?Taem blong Ol Merikel I Stop Finis o No?

Wan yia i pas, oli sendem mi long stet blong Kalifonia; mi go wetem wan stek presiden blong visitim Klak mo Holi Fels mo famli blong tufala long haos blong tufala. Oli talem long mi se oli gat wan merikel we i hapen long olgeta. Taem mifala i kasem haos, Klak i traehad blong stanap mo welkamem mifala from hem i gat wan bigfala strap i holem bak, wan i holem nek mo wan i holem han blong hem.

Jes tu manis bifo, Klak, boe blong hem Tae, mo samples 30 nara yang man mo lida oli mekem wan stek wokbaot aktiviti; oli wokbaot i go long top blong Hil Sasta we i 4,322 mita hae; hem i wan long ol hil we i moa hae long Kalifonia. Long nambatu dei blong longfala wokbaot ia, plante oli kasem top blong hil—hemia oli winim from se oli bin rere from plante manis bifo.

Wan long ol fas pipol we i kasem top blong hil long dei ia i Klak. Afta we hem i spel smol kolosap long en blong hil, hem i stanap mo i stap wokbaot. Taem hem i mekem olsem, hem i kikim wan samting mo i foldaon i gobak biaen, i ova long klif, i foldaon 12 mita i go daon, mo afta i rol rol long aes i go daon, blong wan nara 91 mita bakegen. Laki we laki tumas, Klak i laef be i kasem fulap kil mo i no save muv.

Ol merikel we Klak i gotru long nogud taem ia i jes stat. Sam long ol fas man we oli kasem hem, i hapen se oli wan grup blong ol man blong wokbaot we insaed i gat ol hil gaed mo ol imejensi helt man. Kwiktaem oli tritim Klak mo oli kavremap hem blong i wom i stap. Grup ia, i “hapen” se oli stap testem wan niu komunikesen tul mo oli sendem wan imejensi rikwes blong kasem help long wan eria we i no gat signol blong ol mobaelfon. Wan smol helikopta i kam long Hil Sasta, we i tekem wan aoa. Afta tu helikopta i traem tu taem be i no save lan from strong win, nao paelot i traem nambatri taem. Taem helikopta i kam long defren saed, i “hapen” se ol win oli jenis mo helikopta i lan longtaem inaf blong grup i hariap mo traem pusum Klak, we i harem bodi i soa, i go long smol ples biaen long jea blong paelot.

Taem oli tekem Klak i go long helt senta, ol tes oli soem se bun i brok fulap taem long nek, bak, rib mo fored blong han blong hem; lang i gat hol, mo bodi blong hem i gat fulap kat mo soa. Wan spesel dokta blong bren mo bak, i “hapen” blong wok long dei ia; hem i stap kam long hospital ia sam taem nomo long wan yia. Dokta ia i bin talem afta, se hem i neva luk wan man i karem fulap kil olsem long bun blong bak, mo blad paep blong hat, mo laef i stap. Hem i talem se Klak bae hem i laef, be tu, bae i save kam oraet evriwan bakegen. Dokta ia i talem se hem i no biliv long God, be i talem se kes blong Klak i agensem evri save blong saens long saed blong kil long bren, mo hem i save talem nomo se hem i wan merikel.

Taem Klak mo Holi i finis blong talem bigfala storian blong tufala, mi bin faenem i had blong toktok. I no from ol merikel we oli klia i stap, be from wan merikel we i bigwan moa. Mi bin gat wan dip tingting—wan witnes long saed blong spirit—se Holi mo wanwan long ol faevfala naes pikinini we oli stap sidaon long salong raon long papa mo mama blong olgeta, oli gat wan fet ia we i bin save akseptem eni samting we i bin kamaot long dei ia, be yet, bae oli gohed nomo blong kam antap long saed blong spirit. Klak mo Holi, mo tufala bigfala pikinini blong tufala, Tae mo Pota, oli stap wetem yumi tedei long Konfrens Senta ia.

Taem mi tingting hevi long eksperiens ia blong Fels famli, mi bin tingting fulap long situesen blong plante narafala man. ?Olsem wanem long ol Lata-dei Sent we oli gat bigfala fet, oli kasem fulap prishud blesing, oli prea fulap, oli kipim kavenan mo gat fulap hop, we merikel blong olgeta i neva kam? I neva kam long wei we oli andastanem wan merikel. Long wei we i luk se ol narawan oli kasem wan merikel.

?Olsem wanem long olgeta we oli gotru long bigfala hadtaem—long bodi, long tingting, long filing—blong plante yia, o long ful laef blong olgeta long wol? ?Olsem wanem long olgeta we oli yangfala mo ded?

Tu manis i pas, wan mared kapol wetem tempol rekomen, wetem trifala fultaem misinari, mo faef nara pikinini bitwin olgeta, oli aot long wan smol plen blong flae smol taem. Mi sua se oli bin prea from sefti bifo oli aot mo oli prea strong moa taem plen blong olgeta i kasem problem bifo plen i aksiden, i foldaon. I no gat wan i laef. ?Olsem wanem long olgeta?

?Bae ol gudfala pipol mo olgeta we oli lavem oli gat raet blong askem kwestin we Mormon i bin askem: “dei blong ol merikel i bin stop?”¹

Smol save blong mi i no save eksplenem se from wanem, samtaem, heven i kam help, mo ol nara taem i no kam. Be maet yumi no andastanem gud wanem nao i wan merikel.

Plante taem, yumi talem se i wan merikel blong yumi kam oraet bakegen be saens o dokta i no talem olsem wanem, o taem yumi kamaot long bigfala denja from yumi folem wan klia toktok blong spirit. Be, blong talem se mining blong wan merikel i olsem “wan taem we i gud long wan we i kamtru long wan tabu paoa we man i no save andastanem,”² i givim yumi wan longfala lukluk long ol samting we oli moa blong taem we i no save finis. Mining ia i letem yumi lukluk tu long stamba rol blong fet blong save kasem wan merikel.

Moronae i tijim: “Mo tu, long eni taem i no gat eni we i mekem ol merikel kasem taem nomo we oli gat mo yusum fet blong olgeta.”³ Amon i talem: “Olsem ia nao God i bin mekem wan wei we man, tru long fet, i save mekem ol bigfala merikel.”⁴ Lod i talemaot long Josef Smit tru revelesen: “From mi, mi God, … mo bambae mi soem ol merikel, … long olgeta evriwan we oli biliv long nem blong mi.”⁵

King Nebukadnesa i askem Sadrak, Mesak mo Abednego blong wosipim aedol we oli wokem long gol we hem i putum olsem wan god, i tok strong nao i talem se: “Sapos yutrifala i no wantem bodaon, wantaem nomo bambae oli sakem yutrifala i go long bigfala faea we i laet we i laet.” Afta i mekem olgeta oli fraet i talem: “?Yutrifala i ting se i gat wan god we i save sevem yutrifala?”⁶

Ol trifala strong disaepol i talem: “God ya we mitrifala i wok blong hem, hem i save sevem mitrifala mo i save tekemaot mitrifala long paoa blong yu. Be sapos hem i no sevem mitrifala, nating nomo, be bambae mitrifala i no save mekem wosip long ol god blong yu.”⁷

Oli gat ful tras se God bae i save sevem olgeta, “be sapos no,” be oli bin soem ful fet long plan blong Hem.

Semmak, Elda David A. Bedna i bin askem wan yang man we i bin askem wan prishud blesing: “Sapos hem i tingting blong Papa long Heven se ded i tekem yu taem yu yangfala i go long spirit wol blong gohed long misin blong yu, yu yu gat fet ia blong folem tingting blong Hem mo bae yu no kam oraet?”⁸ ?Yumi, yumi gat fet se bae yumi no kam oraet long ol hadtaem long wol ia blong yumi save kam oraet evriwan long taem we i no save finis?

Wan bigfala kwestin blong tingting hevi long hem i: “?Weaples nao yumi putum fet blong yumi long hem?” ?Fet blong yumi i inaf blong lukluk nomo se bae yumi nomo harem nogud long bodi, o, hem i stanap strong long God Papa mo tabu plan blong Hem, mo long Jisas we i Kraes mo Atonmen blong Hem? Fet long Papa mo Pikinini i letem yumi andastanem mo akseptem tingting blong Tufala taem yumi stap rere from taem we i no save finis.

Tedei, mi testifae abaot ol merikel. Blong stap olsem wan pikinini blong God, hem i wan merikel.⁹ Blong kasem wan bodi we i semmak mo i luk olsem hemia blong Hem, i wan merikel.¹⁰ Presen ia we i Sevya i wan merikel.¹¹ Atonmen blong Jisas Kraes, i wan merikel.¹² Se yumi save kasem laef we i no save finis i wan merikel.¹³

Hem i gud blong prea from mo wok blong protektem yumi long bodi mo kam oraet long bodi long laef long wol ia, be stamba lukluk blong yumi i mas stap long ol merikel long saed blong spirit we oli stap long evri pikinini blong God. I nomata yumi kam wea, wanem sitisensip blong yumi, nomata wanem yumi mekem blong sakem sin, nomata wanem oli mekem long yumi—yumi evriwan i save kasem ol merikel ia. Yumi stap laef long wan merikel, mo moa merikel oli stap kam. Long nem blong Jisas Kraes, amen.