Tus Poj Ntsuam lub Siab

Kuv tau koob hmoov heev vim kuv tau ua hauj lwm nrog Tsoom Haiv Neeg Ntseeg ntawm Dej Hiav Txwv Pacific tau ntev heev. Tsoom Haiv Neeg Ntseeg uas rau siab no txoj kev ntseeg, kev hlub, thiab tej kev txi tshoov kuv lub siab, ua rau kuv ua Vajtswv tsaug thiab muaj kev xyiv fab. Lawv lub neej yeej zoo li nej li.

Ua rau kuv xav hais tias Tsoom Haiv Neeg Ntseeg no yeej zoo li tus poj ntsuam uas tus Cawm Seej pom thaum Nws “zaum … thiab saib cov neeg uas tuaj tso nyiaj. Muaj cov neeg nplua nuj ntau leej tso nyiaj ntau ntau rau hauv lub phij xab

“Thiab muaj ib tug poj ntsuam pluag pluag muab ob lub txiaj toog tuaj tso rau hauv. …

“Yexus hu nws cov thwj tim los cuag nws thiab hais rau lawv hais tias, Kuv qhia tseeb rau nej hais tias tus poj ntsuam uas pluag pluag ntawd tso nyiaj ntau dua lwm tus.

“Rau qhov lwm tus muab lawv tej nyiaj uas seem coj tuaj tso xwb, tiam sis tus poj ntsuam uas pluag pluag no, nws muab hlo ob lub txiaj toog uas nws muaj tuaj tso huv tib si.”¹

Txawm yog nws ob lub txiaj toog yog nyiaj tsawg tsawg xwb, raws li tus Cawm Seej pom nws txoj kev pub nyiaj yeej muaj nqi tshaj plaws, vim nws twb pub txhua yam. Thaum lub sij hawm ntawd, tus Cawm Seej paub tus poj ntsuam tag nrho, vim tus poj ntsuam pub txiaj ntsim uas qhia Nws tias tus poj ntsuam lub siab zoo li cas. Tus poj ntsuam txoj kev hlub thiab txoj kev ntseeg yeej muaj zog txaus nws thiaj li pub txiaj ntsim vim nws paub tias yuav muaj raws li nws xav tau.

Kuv twb pom Tsoom Haiv Neeg Ntseeg ntawm Dej Hiav Txwv Pacific muaj lub siab zoo li ntawd. Nyob hauv ib lub zos me me hauv ib lub pov txwv, ib tug txiv neej laus thiab nws tus poj niam txaus siab ua raws li ob tug tub txib hais kom thov tus Tswv seb tej zaj uas nkawd qhia puas muaj tseeb. Thaum ua li no, khub niam txiv no twb xav txog yuav muaj li cas yog tias nkawd txais lus teb kom nkawd txais yuav txoj moo zoo uas tau muab txum tim rov qab los Nkawd yoo mov thiab thov Vajtswv kom paub lub Koom Txoos thiab Phau Ntawv Maumoos puas muaj tseeb. Nkawd tau txais lus teb uas pom zoo hais tias, “Yog mas!” Qhov no muaj tseeb!”

Vim nkawd tau txais kev ua tim khawv li no, nkawd xaiv ua kev cai raus dej. Yeej muaj xwm txheej rau nkawd tus kheej vim nkawd xaiv ua li no. Nkawd yuav tsum them tus nqi loj heev rau nkawd txoj kev txiav txim thiab txoj kev ua kev cai raus dej. Nkawd poob hauj lwm, tso kev muaj koob muaj npe tseg, cov phooj ywg tso nkawd tseg, thiab nkawd tsev neeg thim lawv txoj kev hlub, kev hwm, thiab kev pab. Nim no nkawd taug kev mus rau lub koom txoos ped txhua hnub Sunday, ntsia cov phooj ywg thiab cov neeg zej zog uas tab tom hla nkawd kev mus nrad.

Thaum nkawd raug tej xwm txheej zoo li no, ib tug neeg nug tus tij laug no seb nws xav li cas txog nws txoj kev txiav txim kom koom lub Koom Txoos. Nws teb kiag tej lus no hais tias, “Nws muaj tseeb, puas yog? Wb paub meej qhov uas wb yuav tsum xaiv.”

Ob tug Neeg Ntseeg uas nyuam qhuav hloov siab los ntseeg yeej muaj lub siab zoo li tus poj ntsuam. Nkawd, zoo li tus poj ntsuam, muab tag nrho nkawd muab tau, paub tias nkawd muab tej yam uas nkawd xav tau tso tseg. Vim hais tias nkawd muaj siab ntseeg uas nyiaj dhau tej lub sij hawm nyuaj ntawd, nkawd tau kev pab ris nkawd lub nra hnyav.Cov mej zeej ntawm lub Koom Txoos nyob ib puag ncig tau txhawb nqa thiab pab nkawd, thiab nkawd txais dag zog los ntawm nkawd txoj hauj lwm hauv lub Koom Txoos.

Tom qab nkawd twb muab txhua yam rau tus Tswv, hnub zoo kawg nkaus yog thaum nkawd ua kev sib khi hauv lub tuam tsev ua ib tsev neeg nyob mus ib txhis. Zoo ib yam li Nws ua rau cov neeg hloov siab los ntseeg thaum Amas yog tus thawj coj, “tus Tswv tau txhawb lawv lub dag lub zog es lawv thiaj ris tau lawv tej nra hnyav yam yooj yim, thiab lawv thiaj zoo siab hlo thiab ua siab ntev ywj rau tus Tswv lub siab nyiam tag nrho.”² Khub niam txiv no yeej coj yam ntxwv raws li tus poj ntsuam lub siab.

Cia kuv hais txog ib lub sij hawm ntxiv thaum pom tau tus poj ntsuam lub siab. Nyob hauv lub teb chaws Samoa, peb nrog tej pawg sab laj hauv ib lub zos kom tso cai rau cov tub txib mus qhia txog txoj moo zoo. Ob peb xyoos tas los, kuv nrog ib tug thawj coj ntawm ib lub zos tham, yog ib lub zos uas lawv tsis tau pub cov tub txib los qhia tau ntau xyoo lawm. Kuv nrog tus no sib tham tsis ntev tom qab tus thawj coj loj tshaj tau qhib lub zos no rau lub Koom Txoos, tso cai rau peb cov tub txib qhia cov uas xav kawm txog txoj moo zoo thiab cov lus qhuab qhia.

Tom qab ntau xyoo, qhov uas muaj txuj ci tseem ceeb kom hloov li no, ua rau kuv xav kawm yog vim li cas tus thawj coj loj tshaj tau ua li no. Kuv nug txog qhov no, thiab tus thawj coj uas nrog kuv tham teb hais tias, “Ib tug neeg nyob tau hauv kev tsaus ntuj tau ib ntus, tiam sis yuav txog lub sij hawm thaum nws xav nyob hauv qhov kaj.”

Tus thawj coj loj tshaj, thaum nws qhib nws lub zos, qhia tias nws muaj tus poj ntsuam lub siab—yog ib lub siab uas mos muag thaum muab txoj kev kaj ntawm qhov tseeb tshwm sim. Tus thawj coj no yeej txaus siab tso kab lig kev cai uas kav ntev tseg, raug kev tsim txom, thiab sawv khov kho kom lwm tus yuav tau koob hmoov. Tus thawj coj no muaj ib lub siab uas tsom ntsoov rau nws cov neeg txoj kev zoo siab thiab kev nyob zoo, thiab tsis tsom ntsoov rau kab lig kev cai thiab kev khaws hwj chim rau nws tus kheej. Nws twb tso tej kev txhawj ntawd tseg kom ua raws li Thawj Tswj Hwm Thomas S. Monson qhia peb tias: “Thaum peb ua raws li tus Cawm Seej tus yam ntxwv, peb yuav muaj cib fim ua ib qho kaj rau hauv lwm tus lub neej.”³

Qhov kawg, cia kuv hais ib zaj ntxiv hais txog Tsoom Haiv Neeg Ntseeg ntawm Dej Hiav Txwv Pacific uas nrog nraim kuv nyob hauv kuv sab ntsuj plig. Ntau xyoo tas los kuv yog ib tug pab cuam hluas rau ib tug npisov nyob hauv ib pawg ntseeg tshiab nyob hauv American Samoa. Peb twb muaj 99 tus mej zeej uas yog cov neeg ua liaj ua teb, cov uas ua hauj lwm tsim kapoom, cov ua hauj lwm rau tseem fwv, thiab lawv tsev neeg. Nyob rau xyoo 1977 thaum Thawj Pawg Thawj Tswj Hwm tshaj tawm tias yuav ua ib lub tuam tsev nyob hauv Samoa, peb txhua tus muaj kev xyiv fab thiab kev zoo siab. Thaum lub sij hawm ntawd nyob hauv American Samoa yuav tsum mus rau ib lub tuam tsev nyob hauv Hawaii los sis New Zealand. Yuav tsum them nyiaj ntau heev uas cov mej zeej rau siab ntseeg feem ntau tsis muaj.

Thaum lub sij hawm no lawv thov kom cov mej zeej muab nyiaj rau ib pob nyiaj ua tsev kom pab txhawb nqa kev ua cov tuam tsev. Yog li ntawd, peb pawg npisov thov kom cov mej zeej ntawm pawg ntseeg thov Vajtswv seb lawv muaj npaum li cas kom pub rau pob nyiaj ntawd. Twb teem ib hnub rau txhua tsev neeg sib sau ua ke muab lawv cov nyiaj pab. Tom qab ntawd, thaum qhib cov nyiaj pab uas tsis cia leej twg pom, ua rau peb pawg npisov txo hwj chim thiab txais kev tshoov siab vim peb pawg ntseeg cov mej zeej zoo muaj kev ntseeg thiab ua siab dawb.

Vim kuv paub txhua tsev neeg thiab lawv lub neej zoo li cas, ua rau kuv xav tsis thoob, kuv hwm lawv, thiab txo kuv lub hwj chim. Lawv yeej zoo li tus poj ntsuam uas pub ob lub txiaj toog vim lawv pub dawb, thiab muaj kev xyiv fab los ntawm txoj koob hmoov uas tau cog lus tseg lawm hais tias yuav ua ib lub tuam tsev dawb huv ntawm tus Tswv nyob hauv Samoa. Tej tsev neeg no twb muab txhua yam lawv muaj fij tseg rau tus Tswv, es lawv muaj kev ntseeg tias lawv yuav tsis xav tau dab tsi. Lawv tej txiaj ntsim qhia tias lawv muaj lub siab zoo li tus poj ntsuam. Txhua tus uas pub nyiaj twb ua siab dawb thiab zoo siab pub vim hais tias tus poj ntsuam lub siab nyob hauv lawv twb muaj kev ntseeg pom tias yuav tau koob hmoov zoo kawg nkaus rau lawv tsev neeg thiab tag nrho cov neeg hauv Samoa thiab American Samoa rau ntau tiam neeg tom ntej. Kuv paub tias tus Tswv twb paub thiab pom zoo rau tej yam uas lawv muab fij tseg, lawv ob lub txiaj toog.

Tus poj ntsuam uas pub nws ob lub txiaj toog lub siab yog ib lub siab uas yuav ua kev txi pub tag nrho; txawm nws yuav tsum nyiaj tej yam nyuaj, raug kev tsim txom, thiab raug xyeej; thiab txawm nws yuav tsum ris nra hnyav ntau hom. Tus poj ntsuam lub siab yog ib lub siab uas paub thiab hnov txoj kev kaj ntawm qhov tseeb thiab yuav ua txhua yam kom ua raws li qhov tseeb ntawd. Qhov nws ua li ntawd kuj pab lwm tus pom txoj kev kaj ntawd thiab los txais kev zoo siab thiab kev xyiv fab mus ib txhis zoo ib yam. Qhov kawg, tus poj ntsuam lub siab yog kev txaus siab pub txhua yam kom txhim tsa Vajtswv lub nceeg vaj hauv lub ntiaj teb.

Thov cia peb koom nrog Tsoom Haiv Neeg Ntseeg nyob thoob plaws lub ntiaj teb kom ua tej yam uas peb yuav tsum ua thiaj li muaj ib lub siab zoo li tus poj ntsuam, muaj kev zoo siab txog cov koob hmoov uas yuav los kom pauv tej yam uas peb twb xav tau ua ntej. Kuv thov kom peb txhua tus yuav txaus siab ris peb tej lub nra hnyav, ua kev txi li yuav tsum ua, thiab muaj lub siab xav pub thiab ua. Kuv cog lus tias tus Tswv yuav tsis cia nej nyob kom xav tau xwb. Tus poj ntsuam lub siab yeej muaj kev ris txiaj puv npo vim tus Tswv yog “ib tug neeg uas muaj kev nyuaj siab, thiab paub txog kev tu siab”⁴ peb thiaj tsis tas saj “lub khob iav.”⁵ Txawm yog peb qaug zog thiab ua yuam kev, thiab vim peb ua li ntawd, Nws tseem muab Nws txhais tes ncav rau peb, uas raug chob kom pab peb. Nws yuav muab peb tsa sawv yog tias peb kam los rau hauv txoj kev kaj ntawm Nws txoj moo zoo, muab siab npuab Nws, thiab cia Nws pub tej uas peb xav tau.

Kuv ua tim khawv txog txoj kev hlub loj uas peb qhia tau vim peb yog cov thwj tim thiab cov uas coj raws li tus Tswv Yexus Khetos. Kuv hlub thiab txhawb nqa Thawj Tswj Hwm Thomas S. Monson ua Vajtswv tus yaj saub nyob hauv lub ntiaj teb no. Phau Ntawv Maumoos yog ib zaj lus tim khawv ntxiv txog Yexus Khetos rau lub ntiaj teb, thiab kuv caw txhua tus nyeem thiab kawm zaj lus uas nyob haud. Txhua tus uas txais yuav tus Tswv tej lus caw kom los cuag Nws yuav nrhiav tau kev kaj siab lug, kev hlub thiab kev kaj. Yexus Khetos yog peb tus Yam Ntxwv thiab tus Txhiv Dim. Yog dhau los ntawm Yexus Khetos xwb, thiab qhov txuj ci tseem ceeb uas yog Nws txoj Kev Theej Txhoj, uas peb thiaj txais tau txoj sia nyob mus ib txhis. Kuv ua tim khawv txog qhov no los ntawm Nws lub npe dawb huv, Yexus Khetos, amees.