Lod I Stap Lidim Jos blong Hem

Ol dia brata blong mi we yufala i kasem prishud blong God. Tedei mi wantem toktok long yufala long gudfala wei ia we Lod i lidim kingdom blong Hem long wol ia. Yufala i save finis ol stamba poen blong hem. Mi prea se Tabu Spirit bae i konfemem ol stamba poen long yufala.

Faswan. Jisas Kraes i hed blong Jos long ful wol.

Seken. Hem i stap lidim Jos blong Hem tedei taem Hem i toktok long ol man we Hem i singaotem olgeta ol profet, mo Hem i mekem hemia tru long revelesen.

Nambatri. Hem i bin stap givim revelesen long ol profet blong Hem longtaem finis i kam, Hem i stap givim yet, mo bambae Hem i gohed blong mekem olsem.

Nambafo. Hem i givim revelesen long olgeta we oli wok anda long lidasip blong ol profet blong Hem.

Aot long ol stamba poen ia, yumi luksave se ful lidasip blong Jos blong Lod i nidim bigfala mo strong fet blong save givim seves long Hem long wol ia.

Eksampol, i nidim fet blong biliv se Lod we i laef bakegen i stap luklukgud long evri dei ditel blong kingdom blong Hem. Hem i nidim fet blong bilivim se Hem i singaotem ol pipol we oli no stret gud blong tekem ol posisen blong tras. I nidim fet blong bilivim se Hem i save gud evriwan ol pipol we Hem i stap singaotem; Hem i save, tugeta, paoa blong olgeta blong mekem samting, mo mak blong paoa we oli save kasem blong mekem samting, mo long wei ia, hem i no save mekem mistek taem Hem i stap singaotem olgeta.

Hemia i save mekem wan i smael mo i seksekem hed long ples ia—olgeta we oli ting se koling blong olgeta i wan mistek, mo tu, olgeta we oli ting long wan narawan we oli save, we oli ting se hem i no stap long ples blong hem insaed long kingdom blong Lod. Kaonsel blong mi long tufala grup ia, i olsem: holemtaet ol kaen jajmen olsem kasem taem yu save luk gud wanem we Lod i luk. Jajmen we yu nidim blong mekem, i we yu yu gat paoa blong kasem revelesen, mo yu save tekem aksen folem mo no nid blong fraet.

Yu nidim fet blong mekem olsem. Mo i nidim moa bigfala fet blong biliv se Lod i singaotem wan man we i no stret nating blong i lidim yu. Stamba tingting blong mi tedei, i blong bildimap fet blong yu, se God i stap lidim yu long seves blong yu long Hem. Mo iven moa impoten, hop blong mi i blong bildimap fet blong yu, se Lod i stap givim insperesen long ol pipol we oli no stret evriwan, we Hem i singaotem olgeta olsem ol lida blong yu.

Fastaem, maet bae yu tingting se kaen fet olsem, i no impoten blong Jos mo kingdom blong Lod i gat sakses. Be, bae yu faenemaot se—i nomata se yu stap wea long jen blong prishud seves, stat long profet blong Lod i go kasem wan niuwan we i kasem Aronik Prishud—fet ia, i nid blong stap.

Bae mi stat wetem wanem nao fet i minim long wan presiden blong kworom blong ol tija. Hem i impoten blong hem i mas gat fet, se Lod i singaotem hem stret, mo Lod i save wiknes mo paoa blong tija ia. Hem i mas gat fet se man we i givim koling ia, i bin kasem revelesen tru long Spirit blong God. Ol kaonsela blong Hem mo ol memba blong kworom blong hem oli nidim sem kaen fet ia blong folem hem wetem tras we i no gat fraet.

Mi luk kaen tras ia taem wan boe, i bin sidaon long kworom presidensi blong ol dikon, long wan Sandei moning. Oli jes singaotem hem i kam sekretari. Yang Man presidensi ia i kaonsel tugeta. Oli tokbaot ol defren wei we oli save mekem wanem bisop i askem blong mekem wan lesaktiv boe i kambak long Jos. Afta we oli prea mo toktok tugeta, oli jusum se sekretari nao bae i go long hom blong wan boe ia we i neva go long wan miting, mo invaetem boe ia blong kam.

Sekretari ia i no save boe ia, be hem i save se papa o mama blong boe ia, wan i lesaktiv mo narawan i no memba blong Jos, mo tufala i no ol kaen pipol. Sekretari i wari smol be i no fraet. Hem i bin save se profet blong God i bin askem ol prishud blong tekem sipsip we i lus i kambak. Mo hem i bin harem prea blong presidensi blong hem. Hem i harem olgeta oli agri long nem blong boe blong go sevem, mo nem blong hem tu.

Mi stap lukluk taem sekretari ia i wokbaot long rod i go long haos blong lesaktiv boe ia. Hem i wokbaot sloslo olsem se bae i fesem bigfala denja. Be afta haf aoa, hem i kambak daon long rod wetem boe ia, i smael, i hapi. Mi no save se hem i bin save long tetaem ia, be hem i bin go wetem fet se hem i stap mekem wan wok blong Lod. Fet ia i bin stap wetem hem mo i bin gro ova ol yia blong hem olsem wan misinari, wan papa, wan lida blong ol yang man, mo wan bisop.

Bae yumi tokbaot wanem nao, kaen fet olsem, i minim long wan bisop. Wan bisop, samtaem oli singaotem blong hem i givim seves long ol pipol we oli save gud hem. Ol memba blong wod oli save sam wiknes blong hem mo sam samting we hem i strong long hem long saed blong spirit, mo oli save se maet God i save singaotem wan narawan insaed long wod—wan narawan we i skul gud, i gat moa eksperiens, i moa kaen, mo tu, wan we bodi mo fes blong hem i luk moa gud.

Ol memba ia, oli mas save se, koling ia, blong givim seves olsem wan bisop, i kam long Lod, tru long revelesen. Sapos ol memba ia oli no gat fet, bisop ia we God i singaotem hem, bae i faenem i had moa blong kasem revelesen blong helpem olgeta. Bae hem i no save mekem, sapos hem i no gat fet blong ol memba blong sapotem hem.

Mo i gud blong luk se nara wei tu, i tru. Tingting long wokman ia blong Lod, King Benjamin, we i lidim ol pipol blong hem blong oli sakem sin. Hat blong ol pipol i kam sofsof tru long fet blong olgeta, se God i singaotem hem nomata ol wiknes blong hem, mo bilif blong olgeta se ol toktok blong hem, oli kam long God. Yu tingbaot wanem nao ol pipol oli talem: “Yes, mifala i bin bilivim evri toktok we yu bin talemaot long mifala; mo tu, mifala i save se ol toktok ia oli stret gud mo oli tru, from Spirit blong Lod we I Gat Ol Paoa, i bin mekem wan bigfala jenis long mifala, o insaed long hat blong mifala, mekem se mifala i nomo wantem blong mekem nogud fasin, be blong gohed blong mekem gudfala fasin oltaem.” (Mosaea 5:2).

Blong wan lida i gat sakses long wok blong Lod, tras blong ol pipol se God i singaotem hem i mas winim wanem oli stap lukluk long saed blong ol samting we hem i no save mekem mo ol wiknes blong hem. Yu tingbaot olsem wanem King Benjamin i eksplenem lidasip rol blong hemwan bakegen:

“Mi no bin givim oda long yufala blong kam ia blong bae yufala i fraet long mi, o blong bae yufala i ting se mi mi moa hae long wan man blong wol.

“Be mi mi olsem yufala nomo, mi mi save kasem evri kaen fasin blong no stap strong long bodi mo tingting; be stil ol pipol ia oli bin jusum mi, mo papa blong mi i bin konsekretem mi, mo han blong Lod i bin letem mi blong bae mi kam wan man blong rul mo kam wan king long ol pipol ia; mo Lod i bin lukaotgud mo holemtaet gud mi i stap wetem paoa blong hem we i bitim eni narafala paoa, blong wok blong helpem yufala wetem ful paoa blong tingting, ful maen, mo ful paoa we Lod i bin givim long mi” (Mosaea 2:10–11).

Mebi yu luk se lida blong yu long Jos blong Lod i wan man nating nomo mo hem i gat wiknes, o maet yu luk se hem i strong mo gat insperesen. Wanem we i tru, i we, evri lida, oli gat tufala kaen fasin olsem, mo moa long hemia. Wanem i helpem ol wokman blong Lod we God i singaotem blong lidim yumi, i taem yumi save luk olgeta olsem we Lod i bin luk olgeta taem Hem i singaotem olgeta.

Lod i luk ol wokman blong Hem i klia nomo. Hem i luk mak we oli save kasem, mo fiuja blong olgeta. Mo Hem i save olsem wanem fasin blong olgeta i save jenis. Hem i save tu, olsem wanem oli save jenis folem ol eksperiens blong olgeta wetem ol pipol we oli stap lidim.

Maet yu gat eksperiens ia we yu kam strong moa tru long ol pipol we oli singaotem yu blong givim seves long olgeta. Wan taem, oli singaotem mi kam bisop blong ol yang singgel adalt. Mi no sua se stamba tingting blong Lod i wanem jenis nao mi save helpem Hem blong mekem long ol yangfala ia, o ol jenis we Hem i bin save se ol yangfala ia bae oli mekem long mi.

I go kasem wan level we mi no andastanem, be plante long ol yang pipol ia long wod ia, oli mekem se God i singaotem mi speseli blong olgeta. Oli luk wiknes blong mi, be oli luk i go ova long ol wiknes ia.

Mi tingbaot wan yang man, we hem i askem advaes long saed blong edukesen joes blong hem. Hem i wan niu studen long wan gudfala yunivesiti. Wan wik afta we mi bin givim advaes ia, hem i putum nara apoenmen wetem mi.

Taem hem i kam long ofis blong mi, hem i mekem mi sek taem hem i askem: “Bisop. ?Yumitu save prea bifo yumitu storian? ?Mo yumitu save nildaon? ?Mo mi mi save prea?”

Wanem hem i askem i mekem mi mi sapraes. Be prea blong hem i mekem mi sapraes moa. I go wan samting olsem: “Papa long Heven, Yu Yu save se Bisop Aering i givim advaes long mi long las wik, mo i no wokaot. Plis givim insperesen long hem blong save wanem bae mi mekem naoia.”

Nao, yu save laf long hemia, be mi mi no laf. Hem i bin save finis wanem Lod i wantem hem blong mekem. Be hem i givim ona long ofis blong wan bisop insaed long Jos blong Lod, mo maet hem i bin wantem mi blong gat janis blong gat moa tras blong kasem revelesen long koling ia.

I wokaot. Taem mitufala i stanap, mo afta sidaon, revelesen i kam long mi. Mi talem long hem wanem we mi filim Lod i wantem hem blong mekem. Hem i gat 18 yia nomo long tetaem ia, be hem i raep gud long saed blong spirit.

Hem i bin save finis se hem i no nidim blong go luk bisop from kaen problem ia. Be hem i bin lanem blong sapotem wokman blong Lod wetem wiknes blong hem. Hem i kam wan stek presiden. Hem i tekem wetem hem lesen ia we yumi lanem tugeta: sapos yu gat fet se Lod i stap lidim Jos blong Hem tru long revelesen long ol wokman we Hem i singaotem, we oli no stret evriwan, nao bae Lod i openem ol windo blong heven long olgeta, semmak olsem bae Hem i mekem long yu.

Aot long eksperiens ia, mi tekem lesen ia i go, se fet blong ol pipol we yumi givim seves long olgeta, samtaem moa bitim fet blong yumi, bae i tekem yumi blong kasem revelesen insaed long seves blong Lod.

I gat wan nara lesen blong mi. Sapos boe ia i bin jajem mi from mi no givim hem gudfala advaes long fas taem, bae hem i neva kambak blong askem bakegen. So, taem hem i jusum blong no jajem mi, hem i kasem konfemesen we hem i bin wantem.

Bakegen, wan nara lesen aot long eksperiens ia, i bin helpem mi. Mi save se, hem i neva bin talem long eniwan long wod se mi mi no bin givim gudfala advaes long hem long fas ples. Sapos hem i bin mekem hemia, maet bae i daonem fet blong ol narawan insaed long wod blong oli trastem insperesen we i kam long bisop.

Mi traem blong no jajem ol wokman blong Lod, o blong tokbaot ol wiknes blong olgeta. Mo mi traem blong tijim hemia tru long eksampol long ol pikinini blong mi. Presiden James E. Faust i serem wan prinsipol we mi traem blong mekem i kam blong miwan. Mi serem wetem yufala:

“Yumi nidim blong sapotem mo sastenem ol lokol lida blong yumi, from se God i singaotem mo jusum olgeta. Evri memba blong Jos ia, i save kasem kaonsel long wan bisop o wan branj presiden, wan stek o misin presiden, mo Presiden blong Jos mo olgeta we oli wok wetem hem. I no gat wan long ol brata ia we i askem koling ia. I no gat wan man i stret evriwan. Be yet, oli ol wokman blong Lod, we Hem i singaotem olgeta tru long olgeta we oli gat raet blong kasem insperesen. Olgeta we oli singaotem, sastenem, mo setem olgeta apat, oli gat raet blong kasem sapot blong yumi.

“… Blong no gat respek long ol lida blong jos i mekem se plante oli safa from oli nomo strong long saed blong spirit mo oli foldaon. Yumi mas luk i go bitim ol samting we i no stret, ol rong, o i bitim ol wiknes blong ol man we God i singaotem blong prisaed ova long yumi, mo blong wok long ofis we oli holem” (“Called and Chosen,” Liahona, Nov. 2005, 54–55).

Kaonsel ia i blesem ol wokman blong God anda long evri situesen.

Long ol fas yia blong Jos blong Lod, ol lida we oli bin stap kolosap long Profet Josef Smit oli stat blong tokbaot ol rong blong hem. Iven wetem evri samting we oli bin luk, mo oli bin save abaot ples we hem i stanap long hem wetem Lod, spirit blong poenem fingga mo jalus i pas i go olbaot olsem wan sik. Wan long Olgeta Twelef, i stanemap standet blong fet mo tru fasin we yumi mas gat sapos yumi mas stap mo givim seves insaed long kingdom blong Lod.

Hemia nao ripot: “Samfala elda oli bin singaotem wan miting insaed long tempol blong evriwan we i bin ting se Josef Smit i wan Profet we i stap foldaon. Oli bin wantem blong jusum Deved Witma olsem niufala lida blong Jos. … Afta we hem i lisin long ol toktok we oli kam agensem Profet, Brigham Yang i girap mo i testifae: ‘Josef i bin wan Profet, mo mi bin save hemia, mo oli save rekem hem mo spolem hem hamas we oli wantem; be oli no bin save spolem mo karemaot koling blong hem olsem Profet blong God; oli save spolem atoriti blong olgeta, katemaot tred ia we i fasem olgeta long Profet mo long God, mo draonem olgetawan long hel’” (Church History in the Fulness of Times Student Manual [Church Educational System manual, 2003], 2nd ed., 174; luk tu long Teachings of Presidents of the Church: Brigham Young [1997], 79).

I gat wan tred we i fasem yumi long Lod insaed long seves blong yumi. I stat long ples we oli singaotem yumi blong givim seves insaed long kingdom, i go tru long olgeta we God i singaotem blong prisaed ova long yumi long prishud, mo i go kasem profet, we Hem i joen long Lod. Hem i tekem fet mo tingting i stap daon blong givim seves long ples we God i singaotem yumi long hem, blong trastem se Lod i singaotem yumi mo olgeta we oli prisaed ova long yumi, mo blong sastenem olgeta wetem ful fet.

Bae i gat ol taem, olsem i bin gat long taem blong Ketlan, we bae yumi nidim fet mo ful tru fasin blong wan Brigham Yang blong stanap long ples we Lod i singaotem yumi long hem, blong stap tru long profet blong Hem mo long ol lida we Hem i putum olgeta i stap.

Mi talem long yufala, tabu mo glad witnes blong mi se Lod Jisas Kraes i stap rul. Hem i stap lidim Jos blong Hem mo ol wokman blong Hem. Mi mi witnes se Thomas S. Monson i wan man ia nomo we i holem mo i yusum evri ki blong tabu prishud long wol ia. Mo mi prea se blesing bae i stap long evri wokman we oli gat tingting i stap daon, we oli stap givim seves wetem hat mo gud fasin insaed long jos blong Jisas Kraes we i kambak. Mi testifae se Josef Smit i bin luk God Papa mo Jisas Kraes. Tufala i bin toktok long hem. Ol ki blong prishud oli kambak blong blesem evriwan long ol pikinini blong Papa long Heven. Hem i misin mo wok blong yumi blong givim seves long ples blong yumi insaed long wok blong Lod. Long nem blong Jisas Kraes, amen.