Eklips long Saed blong Spirit
No letem ol nara samting blong pulum tingting oli kam olsem eklips mo blokem laet blong heven.
Long 21 Ogis blong yia ia, i gat tu samting we i bin hapen se i no stap hapen oltaem, we i pulum tingting blong ol pipol raon long wol. Faswan, hem i namba 90 betdei blong profet we yumi lavem, Presiden Thomas S. Monson. Long tetaem ia, mi bin mekem wan wok long Eria blong Pasifik mo mi glad tumas se olgeta Sent long Ostrelia, Vanuatu, Niu Silan mo Tahiti oli save long dei blong profet, be tu, oli bin glad blong selebretem. Mi filim spesel blong serem fet mo lav blong olgeta wetem gudfala man ia. Hem i wan insperesen blong luk wanem ol Lata-dei Sent oli serem wetem profet blong olgeta.
Yes, Presiden Monson, we i gat tingting long olgeta we oli wantem talem hapi betdei long hem, i tokbaot spesel betdei presen blong hem: “Faenem wan we i gat wan hadtaem, o i sik, o i stap hemwan, mo mekem wan samting blong olgeta. Hemia nomo mi askem.”1 Mifala i lavem mo sastenem yu Presiden Monson.
Eklips blong San
Nara samting we i no hapen tumas, i bin hapen long sem dei mo i pulum fulap milian pipol raon long wol, hem i ful Eklips blong san. Hemia i bin fas taem we wan Eklips i bin hapen raon long ful Yunaeted Stet long 99 yia.2 ?Yu, yu luk wan eklips blong san finis? Maet bae mi tokbaot hemia i ditel moa.
Ful eklips blong san i hapen taem mun i muv bitwin wol mo san, i blokem fulwan laet we i kamaot long san.3 Blong hemia i save hapen, i wan bigfala sapraes long mi. Sapos yu pikjarem san, se hem i bigwan olsem wil blong baeskel, nao mun, sapos yu komperem wetem, i samples saes blong wan smol ston nomo.
?Olsem wanem i posibol blong stamba blong wanem i mekem yumi wom, gat laet mo laef, bae wan samting we i smol tumas bae i save blokem hem fulwan?
Nomata we san i 400 taem moa bigwan long mun, hem i 400 taem moa longwe long wol. 4 Long lukluk blong wol, hemia i mekem se san mo mun, tufala i kolosap sem saes. Taem tufala i laenap stret, i luk se mun i kavremap ful san. Ol fren mo famli blong mi we oli stap long eria ia oli tokbaot olsem wanem laet ia, tudak i kam tekem ples, mo ol sta oli kamkamaot, ol pijin oli stop singsing. Ea i kam kolkol, from se tempereja long taem blong eklips i save godaon moa long 11 digri Selsius. 5
Oli tokbaot se oli maot blong olgeta i open bigwan, oli sapraes, mo oli wari smol, blong oli save se eklips i save kam wetem smol denja. Be, oli lukaotgud se oli no prapa spolem ae blong olgeta, o kam blaen from eklips. Oli bin sef i stap from se oli werem ol glas we i gat spesel filta we i protektem ae blong olgeta blong kasem kil.
Wanem I Semmak
Long sem wei we smol mun ia i blokem bigfala san, i blokem laet mo hot blong hem, wan eklips long saed blong spirit i save hapen taem yumi letem ol smol samting we oli kam blokem yumi—olgeta samting ia we yumi stap fesem long evri dei laef blong yumi—oli kam kolosap tumas, nao, oli blokem bigfala paoa, bigfala laet mo hot blong laet blong Jisas Kraes mo gospel blong hem.
Elda Neal A. Maxwell i tekem pikja ia i go moa taem hem i talem: “Iven wan samting we i smol olsem bigfala fingga blong han, taem oli holem i kolosap long ae, i save mekem man i blaen, i nomo luk san. Be yet, san i stap yet. Blaen fasin ia, man hemwan nomo i karem i kam long hemwan bakegen. Taem yumi pulum ol nara samting i kam, mo putum olgeta oli kolosap tumas, oli kam faswan, nao i blokem lukluk blong yumi i go long heven.” 6
I klia. I no gat wan long yumi i wantem minim blong blokem ae blong luk heven, o i wantem letem wan eklips blong san i hapen long laef blong yumi. Bae yumi lukluk long sam wei, we i save helpem yumi blong mekem se i no gat eklips long saed blong spirit we i save mekem yumi blaen olwe.
Ol Gospel Glas: Holemtaet Lukluk blong Yu long saed blong Gospel
?Yu tingbaot se mi tokbaot spesel sanglas we oli yusum blong protektem ol man long eklips blong san blong i no spolem ae, o mekem yu blaen? Taem yumi lukluk long eklips long saed blong spirit tru long ol glas blong Spirit, i mekem yu save luk long saed blong gospel, nao i protektem yu blong yu no blaen long spirit.
Bae yumi tekem sam eksampol. Wetem ol toktok blong ol profet insaed long hat blong yumi mo Tabu Spirit olsem kaonsela, yumi save lukluk long laet long heven we oli blokem haf tru long ol “glas blong gospel,” mo stap longwe blong no kasem kil blong eklips long saed blong spirit.
So ?olsem wanem nao bae yumi putum glas blong yumi? Hemia sam eksampol: ol gospel glas blong yumi oli talemaot long yumi se Lod i wantem blong yumi kakae sakramen evri wik, mo Hem i wantem blong yumi stadi long ol skripja mo prea evri dei. Oli talem long yumi se Setan bae i temtem yumi blong no mekem ol samting ia. Yumi save se plan blong Setan i blong karemaot fridom blong joes blong yumi tru long ol nara samting blong pulum tingting mo tru long ol temtesen blong wol. Iven long taem blong Job, maet sam i gat ol eklips long saed blong spirit, olsem oli tokbaot: “Long medel dei, tudak i kavremap olgeta mo oli stap lukaot ol samting olsem we i medel naet.”7
Ol brata mo sista, taem mi tokbaot blong luk samting tru long ol glas blong gospel, plis, yufala i mas save se mi no minim se bae yumi no luksave o tokbaot ol jalenj we yumi stap fesem, o blong yumi wokbaot i go mo no save long ol trap mo rabis samting we enemi i putum long fored blong yumi. Mi no stap tokbaot blong kavremap ae blong yumi—be oposit. Be, mi stap talem se yumi lukluk long ol jalenj tru ol glas blong gospel. Elda Dallin H. Oaks i luk se, “wan longfala lukluk i blong save luk evri infomesen we i stret long wan rilesensip we i gat mining,”8 Wan gospel lukluk i mekem yumi luk longwe i go kasem taem we i no save finis.
Taem yu putum gospel glas blong yu, bae yu faenem se yu save luk gud, mo yu gat visen long wei we yu tingting long ol fas samting blong laef, ol problem blong yu, ol temtesen blong yu, mo tu, ol mistek blong yu. Bae yu luk laet ia we i saen moa we bae yu no save luk sapos yu no werem glas ia.
I fani we, i no ol nogud samting nomo we i save mekem ol eklips long saed blong spirit insaed long laef blong yumi. Plante taem, ol gudfala mo bigfala wok, we yumi save spendem taem blong yumi long olgeta, oli save kam kolosap tumas mekem se oli blokem laet blong gospel mo tekem tudak i kam. Ol denja o samting we i pulum tingting, i gat skul mo mane, paoa mo fos, blong wantem moa samting, iven ol talen mo ol presen.
Presiden Dieter F. Uchtdorf i bin tijim se “eni klin fasin, taem yu tekem i go tumas, i save kam wan rabis fasin. I kasem wan poen se wan gud step i kam wan nogud step, mo ol gud samting blong kasem oli kam ol samting we oli fasem nek blong yumi.”9
Bae mi serem moa ditel blong ol eksampol we i save kam strong tul blong stap longwe long eklips blong yumiwan long saed blong spirit.
Sosol Media
Sam manis i pas, mi toktok long BYY Konfrens blong Ol Woman.10 Mi tokbaot olsem wanem teknoloji, we i tekem sosol media, i save help blong man i “save abaot wan Sevya, hemia tru long evri nesen, famli, lanwis mo pipol.”11 Ol teknoloji ia olsem ol websaet blong Jos, LDS.org, mo Mormon.org; ol mobael ap olsem Gospel Library, Mormon Channel, LDS Tools, and Family Tree; mo sosol media olsem Facebook, Instagram, Twitter, mo Pinterest. Olgeta samting ia oli pulum plante milian blong Laekem, serem, lukluk, twit bakegen, mo pin mo oli kam wan strong tul blong save serem gospel.
Aot long evri gud samting mo stret fasin blong yusum ol teknoloji ia, i gat ol denja we oli kam wetem, we taem yumi tekem i kam kolosap tumas long yumi, i save mekem wan eklips long saed blong spirit mo i blokem laet mo wom filing blong gospel.
Fasin blong yusum sosol media, mobael ap, mo ol gem, i save kakae taem mo i save mekem yu nomo toktok stret long fes blong ol man. Taem yu nomo save storian olsem, i save spolem ol mared, mo i tekem ples blong plante gudfala praktis long saed blong spirit, i spolem ol sosol skil, speseli blong ol yut.
Tu narafala denja we i go wetem sosol media i laef we i no ril, mo fasin blong komperem man.
Plante, (o kolosap evriwan) long ol pikja we oli putum long sosol media i stap soem wan laef we i gud tumas—we i no ril nating. Yumi evriwan i bin luk ol naes pikja blong ol naes haos, ol naes ples blong holidei, ol selfi blong man i smael, ol fulap gudfala kaekae, mo pikja blong bodi blong man o woman we i no posibol blong gat.
Hemia, eksampol, wan pikja we yu save luk long akaon blong wan narawan long sosol media. Be, i no soem ful pikja blong wanem i stap long ril laef.
Taem yumi komperem laef blong yumi wetem pikja blong laef blong ol narawan we oli jenisim finis, ol laef we oli stret evriwan we oli presentem long sosol media, samtaem oli mekem yumi givap, yumi kavet, mo tu, yumi nomo mekem wok.
Wan, we hemwan i bin serem plante samting blong hemwan, maet i tok fani, be i talem: “?Wanem poen blong stap hapi sapos bae yu no serem?”12
Olsem Sista Bonnie L. Oscarson i talem bakegen long yumi long moning ia, sakses long laef i no folem hamas Like yumi kasem, o hamas sosol media fren yu gat o hamas i folem yu. Be hem i go wetem fasin blong joen, wetem mining, wetem ol narawan, mo blong ademap laet long laef blong olgeta.
Mi hop se yumi save lanem blong yumi kam moa ril, yumi faenem moa fani samting, mo no stap fesem fasin blong givap taem yumi luk ol pikja we oli save soem sam samting we i stret evriwan, mo plante taem i lidim yumi blong komperem yumi tumas long ol samting ia.
Fasin blong komperem man i no wan saen blong taem tedei nomo. Aposol Pol i wonem ol pipol long taem blong hem se, oli stap jajem olgeta wetem mak we olgeta nomo oli putum mo oli stap komperem olgeta long olgeta bakegen, mo hemia i no waes.13
Wetem plante wei mo insperesen blong yusum teknoloji long stret fasin, ?bae i no moa gud blong yusum blong tij, givim insperesen mo leftemap tingting blong yumi blong helpem ol narawan blong oli kam gud moa—be i no blong soem wan pikja blong yumi we i no ril? Yumi mas tij mo soem stret mo gud wei blong yusum teknoloji i go long jeneresen we i stap kam antap mo givim woning agensem ol denja we i kam wetem, mo i save prapa spolem yumi tu. Taem yumi luk long sosol media tru long glas blong gospel, yumi save stopem blong i kam wan eklips long saed blong spirit long laef blong yumi.
Hae Tingting
Naoia, bae yumi tokbaot ston ia we i stap blokem yumi longtaem finis i kam, hae tingting. Hae tingting i oposit long tingting we i stap daon, we i “blong glad blong folem tingting blong Lod.”14 Taem yumi gat hae tingting, yumi tekem ona long yumiwan be yumi no givim long ol narawan, mo Lod tu. Hae tingting i stap kompit; hem i wan fasin blong lukaot blong gat moa, mo ting se yumi gud moa bitim ol narawan. Hae tingting, plante taem i risal blong ol filing blong stap kros mo no laekem man. I mekem wan i holemtaet rabis tingting o i no save fogiv. Be hae tingting, i go lus insaed long fasin olsem hemia blong Kraes we i blong putum tingting i stap daon.
Ol rilesensip, iven wetem ol stret famli mo olgeta we yumi lavem, speseli wetem ol stret famli—bitwin ol hasban mo waef—oli save gro wetem tingting i stap daon, mo hae tingting i save blokem.
Plante yia i pas, wan bigbos blong wan bigfala stoa i ringim mi blong tokbaot kampani blong hem, we wan we i stap kompit wetem hem bae i pemaot. Hem, mo ol nara wokman blong ofis oli wari tumas se bae oli lusum wok blong olgeta. Hem i save se mi mi save gud long manejmen blong pem wan kampani, hem i askem sapos mi save presentem hem mo givim wan strong refrens long bihaf blong hem, mo tu, blong setemap wan miting blong hem. Long en, hem i talem: “?Yu save wanem oli talem? ‘!Olgeta we oli no stap flas, bae oli go lus!’”
Mi andastanem se toktok blong hem i olsem wan fani toktok. Mi kasem. Be i bin gat wan moa impoten prinsipol we mi bin filim se hem i save yusum. Mi ansa: “No. hemia i no wanem oli stap talem. Hem i oposit long hemia. ‘Olgeta we oli no stap flas oli kasem wol ia,’15 hemia nao oli stap talem.”
Long eksperiens blong mi insaed long Jos, mo tu long taem we mi bin stap wok, sam long ol pipol we oli moa gud mo oli wok gud moa, we mi bin save olgeta, oli olgeta we oli no stap flas mo oli gat tingting we i stap daon.
Fasin blong gat tingting i stap daon mo fasin blong no stap flas i fit tugeta olsem han i fit insaed long hanglav. Bae yumi tingbaot se, “i no gat wan we God i save akseptem, be hem nomo we i no stap flas mo hat blong hem i stap daon.”16
Mi prea se bae yumi traehad blong stap longwe long eklips long saed blong spirit we i hae tingting, mo bae yumi akseptem klin fasin ia blong putum tingting i stap daon.
Las Toktok
Blong endem toktok, wan eklips blong san, i wan bigfala samting we i kamaot, we long tetaem ia, naes samting, hot mo laet blong san, i go lus evriwan, we wan smol samting nating i kavremap, i mekem se i gat tudak mo kolkol.
Sem samting i save hapen long saed blong spirit, taem ol smol samting we oli no impoten, yumi letem olgeta oli kam kolosap tumas mo oli blokem naes, hot mo laet blong heven blong gospel blong Jisas Kraes, i riplesem wetem wan tudak we i kolkol.
Ol sanglas we oli mekem blong protektem ae blong olgeta we oli stap long ples blong eklips blong san, oli save blokem blong kasem laef taem kil, o iven blong oli kam blaen.17 Ol gospel glas, we oli wan save, mo wan testemoni, abaot ol prinsipol mo ol odinens blong gospel, oli givim wan gospel lukluk we i save givim moa proteksen long saed blong spirit, mo i save soem samting klia long wan we i stap long fored blong denja blong wan eklips long saed blong spirit.
Sapos yu faenem se i gat eni samting we yu luk se i stap blokem glad mo laet blong gospel long laef blong yu, mi invaetem yu blong lukluk long hemia tru lukluk blong gospel, mo no letem ol smol samting we oli no impoten long laef blong oli blokem lukluk blong yu long bigfala plan ia blong stap glad, long taem we i no save finis. Long sot toktok, no letem ol nara samting blong pulum tingting oli kam olsem eklips mo blokem laet blong heven.
Testemoni
Mi testifae se i nomata wanem i kam blokem ae blong yumi long laet blong gospel, laet ia i stap nomo i stap. Stamba blong gud filing, trutok mo laet i gospel blong Jisas Kraes. Mi testifae abaot wan Papa long Heven we i gat lav, mo abaot Pikinini blong Hem, Jisas Kraes; mo abaot rol blong Pikinini ia olsem Sevya mo Ridima blong yumi. Long nem blong Jisas Kraes, amen.