Lod Bae Yu Save Mekem Se Ol Ae Blong Mi Bae Oli Open
Yumi mas lukluk long ol narawan wetem ol ae blong Sevya.
Laeon King i wan katun film abaot bus blong Afrika. Taem laeon king i ded taem hem i stap traem blong sevem boe blong hem, yangfala laeon prins ia oli fosem hem blong haed taem wan rabis rula i stap spolem balens long gras fil. Tru long wan tija. Ol ae blong hem oli open long nid blong gat balens long ol samting we i laef long gras fil ia we oli pat blong wan sekol blong laef. Taem hem i stap trening blong kam king, yangfala laeon ia i folem kaonsel blong “lukluk i go bitim wanem we hem i save luk.”1
Taem yumi lanem blong kasem evri samting we Papa blong yumi i gat, gospel i tijim yumi blong lukluk i go bitim wanem we yumi save luk. Blong lukluk i go bitim wanem we yumi save luk, yumi mas lukluk long ol narawan tru long ol ae blong Sevya. Net blong gospel i bigwan, i fulap long evri kaen pipol. Yumi no save andastanem ol joes mo bakgraon blong ol pipol long wol blong yumi, blong Jos kongregesen, mo tu, blong evriwan insaed long ol famli blong yumi from yumi no gat ful pikja long huia olgeta. Yumi mas lukluk i go bitim ol kaen tingting blong ol man we i no tru mo ol defren tingting abaot ol defren kaen man, mo yumi mas openem smol eria blong ol eksperiens blong yumi.
Ol ae blong mi i bin open blong “lukluk i go bitim wanem we mi save luk” taem mi bin stap olsem misin presiden. Wan yang elda i kam wetem wari long ae blong hem. Taem mitufala i mit long wan intaviu, hem i talem wetem harem nogud: “Mi wantem go hom.” Mi tingting long miwan: “Ating yumi save fiksim hemia.” Mi givim kaonsel long hem blong wok had mo blong prea long saed blong samting ia blong wan wik mo afta ringim mi. Wan wik afta, kolosap long sem taem, hem i ring i kam. Hem i stil wantem blong go hom. Mi givim kaonsel long hem bakegen blong prea, blong wok had mo blong ringim mi long wik afta. Long nekis intaviu blong mitufala, ol samting oli no jenis. Hem i wantem yet blong go hom.
Mi no save letem hemia i hapen, Mi stat blong tijim hem abaot tabu wok blong misin blong hem. Mi leftemap tingting blong hem blong fogetem hemwan mo go long wok. ” 2 Be i nomata long wanem kaen wei mi yusum, maen blong hem i no jenis. Long en, i bin kam long mi se ating mi no gat ful pikja. Long tetaem ia nao mi filim blong askem hem kwestin ia: “?Elda. Wanem i had long yu?” Wanem hem i talem i stikim hat blong mi: “Presiden. Mi no save rid.”
Waes kaonsel we mi bin ting se i impoten blong hem i harem i no stret nomo long ol nid blong hem. Wanem hem i nidim moa, i blong mi lukluk i go bitim kwik asesmen blong mi mo letem Spirit blong helpem mi blong save wanem stret i stap long maen blong elda ia. Hem i nidim mi blong luk gud hem mo givim hem wan risen blong hop. Be nomo mi mekem olsem se mi wan bigfala balong we i prapa spolem gud samting. Gudfala elda i lanem blong rid mo kam wan klin disaepol blong Jisas Kraes. Hem i openem ol ae blong mi long ol toktok blong Lod: “Man i stap lukluk long bodi blong man nomo, be mi stap lukluk long tingting blong hem.” (1 Samuel 16:7).
Hem i wan blesing taem we Spirit blong Lod i openem ae blong yumi luk moa. Tingbaot profet Elisa we i wokbaot i go antap blong faenem ol ami blong Siria ol raonem taon wetem ol hos mo kat blong faet? Ol wokman blong hem oli fraet mo askem Elisa wanem bae oli mekem agensem ol ami ia. Elisa i talem long hem blong no wari wetem ol toktok we yumi no save fogetem: “Yu no fraet. Olgeta long saed blong yumi oli plante moa, i winim olgeta ya.” (2 King 6:16). Wokman i no save wanem profet i stap tokbaot. Hem i no bin save lukluk i go bitim wanem hem i save luk. Be Elisa i luk plante ami blong ol enjel we oli rere blong faet from ol pipol blong profet. Mekem se Elisa i prea long Lod blong openem ol ae blong yang man blong hem, “Nao … hem i luk we hil ia we taon i stap long hem i fulap gud long faea we i olsem ol hos wetem ol kat blong faet we oli stap hivap raon long Elisa” (2 King 6:17).
Yumi oltaem seperetem yumi long ol narawan from ol defren samting we yumi luk. Yumi filim gud raon long olgeta we oli tingting, toktok, dresap mo ak olsem yumi mo no filim gud raon long olgeta we oli kam from ol deferent bakgraon o situesen. ?Long reality, i no yumi evriwan i kam long ol defren kantri mo toktok defren lanwis? ?I no yumi evriwan i lukluk long wol tru long ol bigfala fanis blong eksperiens blong yumiwan? From sam oli lukluk mo toktok wetem ol ae Spirit, olsem profet Elisa, mo sam oli luk mo toktok wetem nomol ae olsem we mi eksperiensem wetem misinari blong mi we i no skul.
Yumi laef long wan wol we i laekem blong komperem, toktok nogud long man mo tokbaot nogud man. Be, lukluk tru long ol glas blong sosol media, yumi nidim blong lukluk insaed mo faenem ol fasin blong God we yumi evriwan i gat. Ol kwaliti mo fasin blong God oli no postem long Pinterest o long Instagram.
Blong akseptem mo lavem ol narawan i no minim blong yumi mas akseptem ol tingting ia. i tru se trutok i givim oda blong yumi mas fetful evriwan, be i neva mas stap olsem wan fanis long fasin blong stap kaen. Blong lavem ol narawan long tru fasin, i nidim blong yumi gogohed blong praktisim fasin blong akseptem ol hadwok blong olgeta ia, we, eksperiens blong olgeta, mo wanem i blokem olgeta, bae yumi neva save long hem. Blong save lukluk i go bitim wanem yumi save luk i nidim blong yumi lukluk nomo long Sevya wetem ful tingting.
Long 28 Mei, 2016, Beau Richey we i gat sikstin yia mo fren blong hem Austin, tufala i stap long wan famli fam long Kolorado. Beau mo Austin tufala i klaem i go long olfala trak blong olgeta wetem bigfala tingting blong gat wan gudtaem long dei ia. Tufala i no bin go longwe taem tufala i luksave rabis kondisen blong trak we i mekem aksiden i hapen. Trak, we Beau i draevem i kapsaet wantaem, i lego Beau anda long 180 kg blong aean. Taem Austin, fren blong Beau, i kasem hem, hem i luk Beau i stap traehad from laef blong hem. Wetem evri paoa we hem i gat hem i traem blong pulumaot trak ia long fren blong hem. Be trak i no muv. Hem i prea from Beau mo afta i spid i go from help. Ol man blong imejensi oli kam, be sam aoa afta, Beau i bin rilis, i aot long wol ia.
Papa mo mama blong Beau tufala i kam wetem wan hat we i brok. Taem tufala i stap stanap long smol hospital wetem ol fren mo ol memba blong famli, wan polisman i kam insaed long rum mi givim fon blong Beau long mama blong hem. Taem hem i tekem fon, wan alam i ring. Hem i openem fon mo luk alam blong Beau blong evri dei. Hem i ridim laod mesej we yangfala boe blong tufala we i hapi, gat lav mo laekem blong visitim ples i bin putum blong ridim evri dei. Alam i talem: “Tingbaot blong putum Jisas Kraes long medel blong laef blong yu tedei.”
Lukluk blong Beau long Ridima blong hem i no mekem harem nogud blong olgeta we hem i lavem i kam daon long taem we hem i no stap. Be i givim bigfala hop mo mining long laef mo joes blong Beau. I mekem se famli mo ol fren blong hem oli lukluk i go bitim harem nogud blong eli ded blong hem, mo oli lukluk se, nekis laef, hem i wan ril samting. Hem i bin wan bigfala lav blong papa mo mama blong Beau blong luk tru long ol ae blong boe blong tufala, ol samting ia we hem i tekem se i moa impoten.
Olsem ol memba blong Jos, oli bin givim presen blong spirit alam long yumi we oli stap women yumi taem yumi stap lukluk nomo wetem ol ae blong wol ia aot long fasin blong pemaot man. Sakramen evri wik i mekem yumi gohed blong lukluk long Jisas Kraes blong yumi tingbaot Hem oltaem mo oltaem gat Spirit blong Hem i stap wetem yumi (see D&C 20:77). Yet, Sam taem yumi no luk save ol filing blong mekem yumi tingbaot mo alam. Taem yumi gat Jisas Kraes long medel blong laef blong yumi, bae Hem i mekem ol ae blong yumi bae yumi open long ol bigfala Janis we yumiwan i no save andastanem
Mi kasem wan naes leta abaot wan sef alam we wan fetful sista i eksperiensem. Hem i talem long mi se long wan efot blong helpem hasban blong hem blong save olsem wanem hem filim, hem i kipim wan lektronik lis long fon blong hem long ol samting we hem i mekem o talem we i mekem hem i harem nogud. Hem i tingting se long taem we i stret bae hem i putum tugeta wan pruf blong serem wetem hem we hem i ting se bae i mekem hem i wantem blong jenisim ol wei blong hem. Be, long wan Sandei long taem blong tekem pat long sakramen mo gat strong lukluk long Atonmen blong Sevya, hem i luk save se blong putum tugeta ol nogud filing abaot hasban blong hem i stap mekem Spirit i gowe long hem mo bae i neva jenisim hem.
Wan spirit alam i ring insaed long hat blong hem mo i talem: “Lego i go; Lego evriwan i go. Dilitim ol not ia. Oli no help.” Afta hem i raetem, mo mi kwot: “Mi tekem sam taem blong selektem ‘evriwan’ mo longtaem moa blong ‘dilitim.’ Be taem mi mekem, evri nogud filing ia oli gowe. Hat blong mi i fulap wetem lav—lav blong hasban blong mi mo lav blong Lod.” Olsem Sol long rod blong go long Damaskes, visen blong sista ia i jenis. Ol skel blong fis oli kamaot long ae blong hem.”
Sevya, oltaem, i openem ol ae blong olgeta we oli blaen long bodi mo spirit. Openem ol ae blong yumi long tabu trutok, i minim nomo blong priperem yumi blong yumi kasem hiling long ol samting blong wol we yumi no save luk. Taem yumi lukluk gud long spirit “alam” we i givim saen long nid blong korektem rod o nid blong gat wan lukluk i go long ol taem we i no save, yumi stap kasem ol promes blong sakramen blong gat Spirit blong Hem i stap wetem yumi. Hemia i hapen long Josef Smit mo Oliva Kaodri long Ketlan Tempol taem Sevya i tijim ol trutok we oli gat paoa, we i promes se bae se “vel” blong wol bae oli “tekemaot long maen blong tufala mo se bae ol ae blong save blong [tufala] [bae] i open” (D&C 110:1).
Mi witnes se tru long paoa blong Jisas Kraes, yumi save luk, long saed blong spirit, i go bitim wanem we yumi stap luk nomo. Taem yumi “tingbaot Hem mo gat Spirit” blong Hem i stap wetem yumi, ol ae blong save blong yumi bae oli open. Afta bigfala tru tabu fasin we i stap insaed long evriwan long yumi bae i gat moa paoa long hat blong yumi. Long nem blong Jisas Kraes, amen.