Prishud mo Paoa blong Atonmen blong Sevya

Pikjarem wetem mi, wan roket we oli muvum i go long ples we i stap rere blong flae. Naoia, pikjarem wetem mi, faea we i stap kamaot long roket taem fiul i stap bon, afta i jenis i kam hot gas we i sut aot blong givim paoa ia blong pusumaot roket i go long skae. Laswan, pikjarem kago we i stap sidaon antap long roket. Valiu blong kago ia i kam klia taem kago i kasem ples we i sapos blong stap long hem mo mekem wok blong hem. Yu no nid blong yu wan roket saentis blong luksave se wan wol komunikesen satelaet bae i no gat valiu sapos hem i sidaon i stap long wan stok haos. Misin blong wan roket i blong deliva wan kago.

Long naet ia, mi wantem komperem prishud we yumi holem wetem wan roket, mo janis blong kasem help long paoa blong atonmen blong Sevya wetem kago we roket ia i stap deliva.

From sakrifaes blong Hem we i pem praes, Jisas Kraes i gat paoa mo atoriti blong pemaot evri man. Blong mekem paoa blong atonmen blong Hem i stap oltaem, Hem i givim pat blong paoa mo atoriti blong Hem long ol man long wol. Paoa mo atoriti ia we oli givim, oli singaotem prishud. Hem i letem olgeta we i holem prishud oli helpem Papa long Heven mo Jisas Kraes long wok blong Tufala—blong sevem mo mekem ol pikinini blong God oli kam ol god. Hem i mekem olsem blong givim janis long ol pikinini blong hem blong kasem ol blesing blong paoa blong atonmen blong Sevya.

Paoa blong atonmen blong Jisas Kraes i impoten from yumi no save gobak long hom blong yumi long heven sapos i no gat help. Long wol ia, yumi mekem mistek mo brekem ol loa blong God. Yumi kam doti from sin mo no save gobak long ples ia we God i stap long hem. Yumi nidim paoa blong atonmen blong Sevya blong yumi save stap wetem Papa long Heven. Jisas Kraes i brekem rop blong ded, mekem se evriwan i laef bakegen long ded. Hem i fogivim ol sin, taem yumi obei ol loa mo ol odinens blong gospel blong Hem. Tru long Hem, yumi kam olsem wan god. Janis blong kasem blesing aot long paoa blong atonmen blong Sevya hem i moa impoten kago ia we oli krietem.

Blong ol stamba tingting blong Papa long Heven oli hapen, paoa blong atonmen blong Kraes i nid blong stap oltaem blong evri pikinini blong God oli yusum.¹ Prishud i givim ol janis ia. Hem i roket ia. Prishud i impoten from ol odinens mo kavenan long wol ia oli hapen nomo, tru long atoriti ia. ?Sapos prishud i no save givim janis ia blong kasem blesing tru long paoa blong atonmen blong Sevya, bae prishud ia i blong wanem? ?Bae i stap nomo olsem wan samting we i pulum ae blong pipol from laod noes mo kalkala blong hem? God i wantem blong oli yusum prishud, blong hem i moa bitim wan klas nomo long Sandei o wan janis blong givim seves. Hem i wantem prishud i deliva kago ia.

Smol problem long roket i save bagaremap wan misin. Ol brokbrok pat o pat we i taed, i save mekem roket i no wok gud. Blong protektem prishud long wanem mi singaotem, ol brokbrok pat o pat we i taed, God i protektem wei we oli givim mo yusum prishud.² Sef wei blong givim prishud i tru long ol prishud ki, we oli ol raet we oli givim long man blong stap olsem wan presidensi.³ Fasin blong yusum prishud, hemia tu, ol prishud ki oli protektem, be tu, i stap sef tru long ol kavenan we prishud man ia i mekem. Fasin blong yusum prishud, i stap anda long tugeta, ol prishud ki mo ol kavenan. Wok blong wan man blong prishud, wanwan i kasem, mo hem i no kontrolem.⁴ Prishud i no wan kaen samting we i gat paoa blong lidim hemwan bakegen.

Tugeta, Aronik mo Melkesedek Prishud oli kasem tru long kavenan.⁵ God i disaed long ol rul mo man i akseptem. Blong talem, olgeta we oli holem prishud oli promes blong helpem God long wok blong Hem. Long stat blong dispensesen ia, Jisas Kraes i eksplenem se prishud kavenan “ i konfemem long yufala blong gud blong yufala, mo i no blong gud blong yufala nomo, be blong gud blong ful wol … from olgeta oli kam long mi.”⁶

Hemia i tijim se prishud i blong invaetem ol narawan blong kam long Kraes blong helpem olgeta i kasem gospel ia we i kambak. Yumi gat prishud ia blong helpem ol pikinini blong Papa long Heven blong karemaot hevi blong sin mo kam olsem Hem. Tru long prishud, paoa blong kam olsem wan god i kamaot long laef blong evriwan we i mekem mo kipim ol gospel kavenan mo kasem ol odinens we i kam wetem.⁷ Hemia nao rod we man i folem blong kam long Kraes, i klin gud, mo i kam wan wetem God. Paoa blong atonmen blong Kraes i mekem yumi gat raet ia tru long prishud, we i deliva kago ia.

Ol kavenan wetem God oli no blong pleplei, oli tabu. Man i mas rere from, i mas lanem, mo mekem ol kavenan ia wetem strong tingting blong ona long olgeta. Wan kavenan i kam wan promes long yuwan. Mi talem long wan defren wei smol toktok we, Robet Bolt, wan Inglis man blong raetem plei i talem, se, wan man i mekem kavenan nomo taem hem i wantem komitim hemwan fulwan long wan promes. Hem i mekem wan aedentiti blong hemwan bitwin trutok blong promes mo klin fasin blong hemwan. Taem wan man i mekem wan kavenan, hem i stap holem hemwan, olsem wan wota we i stap insaed long tufala han blong hem. Mo sapos hem i openem fingga blong hem, hem i no nid blong gat hop ia se bae hem i faenem hemwan bakegen. Wan man we i brekem kavenan, i nomo komitim hemwan o nomo kasem ol blesing ia.⁸

Wan man we i holem Aronik Prishud i mekem kavenan blong stap longwe long rabis samting, i stap helpem ol narawan blong stretem olgeta wetem God, mo rere blong kasem Melkesedek Prishud.⁹ Olgeta tabu responsabiliti blong hem, hem i stap mekem olgeta taem hem i tijim, baptaesem, mekem ol memba blong Jos oli kam strong, mo taem hem i stap invaetem ol narawan blong akseptem gospel. Hemia nao i ol wok blong “roket” blong hem. Blong givimbak, God i promesem hop, fogivnes, wok blong ol enjel, mo ol ki blong gospel blong sakem sin mo baptaes.¹⁰

Wan man blong Melkesedek prishud, i mekem ol kavenan blong mekem ol responsabiliti we i kam wetem Aronik Prishud mo blong givim ona long koling blong hem long Melkesedek Prishud.¹¹ Hem i mekem, taem hem i kipim ol komanmen we i kam wetem kavenan ia. Ol komandem ia i gat, “strong tingting blong folem ol toktok blong laef we i no save finis” taem yu laef folem evri toktok we i kamaot long maot blong God,¹² serem testemoni abaot Jisas Kraes mo wok blong Hem long ol las dei,¹³ taem yu no leftemap nem blong yu,¹⁴ mo taem yu kam fren blong Sevya, mo trastem Hem olsem wan fren bae i mekem.¹⁵

Folem hemia, God i promes se wan man we i holem Melkesedek Prishud bae i risivim ol ki blong andastanem ol sikret blong God. Hem bae i kam stret evriwan, blong hem i save stanap long fes blong God. Bae hemi save mekem wok blong hem, long wok blong sevem man. Jisas Kraes bae i rere long rod fastaem blong man we i holem prishud mo bae Hem i stap wetem man ia. Tabu Spirit bae i stap long hat blong prishud ia mo ol enjel bae oli leftemap hem antap. Bodi blong hem bae i kam strong moa mo niu bakegen. Bae hem i gat raet long ol blesing blong Ebraham mo, wetem waef blong hem, tufala i joen wetem Jisas Kraes long Kingdom blong Papa long Heven.¹⁶ Oli ol “nambawan mo tabu promes.”¹⁷ I no gat promes we i nambawan moa we yu save pikjarem.

Long wanwan man we i kasem Melkesedek Prishud, God i konfemem ol promes blong kavenan blong man ia wetem wan strong mo tabu promes.¹⁸ Strong mo tabu promes ia i blong Melkesedek Prishud nomo,¹⁹ mo hem i God we i mekem strong mo tabu promes ia, be i no wan man we i kasem prishud.²⁰ From spesel situesen ia i tekem insaed tabu paoa blong Hem mo atoriti, God i yusum wan strong mo tabu promes, we i kam wetem strong toktok we Hem i save yusum, blong mekem se yumi save stret se ol promes blong Hem oli stap oltaem mo oli no save jenis.

Ol nogud risal oli kam, taem wan i brekem ol prishud kavenan mo tanem baksaed long olgeta.²¹ Taem wan i no ting hevi o no intres long wan prishud koling, hem i olsem we oli stap putum ol pat blong roket we i nomo strong i go long roket. Hem i putum prishud kavenan long denja from i save mekem se misin ia, i no gat sakses. Fasin blong no stap obei long ol komanmen blong God i brekem kavenan. Long hem we i gohed blong no sakem sin mo brekem kavenan, Hem i tekemaot ol blesing we Hem i bin promesem.

Mi kam blong andastanem fulwan rilesensip bitwin “prishud” we i roket mo “janis blong karem gudfala samting aot long paoa blong atonmen blong Kraes” we i kago, samfala yia i pas. Long wan wiken, mi bin gat tu wok blong mekem. Wan i blong krietem fas stek long wan kantri, mo narawan i blong intaviu wan yang man mo, sapos evri samting i stret, putumbak prishud mo ol tempol blesing long hem. Man ia gat 30 yia mo i bin joenem Jos taem hem i wan yut. Hem i finisim misin blong hem wetem ona. Be taem hem i gobak hom, hem i lusum rod, mo hem i lusum membasip blong hem insaed long jos. Afta sam yia, “gudfala tingting i kambak long hem,”²² mo wetem help blong ol prishud lida mo ol kaen memba, hem i sakem sin mo baptaes bakegen insaed long Jos.

Afta, hem i aplae blong kasembak ol prishud mo tempol blesing blong hem. Mifala i putum wan apoenmen blong Satedei long 10 klok moning long mitinghaos. Taem mi kasem ples blong mekem ol nara intaviu bifo hemia blong hem, hem i stap finis longwe. Hem i wantem tumas blong kasem prishud bakegen, hem i nomo save wet.

Long taem blong intaviu, mi soem hem leta we i eksplenem se Presiden Thomas S. Monson i bin lukluk tru long aplikesen ia hemwan mo i givim raet blong mi mekem intaviu. Yangfala man ia wetem fasin blong save wet longtaem, i krae. Mi talem long hem se deit blong intaviu blong mitufala bae i no minim eni samting long laef blong hem. Hem i konfius. Mi letem hem i save se afta mi givimbak ol blesing long hem, membasip rekod blong hem bae i soem nomo fas deit blong baptaes blong hem, fas konfemesen, fas prishud odinens, mo fas endaomen deit. Hem i sapraes bakegen.

Mi askem hem blong ridim Ol Doktrin mo Kavenan:

“Luk, man we i bin sakem ol sin blong hem, mi fogivim hem, mo mi, Lod, mi nomo tingbaot ol sin ia bakegen.

“Long wei ia bae yufala i save sapos wan man i bin sakem ol sin blong hem—luk, bae hem i talemaot ol sin blong hem, mo bae hem i livim olgeta fogud.”²³

Wota i fulap long ae blong hem blong nambatri taem. Afta, mi putum han blong mi long hed blong hem mo long nem blong Jisas Kraes, wetem atoriti blong Melkesedek prishud, mo raet blong Presiden blong Jos, mi putumbak prishud mo ol tempol blesing.

Glad we i kam long mitufala i dip tumas. Hem i save se hem i kasem bakegen atoriti blong holem mo yusum prishud blong God. Hem i save se ol tempol blesing blong hem oli kambak bakegen. Hem i wokbaot wetem glad mo glad ia i saenaot long fes blong hem. Mi glad tumas mo filim save se Papa long Heven tu i glad long hem.

Afta long hemia, stek i oganaes. Ol miting oli fulap wetem ol hapi mo fetful sent, mo oli bin sastenem wan naesfala stek presidensi. Be, blong mi, histri taem ia blong oganaesem fas stek long wan kantri, mi no tingbaot tumas, from glad ia i bin kavremap taem ia, glad ia we mi bin filim taem mi putumbak ol blesing long yangfala man ia.

Mi kam blong luk save se stamba tingting blong oganaesem wan stek, o yusum prishud blong God long eni wei, i blong helpem Papa long Heven mo Jisas Kraes long wok blong Tufala— blong givim wan janis blong fasin blong pemaot man mo fasin blong kam olsem wan god long wanwan pikinini blong God. Olsem roket we stamba tingting blong hem i blong deliva kago, prishud i deliva gospel blong Jisas Kraes, mekem se evriwan i save mekem ol kavenan mo kasem ol odinens we oli kam wetem. “Blad blong Kraes we i pemaot man”²⁴ yumi save yusum insaed long laef blong yumi taem yumi stap gat eksperiens blong paoa blong Tabu Spirit we i stap mekem yumi kam tabu, mo taem yumi kasem ol blesing we God i promesem.

Antap long fasin blong yuwan blong obei ol loa mo ol odinens long gospel, mi invaetem yu blong mekem mo kipim ol prishud kavenan. Kasem strong tabu promes blong God mo promes blong Hem. Wok strong long ol responsabiliti blong prishud blong helpem Papa long Heven mo Jisas Kraes. !Yusum prishud blong help deliva janis ia long wan narawan blong hem i kasem blesing tru long paoa blong atonmen blong Sevya! Taem yu mekem hemia, plante blesing bae i kam long yu mo famli blong yu. Mi testifae se Ridima i stap laef mo i stap daerektem wok ia, long nem blong Jisas Kraes, amen.