Nrhiav hauv tej Phau Ntawv Zoo Tshaj Plaws

Lub caij sov thaum sawv ntxov, kuv pom ib tug kab ntsig tshaib plab uas nyuaj pom saum ib tsob paj ntshua nplaim zoo nkauj. Thaum kuv saib tej ntsuag paj uas tsis muaj nplooj, ntshe txawm yus lam saib xwb yus yuav paub tias tus kab ntsig siv nws cov hniav ntse noj cov nplooj mos nyoos. Ua rau kuv xav txog ib zaj lus piv txwv hais tias muaj tib neeg zoo li tus kab ntsig no; lawv nyob thoob plaws lub ntiaj teb, tiam sis lawv zais lawv tus kheej zoo zoo peb thiaj cia lawv nkag los rau hauv peb lub neej, thiab tsis ntev, lawv twb noj tas peb cov cag ntawm sab ntsuj plig thiab peb tsev neeg thiab cov phooj ywg cov cag.

Peb nyob hauv ib lub caij uas tib neeg qhia yuam kev txog peb txoj kev ntseeg ntau heev. Nyob hauv tej lub caij zoo li no, yog peb tsis pov hwm thiab txhawb nqa peb cov cag ntawm sab ntsuj plig ces zoo li peb caw cov uas xav ua rau peb txoj kev ntseeg Khetos thiab Nws lub Koom Txoos uas tau muab txum tim rov qab los raug puas tsuaj tas los noj cov cag ntawd. Nyob hauv Phau Ntawv Maumoos, yog Xi-elas uas xav ua rau tib neeg txoj kev ntseeg puas tsuaj tas.

Tej yam nws ua thiab nws tej lus yog “tus yeeb ncuab ib rooj ntxiab, uas nws … cuab kom ntes tau cov neeg no, xwv kom nws yuav coj tau [lawv] mus ywj rau nws, xwv kom nws yuav xuas nws tej saw hlau khaub zig tau [lawv]” (Amas 12:6). Tej rooj ntxiab li ntawd los muaj niaj hnub nim no, thiab yog peb tsis saib xyuas peb sab ntsuj plig thiab nyob saum lub hauv paus khov kho uas yog peb tus Txhiv Dim (saib Hilamas 5:12), ces ntshe peb yuav raug Dab Ntxwg Nyoog tej saw hlau khi peb thiab coj peb mus taug tej kev uas txwv tsis pub neeg mus li Phau Ntawv Maumoos hais txog (saib 1 Nifais 8:28).

Tus Thwj Tim Povlauj ceeb toom cov neeg hauv nws lub caij nyoog uas yog kev ceeb toom zoo rau peb thiab: “Vim kuv paub li no tias, … txawm yog hauv nej cov los yeej yuav muaj qee leej qhia tsis tseeb ntxias cov ntseeg kom mus ua lawv thwj tim” (Tes Hauj Lwm 20:29–30).

Nws thiab peb cov yaj saub thiab cov thwj tim tej lus ceeb toom qhia peb tias peb yuav tsum ua txhua yam peb ua tau ntawm sab ntsuj plig kom tiv tau tej lus tawm tsam thiab tej lus ntxias. Thaum kuv mus xyuas tej pawg ntseeg thiab ceg txheem ntseeg ntawm lub Koom Txoos, qhov uas txhawb nqa kuv yog tej uas kuv pom, hnov, thiab xav thaum Tsoom Haiv Neeg Ntseeg ua zoo thiab rau siab ntseeg ua raws li tus Cawm Seej thiab Nws cov tub qhe tej lus qhia.

Qhov uas cov mej zeej hwm Hnub Caiv yog ib qho piv txwv txog kev tiv thaiv lawv sab ntsuj plig vim lawv ua raws li cov yaj saub tej lus qhia. Lawv haj yam nyob ruaj nrees thaum lawv mus rau lub tuam tsev thiab ua hauj lwm nrhiav tsev neeg zaj keeb kwm ntxiv thaum lawv nrhiav lawv cov poj koob yawm txwv kom ua cov kab ke hauv lub tuam tsev. Peb cov cag ntawm sab ntsuj plig yuav mus tob hauv av thaum peb thov Vajtswv peb tus kheej thiab nyob hauv peb tsev neeg kom peb txoj kev ntseeg muaj zog, thiab thaum peb hloov siab lees txim txhua hnub, nrhiav tus Vaj Ntsuj Plig Dawb Huv kom nrog nraim peb, thiab kawm txog peb tus Cawm Seej thiab Nws tej cwj pwm thiab siv zog ua neeg zoo li Nws (saib 3 Nifais 27:27).

Peb tus Cawm Seej, Yexus Khetos, yog txoj Kev Kaj ntawm lub Ntiaj Teb, thiab Nws thov peb coj raws li Nws. Peb yuav tsum ntsia Nws txhua lub sij hawm thiab qhov tseem ceeb yog thaum muaj tej hmo tsaus ntuj thiab huab cua phem ntawm kev ua xyem xyav thiab kev ntxhov siab los zoo li pos huab. Yog tias cov neeg hauv “lub tsev loj thiab dav nyob ntawm tus kwj uas muaj dej sab tid” (1 Nifais 8:26) taw tes rau nej thuam, cem, thiab ntxias nej, kuv thov kom nej tig mus tam sim ntawd nej thiaj yuav tsis raug ntxias los ntawm tej lus dag kom nej txais tsis tau qhov tseeb thiab cov koob hmoov.

Tiam sis, ua li no xwb yeej yuav tsis txaus pab nej thaum tib neeg sau, hais thiab ua tej kev qias. Txwj Laug Robert D. Hales qhia peb, ”Yog nej tsis coj raws nraim li txoj moo zoo—ua kom ‘kawg siab kawg ntsws kawg dag kawg zog’—nej thiaj yuav tsis muaj qhov kaj ntawm sab ntsuj plig txaus kom qhov tsaus ntuj ploj mus” (“Out of Darkness into His Marvelous Light,” Liahona, Xya Hli Ntuj 2002, 78). Muaj tseeb tiag, qhov uas peb xav coj raws li Khetos, tus uas yog txoj kev kaj ntawm lub ntiaj teb (saib Yauhas 8:12), txhais hais tias peb yuav tsum ua raws li Nws tej lus qhia. Thaum peb ua raws li Vajtswv txoj lus peb txhawb nqa, tiv thaiv, thiab pov hwm peb sab ntsuj plig.

Thaum peb muaj txoj kev kaj hauv peb lub neej, peb muaj duab ntxoov ntxoo tsawg. Tiam sis, txawm yog muaj txoj kev kaj ntau los yeej muaj tib neeg uas hais lus txog peb txoj kev ntseeg uas tsis yog thiab lawv sim peb lub siab. Tus Thwj Tim Yakaunpaus sau hais tias qhov uas peb, “ua siab ntev nyiaj tej kev nyuaj siab, ces … ua rau [peb] muab siab rau ntseeg ntxiv” (Yakaunpaus 1:3). Vim peb paub li no, Txwj Laug Neal A. Maxwell qhia tias, “Ib tug thwj tim uas ua siab ntev … yuav tsis xav tsis thoob los sis ntxhov siab thaum tib neeg hais tsis yog txog lub Koom Txoos” (“Patience” [Brigham Young University kev sib ntsib hawm Vajtswv, Kaum Ib Hlis Ntuj 27, 1979], speeches.byu.edu).

Yeej muaj tej lus nug txog peb lub Koom Txoos zaj keeb kwm thiab txoj kev ntseeg. Peb yuav tsum ceev faj zoo zoo seb peb yuav nrhiav lus teb nyob qhov twg. Yeej tsis muaj nqis dab tsi yog tias yus nrhiav tej kev xav ntawm cov uas tsis tshua paub los yog cov uas tsis ntseeg lawm. Tus Thwj Tim Yakaunpaus tej lus ntuas zoo tshaj plaws hais tias: “Yog nej cov leej twg tsis muaj tswv yim, kom nws cia li thov Vajtswv” (Yakaunpaus 1:5).

Peb yuav tsum ua tib zoo kawm ua ntej peb thov Vajtswv, vim cov vaj lug kub qhia kom peb nrhiav “tej lus tswv yim hauv tej phau ntawv zoo tshaj plaws” thiab “nrhiav kev kawm, twb yog los ntawm kev kawm ntawv thiab los ntawm kev ntseeg” (Q&K 88:118). Muaj phau ntawv li no ntau heev, cov ntawv uas lub Koom Txoos cov thawj coj tau txais kev tshoov siab sau thiab cov ntawv txog lub Koom Txoos zaj keeb kwm thiab cov lus qhuab qhia uas cov kws kawm txuj pom zoo thiab sau kom thwj. Txawm li ntawd los, tsis muaj dab tsi uas zoo tshaj Vajtswv txoj lus uas tau muab tshwm sim hauv cov vaj lug kub. Los ntawm tej phab nyias nyias ntawd uas muaj tej lus qhia txog sab ntsuj plig ntau, peb kawm qhov tseeb los ntawm tus Vaj Ntsuj Plig Dawb Huv ua rau peb txais qhov kaj ntxiv.

Thawj Tswj Hwm Thomas S. Monson tau thov kom peb “mob siab thov Vajtswv thaum kawm thiab ntsuam xav txog Phau Ntawv Maumoos txhua txhua hnub” (“Lub Hwj Chim ntawm Phau Ntawv Maumoos,” Liahona, Tsib Hlis Ntuj 2017, 87).

Ob peb xyoos tas los, thaum kuv yog tus thawj tswj hwm ntawm Qhov Chaw Tshaj Tawm txoj Moo Zoo Fiji Suva, muaj cov tub txib uas qhia lawv tias Phau Ntawv Maumoos muaj hwj chim kom tib neeg hloov siab los ntseeg. Yog ib hnub sov sov, es ob tug txwj laug tuaj txog ib lub tsev nyob hauv ib lub zos me me hu ua Labasa.

Nkawd khob qhov rooj es ib tug txiv neej laus los thiab mloog nkawd ua tim khawv txog qhov uas Phau Ntawv Maumoos muaj tseeb. Nkawd muab ib phau rau nws thiab caw nws nyeem thiab thov Vajtswv kom paub, ib yam li nkawd, hais tias phau no yog Vajtswv txoj lus. Nws teb me ntsis hais tias: “Tag kis kuv rov qab mus nuv ntse. Kuv mam li nyeem thaum kuv nyob hauv nkoj, thiab thaum kuv rov qab los, neb tuaj xyuas kuv los tau.”

Thaum nws tsis nyob, twb muab cov tub txib sib pauv, thiab ob peb lim tiam tom qab ntawd, ib khub txwj laug tshiab rov qab tuaj xyuas tus neeg nuv ntses. Txog lub sij hawm no nws twb nyeem Phau Ntawv Maumoos tag nrho, nws txais kev pom zoo hais tias phau no muaj tseeb thiab nws xav paub ntxiv.

Tus Vaj Ntsuj Plig Dawb Huv twb ua rau nws hloov siab los ntseeg thiab ua tim khawv txog qhov tseeb ntawm cov lus uas muaj nqis nyob hauv txhua phab txog tej xwm txheej thiab cov lus qhuab qhia puag thaum ub uas tau muab tshwj tseg rau peb lub caij nyoog hauv Phau Ntawv Maumoos. Txoj koob hmoov no los peb txhua tus txais tau.

Lub tsev yog ib qho chaw zoo tshaj plaws rau tsev neeg kawm thiab sib qhia txog tej yam uas lawv kawm los ntawm cov vaj lug kub cov yaj saub tej lus thiab cov ntaub ntawv ntawm lub Koom Txoos nyob hauv LDS.org. Nyob ntawd nej yuav nrhiav tau xov xwm txog txoj moo zoo xws li tej zaj hais txog Thawj Zaug Ua Yog Toog Pom. Thaum peb kawm tej phau ntawv zoo tshaj plaws, peb pov hwm peb tus kheej kom tsis txhob raug tej hniav ntse ntawm cov uas xav noj peb tej cag ntawm sab ntsuj plig.

Txawm yog peb thov Vajtswv, kawm, thiab xav los, tej zaum tseem tshuav tej lus nug uas tsis tau txais lus teb, tiam sis peb yuav tsum tsis txhob cia qhov ntawd tua hluav taws ntawm kev ntseeg nyob hauv peb. Tej lus nug li ntawd yog kev caw kom txhawb peb txoj kev ntseeg thiab yuav tsum tsis txhob cia siv sij hawm ua xyem xyav. Yog lub ntsiab ntawm kev teev ntuj kom tsis paub tseeb lus teb rau txhua lo lus nug, vim hais tias nov yog lub ntsiab ntawm kev ntseeg. Hais txog qhov no, Txwj Laug Jeffrey R. Holland tau qhia peb tias “thaum twg txog tej lub sij hawm zoo li ntawd thiab nej muaj teeb meem, ntshe kev daws tej teeb meem ntawd tsis los sai heev, ces cia li tuav nkaus tej yam uas nej paub lawm thiab nyob ruaj khov kho mus txog thaum nej paub ntxiv.” (“Lord, I Believe,” Liahona, Tsib Hlis Ntuj 2013, 94)

Nyob ib puag ncig peb pom kev xyiv fab ntawm cov uas sawv ruaj khov thaum lawv tu lawv cov cag ntawm sab ntsuj plig tsis tu tsis tseg. Lawv txoj kev ntseeg thiab kev mloog lus yeej txaus ua rau lawv muaj kev cia siab txog lawv tus Cawm Seej, thiab ua rau lawv zoo siab kawg. Lawv tsis hais tias lawv paub txhua yam, tiam sis lawv them tus nqi kom paub txaus thiab muaj kev kaj siab lug thiab ua siab ntev nyob thaum lawv nrhiav kom paub ntxiv. Ib nqe lus ntxiv rau ib nqe lus, lawv txoj kev ntseeg Khetos yeej nyob ruaj nrees, thiab lawv sawv khov kho ua ke nrog Tsoom Haiv Neeg Ntseeg.

Thov kom peb txhua tus ua neej nyob kom cov kab ntsig uas nyuaj pom thiab muaj hniav ntse yuav tsis muaj chaw nyob hauv peb lub neej, tsis hais nim no los yog yav tom ntej los yog, xwv kom peb yuav “nyob ruaj nrees ntawm txoj kev ntseeg Khetos, kom mus txog thaum kawg” (Amas 27:27). Los ntawm Yexus Khetos lub npe, amees.