb koom ib txoj sia, ces peb yuav tsum ua neeg dawb huv.
Hnub tom qab uas Yexus pub 5,000 tus neeg nyob hauv Kalilais noj nrog “tsib lub ncuav, thiab ob tug ntses”1 xwb, Nws hais lus rau cov neeg nyob hauv Kapena-us. Tus Cawm Seej paub hais tias lawv feem coob tsis tshua xav kawm Nws tej lus qhia thiab lawv tsuas xav rov qab noj dua.2 Yog li ntawd, Nws twb sim qhia lawv txog qhov uas muaj nqi loj tshaj uas yog “cov mo uas tsis txawj lwj; Neeg Leej Tub yuav muab cov mov uas cawm tau txoj sia ntev dhawv mus ib txhis rau nej.”3 Yexus hais tias:
“Kuv yog cov mov uas cawm neeg txoj sia.
“Txawm yog nej cov yawg koob tau noj manas tom tiaj suab puam los lawv twb tuag tas lawm.
“Tiam sis yog leej twg noj cov mov uas los saum ntuj los, tus ntawd yuav tsis tuag.
“Kuv yog cov mov uas los saum ntuj los cawm neeg txoj sia. Tus uas noj cov mov no yuav tau txoj sia ntev dhawv mus ib txhis; thiab cov mov uas kuv yuav muab cawm neeg ntiaj teb txoj sia ntawd twb yog kuv cev nqaij ntag.”4
Cov uas mloog Nws hais uas xav tias tus Cawm Seej hais tiag tiag tsis tau to taub Nws lub ntsiab. Kev xav li ntawd tsis ntxim nyiam, lawv thiaj xav tias, “Tus txiv neej no yuav ua li cas muab tau nws cev nqaij rau peb noj?”5 Yexus hais ntxiv hais tias:
“Kuv qhia tseeb rau nej hais tias yog nej tsis noj Neeg Leej Tub cev nqaij, thiab tsis haus nws cov ntshav, ces nej yuav tsis tau txoj sia.
“Tus uas noj kuv cev nqaij thiab haus kuv cov ntshav, tus ntawd tau txoj sia ntev dhawv mus ib txhis, thiab thaum txog hnub kawg kuv yuav tsa nws sawv hauv qhov tuag rov qab los.
“Rau qhov kuv cev nqaij yog cov tseem mov, thiab kuv cov ntshav yog cov tseem dej.”6
Ces nws piav txog lub ntsiab ntawm Nws cov lus piv txwv:
“Tus uas noj kuv cev nqaij thiab haus kuv cov ntshav, tus ntawd nrog kuv koom ib txoj sia, thiab kuv nrog tus ntawd koom ib txoj sia.
“Vim kuv nrog [Leej Txiv] koom ib txoj sia, kuv thiaj li muaj txoj sia. Ib yam nkaus li ntawd, tus uas noj kuv cev nqaij tus ntawd tau txoj sia, rau qhov kuv yog tus uas muaj txoj sia.”7
Cov uas mloog tseem tsis to taub Yexus hais li cas, thiab thaum lawv hnov nws hais li ntawd, “feem ntau hais tias, Cov lus no nyuaj kawg li; leej twg thiaj yuav to taub? … [Thiab] cov neeg uas caum Yexus qab muaj coob leej thiaj tso Yexus tseg thiab tsis nrog nws mus lawm.”8
Qhov uas peb noj Nws cev nqaij thiab haus Nws cov ntshav yog ib yam uas qhia hais tias peb yuav tsum muaj tus Cawm Seej hauv peb lub neej npaum li cas—nyob hauv peb tus kheej—xwv kom peb yuav koom siab koom ntsws. Vim li cas ho muaj tau li no?
Qhov thib ib, peb to taub hais tias vim Nws muab Nws cev nqaij thiab cov ntshav txi, Yexus theej txhoj rau peb tej kev txhaum thiab kov yeej kev tuag, tsis hais ntawm sab cev nqaij daim tawv thiab sab ntsuj plig.9 Muaj tseeb tiag, peb noj Nws cev nqaij thiab haus Nws cov ntshav thaum Nws pub rau peb txais lub hwj chim thiab cov koob hmoov ntawm Nws txoj Kev Theej Txhoj.
Khetos cov lus qhuab qhia piav hais tias peb yuav tsum ua li cas kom txais tau kev tshav ntuj uas theej txhoj. Peb yuav tsum ntseeg thiab cia siab rau Khetos, hloov siab lees txim thiab ua kev cai raus dej, thiab txais tus Vaj Ntsuj Plig Dawb Huv, “tom qab ntawd muaj kev zam txim rau nej tej kev txhaum los ntawm hluav taws thiab los ntawm tus Vaj Ntsuj Plig Dawb Huv.”10 Nov yog rooj vag, peb txoj kev kom txais tau tus Cawm Seej txoj kev tshav ntuj uas theej txhoj thiab txoj kev ti thiab nqaim uas mus rau Nws lub nceeg vaj.
“Yog li ntawd, yog tias nej yuav thawb lawm tom hauv ntej, mloog ntsoov Khetos tej lus, thiab nyiaj mus kom txog thaum kawg, saib seb, Leej Txiv hais li no tias: Nej yuav tau txoj sia nyob mus ib txhis.”
“… Saib seb, qhov no yog Khetos txoj lus qhuab qhia, thiab yog tib txoj lus qhuab qhia tseeb ntawm Leej Txiv, thiab ntawm Leej Tub thiab ntawm tus Vaj Ntsuj Plig Dawb Huv, uas yog ib tug Vajtswv, uas tsis muaj qhov kawg li.”11
Thaum xav txog tej lub cim ntawm lub cim nco txog ntawm tus Tswv Rooj Mov ces tej ntawd yeej zoo nkauj kawg. Cov mov thiab cov dej piv txog cev nqaij thiab cov ntshav los ntawm Nws tus uas yog cov Mov uas Cawm txoj Sia thiab cov Dej uas Cawm txoj Sia,12 uas ua rau peb nco txog tus nqi uas Nws tau them kom txhiv peb dim. Thaum ntais cov mov mog, peb nco txog tus Cawm Seej lub cev nqaij uas raug ntuag. Txwj Laug Dallin H. Oaks qhia hais tias “vim peb muab cov mov mog ntais, txhua daim yeej tsis zoo ib yam, ib yam li tib neeg uas txais yeej tsis zoo ib yam. Peb nyias muaj nyias kev txhaum uas ua rau nyias yuav tsum hloov siab lees txim. Peb txhua tus nyiaj muaj nyias tej yam uas yuav tsum txhawb dag zog dhau los ntawm tus Tswv Yexus Khetos txoj Kev Theej Txhoj, tus uas peb nco txog nyob hauv txoj kab ke no.”13 Thaum peb haus cov dej, peb xav txog Nws txoj kev los ntshav hauv Khexemanes thiab nyob saum tus ntoo khaub lig thiab cov ntshav lub hwj chim uas hloov peb ua neeg dawb huv.14 Qhov uas peb paub tias “tsis muaj ib yam uas tsis huv yuav muaj peev xwm nkag tau mus rau hauv nws lub nceeg vaj,” peb thiaj li xav nrog “cov uas tau ntxuav lawv tej tsoos tsho nyob hauv [tus Cawm Seej] cov ntshav, vim yog lawv txoj kev ntseeg, thiab txoj kev hloov siab lees txim rau tag nrho lawv tej kev txhaum, thiab lawv txoj kev rau siab ntseeg kom mus txog thaum kawg.”15
Kuv tau hais lus txog kev txais tus Cawm Seej txoj kev tshav ntuj theej txhoj kom tshem peb tej kev txhaum thiab qhov tsuas los ntawm tej kev txhaum ntawd mus. Tiam sis qhov piv txwv txog kev noj Nws cev nqaij thiab haus Nws cov ntshav muaj ib lub ntsiab ntxiv uas tseem ceeb, thiab qhov ntawd qhia tias peb yuav tsum muaj Khetos tej cwm pwm thiab coj yam txwv zoo li Nws, tso tus neeg uas nyiam sab cev nqaij daim tawv tseg thiab hloov los ua Haiv Neeg Ntseeg “tus Tswv Khetos txoj kev theej txhoj.”16 Thaum peb txais cov mov thiab cov dej ntawm lub cim nco txog txhua lub lim tiam, tsim nyog uas peb xav txog qhov uas peb yuav tsum coj raws li Nws tej cwj pwm thiab tus yam ntxwv ntawm Nws lub neej uas tsis tau ua txhaum kom muaj li ntawd nyob hauv peb lub neej thiab peb tus yam ntxwv. Yexus theej txhoj rau lwm tus tej kev txhaum tsis tau yog tias Nws tus Kheej tau ua txhaum. Vim hais tias Nws tsis tshuav nqi uas yuav tsum them rau kev txim lij, Nws thiaj li muab tau Nws tus Kheej kom theej peb lub txhoj kom them nqi rau kev txim lij thiab muab kev hlub tshua rau peb. Thaum peb nco txog thiab hwm Nws txoj kev txi theej txhoj, peb yuav tsum xav txog Nws lub neej uas tsis tau ua txhaum.
Qhov no qhia tias tsim nyog uas peb siv zog kawg siab kawg ntsws. Peb yuav tsum tsis txhob txaus siab nyob li peb nyob tam sim no tiam sis peb yuav tsum mus tom ntej “ua tau lub neej zoo ib yam li Yexus Khetos.”17 Ib yam li Lamaunais txiv hais, peb yuav tsum txaus siab tso tag nrho peb tej kev txhaum tseg18 thiab tsom ntsoov rau tej yam uas tus Tswv xav kom peb ua, ib tug dhau ib tug thiab nyob ua ke.
Tsis ntev tas los, ib tug phooj ywg qhia rau kuv txog ib qho uas tshwm sim thaum nws yog qhov chaw tshaj tawm txoj moo zoo tus thawj tswj hwm. Nws phais mob es yuav tsum so tau ob peb lim tiam. Thaum lub sij hawm uas nws so kom rov zoo, nws tau siv sij hawm ntau kawm cov vaj lug kub. Muaj ib tav su thaum nws xav txog tus Cawm Seej tej lus nyob hauv tshooj 27 ntawm 3 Nifais, nws tsaug zog. Ces nws hais tias:
“Kuv ua npau suav ua rau kuv pom meej txog tag nrho kuv lub neej. Kuv pom kuv tej kev txhaum, tej yam kuv xaiv tsis yog, tej lub sij hawm … uas kuv ua siab luv rau tib neeg, thiab tej yam zoo uas kuv tsis tau hais los sis tsis tau ua. … Twb siv ob peb feeb xwb kom saib tag nrho kuv lub neej, tiam sis ua rau kuv xav tias yog ib lub sij hawm ntev dua. Kuv tsim los, xav tsis thoob, thiab … kuv txhos caug kiag rau ntawm kuv lub txaj ib sab thiab pib thov Vajtswv, thov kom zam txim, hais tej kev xav ntawm kuv lub siab tsis zoo li kuv ib txwm tau thov ua ntej.
“Ua ntej zaj npau suav no, kuv tsis tau paub hais tias kuv yuav tsum hloov siab lees txim npaum li cas. Kuv tej kev txhaum thiab tej kuv ua yuam kev los kuv paub meej heev ua rau kuv xav tias kuv yog ib tug neeg uas nyob deb tsis deb ntawm Vajtswv txoj kev dawb huv thiab txoj kev zoo. Thaum kuv tau thov Vajtswv tav su ntawd, kuv twb tau hais tias kuv ris Leej Txiv Saum Ntuj Ceeb Tsheej thiab tus Cawm Seej txiaj kawg siab kawg ntsws rau tej yam uas Nkawd tau ua rau kuv thiab rau kev sib raug zoo nrog kuv tus poj niam thiab cov me nyuam. Thaum kuv txhos caug kuv kuj hnov tau Vajtswv txoj kev hlub thiab kev zoo uas paub tseeb, txawm yog kuv xav tias kuv tsis tsim nyog. …
“Kuv yeej tsis zoo ib yam txij thaum hnub ntawd. … Kuv lub siab hloov hlo. … Tom qab ntawd kuv txawj xav tias lwm tus xav li cas ntxiv, muaj siab hlub lwm tus ntxiv, thiab xav xav qhia txog txoj moo zoo rau lwm tus. … Kuv txawj qhia tej zaj txog kev ntseeg, kev cia siab, thiab lub txiaj ntsim uas yog kev hloov siab lees txim raws li qhia hauv Phau Ntawv Maumoos zoo dua li kuv ib txwm txawj qhia.”19
Yeej yog ib qho tseem ceeb uas peb to taub tias tus neeg zoo no txoj kev tshwm sim txog nws tej kev txhaum thiab tej nws ua yuam kev tsis tau ua rau nws poob siab los sis tas kev cia siab. Muaj tseeb tiag, nws twb xav tsis thoob thiab muaj kev nyuaj siab. Nws xav tias nws yuav tsum hloov siab lees txim. Nws twb txo hwj chim, tiam sis nws muaj kev ris txiaj, kev kaj siab lug, thiab kev cia siab—kev cia siab tiag tiag—vim Yexus Khetos, yog “cov mov uas los saum ntuj los cawm neeg txoj sia.”20
Kuv tus phooj ywg hais txog qhov uas nws lub neej nyob deb npaum li cas ntawm Vajtswv txoj kev dawb huv. Dawb huv yog lo lus yog lawm. Qhov ua peb noj Khetos cev nqaij thiab haus Nws cov ntshav txhais hais tias peb xav ua neeg dawb huv. Vajtswv txib hais tias, “Ua neeg dawb huv; vim kuv yog neeg dawb huv.”21
Enauj ntuas peb hais tias, “Muab tej no qhia rau nej cov me nyuam, hais tias txhua tus neeg, qhov txhia chaw, yuav tsum hloov siab lees txim, tsis li ces lawv yeej yuav tsis tau Vajtswv lub nceeg vaj ua lawv tug, vim tsis muaj ib yam tsis dawb huv uas nyob taus haud, los yog nyob ntawm nws xub ntiag; vim, ntawm Adas yam lus ces, Neeg Dawb Huv yog nws lub npe, thiab nws Tib Leeg Tub lub npe yog Neeg Leej Tub, uas yog Yexus Khetos.”22 Thaum kuv yog ib tug tub, kuv xav paub vim li cas nyob hauv Phau Tshiab lawv hais tias Yexus yog Neeg Leej Tub (thiab Nws hais li ntawd txog Nws tus kheej) thaum Nws yog Vajtswv Leej Tub, tiam sis Enauj zaj lus qhia meej tias tej npe no yog ib txoj kev qhia tias peb paub txog Nws txoj kev dawb huv—Nws yog Neeg Dawb Huv Leej Tub, Vajtswv Leej Txiv.
Yog peb xav nrog Khetos koom ib txoj sia thiab Nws nrog peb koom ib txoj sia,23 ces peb yuav tsum ua neeg dawb huv, tsis hais los ntawm sab cev nqaij daim tawv thiab sab ntsuj plig.24 Peb nrhiav kev dawb huv nyob hauv lub tuam tsev uas twb sau cov lus no “Kev Dawb Huv rau tus Tswv.” Peb nrhiav kev dawb huv nyob hauv peb tej kev sib yuav, tsev neeg, thiab cov tsev. Peb nrhiav txhua lus lim tiam thaum peb zoo siab txog tus Tswv hnub dawb huv.25 Peb nrhiav kev dawb huv thaum peb ua neej nyob txhua hnub: nyob hauv peb tej lus, peb tej kev xav, peb txoj kev hnav khaub ncaws. Ib yam li Thawj Tswj Hwm Thomas S. Monson hais tias, “Peb yog neeg los ntawm txhua yam uas peb nyeem, txhua yam peb saib, txhua yam peb hnov thiab txhua yam peb xav.”26 Peb nrhiav kev dawb huv thaum peb ris peb tus ntoo khaub lig txhua hnub.27
Muam Carol F. McConkie tau hais tias: “Peb to taub tias muaj ntau yam kev sim siab, kev ntxias, thiab kev txom nyem uas rub peb kom nyob deb ntawm txhua yam uas Vajtswv pom tias yog tej yam dawb huv. Tiam sis peb lub neej hauv lub ntiaj teb no yog lub cib fim rau peb xaiv kev ua dawb huv. Feem ntau yog tej yam uas peb yuav tsum muab tso tseg kom ua raws li peb tej kev khi lus uas ua rau peb hloov ua neeg dawb huv.”28 Thiab ntxiv rau “tej yam uas peb yuav tsum muab tso tseg” yog tej kev pab uas peb pub rau lwm tus.
Peb paub hais tias “thaum [peb] ua hauj lwm pab [peb] cov neeg zej zog ces [peb] tsuas yog ua hauj lwm rau [peb] tus Vajtswv xwb.”29 Thiab tus Tswv ua rau peb nco ntsoov tias kev ua hauj lwm pab li no yeej tseem ceeb rau Nws lub neej thiab tej cwj pwm: “Txawm yog Neeg Leej Tub los, nws tsis tau kom leej twg tu nws, tiam sis nws los tu sawv daws thiab muab nws txoj sia los txhiv ntau leej.”30 Thawj Tswj Hwm Marion G. Romney tau qhia hais tias: “Kev pab ua hauj lwm tsis yog ib yam uas peb nyiaj kom dhau hauv lub ntiaj teb no kom peb thiaj tsim nyog ua neej nyob hauv lub nceeg vaj xilethi-aus. Kev pab hauj lwm yog lub ntsiab ua neej hauv lub nceeg vaj xilethi-aus.”31
Xakhaliyas qhia tej uas yuav muaj yav tom ntej nyob rau lub sij hawm uas tus Tswv kav hauv milenias, txawm yog tej tswb nees los yuav sau ntawv rau hais tias, “Kev dawb huv rau tus Tswv.”32Ib yam li ntawd, Tsoom Haiv Neeg Ntseeg pioneer nyob hauv lub hav no tau sau ntawv “Kev Dawb Huv rau tus Tswv,” rau ntau yam los yog tej yam dog dig thiab tej yam ntxi uas ua rau lawv nco txog lawv txoj kev teev ntuj. Twb muab sau cia rau tej khob thiab phab rau lub cim nco txog thiab sau rau tej daim pov thawj txog kev tsa cov Xya Caum thiab sau rau ib daim ntawv ntev rau lub Koom Haum Niam Tsev. “Kev Dawb Huv rau tus Tswv” los twb sau ntawv rau tej qhov rais ntawm Zion’s Cooperative Mercantile Institution, chaw muag khoom hu ua ZCMI. Twb nrhiav tau lawm hais tias muaj neeg sau rau ib rab rauj thiab rau ib lub nruas. Twb sau “Kev Dawb Huv rau tus Tswv” rau ntawm tej pob hlau ntawm qhov rooj ntawm Thawj Tswj Hwm Brigham Young lub tsev. Tej lus uas lawv sau txog kev dawb huv los zoo li nyob hauv tej qhov chaw los sau rau tej yam uas zoo li tsis sib haum, tiam sis tej no qhia hais tias peb yuav tsum tsom ntsoov rau kev dawb huv txhua lub sij hawm thiab nyob txhua qhov chaw.
Qhov uas peb noj tus Cawm Seej cev nqaij thiab haus Nws cov ntshav txhais hais tias peb tso txhua yam uas tsis yog raws li Khetos tus yam ntxwv tseg thiab coj raws li Nws tej cwj pwm. Qhov no yog lub ntsiab ntawm kev hloov siab lees txim: tsis yog yus tso tej kev txhaum uas ua dhau los tseg xwb tiam sis yus kuj “hloov yus lub siab thiab lub siab nyiam rau Vajtswv”33 txij ntawd mus. Ib yam li kuv tus phooj ywg kawm thaum nws ua npau suav, Vajtswv yuav qhia peb txog peb tej kev txhaum thiab tej peb ua yuam kev, tiam sis Nws kuj yuav pab peb muab peb tej kev qaug zog hloov kom muaj zog.34 Yog peb xav paub tiag tiag hais tias, “Tseem tshuav yam twg uas kuv tsis tau ua thiab?”35 Nws yuav tsis tso peb tseg kom twv seb yog dab tsi, tiam sis nrog kev hlub Nws yuav teb peb kom peb thiaj yuav zoo siab thaum yav tom ntej. Thiab Nws yuav muab kev cia siab rau peb.
Peb yuav tsum siv tag nrho peb lub dag zog ua txoj hauj lwm no, thiab ntshe peb ua tsis taus yog tias thaum peb siv zog ua neeg dawb huv peb nyob peb ib leeg xwb. Qhov tseeb zoo kawg nkaus qhia hais tias peb tsis nyob peb ib leeg. Peb muaj Vajtswv txoj kev hlub, Khetos txoj kev tshav ntuj, tus Vaj Ntsuj Plig Dawb Huv nplij peb lub siab thiab coj peb kev, thiab Tsoom Haiv Neeg Ntseeg uas yog Khetos lub cev txhawb nqa thiab sib raug zoo nrog peb. Thov kom peb tsis txhob txaus siab lawm, tiam sis tsis txhob poob siab thiab. Ib zaj nkauj qhuas Vajtswv zoo yaum kom peb:
Siv sij hawm ua dawb huv, thaum tib neeg maj mus;
siv sij hawm koj ib leeg nrog Yexus xwb.
Yog koj ntsia Yexus, koj yuav ua zoo li nws;
cov phooj ywg yuav pom nws hauv koj tus yam ntxwv.36
Kuv ua tim khawv txog Yexus Khetos, “cov mov uas los saum ntuj los cawm neeg txoj sia,”37 thiab “tus uas noj [Nws] cev nqaij thiab haus [Nws] cov ntshav, tus ntawd tau txoj sia ntev dhawv mus ib txhis,”38 los ntawm Yexus Khetos lub npe, amees.