Tej Yam uas Ntis Sab Ntsuj Plig
Tsis txhob cia tej yam ntawm lub neej no ntis qhov kaj saum ntuj ceeb tsheej.
Thaum lub Yim Hli Ntuj hnub tim 21 xyoo no, muaj ob lub sij hawm tseem ceeb uas ua rau tib neeg tsom ntsoov nyob thoob plaws lub ntiaj teb no. Lub sij hawm thib ib yog kev ua koob tsheej txog peb tus yaj saub, Thawj Tswj Hwm Thomas S. Monson, hnub yug. Lub sij hawm ntawd, kuv ua hauj lwm nyob hauv Cheeb Tsam Pacific thiab kuv zoo siab uas Tsoom Haiv Neeg Ntseeg hauv Audaliyas, Vanuatu, New Zealand, thiab French Polynesia paub txog nws hnub yug no, tiam sis lawv kuj zoo siab ua koob tsheej txog nws. Kuv zoo siab uas kuv koom nrog lawv txoj kev ntseeg thiab txoj kev hlub tus neeg zoo kawg no. Ua rau kuv txais kev tshoov siab pom Tsoom Haiv Neeg Ntseeg hauv Hnub Nyoog Kawg txoj kev hlub lawv tus yaj saub.
Muaj tseeb tiag, Thawj Tswj Hwm Monson, uas paub hais tias muaj neeg xav hais nyob zoo hnub yug rau nws, tau piav hais tias nws xav tias khoom plig twg yog qhov zoo tshaj plaws: “Nrhiav ib tug neeg uas nyuaj siab los yog mob los yog kho siab thiab ua ib yam dab tsi pab nws. Kuv xav muaj li ntawd xwb.”1 Peb hlub koj thiab txhawb nqa koj os, Thawj Tswj Hwm Monson.
Lub Hli Ntis lub Hnub
Ib lub sij hawm ntxiv nyob saum ntuj thaum tib hnub ntawd thiab yog ib yam uas neeg coob heev nyob thoob plaws lub ntiaj teb xav saib yog qhov uas lub hli ntis lub hnub. Zaum no yog thawj zaug uas lub hli ntis lub hnub nyob hauv lub Teb Chaws Amelikas txij thaum 99 xyoos tas los.2 Nej puas tau pom lub hli ntis lub hnub? Kuv yuav piav ntxiv txog qhov no.
Lub hli ntis lub hnub tag nrho thaum lub hli txav mus nyob nruab nrab lub ntiaj teb thiab lub hnub, thaiv qhov kaj uas los ntawm lub hnub yuav luag tag nrho.3 Qhov uas muaj tau li no ua rau kuv xav tsis thoob. Yog tias yus xav tias lub hnub yeej loj npaum li ib lub log ntawm ib lub luv thij, ces piv txog qhov ntawd, lub hli yeej yuav loj npaum li ib lub pob zeb me me.
Ua cas qhov uas ua rau peb sov so, muaj qhov kaj thiab muaj txoj sia yuav raug thaiv los ntawm ib yam me me tag npaud?
Txawm yog lub hnub loj li 400 npaug ntau dua li lub hli, lub hnub kuj nyob deb 400 npaug ntawm lub ntiaj teb.4 Raws li pom nyob hauv lub ntiaj teb, qhov uas nyob deb li no ces ua rau yus pom lub hnub thiab lub hli loj zoo ib yam. Thaum twg lub hli thiab lub hnub nyob ncaj qha, ces zoo li lub hli thaiv lub hnub tag nrho. Cov phooj ywg thiab kuv tsev neeg uas nyob hauv qhov chaw pom tau lub hli ntis lub hnub tag nrho piav tias qhov tsaus ntuj pauv qhov kaj, twb pom cov hnub qub, thiab cov noog tsum tsis nrov. Ua rau huab cua txias vim thaum lub hli ntis lub hnub ces yuav ua rau huab cua qis tshaj dua li 20 degree Fahrenheit (11 degrees Celsius).5
Lawv piav hais tias lawv xav tsis thoob, thiab txhawj me ntsis, vim hais tias lawv paub muaj xwm txheej tau thaum lub hli ntis lub hnub. Tiam sis, lawv txhua tus ua tib zoo ceev faj kom tsis txhob raug mob qhov muag los yog “kev dig muag thaum lub hli ntis lub hnub” thaum lub sij hawm zoo li no. Lawv muaj kev nyab xeeb vim lawv coj iav uas muaj lub tsom iav tshwj xeeb uas pov hwm qhov muag kom tsis txhob raug mob.
Lus Piv Txwv
Ib yam li ib lub hli me me yuav ntis tau lub hnub uas loj kawg nkaus, ua rau yus tsis muaj kev sov so thiab qhov kaj, yuav muaj tej yam uas ntis tau sab ntsuj plig thaum peb cia tej yam me me thiab tej yam meem txom uas ntis tau peb nyob hauv peb lub neej txhua hnub los nyob ze ua rau tej ntawd thaiv tau Yexus Khetos txoj kev ci ntsa iab, kev sov so, thiab qhov kaj thiab Nws txoj moo zoo.
Txwj Laug Neal A. Maxwell piav txog zaj lus piv txwv ntxiv thaum nws hais tias, “Txawm yog ib yam me me xws li ib tug neeg tus ntiv tes xoo, thaum muab nyob ze qhov muag, yuav ua rau nws dig muag tsis pom lub hnub uas loj heev. Tiam sis lub hnub tseem nyob ntawd. Tus neeg nws tus kheej yog tus uas ua rau nws dig muag. Thaum peb muab tej yam los nyob ze peb, yog peb tsom ntsoov rau tej ntawd ua ntej, ces ua rau peb tsis pom lub ntuj ceeb tsheej.”6
Yeej tsis muaj leej twg uas xav txhob txwm thaiv lawv tus kheej txoj kev pom lub ntuj ceeb tsheej los sis cia muaj ib yam ntis peb sab ntsuj plig hauv peb lub neej. Cia kuv qhia nej txog tej yam uas yuav pab peb tiv thaiv kom txhob muaj tej uas ntis tau sab ntsuj plig thiab ua rau peb sab ntsuj plig raug mob.
Tsom Iav ntawm txoj Moo Zoo: Muaj Kev Xam Pom txoj Moo Zoo
Nej puas nco qab thaum kuv piav txog lub tsom iav uas yuav tsum coj kom pov hwm cov uas saib lub hli ntis lub hnub qhov muag thiaj li tsis raug mob los sis dig muag? Thaum peb saib tej uas ntis peb sab ntsuj plig es peb siv tus Ntsuj Plig uas zoo li tsom iav uas pov hwm thiab pab xam pom txoj moo zoo, thiab pov hwm peb kom peb sab ntsuj plig tsis dig muag.
Cia peb xav txog tej tus yam ntxwv. Thaum muaj cov yaj saub tej lus hauv peb lub siab thiab tus Vaj Ntsuj Plig Dawb Huv ua tus qhia peb, ces zoo li peb siv “tsom iav ntawm txoj moo zoo” saib tej uas ntis qhov kaj uas los saum ntuj los, ua rau peb tsis raug mob thaum muaj tej uas ntis peb sab ntsuj plig.
Yog li ntawd peb yuav ua li cas kom coj iav ntawm txoj moo zoo no? Nov yog tej yam uas pab tau: “Peb tsom iav ntawm txoj moo zoo qhia peb tias tus Tswv xav kom peb txais lub cim nco txog txhua lub lim tiam thiab Nws xav kom peb kawm vaj lug kub thiab thov Vatjswv txhua hnub.” Tsom iav no kuj qhia peb tias Dab Ntxwg Nyoog yuav ntxias kom peb tsis txhob ua li ntawd. Peb paub tias nws lub hom phiaj yog rhuav peb txoj kev ywj siab xaiv los ntawm tej uas tsis tseem ceeb thiab tej kev ntxias. Txawm yog nyob hauv Yauj lub caij nyoog, muaj ib txhia uas raug tej uas ntis tau lawv sab ntsuj plig, uas piav li no hais tias: lawv “txawm yog nruab hnub nrig los lawv maub ib yam li tsaus ntuj nti.”7
Cov kwv tij thiab cov muam, thaum kuv hais txog kev pom tau thaum siv tsom iav ntawm txoj moo zoo thov kom nej paub tias kuv tsis hais kom peb tsis kam paub los yog tsis sib tham txog tej teeb meem los sis cia li taug kev thiab tsis paub txog tej ntxiab thiab tej kev phem uas tus yeeb ncuab twb tso rau peb. Kuv tsis hais tias peb yuav coj iav uas thaiv kom peb tsis txhob pom dab tsi—tiam sis kuv hais qhov fab ntxeev. Kuv hais tias peb yuav tsum siv cov iav ntawm txoj moo zoo kom saib peb tej teeb meem. Txwj Laug Dallin H. Oaks qhia hais tias “kev xam pom yog kev muaj peev xwm pom txhua yam tseem ceeb sib txuas li cas.”8 Kev xam pom txoj moo zoo ua rau peb pom tau tag nrho tej yam uas nyob mus ib txhis.
Thaum yus coj tsom iav ntawm txoj moo zoo, nej yuav tsom ntsoov thiab muaj lub zeem muag thaum nej xav txog nej tej hom phiaj, teeb meem, kev ntxias, thiab tej uas nej ua yuam kev. Nej yuav pom qhov kaj ci ntsab iab uas nej pom tsis tau yog tsis muaj.
Yog ib qho txawv heev uas tsis yog kev phem xwb uas ua rau tej yam ntis tau peb sab ntsuj plig hauv peb lub neej. Muaj tej yam zoo los yog tej yam txaus qhuas uas peb tsom ntsoov rau ces ntshe peb muab cev los nyob ze dhau ua rau tej ntawd ntis qhov kaj ntawm txoj moo zoo thiab ua rau peb nyob hauv kev tsaus ntuj. Tej xwm txheej no muaj xws li kev kawm ntawv thiab kev vam meej, kev muaj hwj chim thiab hwj huam, kev ntshaw, thiab tej txuj ci thiab tej txiaj ntsim los yog.
Thawj Tswj Hwm Dieter F. Uchtdorf tau qhia hais tias “txhua yam zoo, thaum ua heev dhau, ces qhov zoo ntawd hloov los ua ib qho tsis zoo. … Muaj ib lub sij hawm uas peb tej hom phiaj thiab tej kev xav tau yuav hloov los ua tej kev lav ris hnyav heev.”9
Cia kuv hais ntxiv txog tej yam uas ntshe ntis tau peb sab ntsuj plig.
Sib Tham Hauv Internet
Ob peb hlis tas los kuv tau hais lus rau BYU lub Rooj Sab Laj rau cov Poj Niam.10 Kuv piav hais tias tej txuj ci technology tsis hais kev sib tham hauv internet yuav pab tshaj tawm “kev paub txog tus Cawm Seej … nyob hauv txhua haiv neeg, xeem neeg, yam lus thiab tej neeg.”11 Tej txuj ci technology no los muaj lub Koom Txoos tej website xws li LDS.org thiab Mormon.org; tej app hauv xov tooj xws li Gospel Library, Mormon Channel, LDS Tools, thiab Family Tree; thiab tej kev sib tham hauv internet xws li Facebook, Instagram, Twitter, thiab Pinterest. Tej yam no twb tau muaj neeg nyiam, faib, pom, rov qab faib thiab ntsia thiab yeej yog tej yam uas zoo thiab pab qhia txoj moo zoo rau tsev neeg, phooj ywg, thiab cov neeg uas yus paub.
Txawm yog muaj tag nrho tej yam zoo thiab kev siv tej txuj ci technology raws li kev tsim nyog no los, muaj tej uas pheej hmoo ua, ntshe thaum yus muab cev los nyob ze dhau, ces tej zaum ua rau tej no ntis peb sab ntsuj plig thiaj yuav thaiv qhov sov so thiab qhov kaj ntawm txoj moo zoo.
Qhov uas yus siv tej kev sib tham hauv internet, cov app hauv xov tooj, thiab kev ua si ntshe yuav siv sij hawm ntev thiab ua rau yus tsis tham tim ntsej tim muag. Qhov uas yus tsis sib tham tim ntsej tim muag li no yuav ua rau yus muaj teeb meem hauv kev sib yuav, tsis txawj sib tham thiab ntshe yuav pauv tej kev xyaum ua tej yam ntawm sab ntsuj plig, feem ntau yog peb cov tub hluas ntxhais hluas.
Ob qho uas pheej hmoo ntawm kev sib tham hauv internet ntxiv yog kev pom qhov zoo siab thiab kev sib piv uas ua kom qaug zog.
Cov duab uas tib neeg tso rau lwm tus saib thaum sib tham hauv internet feem ntau ua rau yus pom tej yam zoo hauv lawv lub neej xwb—feem ntau tsis yog tiag tiag. Peb txhua tus twb pom tej duab zoo nkauj txog kev tu tsev, tej qhov chaw ua si zoo, tib neeg luag nyav thaij lawv tus kheej, npaj khoom noj zoo zoo, thiab muaj lub cev noj qab nyob zoo uas peb muaj tsis taus.
Ua piv txwv, nov yog ib daim duab uas tej zaum nej yuav pom nyob hauv ib tug neeg txoj kev sib tham hauv internet. Tiam sis, daim daub no tsis qhia tag nrho txog tej yam uas muaj hauv nws lub neej tiag tiag.
Thaum peb muab peb lub neej piv rau lwm tus lub neej uas lawv twb kho kom zoo tag nrho tso rau hauv kev sib tham hauv internet, tej lub sij hawm ua rau peb poob siab, ntshaw, thiab xav tias peb twb tsis yog neeg zoo.
Ib tug neeg uas twb faib ntau daim duab txog nws tus kheej hais tias, tej zaum nws tso luag xwb, “Kev zoo siab muaj nqis li cas yog tias yus tsis qhia lwm tus hauv internet?”12
Ib yam li Muam Bonnie L. Oscarson hais tag kis no, kev vam meej hauv lub neej no tsis nyob ntawm muaj neeg nyiam ntau npaum li cas los yog muaj pes tsawg tus phooj ywg los yog neeg uas raws yus nyob hauv internet. Tiam sis kev vam meej nyob ntawm qhov uas yus sib raug zoo nrog lwm tus thiab pab lawv txais qhov kaj nyob hauv lawv lub neej.
Kuv cia siab hais tias peb yuav kawm qhia tias peb lub neej zoo li cas tiag, tso luag, thiab tsis txhob poob siab thaum peb pom cov duab uas ua rau peb pom qhov zoo xwb thiab ua kev sib piv uas ua kom peb qaug zog.
Kev sib piv tsis yog ib lub cim ntawm peb lub caij nyoog xwb tiam sis yog ib qho teeb meem yav tas los thiab. Tus Thwj Tim Povlauj ceeb toom nws cov neeg hais tias “ lawv ib tug ntsuas ib tug thiab muab ib tug piv rau ib tug [lawv tsis muaj tswv yim].”13
Vim muaj ntau yam kev siv txuj ci technology uas tsim nyog, xav kom peb siv tej ntawd kom qhia, tshoov siab, thiab txhawb nqa peb tus kheej thiab yaum kom lwm tus ua zoo dua ntxiv—thiab tsis txhob siv kom lwm tus pom qhov zoo xwb. Cia peb ua txhua yam peb ua tau kom qhia tiam neeg uas tab tom loj hlob paub siv technology raws li kev ncaj ncees thiab ceeb toom txog tej xwm txheej ceev thiab kev siv tsis yog. Yog peb saib kev sib tham hauv internet thaum peb coj iav ntawm txoj moo zoo ces peb yuav tsis muaj tej ntawd ntis peb sab ntsuj plig hauv peb lub neej.
Kev Muab Hlob
Nim no cia peb kawm txog qhov uas yeej ua rau neeg dawm taw: kev muab hlob. Kev muab hlob yog qhov fab ntxeev ntawm kev txo hwj chim uas yog “kev txaus siab ua raws li tus Tswv lub siab nyiam.”14 Thaum peb muab hlob, peb hwm peb tus kheej thiab tsis muab rau lwm tus, tsis hais tus Tswv los yog. Kev muab hlob yeej yog kev sib tw; yog qhov uas peb xav tias peb muaj ntxiv thiab xav tias peb zoo dua lwm tus. Kev muab hlob feem ntau ua rau tib neeg npau taws thiab ntxub lwm tus; ua rau ib tug neeg cim ntsoov lwm tus tej kev txhaum los yog tsis zam txim. Tiam sis kev muab hlob los kuj ploj mus thaum coj Khetos tus cwj pwm uas yog kev txo hwj chim.
Kev txheeb ze, txawm yog tsev neeg thiab cov uas peb hlub, qhov tseem ceeb yog tsev neeg thiab cov uas peb hlub—tsis hais khub niam txiv—yuav muaj zog thaum txo hwj chim thiab yuav ploj mus thaum muab hlob.
Ntau xyoo tas los ib tug kws muag khoom loj heev hu kuv nrog kuv tham txog qhov uas ib lub koom haum, uas nrog nws sib tw mam li yuav nws lub koom haum. Nws thiab lwm tus neeg ua hauj lwm txhawj heev hais tias tej zaum lawv yuav xiam lawv txoj hauj lwm. Vim nws paub tias kuv paub cov thawj coj ntawm lub koom haum uas yuav nws lub, nws thov seb kuv puas kam qhia txog nws thiab qhia tias nws zoo npaum li cas, tej zaum teem sij hawm rau kev sib ntsib thiab. Ces nws xaus lus hais tej lus no: “Koj paub neeg hais li cas yom? ‘Cov uas txo hwj chim mam li piam sij!’”
Kuv to taub hais tias nws tso luag xwb. Kuv to taub. Tiam sis muaj ib lub ntsiab cai uas kuv xav tias yuav pab nws. Kuv teb hais tias, “Qhov uas neeg hais tsis zoo li ntawd. Muaj tseeb tiag, lawv hais qhov fab ntxeev. ‘Cov uas txo hwj chim … yuav tau lub ntiaj teb ua lawv tug’15 yog qhov lawv hais.”
Nyob hauv lub Koom Txoos thiab nyob hauv kuv txoj hauj lwm, tib neeg uas zoo tshaj plaws, uas txawj ua hauj lwm zoo tshaj yog cov uas siab mos siab muag thiab txo hwj chim.
Kev txo hwj chim thiab kev ua siab mos siab muag yeej sib haum. Thov kom peb nco ntsoov tias, “twb tsis muaj ib tug uas Vajtswv pom zoo, tsuas yog cov uas muaj siab mos siab muag thiab txo siab txo ntsws xwb.”16
Kuv thov kom peb yuav txo hwj chim kom txhob cia kev muab hlob ntis peb sab ntsuj plig.
Lus Xaus
Lub xaus hais tias, thaum lub hli ntis lub hnub, yeej yog ib yam xav tsis thoob hauv lub ntiaj teb no uas ib yam me me thaiv tau lub hnub qhov zoo nkauj, qhov sov so, thiab qhov kaj, ua rau yus nyob hauv kev tsaus ntuj thiab txias tas.
Muaj ib yam zoo li no rau peb sab ntsuj plig, thaum peb muab tej yam me thiab tsis tseem ceeb los nyob ze dhau thiab thaiv qhov zoo nkauj, qhov sov so, thiab qhov kaj saum ntuj ceeb tsheej ntawm Yexus Khetos txoj moo zoo, ua rau peb sab ntsuj plig nyob hauv ntuj txiag teb tsaus.
Cov iav uas tau kho kom pov hwm qhov muag uas cov uas pom tau lub hli ntis lub hnub coj yuav pab kom txhob mob qhov muag thiab txhob ua rau nws dig muag.17 Tsom iav ntawm txoj moo zoo yog kev paub thiab kev ua tim khawv txog cov ntsiab cai thiab cov kab ke ntawm txoj moo zoo ua rau ib tug neeg muaj kev xam pom txoj moo zoo thiaj li yuav pov hwm nws thaum muaj tej yam ntis nws sab ntsuj plig.
Yog tias koj pom ib yam dab tsi uas thaiv txoj kev xyiv fab thiab txoj kev kaj ntawm txoj moo zoo nyob hauv nej lub neej, kuv caw nej pom nrog kev xam pom txoj moo zoo. Cia li siv tsom iav ntawm txoj moo zoo saib thiab rau siab kom tsis txhob cia tej yam tsis tseem ceeb hauv nej lub neej thaiv nej txoj kev pom tau txoj hau kev zoo siab. Lub ntsiab hais tias, tsis txhob cia tej yam ntawm lub neej no ntis qhov kaj saum ntuj ceeb tsheej.
Ua Tim Khawv
Kuv ua tim khawv tias txawm yog muaj dab tsi ntis peb txoj kev xam pom qhov kaj ntawm txoj moo zoo, qhov kaj ntawd tseem nyob. Lub hauv paus ntawm kev sov so, qhov tseeb, thiab kev ci ntsa iab yog Yexus Khetos txoj moo zoo. Kuv ua tim khawv txog ib Leej Txiv Saum Ntuj Ceeb Tsheej uas hlub peb; Nws Leej Tub, Yexus Khetos; thiab txog Nws Leej Tub lub luag hauj lwm ua peb tus Cawm Seej thiab tus Txhiv Dim. Los ntawm Yexus Khetos lub npe, amees.