Txhua Hnub Ntsib tus uas Tsis Paub Kawg
Peb yuav tsum txo peb lub hwj chim rau Vajtswv lub hom phiaj.
Txij thaum kuv ua tub txib nyob hauv Qhov Chaw Tshaj Tawm txoj Moo Zoo British, kuv thiaj li nyiam cov Neeg Akiv txoj kev tuaj dab ros. Tej lub sij hawm tib neeg hais tias lawv txoj kev tuaj dab ros no yog kev thuam lawv tus kheej thiab kev txo hwj chim txog lawv lub neej. Ib qho piv txwv txog qhov no yog qhov uas lawv hais txog lub caij sov zoo li cas. Lub caij sov nyob Akiv Teb yeej luv luv thiab tsis paub yuav nyob ntev li cas. Ib tug kws sau ntawv hais tias, “Kuv nyiam cov Neeg Akiv lub caij sov, yog hnub uas kuv nyiam tshaj txhua xyoo.”1 Neeg tas lauv Akiv uas kuv nyiam heev pw hauv txaj sawv lig lig thiab nws hais lus rau nws ob tug aub hais tias, “Aub yauj! Ntshe peb pw lig dhau thiab lub caij sov twb tas lawm.”2
Muaj ib zaj lus piv txwv nyob hauv kev tuaj dab ros txog peb lub neej hauv lub ntiaj teb zoo nkauj no. Cov vaj lub kub qhia meej tias peb lub neej uas muaj nqis hauv ntiaj teb no yeej yuav nyob tsis ntev. Tej zaum peb hais tau tias yog muaj lub zeem muag uas nyob mus ib txhis, peb lub neej hauv lub ntiaj teb ntshe ntev npaum li ib lub caij sov nyob Akiv Teb.3
Tej lub sij hawm tib neeg lub hom phiaj thiab txoj sia los vaj lug kub siv tej lus txo hwj chim kom piav txog. Thaum tus yaj saub Mauxes loj hlob tuaj ib txhia yuav hais tias nws muaj meej mom heev. Raws li sau nyob hauv phau Lub Hlaws uas Muaj Nqis Heev, tus Tswv, uas npaj Mauxes rau nws txoj hauj lwm ua tus yaj saub, muab tag nrho lub ntiaj teb thiab tag nrho noob neej uas ib txwm muaj thiab tau tsim los rau Mauxes saib.4 Mauxes xav tsis thoob hais tias, “Nim no … kuv thiaj paub tias tib neeg twb tsis tseem ceeb, qhov uas kuv yeej tsis tau xav txog li”5
Yog li ntawd, Vajtswv, zoo li nws hais qhov fab ntxeev rau Mauxes txoj kev xav tias nws tsis tseem ceeb, tshaj tawm txog Nws lub hom phiaj tiag tiag: “Vim saib seb, qhov no yog kuv txoj hauj lwm thiab kuv lub yeeb koob—ua kom tib neeg tsis txawj tuag thiab tau txoj sia nyob mus ib txhis.”6
Vajtswv pom tias peb txhua tus sib npaug zos. Nws cov lus qhuab qhia yeej meej. Nyob hauv Phau Ntawv Maumoos, peb nyeem hais tias, “Txhua tus yeej zoo tib yam rau Vajtswv,” tsis hais “cov neeg dub los sis cov neeg dawb, cov neeg ua qhev los sis cov neeg ywj pheej, tsis hais poj niam los sis txiv neej.”7 Yog li ntawd, tus Tswv caw txhua tus los cuag Nws.8
Tus uas hais tias nws yog ib tug zoo dua ntais nyob hauv Vajtswv txoj hau kev vim nws yog ib haiv neeg twg, yog poj niam los sis txiv neej, nyob hauv teb chaws twg, hais yam lus twg, los yog muaj nyiaj npaum li cas los, tus ntawd tsis coj ncaj ncees thiab tsis to taub tus Tswv lub hom phiaj rau tag nrho peb Leej Txiv cov me nyuam.9
Tu siab uas, niaj hnub no nyob hauv yuav luag txhua qhov chaw, muaj neeg uas saib kev qia dub thiab kev muab hlob rau nqi thiab lawv thuam kev txo hwj chim thiab kev lav ris rau Vajtswv. Ntshe peb lub sawm fem feem coob twb tso kev coj ncaj ncees tseg thiab tsis to taub vim li cas peb nyob hauv lub ntiaj teb no. Kev txo hwj chim tiag tiag, uas yuav tsum muaj kom ua raws li tus Tswv lub hom phiaj rau peb, ntshe pom tsawg tsawg xwb.10
Yog ib yam tseem kom to taub hais tias Khetos txoj kev txo hwj chim, kev ncaj ncees, tus yam ntxwv, thiab kev txawj ntse zoo npaum li cas raws li qhia hauv vaj lug kub. Yeej tsis tsim nyog yog peb saib tsis taus qhov uas peb yuav tsum siv zog ua kom muaj tej cwj pwm zoo li Khetos tsis tu tsis tseg txhua hnub, qhov tseem ceeb yog kev txo hwj chim.11
Cov vaj lug kub qhia meej hais tias txawm yog lub neej no tsis ntev los, lub neej no yeej tseem ceeb heev. Amulej, tus uas yog Amas tus khub ua tub txib nyob hauv Phau Ntawv Maumoos, hais tias, “Lub neej no yog lub caij rau tib neeg npaj mus ntsib Vajtswv; muaj tseeb tiag, saib seb lub caij ntawm lub neej no yog lub caij rau tib neeg ua lawv tej hauj lwm.”12 Peb tsis xav ua li tus tas lauv kuv hais txog, thiab pw kom dhau lub neej no.
Tus Cawm Seej txoj kev coj yam ntxwv txog kev txo hwj chim thiab txoj kev txi rau tag nrho noob neej yog qhov tseem ceeb tshaj plaws nyob hauv zaj keeb kwm. Tus Cawm Seej, uas yog ib tug hauv Pawg Vajtswv, txaus siab yug los rau hauv lub ntiaj teb ua ib tug me tub thiab pib ib lub neej kom qhia thiab kho Nws cov kwv tij thiab cov muam zoo thiab thaum kawg raug kev txom nyem uas mob tshaj qhov piav tau nyob hauv Khexemanes thiab saum tus ntoo khaub lig kom ua Nws txoj Kev Theej Txhoj tag nrho. Khetos txoj kev hlub thiab kev txo hwj chim ua li no los vaj lug kub hais tias yog Nws txoj kev nqis los nrog neeg nyob.13 Nws tau ua li no rau txhua tus txiv neej thiab poj niam uas Vajtswv tau tsim los yog yuav tsim.
Peb Leej Txiv Saum Ntuj Ceeb Tsheej tsis xav kom Nws cov me nyuam poob siab los yog tso lawv txoj kev xav tau lub yeeb koob xilethi-aus tseg. Thaum peb xav ntsoov txog Vajtswv Leej Txiv thiab Khetos Leej Tub, Nkawd yog leej twg, thiab Nkawd tau ua dab tsi kom pab peb, ces ua rau peb hwm, xav tsis thoob, ris txiaj, thiab txo hwj chim.
Yuav Tsum Txo Hwj Chim Kom Pab Tau tus Tswv Txhim Tsa Nws lub Koom Txoos
Amas tau nug ib lo lus nyob hauv nws lub caij nyoog uas tseem ceeb rau peb niaj hnub no: “Yog nej lub siab twb hloov, thiab yog nej lub siab xav hu zaj nkauj txog txoj kev hlub uas txhiv dim, kuv nug hais tias, nim no nej puas tseem xav zoo li ntawd?”14 Amas hais ntxiv hais tias, “Yog Vajtswv hu nej kom cia li tuag lub sij hawm no, nej puas muaj cuab kav hais tau … hais tias, nej twb txo hwj chim txaus nkaus lawm?”15
Txhua zaus kuv nyeem txog Amas tus Hluas txoj kev tso nws txoj hauj lwm ua tus nom ntawm nws lub teb chaws tseg kom mus tshaj tawm Vajtswv txoj lus,16 ua rau kuv nyiam heev. Amas yeej muaj ib zaj lus tim khawv txog Vajtswv Leej Txiv thiab Yexus Khetos thiab lav ris rau Nkawd tag nrho thiab tsis muaj dab tsi thaiv nws. Nws twb tsom ntsoov rau tej yam yog lawm thiab nws txo hwj chim txaus kom muab nws txoj kev muaj npe tseg vim nws paub tias kev ua hauj lwm rau tus Tswv yog qhov tseem ceeb tshaj.
Ib qho uas muaj heev yog kev txo hwj chim txaus hauv peb lub neej kom pab txhim tsa lub Koom Txoos. Ib zaj nyob hauv lub Koom Txoos zaj keeb kwm qhia tau peb txog qhov no. Thaum lub Rau Hli Ntuj xyoo 1837, tus Yaj Saub Yauxej txais kev tsoov siab thaum nyob hauv lub Tuam Tsev Kirtland kom hu tus Thwj Tim Heber C. Kimball mus tshaj tawm Yexus Khetos txoj moo zoo rau “Akiv Teb … thiab qhib lub qhov rooj ntawm kev cawm seej rau haiv neeg ntawd.”17 Nws txib tus Thwj Tim Orson Hyde thiab ob peb tug ntxiv nrog nws mus. Txwj Laug Kimball txoj kev teb yeej zoo kawg. “Kev xav tias Vajtswv txib kuv ua ib lub luag hauj lwm tseem ceeb npaum li no ntshe hnyav dhau qhov kuv ris tau.” … Ua rau kuv yuav luag qaug zog tas vim lub nra uas tau muab tso rau kuv ris.”18 Txawm li ntawd los, nws ua lub luag hauj lwm ntawd nrog kev ntseeg, kev rau siab, thiab kev txo hwj chim.
Tej lub sij hawm kev txo hwj chim yog kev txais tej kev hu thaum peb xav tias peb tsis tsim nyog. Tej lub sij hawm kev txo hwj chim yog kev rau siab ua hauj lwm thaum peb xav tias peb txawj ua tej yam tseem ceeb dua. Cov thawj coj uas txo hwj chim tau hais thiab coj yam txwv uas qhia hais tias qhov tseem ceeb tsis yog txoj hauj lwm uas peb ua tiam sis yog qhov uas peb rau siab ua hauj lwm xwb.19 Tej lub sij hawm kev txo hwj chim yog kev kov yeej kev tu siab thaum peb xav tias cov thawj coj los sis lwm tus tau ua tsis zoo rau peb.
Thaum lub Xya Hli Ntuj hnub tim 23, 1837, tus Yaj Saub Yauxej sib ntsib nrog Txwj Laug Thomas B. Marsh, tus Thawj Tswj Hwm ntawm Pawg Kaum Ob tug Thwj Tim. Txwj Laug Marsh ntxhov siab vim tus Yaj Saub twb hu ob tug ntawm nws Pawg mus rau England es tsis tau nrog nws tham. Thaum Yauxej nrog Txwj Laug Marsh tham, nkawd tso kev tu siab tseg, thiab tus Yaj Saub txais kev tshwm sim zoo heev. Tam sim no yog tshooj 112 ntawm phau Lus Qhuab Qhia thiab Kev Khi Lus.20 Tshooj no yog Vajtswv txoj lus qhia zoo kawg nkaus uas hais txog kev txo hwj chim thiab kev ua tub txib txoj hauj lwm. Nqe 10 hais tias, “[Ne] cia li txo hwj chim; thiab tus Tswv [nej] tus Vajtswv yuav tuav tes coj [nej], thiab hais lus teb [nej] tej lus thov.”21
Tau txais kev tshwm sim no tib hnub uas Txwj Laug Kimball, Hyde, thiab John Goodson, uas txo hwj chim heev, tau tshaj tawm txog qhov uas tau muab Yexus Khetos txoj moo zoo txum tim rov qab los nyob hauv Tsev Teev Ntuj Vauxhall nyob hauv Preston, England.22 Nov yog thawj thawj zaug uas cov tub txib tau tshaj tawm txog txoj moo zoo hauv ib qho chaw uas tsis yog Amelikas Qaum Teb nyob hauv lub caij nyoog tso txoj cai no. Lawv txoj hauj lwm ua tub txib ua rau neeg coob hloov siab los ntseeg tam sim ntawd ua kev cai raus dej thiab rau siab ntseeg.23
Tej feem ntawm kev tshwm sim no coj cov tub txib txoj hauj lwm niaj hnub no thiab. Tej no hais tias, “Tus uas nej yuav xa mus los ntawm kuv lub npe … tus ntawd yuav muaj hwj chim qhib lub qhov rooj ntawm kuv lub nceeg vaj rau ib haiv neeg … npaum li uas lawv yuav txo lawv hwj chim rau kuv, thiab coj raws nraim li kuv txoj lus, thiab mloog kuv tus Ntsuj Plig lub suab.”24
Kev txo hwj chim ntawm kev ua tub txib no ua rau tus Tswv siv ib txoj kev zoo kawg nkaus kom txhim tsa Nws lub Koom Txoos.
Zoo siab uas peb pom muaj li no nyob hauv lub Koom Txoos niaj hnub no. Cov mej zeej, tsis hais tiam neeg uas tab tom loj hlob, siv lawv lub sij hawm thiab nres kev kawm ntawv thiab kev ua hauj lwm kom mus ua tub txib. Ntau tus mej zeej laus tso lawv tej hauj lwm tseg thiab ua lwm yam kev txi kom ua hauj lwm rau Vajtswv txawm yog lawv ua dab tsi los xij. Peb tsis cia tej xwm txheej ntawm peb tus kheej ua rau peb tsum tsis ua raws li Nws tej lub hom phiaj.25 Yuav tsum txo hwj chim kom ua hauj lwm hauv lub Koom Txoos. Peb txo hwj chim ua hauj lwm raws li Vajtswv hu peb kom kawg siab kawg ntsws kawg dag kawg zog. Txhua tus uas ua hauj lwm hauv lub Koom Txoos yuav tsum to taub txog Khetos tus cwj pwm uas yog kev txo hwj chim.
Yuav Tsum Txo Hwj Chim Txhua Hnub Kom Pab Tib Neeg Ntsib Vajtswv
Lub hom phiaj kom hwm tus Tswv thiab ua raws li Nws lub siab nyiam26, tib neeg hauv peb lub sawm fem tsis saib qhov no rau nqi npaum li yav tas los. Cov Neeg Ntseeg Khetos cov thawj coj ib txhia ntseeg tias peb nyob hauv ib lub ntiaj teb uas tsis zoo li cov Neeg Ntseeg Khetos dhau los.27
Ntau tiam tas los, cov ntseeg kev teev ntuj feem coob coj kev cai txog kev txo hwj chim thiab lub siab mos muag thiab kev hais tsis tag.
Nyob hauv lub ntiaj teb niaj hnub no, tib neeg nyiam muab hlob, tsa lawv tus kheej, thiab hais tias lawv ua “tseeb tseeb,” uas tej lub sij hawm ua rau lav tsis txo hwj chim. Ib txhia hais tias tej kev cai uas yuav tsum ua kom zoo siab niaj hnub no yog “ua tseeb, muaj zog, ua hauj lwm—thiab qhov tseem ceeb, tsis txhob tso siab rau lwm tus neeg … vim nej txoj hmoov … nyob ntawm nej txhais tes.”28
Cov vaj lug kub hais kom ua ib yam dab tsi txawv. Vaj lug kub qhia tias peb yuav tsum ua Yexus Khetos cov thwj tim tseeb. Yus yuav tsum paub tseeb tiag yus lav ris rau Vajtswv thiab txo hwj chim hauv yus lub neej. Tus Vaj Ntxwv Npeyamis qhia tias tus neeg ntawm sab cev nqaij daim tawv yog ib tug yeeb ncuab rau Vajtswv thiab hais kom peb ywj rau “tus Vaj Ntsuj Plig Dawb Huv tej kev tshoov siab.” Nws piav hais tias, nrog rau lwm yam thiab, hais tias yuav tsum “mloog lus, muaj siab mos siab muag, txo hwj chim, ua siab ntev, muaj kev hlub puv npo” kom muaj li no.29
Ib txhia siv lo lus ua neeg tseeb kom ua li tus neeg ntawm sab cev nqaij daim tawv thiab ua tej yam uas yeej tsis yog kev txo hwj chim, kev ua siab zoo, kev hlub tshua, kev zam txim, thiab kev paub cai. Peb yeej zoo siab rau qhov Vajtswv cov me nyuam tsis zoo tib yam es tsis tas hais tias peb ua neeg tseeb peb thiaj coj yam ntxwv tsis zoo li Khetos.
Thaum peb sim txo peb lub hwj chim, lub internet niaj hnub no ua nyuaj rau peb tsis txhob muab hlob. Ob qho piv txwv txog qhov no yog kev ua tej yam kom tib neeg saib yus tus kheej los yog kev tawm tsam lwm tus thaum cem hnyav nyob hauv social media. Ib qho ntxiv yog txoj kev “humblebrag.” Qhov no txhais hais tias “yus hais tej yam los yog tso duab uas tsis tshua khav txog yus tus kheej tiam sis lub hom phiaj yog kom tib neeg tsom ntsoov rau ib yam uas ua rau yus muab hlob.”30 Cov yaj saub ib txwm tau ceeb toom txog kev muab hlob thiab kev tsom ntsoov rau tej yam uas tsis muaj nqis hauv lub ntiaj teb.31
Qhov uas txoj kev sib tham sib hais ploj mus zuj zus kuj yog ib yam uas ua rau peb txhawj. Lub ntsiab cai nyob mus ib txhis uas yog kev ywj siab xaiv qhia tias peb yuav tsum cia tib neeg xaiv tej yam uas peb tsis pom zoo. Niaj hnub no kev sib cav sib ceg feem ntau ua txhaum “tej kev cai uas tib neeg yeej ib txwm pom zoo.”32 Peb yuav tsum muaj kev txo hwj chim thiab lub siab mos muag.
Amas ceeb toom kom tsis txhob “ khav theeb vim nej lub siab muab hlob,” vim nej “xav tias nej ib tug zoo dua ib tug,” thiab thuam cov uas txo hwj chim uas “taug kev raws li Vajtswv tus txheej txheem dawb huv.”33
Txhua tus neeg uas ntseeg txhua yam teev ntuj muaj neeg zoo uas txo hwj chim thiab lav ris rau Vajtswv. Muaj feem coob uas ua raws li tus yaj saub Mikhas hauv Phau Qub, uas qhia tias, “Tej uas [tus Tswv] xav kom peb ua yog li no: ua lub siab ncaj, cog kev sib hlub kom ruaj khov, thiab ua lub neej txo hwj chim nrog peb tus Vajtswv sib raug zoo.”34
Thaum peb txo hwj chim tiag tiag, peb thov kom txais kev zam txim thiab peb zam txim rau lwm tus. Raws li peb nyeem hauv phau Mauxiyas, Amas qhia tias txhua zaus uas peb hloov siab lees txim, tus Tswv yuav zam txim rau peb tej kev txhaum.35 Tiam sis, raws li hais nyob hauv tus Tswv zaj Lus Thov,36 thaum peb tsis zam txim rau lwm tus tej kev txhaum, peb raug txim peb tus kheej.37 Vim muaj Yexus Khetos txoj Kev Theej Txhoj, dhau los ntawm kev hloov siab lees txim Nws zam txim rau peb tej kev txhaum. Thaum peb tsis zam txim rau cov uas ua txhaum rau peb, zoo li peb tso tus Cawm Seej txoj Kev Theej Txhoj tseg. Qhov uas peb cim lwm tus tej kev txhaum tseg thiab tsis kam zam txim thiab tsis txaus siab txo hwj chim sib raug zoo li Khetos tus yam ntxwv yeej ua rau peb raug txim. Kev cim kev txhaum tseg yeej yog tshuaj lom rau peb sab ntsuj plig.38
Cia kuv kuj ceeb toom txog kev muab hlob. Tus Tswv, dhau los ntawm tus yaj saub Maulaunais, hais txog qhov uas cov muab hlob thiab cov txo hwj chim txawv li cas: “Cov neeg ruam thiaj li thuam, tiam sis lawv yuav nyiav; thiab kuv lub hwj chim yeej txaus rau cov neeg uas muaj siab mos siab muag.” Tus Tswv kuj tshaj tawm hais tias, “Kuv muab txoj kev qaug zog rau tib neeg xwv kom lawv yuav txo hwj chim; thiab kuv lub hwj chim yeej txaus rau tib neeg txhua tus uas txo lawv lub hwj chim rau kuv; yog tias lawv txo lawv lub hwj chim rau kuv, thiab ntseeg kuv, ces kuv yuav ua kom tej uas qaug zog los ua tej uas muaj zog rau lawv.”39
Kev txo hwj chim yog kev ris txiaj rau Vajtswv cov koob hmoov thiab txoj kev pab. Kev txo hwj chim tsis yog thaum yus ua ib qho tseem ceeb los yog kov yeej ib yam teeb meem loj heev. Yog ib lub cim hais tias yus muaj zog ntawm sab ntsuj plig. Yog kev ntseeg yus tus kheej hais tias ib hnub dhau ib hnub thiab ib teev dhau ib teev peb yuav tso siab rau tus Tswv, ua hauj lwm rau Nws, thiab ua raws li Nws lub hom phiaj. Kuv thov Vajtswv hais tias nyob hauv lub ntiaj teb uas sib cav sib ceg peb yuav rau siab siv zog kom txo hwj chim tiag tiag txhua hnub. Ib zaj paj lug hais li no tias:
Kev sim saib yus puas yog neeg zoo kawg
Ua rau yus txhua hnub ntsib tus uas tsis paub kawg.40
Kuv ua tim khawv tseeb txog tus Cawm Seej thiab Nws txoj Kev Theej Txhoj thiab qhov uas peb yuav tsum txo hwj chim ua hauj lwm rau Nws txhua hnub. Los ntawm Yexus Khetos lub npe, amees.