Plan mo Famli Ofisol Toktok
Famli ofisol toktok i Lod we i stap poenem bakegen ol trutok blong gospel we yumi nidim blong sapotem yumi tru long ol jalenj blong tedei long saed blong famli.
Hem i kamaot klia long famli ofisol toktok se ol memba blong Jos blong Jisas Kraes blong Ol Lata-dei Sent oli gat blesing wetem wan doktrin ia we i no gat nara ples, mo wetem ol defren wei blong luk wol. Yumi tekpat, mo tu, yumi kam topman long sam aktiviti blong wol, be long sam topik, yumi jusum blong no tekpat from yumi stap wantem folem ol tijing blong Jisas Kraes mo ol Aposol blong Hem, blong bifo mo tedei.
I.
Long wan parabol, Jisas i tokbaot olgeta we oli “harem toktok” be oli “no karem frut” taem we toktok ia, “[ol wari blong wol mo giaman blong ol rij samting]” oli “blokem” toktok ia (Matiu 13:22). Afta, Jisas i tok strong long Pita from hem i “no stap tingting long ol samting blong God, be blong man nomo,” nao i talem long hem se: “?Sapos wan man i kasem olgeta samting blong wol be i lusum laef blong hem, hem bambae i save winim wanem?” (Matiu 16:23, 26). Long ol las tijing blong Hem, Hem i talem ol disaepol blong Hem: “Sapos yufala i man blong wol ya, bambae man blong wol ia oli save lavem yufala, from we yufala i man blong wol ia. Be yufala i no man blong wol ia, … taswe, ol man blong wol ia oli no laekem yufala oli agens long yufala” (Jon 15:19; luk tu long Jon 17:14, 16).
Semmak, ol raeting blong ol fas Aposol oli yusum plante pikja ia blong “wol” blong ripresentem wanem i kam agensem ol tijing blong gospel. “Yufala i no mas letem fasin blong yufala i kam olsem fasin blong ol man long wol,” (Rom 12:2) Aposol Pol i tijim. “Ol man blong wol oli stap talem se oli waes, be long fes blong God oli krangke nomo” (Fas Korin 3:19). Mo hem i givim woning se: “Yufala i mas lukaotgud blong i no gat ol man oli kam fasem yufala long rabis tok ia we i folem waes blong man, … ol tok blong giaman nomo we oli stap kamaot long ol devel we oli stap olbaot long wol ia fastaem, i no kamaot long Kraes (Kolosi 2:8). Aposol Jemes i tijim se “man we i wantem tumas ol fasin blong wol, hem i kam enemi blong God. Taem [man] i wantem tumas ol fasin blong wol, be semtaem nomo [hem] i kam enemi blong God” (Jemes 4:4).
Buk blong Momon, plante taem i yusum pikja ia blong agensem fasin blong “wol.” Nifae i profesae se “olgeta we oli bildimap blong plante man i laekem olgeta long ae blong wol, mo olgeta we i lukaotem ol samting blong bodi blong mit mo bun mo ol samting blong wol,” (1 Nifae 22:23; luk tu long 2 Nifae 9:30) bae Lod i kilimded olgeta. Alma i givim jajmen long “[olgeta we] oli solap, oli solap bigwan, wetem ol samting nating blong wol” (Alma 31:27). Drim blong Lihae i soem se olgeta we oli lukaot blong hang long rel blong aean, toktok blong God, bae oli fesem agens blong wol. Olgeta we oli stap long bigfala bilding we i gat plante spes we Lihae i luk, oli stap “jikim mo poenem fingga blong spolem man” (1 Nifae 8:26–27, 33). Long visen blong hem we i talem mining blong drim, Nifae i lanem se jik fasin ia mo agens, i kam long “ol plante grup blong pipol blong wol; … wol ia mo waes tingting blong hem; … we i hae tingting blong wol ia” (1 Nifae 11:34–36).
?Wanem nao mining blong ol woning blong skripja mo ol komanmen blong no folem “fasin blong wol,” o komanmen blong tedei blong “livim ol samting ia blong wol fogud”? (D&C 53:2). Presiden Thomas S. Monson i talem long ol tijing ia: “Yumi mas lukaotgud long wan wol ia we i go longwe tumas long wanem we i blong spirit. Hem i nid blong yumi sakemaot eni samting we i no stret long ol standet blong yumi, mo no akseptem blong givap long wanem we yumi wantem moa: laef we i no save finis insaed long kingdom blong God.”1
God i bin krietem wol ia folem plan blong Hem blong givim, long ol spirit pikinini blong Hem, wan ples blong fesem laef long wol olsem wan pat we i nid blong save kasem ol glori we Hem i wantem blong evri pikinini blong Hem. Nomata se i gat ol defren kingdom mo glori, wanem Papa blong yumi long Heven i wantem tumas blong ol pikinini blong Hem i wanem we Presiden Monson i singaotem, “laef we i no save finis insaed long kingdom blong God,” we i blong kam olsem wan god insaed long ol famli. Hemia i moa bitim blong sevem man. Presiden Russel M. Nelson i mekem yumi tingbaot se “insaed long plan we i no save finis blong Papa, fasin blong sevem man, i blong wanwan man o woman; be blong kam olsem wan god, i blong ful famli.”2
Gospel blong Jisas Kraes, we i kambak, mo famli ofisol toktok we bae mi tokbaot afta, oli stamba tijing blong lidim yumi blong rere long wol ia blong kam olsem wan god. Nomata we yumi mas laef wetem ol loa blong mared mo ol nara kastom blong wan wol we i stap foldaon, olgeta we oli traehad blong kam olsem wan god oli mas mekem ol joes blong olgetawan lon famli laef folem wei blong Lod taem ol wei blong wol oli defren long hemia blong Lod.
Long laef blong wol ia, yumi no tingbaot wanem i stap bifo yumi bon i kam, mo yumi fesem agens. Yumi groap mo kam raep long spirit taem yumi jusum blong obei long ol komanmen blong God mo mekem fulap stret mo gud joes. Hemia i tekem ol kavenan, ol odinens mo fasin blong sakem sin taem joes i rong. Be, sapos yumi no gat fet long plan blong God, mo yumi no stap obei, o yumi minim blong no tekem aksen, yumi lusum fasin blong groap mo kam raep. Buk blong Momon i tijim se: “Laef ia i taem blong ol man oli rere blong mitim God.” (Alma 34:32).
II.
Ol Lata-dei Sent we oli andastanem plan blong fasin blong sevem man we i kam long God, oli save luk wan samting we i spesel abaot wol we i helpem olgeta blong luk risen blong gat ol komanmen blong God, hao ol odinens ia oli no save jenis, mo stamba rol blong Sevya, Jisas Kraes. Atonmen blong Sevya i pemaot yumi long ded, mo, sapos yumi sakem sin nomo, i sevem yumi from sin. Wetem lukluk ia long wol, ol Lata-dei Sent oli gat ol defren fas wok mo praktis, mo oli gat blesing wetem paoa blong stap strong long ol hadtaem mo ol taem we hat i soa long laef long wol.
Be yes. Ol aksen blong olgeta we oli traem blong folem plan blong fasin blong sevem man we i kam long God, i save mekem se man i no andastanem samting, o i save mekem raorao wetem ol memba blong famli o ol fren we oli no bilivim ol prinsipol ia. Raorao ia i stap olsem oltaem. Evri jeneresen we i lukaot blong folem plan blong God i bin gat jalenj. Bifo, profet Aesea i givim paoa long ol man Isrel we hem i singaotem olgeta, “[yufala ia we i savegud stret mo gud fasin, be hat blong yufala i stap long loa blong mi,] nao hem i talem long olgeta: “[ sapos ol man oli jikim yufala o stap tok nogud long yufala, yufala i no fraet, yufala i no seksek.” (Isaiah 51:7; see also 2 Nephi 8:7). Be nomata wanem poen blong raorao wetem olgeta we oli no andastanem o bilivim plan blong God, olgeta we oli andastanem, oltaem oli gat komanmen blong jusum wei blong Lod be i no fasin blong wol.
III.
Gospel plan we wanwan famli i mas folem blong rere long laef we i no save finis mo fasin blong kam olsem wan god, i stap long ofisol toktok blong Jos long 1995, “Famli: Wan Ofisol Toktok I Go long Wol.”3 Ol toktok blong hem, yes, yu save luk se oli defren long samfala loa, praktis, mo toktok blong wol we yumi stap laef long hem. Long taem blong yumi, ol samting we yumi luk oli defren oli fasin blong laef tugeta be no mared, sem seks mared, mo blong lukaotem pikinini long ol kaen rilesensip ia. Olgeta we oli no biliv, o wantem kam olsem god, oli rili biliv long ol fasin ia blong wol mo oli luk se ofisol toktok ia i wan polisi toktok nomo we i save jenis. Be, ol Lata-dei Sent oli talem tru se ofisol toktok i talemaot wanem kaen famli rilesensip nao i moa impoten blong yumi stap long taem we i no save finis.
Yumi witnesem wan fasin we i kwik mo i kam antap, blong akseptem fasin blong laef tugeta be no mared, mo sem seks mared. Fasin we media, edukesen mo narawan i sapotem hemia i givim jalenj long ol Lata-dei Sent. Yumi mas traem blong skelem fasin blong folem loa mo tijing blong gospel long wanwan laef blong yumi semmak olsem yumi mas traem blong soem lav long evriwan. 4 Taem yumi mekem olsem, samtaem yumi fesem, be yumi no mas fraet long wanem Aesea i singaotem “ol jik blong ol man.”
Ol Lata-dei Sent we oli jenisim laef blong olgeta oli biliv se famli ofisol toktok, we oli putumaot ova 20 yia i pas finis, mo oli transletem naoia long plante lanwis, i Lod we i talemaot bigwan bakegen ol trutok blong gospel we yumi nidim blong sapotem tru long ol jalenj tedei blong famli. Tufala eksampol i, sem seks mared, mo laef tugeta be no mared. Jes 18 yia afta long famli ofisol toktok, Yunaeted Stet Suprim Kot i letem sem seks mared, i tanem ova plante taosen yia blong mared we i bitwin man mo woman nomo. Hae namba blong ol pikinini long Amerika blong ol pikinini we oli bon long wan mama we i no mared long papa i kam antap moa: 5 pesen long ol yia 1960,5 32 pesen long 1995,6 mo naoia long 40 pesen. 7
IV.
Famli ofisol toktok i stat mo i talem se “God i odenem mared bitwin wan man mo wan woman, mo famli i stap long medel blong plan we Krieta i gat long tabu fiuja blong ol pikinini blong Hem.” I talem tru tu se “[ blong stap olsem man o woman, i huia yu long laef bifo, laef naoia, mo i aedentiti blong yu long taem we i no save finis.” I talemaot bakegen se “tabu paoa blong mekem pikinini i mas tekem ples nomo bitwin man mo woman we tufala i bin mared folem loa olsem hasban mo waef.”
Ofisol toktok i talem tru se diuti blong hasban mo waef i stap gogohed, i blong tufala i gat fulap pikinini mo fulumap wol, mo tabu responsabiliti blong olgeta blong lavem mo kea long wanwan long olgeta mo ol pikinini blong olgeta: “Ol pikinini oli gat raet blong oli bon insaed long mared laef blong papa mo mama. Oli gat raet tu blong groap long han blong papa mo mama we tufala i agri mo folem ol promes we tufala i bin mekem long mared blong tufala wetem fasin blong stap fetful long tufala oltaem.” Hem i givim strong woning agensem vaelens agensem waef, hasban o pikinini, mo i talem tru se “hapines insaed long famli laef i gat gudfala janis blong kamtru sapos laef insaed long famli i stanap long ol tijing blong Lod Jisas Kraes.” Laswan, hem i askem strong ol gavman blong “blong wok strong moa long ol [loa] blong holemtaet mo mekem famli i kam strong olsem stamba yunit ia blong sosaeti.”
Long 1995, wan Presiden blong Jos mo 14 nara Aposol blong Lod oli putumaot ol impoten doktrin toktok ia. Olsem wan long ol seven Aposol ia we i stap laef yet, mi filim se i wok blong mi blong serem wanem i mekem se famli ofisol toktok ia i kamaot, hemia blong infomesen blong olgeta evriwan we i wantem save.
Insperesen ia we i soem nid blong wan ofisol toktok abaot famli i kam long lidasip blong Jos ova long 23 yia bifo finis. Hem i bin wan sapraes long olgeta we oli tingting se ol doktrin trutok abaot mared mo famli, man i andastanem gud finis mo i no nid blong talem bakegen.8 Be mifala i filim konfemesen ia mo mifala i go mekem wok. Oli faenem ol poen mo ol memba blong Kworom blong Olgeta Twelef Aposol oli tokbaot blong wan ful yia. Fasin blong putum long toktok i kamaot, oli bin luklukbak long hem mo oli bin lukluk bakegen long hem. Wetem prea mifala i bin stap askem Lod blong Hem i givim insperesen long wanem mifala i sapos blong talem mo olsem wanem blong talem. Mifala evriwan i lanem “tijing folem tijing, rul folem rul” olsem we Lod i bin promesem (D&C 98:12).
Long taem blong revelesen taem ia, oli putum wan ofisol toktok i go long Fas Presidensi, we i lukluk mo i talemaot ol tijing mo doktrin blong Jos. Afta we Presidensi i bin mekem sam moa jenis, Presiden blong Jos, Gordon B. Hinkli i bin anaonsem. Long miting blong ol woman long 23 Septemba 1995, hem i anaonsem ofisol toktok ia olsem: “Wetem plante swit toktok we oli putum se oli trutok, wetem plante giaman long saed blong ol standet mo valiu, wetem fulap trik mo samting blong pulum man blong kasem mak blong wol sloslo, mifala i filim blong givim woning mo givim woning fastaem.”9
Mi testifae se famli ofisol toktok i wan toktok we i talem trutok we i no save finis, i tingting blong Lod from ol pikinini blong Hem we oli stap lukaotem laef we i no save finis. Hem i bin stamba blong tijing mo praktis blong Jos blong ol las 22 yia mo bae i gohed olsem long fiuja. Tekem olsem we i stap; tijim, laef folem, mo bae yu gat blesing taem yu stap gohed strong from laef we i no save finis.
Foti yia i pas, Presiden Esra Taf Benson i tijim se “evri jeneresen i gat ol tes mo ol janis blong hem blong stanap mo pruvum hemwan.”10 Mi biliv se fasin blong yumi long saed mo long fasin blong yusum famli ofisol toktok i wan long ol tes blong jeneresen ia. Mi prea se bae evri Lata-dei Sent bae oli stanap strong long tes ia.
Mi finis wetem ol tijing blong Presiden Gordon B. Hinkli we hem i talem 2 yia afta we hem i bin anaonsem famli ofisol toktok. Hem i talem: “Mi luk wan gudfala fiuja long wan wol we i no strong nating. Sapos yumi hang strong long ol valiu blong yumi, sapos yumi bildimap yumi long wanem oli livim i stap biaen, sapos yumi wokbaot wetem fasin blong obei long fored blong Lod, sapos yumi laef folem gospel nomo, bambae God i blesem yumi long wan bigfala mo gudfala wei. Bae oli luk long yumi olsem wan spesel pipol we i faenem ki blong wan spesel hapines.”11
Mi testifae abaot trutok ia mo se famli ofisol toktok i impoten long taem we i no save finis; Lod Jisas Kraes i talemaot long ol Aposol blong Hem, blong ol pikinini blong God oli kam olsem ol god (luk long Doctrine and Covenants 131:1–4), long nem blong Jisas Kraes, amen.