Ol Man blong Holem Laet blong Heven

Samtaem, sik long saed blong spirit i kam from yumi mekem sin, o from ol soa long filing we yumi stap safa from. Samtaem, nogud helt long saed blong spirit i kam sloslo mo yumi no save talem wanem i stap hapen. Semmak olsem ol bed blong ston, so mo krae long saed blong spirit i save bildap wetem taem, oli hevi long spirit blong yumi kasem taem yumi nomo save tekem. Eksampol, hemia i save hapen taem ol responsabiliti blong yumi long wok, hom, mo jos oli kam bigwan tumas, mekem se yumi nomo luk glad blong gospel. Yumi save filim tu se yumi nomo gat samting blong givim, o yumi filim se blong laef folem ol komanmen blong God i bitim paoa blong yumi.

Be, i no from se ol tes long saed blong spirit oli ril we i minim se i no gat meresin from.

Yumi save kam oraet long saed blong spirit.

Iven ol dip so long saed blong spirit—yes, iven olgeta we yumi luk se oli no save kam oraet—bae oli kam oraet.

Ol dia fren blong mi, hiling paoa blong Jisas Kraes i stap nomo long taem blong tedei.

Hiling blong Sevya i save jenisim laef blong yumi long taem blong yumi semmak olsem we long taem blong Hem. Sapos bae yumi gat fet, Hem i save tekem han blong yumi, fulumap sol blong yumi wetem laet mo hiling blong heven, mo talem long yumi ol tabu toktok ia: “Girap, tekem bed blong yu mo wokbaot.”¹

Wanem i mekem se yumi sik long saed blong spirit, evriwan i gat wan samting we i semmak: i no gat tabu laet.

Tudak i daonem paoa blong yumi blong luk samting i klia. I daonem visen blong yumi long wanem we, long wan taem, i bin simpol mo klia. Taem yumi stap long tudak, bae yumi mekem ol joes we oli no stret tumas, from se yumi no save luk ol denja long rod blong yumi. Taem yumi stap long tudak, bambae yumi lusum hop, from se yumi no save luk pis mo glad we i stap wet long yumi sapos nomo yumi gohed strong.

Long nara han, laet i letem yumi blong luk ol samting olsem we oli stap. I letem yumi blong luksave wanem i tru, mo wanem i rong, wanem i impoten tumas, mo hemia we i nating nomo. Taem yumi stap long laet, yumi save mekem ol stret mo gud joes folem ol tru prinsipol. Taem yumi stap long laet, yumi gat “wan hop we i stret evriwan,”² from se yumi save luk ol tes blong laef wetem wan lukluk i go long taem we i no save finis.

Bambae yumi faenem hiling long saed blong spirit taem yumi kamaot long ol sado blong wol ia, mo yumi go long Laet blong Kraes we i no gat en.

Moa yumi andastanem mo yusum doktrin blong laet, moa bae yumi save protektem yumi agensem sik long saed blong spirit we i stap spolem mo trabolem yumi long evri saed mo han; mo tu, bae yumi wok gud moa olsem ol man we yumi muvmuv, gat strong paoa long tingting, kea, mo gat tingting i stap daon, olsem ol man we i tekem tabu prishud—ol tru wokman mo disaepol blong King ia we yumi lavem mo i no save finis.

Jisas Kraes i talem: “Mi nao, mi olsem laet blong ol man long wol. Man we i biaen long mi, bambae hem i no save wokbaot long tudak. Hem bambae i gat laet blong laef.”³

?Hemia i minim wanem?

Simpol nomo: Hem we i putum tingting blong hem i stap daon mo i stap folem Jisas Kraes, bae i gat eksperiens mo bae i serem laet ia blong Jisas. Mo laet ia bae i gro kasem taem we i ronemaot ol dip tudak.

I minim se i gat wan paoa, wan strong fos, we i kamaot long Sevya. Hem i aot long “ples we God i stap long hem i go fulumap bigbigfala spes we i stap.”⁴ From se paoa ia i givim moa laet, i leftemap man, i saenem laef blong yumi; skripja i singaotem hemia laet, be tu, i singaotem spirit mo trutok.

Long Doktrin mo Ol Kavenan, yumi ridim: “Toktok blong Lod i trutok, mo wanem we i trutok hem i laet, mo wanem we hem i laet i Spirit, we i Spirit blong Jisas Kraes.”⁵

Bigfala tingting ia i stap—laet ia i spirit, we i trutok, mo laet ia i blong saenem evri sol we i kam long wol—hemia i impoten mo semtaem i gat hop long hem. Laet blong Kraes i givim moa laet mo i fulumap sol blong evriwan we i stap mekem folem voes blong Spirit.⁶

Laet blong Kraes i fulumap yunives.

I fulumap wol.

Mo i save fulumap evri hat.

“God i mekem i semmak long evri man.”⁷ Laet blong Hem i stap blong evriwan—bigman, smolman, rijman o puaman, olgeta wetem samting o olgeta we oli no gat samting.

Sapos yu openem maen mo hat blong yu blong kasem Laet blong Kraes, mo wetem tingting we i stap daon, mo folem Sevya, bambae yu kasem moa laet. Laen folem laen, smol long ples ia, smol longwe, bambae yu pulum moa laet mo trutok insaed long sol blong yu, kasem taem we tudak i nomo gat ples long laef blong yu.⁸

God bambae i openem ae blong yu.

God bambae i givim wan niu hat long yu.

Lav, laet mo trutok blong God bambae oli mekem se ol samting we oli stap slip oli kam laef, mo bambae yu bon bakegen long wan niufala laef wetem Kraes Jisas.⁹

Lod i promesem: “Sapos ae blong yufala i lukluk long glori blong mi nomo, ful bodi blong yufala bambae i fulap long laet, mo bambae i no gat tudak insaed long yufala; mo bodi ia we i fulap wetem laet i andastanem evri samting.”¹⁰

Hemia i meresin blong sik long saed blong spirit. Tudak i lus long fored blong laet.

Be, God bae i no fosem yumi blong akseptem laet blong Hem.

Sapos yumi kam blong harem gud wetem tudak, i luk olsem se hat blong yumi bae i no jenis.

Blong jenis i tekem ples, yumi nidim blong wok blong letem laet i kam insaed.

Long taem we mi flae olsem wan plen kapten i go raon long planet ia, wol, mi bin laekem tumas blong luk kriesen blong God we i naes mo i stret evriwan. Mi bin faenem spesel tumas, rilesensip ia bitwin wol mo san. Mi ting se i wan bigfala lesen long hao tudak mo laet, tufala i stap.

Olsem yumi evriwan i save, long evri 24 aoa, naet i kam dei, mo dei i kam naet.

So, ?naet ia i wanem?

Hem i wan sado nomo.

Iven long ol naet we i tudak evriwan, san i no stop blong saenem laet blong hem. Hem i gohed blong saen we i saen. Be haf blong wol, i stap long tudak.

From se i no gat laet, i mekem se i gat tudak.

Taem tudak blong naet i foldaon, yumi no lusum hop mo wari se san i lus. Yumi no talem se san i no stap o i ded. yumi andastanem se yumi stap long wan sado, se wol bae i gohed blong tanem hemwan, mo long en, laet blong san bae i kasem yumi wan moa taem.

Tudak i no soem se i no gat laet. Plante taem, i minim nomo se yumi no stap long raet ples blong kasem laet. Long taem blong eklips blong san, plante oli traehad se oli stap long smol sado ia we mun i krietem long medel blong bigfala delaet we san i saen gud.

Long wan semmak wei, laet long saed blong spirit i gohed blong saen long evri kriesen blong God. Setan bae i traem bes blong hem blong krietem wan sado, o putum yumi long sado we yumiwan i mekem. Bae hem i fosem yumi blong krietem sado blong yumi; bambae hem i pusum yumi long tudak blong hol blong ston blong hem.

Tudak long saed blong spirit i save pulum wan vel blong yumi fogetem samting, iven olgeta we oli bin wokbaot long laet mo stap glad wetem Lod. Be, iven long ol taem blong bigfala tudak, God i harem prea blong yumi, “Lod mi biliv, be bilif blong mi i smol. Plis givhan long mi.”¹¹

Long taem blong Alma, i bin gat plante we oli traehad blong akseptem ol samting long saed blong spirit, mo “from se oli no biliv,” laet mo trutok blong God i no save go insaed long sol blong olgeta, “mo hat blong olgeta i kam strong.”¹²

Ol brata. I stap long yumi nao blong stap long raet ples blong luk tabu laet mo trutok blong gospel blong Jisas Kraes. Iven taem naet i foldaon mo i luk olsem se wol i tudak, yumi jusum blong wokbaot long laet blong Kraes, blong obei ol komanmen, mo gat strong paoa long tingting blong testifae se Hem i tru mo Hem i hae.

Olsem wan man we i tekem prishud blong God, mo olsem wan disaepol blong Jisas Kraes, yu yu holem laet ia. Gohed blong mekem olgeta samting we bae i fidim tabu laet ia. “Holem laet ia antap”¹³ mo “letem i saen long fored blong man”– i no blong oli lukluk long yu, be “blong oli luk ol gudfala wok blong yu, mo oli givim glori long Papa blong yu we i stap long heven.”¹⁴

Ol dia brata blong mi. Yufala i ol tul long han blong Lod wetem stamba tingting ia blong tekem laet mo hiling long sol blong ol pikinini blong Papa long Heven. Maet yu no nid blong filim se yu kwalifae blong hilim olgeta we oli sik long saed blong spirit—i semmak long wokman blong postofis we i no kwalifae blong lukluk long sik blong bun blong joen. Hem i givim yufala atoriti mo responsabiliti blong go luk olgeta long nid. Hem i kavremap yufala wetem tabu prishud paoa blong Hem blong tekem laet i go long tudak mo blong leftemap mo blesem ol pikinini blong God. God i putumbak Jos blong Hem mo gudfala gospel blong Hem we i “mekem sol we i gat soa i kam oraet bakegen.”¹⁵ Hem i rere long wan rod blong kam oraet long saed blong spirit; blong faenem hiling blong fasin blong fas long wan ples mo no progres, mo wokbaot long wan rod wetem helt we i laef mo fulap long spirit.

Evri taem yu tanem hat blong yu long prea long God, yu gotru laet blong Hem. Evri taem yu luklukgud long toktok mo tingting blong Hem long ol skripja, laet i gro, i saen moa. Evri taem yu luk wan long nid mo sakrifaesem gud laef blong yu blong givim lav, laet ia i saen moa mo i kam bigwan. Evri taem yu sakemaot temtesen mo jusum klin fasin, evri taem yu lukaotem o fogivim man, evri taem yu gat strong paoa long tingting blong testifae abaot trutok, laet ia i ronemaot tudak mo i pulum ol nara man we oli stap lukaotem laet.

Tingbaot eksperiens blong yuwan, ol taem blong seves long God mo ol narawan taem we tabu laet ia i bin saen long laef blong yu, insaed long tabu tempol, long sakramen tebol, mo long wan kwaet taem blong tingting hevi wetem prea, long kam tugeta blong ol famli, o long wan prishud seves. Serem ol taem ia wetem ol famli mo fren, mo speseli wetem ol yut we oli stap lukaotem laet. Oli nidim blong harem yu talem, se wetem laet ia, hop mo hiling i kam.

Laet blong Kraes i tekem hop, hapines mo hiling blong eni so o sik long saed blong spirit.¹⁶ Olgeta we oli gotru long paoa ia we i smutum man, i kam wan tul long han blong Laet blong Wol mo i givim laet long ol narawan.¹⁷ Bae oli filim wanem we King Lamonae i bin filim: “laet ia i karem glad ia i kam sloslo long sol blong hem, ol klaod blong tudak oli go lus, mo se laet blong laef we i no gat en i laet long sol blong hem.”¹⁸

Ol dia brata. Faet blong yumi i blong lukaotem Lod kasem taem we laet blong Hem blong laef we i no gat en i laet bigwan insaed long yumi mo testemoni blong yumi i kam strong we i strong, iven long medel blong tudak.

Hemia i prea mo blesing blong mi, se bambae yu gat sakses blong kasem fiuja ples blong yu olsem man we i holem prishud blong wan God we I Gat Olgeta Paoa, mo olsem ol man we oli glad blong holem laet blong Heven, we i blong Hem. Long nem blong Jisas Kraes, amen.