Lub Pov Thawj Hwj thiab tus Cawm Seej lub Hwj Chim Theej Txhoj

Cia li nrog kuv xav txog ib lub nkoj huab uas tso rau ntawm qhov chaw ya mus. Nim no cia li xav txog kev muab cig. Cov roj, uas kub hnyiab zuj zus, hloov los ua roj cua uas txhuav tawm, kom thawb tau lub nkoj huab mus puag saum ntuj. Qhov kawg, cia li xav txog pob khoom, los yog lub nra, uas lub nkoj huab thauj. Pob khoom ntawd muaj nqis tsuas yog thaum thauj tau pob khoom txog qhov chaw yog thiab tej khoom ntawd khiav tau raws li tau teem tseg. Tsis tas yus yog ib tug kws kawm txuj ci txog lub nkoj huab kom to taub hais tias ib lub tshuab xa xov xwm kom thoob ntiaj teb tsis muaj nqis yog tias nyob twj ywm hauv ib lub tsev rau khoom xwb. Lub nkoj huab lub luag hauj lwm yog kom xa pob khoom txog qhov chaw yog.

Hmo no kuv xav muab lub pov thawj hwj uas peb tuav piv rau ib lub nkoj huab uas mus tau puag saum nruab ntug thiab lub cib fim kom txais tau tus Cawm Seej lub hwj chim theej txhoj piv rau pob khoom uas lub nkoj huab ntawd thauj.

Vim yog los ntawm Nws txoj kev txi theej txhoj, Yexus Khetos muaj lub hwj chim thiab txoj cai kom txhiv tib neeg txhua leej txhua tus dim. Xwv kom tib neeg siv tau Nws lub hwj chim theej txhoj, Nws tau tso cai ib feem ntawm Nws lub hwj chim thiab txoj cai rau cov txiv neej hauv lub ntiaj teb. Lub hwj chim thiab txoj cai uas Nws tso cai rau lawv hu ua pov thawj hwj. Lub hwj chim no cia cov uas tuav pov thawj hwj pab Leej Txiv Saum Ntuj Ceeb Tsheej thiab Yexus Khetos ua Nkawd txoj hauj lwm—kom Vajtswv cov me nyuam txais tau kev tsa nto thiab kev cawm seej. Muaj li no vim lub hwj chim no ua rau Nws cov me nyuam muaj cib fim txais tau cov koob hmoov ntawm tus Cawm Seej lub hwj chim theej txhoj.

Peb yuav tsum muaj Yexus Khetos lub hwj chim theej txhoj vim tsis muaj leej twg uas yuav rov qab los rau peb tsev neeg saum ntuj ceeb tsheej yog tsis muaj kev pab. Nyob hauv lub neej no, peb yeej ua yuam kev thiab txhaum Vajtswv tej kev cai. Kev txhaum ua rau peb tsis huv thiab Vajtswv tsis pub peb rov qab los rau hauv Nws xub ntiag. Peb yuav tsum muaj tus Cawm Seej lub hwj chim theej txhoj kom peb rov qab sib raug zoo nrog Leej Txiv Saum Ntuj Ceeb Tsheej. Yexus Khetos tau muab kev tuag ntawm sab nqaij daim tawv tej hlua tu nrho, qhib kev rau txhua tus sawv rov los. Nws muab kev zam txim rau peb, yog peb mloog lus thiab ua raws li Nws txoj moo zoo tej kev cai thiab cov kab ke. Dhau los ntawm Nws, Vajtswv muab kev tsa nto rau lawv. Lub cib fim kom txais tau kev pab los ntawm tus Cawm Seej lub hwj chim theej txhoj yog pob khoom tseem ceeb tshaj plaws txij thaum ntuj tsim teb raug los.

Yog yuav muaj raws li Leej Txiv Saum Ntuj Ceeb Tsheej tej hom phiaj, ces yuav tsum muab Khetos lub hwj chim theej txhoj rau Vajtswv cov me nyuam.¹ Lub pov thawj hwj muab tej cib fim no rau lawv. Lub pov thawj hwj yog lub nkoj huab. Lub pov thawj hwj yeej tseem ceeb vim hais tias yuav tsum muaj txoj cai kom muab cov kab ke thiab kev khi lus hauv lub ntiaj teb rau lwm tus. Yog tias lub pov thawj hwj tsis muab cib fim rau tib neeg kom txais tau kev pab los ntawm tus Cawm Seej lub hwj chim theej txhoj, ces lub pov thawj hwj muaj nqis dab tsi? Puas yog lub nkoj huab yog ib lub paj hluav taws loj loj uas xav kom txhua tus saib xwb? Vajtswv xav kom peb siv lub pov thawj hwj ua ntau yam tsis yog qhia ib hoob thaum hnub Sunday los yog pab lwm tus xwb. Nws xav kom lub pov thawj hwj xa pob khoom mus.

Yog muaj tej yam tsis zoo me me nyob hauv tej nkoj huab ces ntshe ua tsis taus nws lub luag hauj lwm. Tej khoom uas nkig thiab cov hlau uas tsis khov yuav ua rau ib lub nkoj huab tsis ua hauj lwm. Xwv kom yuav pov hwm lub pov thawj hwj kom tsis txhob muaj tej teeb meem no, Vajtswv pov hwm kev muab pov thawj hwj rau tib neeg thiab kev siv lub pov thawj hwj.² Vajtswv siv tej yuam sij pov thawj hwj kom pov hwm kev muab lub pov thawj hwj, uas yog txoj cai ua ib pawg thawj tswj hwm uas pub rau tib neeg.³ Zoo ib yam li ntawd kev siv lub pov thawj hwj yog los ntawm cov yuam sij pov thawj hwj thiab los ntawm tej kev khi lus uas tus uas tuav lub pov thawj hwj ua. Yus siv lub pov thawj hwj raws li cov yuam sij ntawm lub pov thawj hwj thiab tej kev khi lus. Ib tug txiv neej txoj kev txib kom siv lub pov thawj hwj yog muab rau nws tus kheej kiag thiab tsis yog nyias nyob nyias;⁴ lub pov thawj hwj tsis yog ib lub hwj chim uas tsis muaj cag tsis muaj ceg hlo li.

Yus txais lub Pov Thawj Hwj Aloos thiab Mekhixedes los ntawm kev khi lus.⁵ Vajtswv yog tus uas teem tseg tej uas yuav tsum ua thiab tib neeg lees txais tej ntawd. Cov uas tuav lub pov thawj hwj khi lus tias lawv yuav pab Vajtswv ua Nws txoj hauj lwm. Nyob hauv lub caij nyoog tso txoj cai no, Yexus Khetos piav hais tias kev khi lus pov thawj hwj los “tau muab tsa rau nej kom pab nej, thiab tsis yog kom pab nej nkaus xwb, tiam sis kom pab tag nrho neeg ntiaj teb … vim lawv tsis los cuag kuv.”⁶

Nqe no qhia tias lub hom phiaj ntawm lub pov thawj hwj yog kev caw lwm tus los cuag Khetos thaum pab lawv txais txoj moo zoo uas tau muab txum tim rov qab los. Peb muaj lub pov thawj hwj kom peb thiaj pab tau Leej Txiv Saum Ntuj Ceeb Tsheej cov me nyuam tshem tau lub nra ntawm kev txhaum thiab hloov los ua neeg zoo li Nws. Dhau los ntawm lub pov thawj hwj, txhua tus uas ua raws li tej kev khi lus ntawm txoj moo zoo thiab txais cov kab ke muaj lub hwj chim ua neeg zoo li Vajtswv nyob hauv lawv lub neej.⁷ Txoj kev no yog txoj kev uas peb txhua tus los cuag Khetos, Nws ua kom peb huv, thiab peb rov qab sib raug zoo nrog Vajtswv. Lub pov thawj hwj, uas xa pob khoom mus, yog qhov uas thauj Yexus Khetos lub hwj chim theej txhoj los rau tib neeg.

Tej kev khi lus nrog Vajtswv yeej tseem ceeb thiab muaj nuj nqis. Ib tug txiv neej yuav tsum muaj siab xav ua raws li nws tej kev khi lus thaum nws npaj, kawm thiab ua kev khi lus. Kev khi lus yog kev khi yus tus kheej. Zoo li tus kws sau yeeb yam Robert Bolt hais tias, ib tug neeg ua kev khi lus thaum nws xav cog lus tiag tiag xwb. Nws muab qhov tseeb ntawm kev cog lus txuas rau nws tus kheej txoj kev tsim txiaj. Thaum ib tug txiv neej ua kev khi lus, zoo nkaus li nws ob xib teg cev cov dej, cov dej uas piv txog nws tus kheej. Yog nws qhib nws cov ntiv tes, ces ntshe nws yuav nrhiav tsis tau nws tus kheej ntxiv li lawm. Ib tug uas rhuav nws txoj kev khi lus yeej tsis muaj nws tus kheej kom cog lus tau.⁸

Ib tug uas tuav lub Pov Thawj Hwj Aloos khi lus tias nws yuav tsis txhob kov kev phem, nws yuav pab lwm tus rov sib raug zoo nrog Vajtswv, thiab npaj txais lub Pov Thawj Hwj Mekixedes.⁹ Yuav muaj raws li tej kev lav ris dawb ceev no thaum nws qhia, muab neeg ua kev cai raus dej, txhawb nqa cov mej zeej ntawm lub Koom Txoos, thiab caw lwm tus lees txais txoj moo zoo. Tej no yog tej hauj lwm ntawm nws lub “nkoj huab.” Yog ua li ntawd, ces Vajtswv cog lus tias yuav muab kev cia siab, kev zam txim, cov tim tswv txoj kev txhawb pab, thiab cov yuam sij ntawm txoj moo zoo xws li kev hloov siab lees txim thiab kev cai raus dej.¹⁰

Ib tug uas tuav lub Pov Thawj Hwj Mekixedes khi lus tias nws yuav ua raws li tej kev lav ris ntawm lub Pov Thawj Hwj Aloos thiab rau siab ua raws li qhov uas Vajtswv hu nws ua nyob hauv lub Pov Thawj Hwj Mekixedes.¹¹ Nws ua li no thaum nws ua raws li cov lus txib uas txuas rau kev khi lus ntawd. Cov lus txib no yog “rau siab mloog cov lus ntawm txoj sia nyob mus ib txhis” los ntawm kev ua neej “raws li txhua lo lus uas tawm ntawm Vajtswv lub qhov ncauj los,”¹² ua tim khawv txog Yexus Khetos thiab Nws lub luag hauj lwm hauv hnub nyoog kawg,¹³ tsis txhob khav txog nws tus kheej,¹⁴ thiab los ua tus Cawm Seej tus phooj ywg, tso siab rau Nws ib yam li ib tug phooj ywg.¹⁵

Yog ua li ntawd, Vajtswv cog lus tias ib tug uas tuav lub Pov Thawj Hwj Mekixedes yuav txais cov yuam sij kom to taub Vajtswv tej txuj ci uas neeg paub tsis txog. Nws yuav hloov los ua neeg zoo tag nrho kom nws sawv taus hauv Vajtswv xub ntiag. Nws yuav ua nws lub luag hauj lwm nyob hauv txoj kev cawm seej. Yexus Khetos yuav npaj txoj kev rau tus uas tuav lub pov thawj hwj thiab yuav nrog nws nyob. Tus Vaj Ntsuj Plig Dawb Huv yuav nyob hauv tus uas tuav lub pov thawj hwj lub siab thiab cov tim tswv yuav txhawb nqa nws. Vajtswv yuav muab txhawb nws lub cev kom muaj dag muaj zog. Nws yuav los txais Anplaham cov koob hmoov ua nws tug, thiab nrog nws tus poj niam, koom nrog Yexus Khetos txais Leej Txiv Saum Ntuj Ceeb Tsheej lub nceeg vaj.¹⁶ Tej no yeej yog tej kev cog lus zoo kawg nkaus.¹⁷ Tsis muaj tej lus cog tseg uas tseem ceeb dua.

Hais rau txhua tus txiv neej uas txais tau lub Pov Thawj Hwj Mekixedes, Vajtswv siv kev lav lus kom pom zoo rau Nws tej kev khi lus.¹⁸ Kev lav lus no yog hais txog lub Pov Thawj Hwj Mekixedes xwb,¹⁹ thiab yog Vajtswv uas hais kev lav lus no, tsis yog tus uas tuav lub pov thawj hwj.²⁰ Vim hais tias tej no yog hais txog Nws lub hwj chim thiab txoj cai, Vajtswv siv kev lav lus, siv tej lus uas muaj kuab heev, kom qhia peb tias Nws tej lus cog tseg yeej khi peb thiab thim tsis taus.

Tus uas rhuav nws tej kev khi lus pov thawj hwj thiab tig hlo mus yuav raug tej xwm txheej uas sab heev.²¹ Qhov uas yus tsis tshua quav ntsej los yog tsis xav li cas txog txoj kev hu kom siv lub pov thawj hwj yeej zoo li yus ua rau tej khoom ntawm lub nkoj huab tsis khov. Ntshe tsim teeb meem rau kev khi lus pov thawj hwj vim hais tias tej zaum yuav ua rau yus ua tsis taus yus lub luag hauj lwm. Qhov uas yus tsis ua raws li Vajtswv cov lus txib ua rau kev khi lus rhuav lawm. Yog tias muaj ib tug uas pheej rhuav kev khi lus thiab nws tsis hloov siab lees txim, ces Vajtswv yuav muab cov koob hmoov thim.

Ob peb xyoos tas los ua rau kuv to taub zoo dua txog qhov uas lub nkoj huab ntawm “lub pov thawj hwj” thiab pob khoom uas yog “lub cib fim kom txais kev pab los ntawm Khetos lub hwj chim theej txhoj” sib txuas ua ke li cas. Thaum hnub rau thiab hnub xya, kuv muaj ob txoj hauj lwm. Yam thib ib yog kom txhim tsa thawj ceg txheem ntseeg nyob hauv ib lub teb chaws, thiab yam thib ob yog xam phaj ib tug tub hluas thiab yog tias txhua yam zoo, ces muab nws cov koob hmoov ntawm lub pov thawj hwj thiab lub tuam tsev txum tim rov qab los rau nws. Tus txiv neej uas muaj 30 xyoo no twb koom lub Koom Txoos thaum nws yog ib tug tub hluas. Nws twb mus ua ib tug tub txib lawm. Tiam sis thaum nws rov qab los tsev, nws xaiv txoj kev tsis yog, thiab nws poob nws txoj kev ua mej zeej hauv lub Koom Txoos. Ob peb xyoos tom qab ntawd, “nws nco dheev,”²² thiab nrog nws cov thawj coj pov thawj hwj thiab cov mej zeej uas siab zoo txoj kev pab, nws hloov siab lees txim thiab rov qab ua kev cai raus dej hauv lub Koom Txoos.

Tom qab ntawd, nws xa ntawv thov kom muab nws cov koob hmoov ntawm lub pov thawj hwj thiab lub tuam tsev txum tim rov qab los. Wb teem sij hawm rau hnub Saturday thaum 10 teev sawv ntxov nyob hauv lub tsev sib ntsib. Thaum kuv tuaj muab lwm tus tuaj xam phaj ua ntej, nws twb nyob ntawd lawm. Nws xav xav rov qab muaj lub pov thawj hwj ntxiv, nws tos tsis tau.

Thaum wb xam phaj kuv muab daim ntawv rau nws uas piav tias Thawj Tswj Hwm Thomas S. Monson twb tau saib nws daim ntawv thov thiab tso cai rau wb xam phaj. Ua rau tus txiv neej no los kua muag. Ces kuv qhia nws tias hnub uas wb ua kev xam phaj no yeej yuav tsis muaj nqis nyob hauv nws lub neej. Kuv saib nws zoo li nws tsis to taub. Kuv qhia nws tias tom qab kuv muab nws cov koob hmoov txum tim rov qab los, ces nyob hauv nws daim ntawv ua mej zeej tsuas yuav pom thib ib uas nws ua kev cai raus dej, ua kev pom zoo, txais lub pov thawj hwj, thiab txais vaj txiaj ntsim. Ua rau nws rov qab los kua muag.

Kuv hais kom nws nyeem los ntawm phau Lus Qhuab Qhia thiab Kev Khi Lus:

“Saib seb, tus uas tau hloov siab lees txim rau nws tej kev txhaum, ces twb zam txim rau tus ntawd, thiab kuv, tus Tswv, tsis nco qab txog tej ntawd ntxiv.

“Zoo li no nej thiaj yuav paub yog tias ib tug neeg tau hloov siab lees txim rau nws tej kev txhaum—saib seb, nws yuav lees txhaum thiab tso tej kev txhaum ntawd tseg.”²³

Nws los kua muag zaum peb. Ces kuv tso kuv tes saum nws lub taub hau thiab los ntawm Yexus Khetos lub npe, thiab los ntawm txoj cai ntawm lub Pov Thawj Hwj Mekixedes, thiab nrog tus Thawj Tswj Hwm ntawm lub Koom Txoos txoj kev tso cai, kuv rov qab muab nws cov koob hmoov ntawm lub pov thawj hwj thiab lub tuam tsev rau nws.

Wb txoj kev xyiv fab yeej loj kawg nkaus. Nws paub tias nws rov qab muaj cai tuav thiab siv Vajtswv lub pov thawj hwj. Nws paub tias nws cov koob hmoov ntawm lub tuam tsev rov qab ua hauj lwm. Nws muaj kev zoo siab thaum nws mus kev thiab txoj kev kaj nyob ib puag ncig nws. Kuv zoo siab heev rau nws thiab kuv paub tias Leej Txiv Saum Ntuj Ceeb Tsheej zoo siab rau nws.

Tom qab ntawd, kuv muab ceg txheem ntseeg txhim tsa. Muaj Tsoom Haiv Neeg Ntseeg uas rau siab ntseeg thiab zoo siab tuaj rau tej kev sib ntsib, thiab tau txhawb nqa pom zoo rau ib ceg txheem ntseeg pawg thawj tswj hwm zoo heev. Tiam sis, rau kuv mas, qhov uas tau txhim tsa thawj ceg txheem ntseeg nyob hauv ib lub teb chaws yeej tsis ua rau kuv muaj kev xyiv fab npaum li qhov uas kuv muab cov koob hmoov txum tim rov qab los rau tus txiv neej no.

Kuv twb kawm hais tias lub hom phiaj ntawm kev txhim tsa ib ceg txheem ntseeg, los yog kev siv Vajtswv lub pov thawj hwj ua ib yam dab tsi, yog kom pab Leej Txiv Saum Ntuj Ceeb Tsheej thiab Yexus Khetos ua Nkawd txoj hauj lwm—kom muab cib fim rau Vajtswv cov me nyuam txhua tus txais tau kev txhiv dim thiab kev tsa nto. Zoo li lub nkoj huab uas lub hom phiaj yog kom xa pob khoom mus, lub pov thawj hwj xa Yexus Khetos txoj moo zoo, xwv kom txhua tus ua kev khi lus thiab txais cov kab ke. Yog li ntawd, peb siv tau “Khetos cov ntshav uas theej txhoj”²⁴ hauv peb lub neej thaum peb txais tau tus Vaj Ntsuj Plig Dawb Huv lub hwj chim uas hloov peb los ua neeg dawb huv thiab txais cov koob hmoov uas Vajtswv cog lus rau peb.

Nrog rau kev ua raws li tej kev cai thiab cov kab ke ntawm txoj moo zoo nej tus kheej, kuv caw nej ua thiab ua raws li lub pov thawj hwj tej kev khi lus. Cia li txais Vajtswv txoj kev lav lus thiab Nws cov lus cog tseg. Rau siab ua raws li nej tej kev lav ris los ntawm lub pov thawj hwj kom pab Leej Txiv Saum Ntuj Ceeb Tsheej thiab Yexus Khetos. Cia li siv lub pov thawj hwj kom xa lub cib fim rau lwm tus txais tau kev pab los ntawm tus Cawm Seej lub hwj chim theej txhoj! Thaum nej ua li ntawd, nej thiab nej tsev neeg yuav tau koob hmoov ntau heev. Kuv ua tim khawv tias tus Txhiv Dim muaj txoj sia nyob thiab coj txoj hauj lwm no, los ntawm Yexus Khetos lub npe, amees.