Voes blong Lod
Mi testifae se, long konfrens ia, yumi bin harem voes blong Lod. Tes blong wanwan long yumi, hem i olsem wanem yumi mekem folem voes ia.
Faswan, wan naes toktok i go long ol smol pikinini. Yes, hemia i las sesen, mo mi mi las spika.
I no longtaem i pas, taem mi stap visitim Provo Siti Senta Tempol, mi stap laekem lukluk wan peinting we taetol i, “Lukluk I Go long Fas Visen.” Peinting ia i stap soem laet mo paoa we i kam long heven, taem Papa mo Pikinini i visitim yang Josef Smit.
Mi no komperem hemia wetem stret tabu taem ia we i hapen long Restoresen, mi save pikjarem wan semmak visen olsem we i bae i soemaot laet mo spirit paoa blong God we i stam kamdaon long yumi long Jeneral Konfrens ia, mo, afta, paoa mo laet ia i muv i krosem ful wol.
Mi witnes long yufala se Jisas i Kraes, se Hem i stap lidim evri pat blong tabu wok ia, mo se Jeneral Konfrens i wan long ol bigfala impoten taem we Hem i givim daereksen long Jos blong Hem mo long yumi wanwan.
Tijing we I Kam long Heven
Long dei we Jos i oganaes, Lod i jusum Josef Smit olsem wan profet, sia mo aposol blong Lod Jisas Kraes,1 mo i talem long Jos:
“From toktok blong hem, bambae yufala i kasem, semmak olsem se hem i kamaot long maot blong miwan, wetem fasin blong save wet longtaem mo wetem fet.”
“From we, taem bae yufala i mekem olgeta samting ia, ol get blong hel bae oli no save win agensem yufala; mo Lod God bae i ronemaot ol paoa blong tudak long fored blong yufala, mo bae i mekem ol heven oli seksek blong gud blong yufala.”2
Afta long hemia, Fas Presidensi mo Kworom blong Olgeta Twelef Aposol, oli bin sastenem olgeta, oli odenem olgeta tu oli kam ol profet, sia mo reveleta.3
Nao, taem yumi mit anda long daereksen blong Presiden Tomas S. Monson, yumi wet blong stap harem “tingting blong Lod, maen blong Lod, voes blong Lod, mo paoa blong God blong sevem ol man.”4 Yumi trastem promes blong Lod: “Sapos hem i tru long voes blong mi, o tru long voes blong ol wokman blong mi, i semmak nomo.”5
Long medel blong ol noes mo ol tu tingting blong wol tedei, tras mo bilif blong yumi long ol toktok blong Fas Presidensi mo Kworom blong Olgeta Twelef Aposol, oli impoten tumas blong yumi save gro mo stap strong.6
Yumi kam tugeta long naesfala konfrens ia. Ol milian Lata-dei Sent mo ol narawan long jos long moa long 200 kantri, we oli stap toktok moa long 93 lanwis, oli kam long ol sesen ia o oli stap ridim ol mesej blong konfrens.
Yumi kam we yumi bin prea mo yumi rere. Long plante long yumi, i gat ol bigfala wari, o ol ansa we yumi wantem tumas. Yumi wantem blong riniu bilif blong yumi long Sevya, Jisas Kraes, mo yumi wanem mekem i strong moa, paoa ia blong stanap agensem temtesen mo stap longwe long ol samting we oli putum tingting. Yumi kam blong heven i tijim yumi.
Maen blong Lod mo Wanem Hem I Wantem
Long Fas Presidensi mo Olgeta Twelef, we oli stap toktok long evri konfrens, bigfala responsabiliti blong rere long ol mesej blong olgeta i wan hevi wok we i hapen oltaem, mo i wan tabu wok.
Sam yia i pas, bifo mi stap olsem wan Jeneral Atoriti, mi bin askem Elda Dallin H. Oaks sapos hem i stap rere long wan defren toktok blong wanwan stek konfrens. Hem i talem se, no, be hem i ademap, “Be ol toktok blong mi blong Jeneral Konfrens oli defren. Mi save raetem 12 kasem 15 raf pepa blong mekemsua se mi talem wanem Lod i wantem mi talem.”7
?Wetaem mo olsem wanem nao insperesen blong toktok blong Jeneral Konfrens i kam?
Taem oli no givim topik, yumi luk heven i putum gud tugeta ol topik mo ol stamba toktok blong trutok we i no save finis long wanwan mo evri konfrens.
Wan long ol Brata blong mi, i talem long mi se topik blong konfrens ia, hem i kasem stret afta long toktok blong hem long las Epril. Wan narawan i talem se tri wik i pas, hem i stap prea yet mo i stap wet yet long Lod. Wan moa, taem mi askem hem se i tekem hamas taem blong raetem wan toktok we topik i no isi, i ansa: “Twantefaef yia.”
Samtaem, stamba tingting i kam kwiktaem, be wanem blong talem mo ol ditel, oli nidim blong mas klaem long saed blong spirit. Blong livim kakae mo prea, stadi mo gat fet, oli oltaem pat blong wok ia. Lod i no wantem man i priten mo stap daonem voes blong Hem long ol Sent.
Daereksen blong wan toktok blong jeneral konfrens, plante taem, i kam long naet, o eli long moning, taem toktok ia i stap longwe long ol tingting blong maen. Kwiktaem, ol tingting we wan i no ting long hem, mo samtaem, ol stret toktok mo sentens oli kamkamaot olsem revelesen we i tabu evriwan.8
Taem yu lisin, ol mesej we yu kasem bae oli stret nomo, olsem se oli toktok long yu nomo.
Taem mi bin toktok plante yia i pas long wan jeneral konfrens, mi bin talem wan toktok we i bin kam insaed long maen blong mi taem mi bin stap tingting blong go long wan misin o no. Toktok ia, hem i: “!Yu no save evri samting, be yu save inaf!”9 Wan yang woman we i bin sidaon long jeneral konfrens long dei ia, i bin talem long mi se hem i bin stap prea from wan i askem mared long hem, mo i stap askem hemwan sapos hem i save gud man ia o no. Taem mi bin talem ol toktok ia: Yu no save evri samting, be yu save inaf, Spirit i konfemem hemia long hem se hem i bin save man ia inaf. Tufala i mared mo stap hapi plante yia.
Mi promesem yufala se taem yufala i stap mekem spirit blong yufala i rere, mo kam wetem tingting se bae yu harem voes blong Lod, ol tingting mo ol filing bae oli kam long maen blong yu, we oli stret long yu. Yu bin filim hemia long konfrens ia, o bambae yu filim taem yu stadi long ol mesej long ol wik we oli stap kam.
Blong Naoia mo Ol Manis we Oli Stap Kam
President Monson i talem:
“Tekem taem blong ridim ol mesej blong konfrens.”10
“Tingting hevi long olgeta. Mi faenem se mi kasem moa aot long ol tabu toktok ia taem mi stap stadi long olgeta i go moa.”11
Ol tijing blong Jeneral Konfrens oli ol samting we Lod i wantem se yumi lukluk long olgeta naoia mo long ol manis we oli stap kam.
Man we i Stap Lukaot long Sipsip “i go fastaem ol sipsip blong hem, mo ol sipsip oli folem hem from we oli save voes blong hem.”12
Plante taem, voes blong Hem i talem long yumi blong jenisim wan samting insaed long laef blong yumi. Hem i stap invaetem yumi blong sakem sin. Hem i stap invaetem yumi blong stap folem Hem.
Tingbaot ol toktok ia we oli bin kamaot long konfrens ia:
Presiden Henry B. Eyring, long moning: “ Mi talem witnes blong mi se God Papa i stap laef, mo Hem i wantem yu blong kambak hom long Hem. Hemia i tru Jos blong Lod Jisas Kraes. Hem i save yu, Hem i lavem yu, mo Hem i lukaotgud long yu.”13
Presiden Dieter F. Uchtdof, yestedei: “Mi testifae se taem yumi kambak, o gohed long gudfala wokbaot ia we i lidim yumi i go long God, bae laef blong yumi i kam gud moa, mo Lod bambae i yusum yumi long ol bigfala wei blong blesem olgeta raon long yumi mo mekem ol stamba tingting blong Hem we oli no save finis oli kamtru.”14
Presiden Russell M. Nelson, yestedei aftenun: “Mi promes se, taem we yu draonem yuwan evri dei long Buk blong Momon, bae yu save protektem yu agensem ol rabis samting blong tedei, iven rabis sik blong ponografi, mo ol nara adiksen we i mekem maen i ded.”15
Elda Dallin H. Oaks, yestedei: “Mi testifae se ofisol famli toktok i wan toktok we i talem wan trutok we i no save finis, i tingting we Lod i gat blong ol pikinini blong Hem we oli stap lukaotem laef we i no save finis.”16
Elda M. Russell Ballard, sam minit i pas: “Yumi nidim blong akseptem ol pikinini blong God wetem lav mo sore, mo sakemaot eni rabis fasin, olsem fasin blong luk kala blong skin, se yu man o woman, mo sitisensip.”17
From se yumi gat wan moa minit, mi wantem tokbaot smol Elda Robert D. Hales. Fas Presidensi i bin talem long Elda Hels blong givim wan toktok long Sande moning sesen sapos helt blong hem i gud. From helt blong hem i no letem hem blong mekem, hem i bin rere long wan mesej, we hem i bin finisim las wik mo serem wetem mi. Naoia we hem i ded 3 aoa i pas finis, mo bae mi serem tri laen nomo blong toktok ia blong hem.
Mi kwotem Elda Hales: “Taem we yumi jusum blong gat fet, yumi stap rere blong stanap ples we God i stap long hem. Afta we oli hangem Sevya long kros, Hem i kamaot long olgeta ia nomo we oli ‘bin fetful long testemoni long saed blong Jisas taem we oli bin stap laef yet long wol ia.’ [D&C 138:12.] Mo ‘olgeta we oli stap agens, we oli bin sakemaot ol testemoni … blong ol profet blong bifo, oli no [save] luk [Sevya] i stap, mo [oli no bin] save luk fes blong [Sevya].’ [D&C 138:21.] … Fet blong yumi i mekem yumi stap rere blong stap long ples we God i stap long hem.”
Lod hem i kaen tumas blong talem long Presiden Russell M. Nelson blong lego kwik fes sesen blong konfrens, long en, mo no kakae lanj blong hem, mo muv kwik i go long saed blong bed blong Elda Hales, blong hem i save kasem longwe mo stap, olsem kworom presiden blong hem, wetem enjel Mary Hales long saed, taem Elda Hales i graduet long wol ia.
Mekem Folem Voes blong Lod
Mi testifae se, long konfrens ia, yumi bin harem voes blong Lod.
Yumi no mas fraet taem ol toktok blong ol wokman blong Lod oli agensem ol tingting blong wol, mo, samtaem, tingting blong yumi bakegen. I bin olsem oltaem. Mi stap oltaem long ni blong mi insaed long tempol wetem ol Brata blong mi, mo mi save talem se oli gat wan gudfala sol. Wanem oli wantem moa, i blong mekem Lod i glad, mo blong helpem ol pikinini blong God blong oli gobak stap wetem Hem.
Olgeta Seventi; Bisoprik; ol Jeneral Presidensi blong Rilif Sosaeti, Yang Woman, mo Praemeri; mo ol nara okseleri lida, oli ademap plante insperesen long konfrens ia, semmak olsem naes miusik mo ol gudfala prea wetem ol gudfala tingting.
I gat wan bokis we i fulap long ol daereksen blong heven we i stap wet blong yu faenem hem insaed long ol mesej blong Jeneral Konfrens. Tes blong wanwan long yumi naoia i hao nao yumi mekem folem wanem we yumi bin harem mo wanem nao yumi bin filim.
Bae mi serem wan eksperiens long saed blong folem ol toktok blong profet, we i kamaot long laef blong Presiden Russell M. Nelson:
Long 1979, faef yia bifo oli singaotem hem i kam wan Jeneral Atoriti, Brata Nelson i kam long wan miting, jes bifo long Jeneral Konfrens. Presiden Spencer W. Kimball i bin jalenjem evriwan we i bin stap blong oli mekem moa wok blong tekem gospel i go long ful wol. Long medel blong ol kantri we Presiden Kimbol i tokbaot, i gat Jaena, mo i talem: ‘Yumi mas stap givim seves long ol Jaenis. Yumi mas lanem lanwis blong olgeta. Yumi mas prea from olgeta mo helpem olgeta.’”18
Taem hem i gat 54 yia, Brata Nelson i filim, long miting ia, se hem i mas stadi long Mandarin lanwis. Nomata hem i wan bisi dokta blong hat, kwiktaem, hem i pem seves blong wan tija.
I no longtaem afta we hem i stat blong stadi, Dokta Nelson i go long wan miting, mo i hapen se hem i sidaon long saed blong wan “dokta we oli save gud hem long Jaena, Dokta Wu Yingkai. From se Brata Nelson i bin stadi long Mandarin, hem i stat blong storian wetem Dokta Wu.”19
Hat blong Dokta Nelson blong folem profet i mekem se Dokta Wu i kam visitim Sol Lek Siti, mo Dokta Nelson i travel i go long Jaena blong givim ol toktok mo blong operetem man.
Lav blong hem long ol Jaenis pipol, mo lav mo respek blong olgeta long Hem i gro.
Long Febwari 1985, ten manis afta we oli singaotem hem long Kworom blong Olgeta Twelef, Elda Nelson i kasem wan sapraes kol i kam long Jaena, oli plis long Dokta Nelson blong go long Beijing blong katem hat blong top opera singga blong Jaena. Wetem sapot blong Presiden Gordon B. Hinckley, Elda Nelson i gobak long Jaena. Las operesen we hem i bin mekem, hem i long Ripablik blong Ol Pipol blong Jaena.
Jes tu yia i pas, long Oktoba 2015, Presiden Russell M. Nelson i kasem ona bakegen taem oli givim wan ofisol awod we oli putum hem i kam “Olfala Fren blong Jaena.”
Mo yestedei, yumi harem olfala Presiden Russell M. Nelson we i gat 93 yia i tokbaot singaot blong Presiden Thomas S. Monson “long wanwan long yumi long las konfrens long Epril, blong prea mo stadi mo tingting hevi long Buk blong Momon evri dei.”
Semmak olsem we hem i bin mekem taem hem i wan bisi dokta blong hat, taem hem i pem wan tija blong tijim Mandarin, Presiden Nelson i mekem folem kaonsel blong Presiden Monson, mo i yusum long laef blong hem. I no rid nomo, hem i talem se “hem i mekem ol lis blong, wanem ia Buk blong Momon, wanem i konfemem, wanem i sakemaot, wanem i mekem i hapen, wanem i mekem i kam klia, mo wanem nao hem i talemaot.”20
Mo i gud tumas blong luk se, olsem wan nambatu witnes, Presiden Henry B. Eyring, i toktok tu long moning ia, long wei we hem i mekem folem wanem Presiden Monson i askem. ?Yufala i tingbaot ol toktok blong hem? “Olsem plante long yufala, mi bin harem ol toktok blong profet olsem voes blong Lod we i kam long mi. Mo tu, olsem plante long yufala, mi bin disaed blong obei ol toktok ia.”21
Bae yumi luk hemia olsem ol eksampol blong laef blong yumiwan.
Wan Promes mo Wan Blesing
Mi promes se, taem yu stap harem voes blong Lod we i tok long yu long ol tijing blong Jeneral Konfrens ia, mo afta, taem yu mekem folem ol toktok ia, bambae yu filim han blong heven i stap long yu, mo laef blong yu, mo laef blong olgeta raon long yu bae oli gat blesing.22
Long taem blong konfrens ia, yumi tingting long dia profet blong yumi. Mifala i lavem yu, Presiden Monson. Mi endem wetem ol toktok we hem i bin talem antap long pulpit ia we mi bilif se hem i wan blesing we hem i wantem tumas blong givim long wanwan long yumi, sapos hem i stap ia wetem yumi tedei. Hem i talem: “Taem yumi aot long konfrens ia, mi askem wan blesing blong stap wetem yufala. Bae ol mesej mo spirit blong konfrens ia bae oli kam laef long evri samting we yufala i stap mekem—insaed long hom blong yufala, long wok blong yufala, long ol miting blong yufala mo long evri samting we yufala i kasem mo givim.”
Hem i endem: “Mi lavem yufala. Mi stap prea from yufala. Bae God i blesem yufala. Bae pis we Hem i promesem i stap wetem yufala naoia mo oltaem.”23
Long nem blong Jisas Kraes, amen.