Tanem Yu I Go long Lod

Long springtaem blong 1998, Karol mo mi i mekem wan kombaen bisnis mo famli holidei trip mo mifala i tekem ol fofala pikinini, wetem mama blong waef we i jes lusum man blong hem, mo mifala i go long Hawae blong sam dei.

Naet bifo mifala i aot i go long Hawae, boe blong mitufala we i gat fo manis, Jonathon, oli faenem wan sik long sora, mo oli talem se bae hem i no save travel blong tri o fo dei. Mifala i disaed se bae Karol i stap long haos wetem Jonathon, mo bae mi go wetem ol nara memba blong famli.

Fas saen we i soem se hemia i no trip we mi tingting long hem, i hapen i no longtaem afta mifala i kasem Hawae. Mifala i stap wokbaot long smol rod we kokonat i gro saedsaed long hem, wetem mun i saen, mo wetem solwota long fored blong mifala, mo mi tanem mi blong talem se aelan i naes, mo long lav taem ia, mi no luk Karol, be mi lukluk ae blong mama blong waef—we, mi save talem, mi lavem hem. Be i no wanem mi tingting long hem. Mo tu, Karol i no ting se bae i spendem holidei long hom hemwan wetem sik boe blong mitufala.

Bae i gat ol taem long laef blong yumi we yumi stap long wan rod we yumi no ting long hem, yumi fesem ol situesen we oli moa had bitim wan holidei we i no go gud. ?Olsem wanem nao yumi fesem ol kaen taem olsem we yumi no save kontrolem, we oli jenisim laef we yumi plan from o hop from?

Long 6 Jun 1944, Hyrum Shumway, wan yang seken lietnen long ami blong Yunaeted Stet i go so long Omaha Bij long taem blong D dei. Hem i lan sef, be long 27 Julae, taem ami i stap maj i go, hem i kasem bigfala kil from wan maen i faerap. Wantaem nomo, laef blong hem mo fiuja wok blong hem i jenis. Afta long plante taem we oli katem hem, we i bin helpem hem blong kam oraet, Brata Sumwei i no save luk samting long ae blong hem. ?Bae hem i fesem hemia olsem wanem?

Afta long trifala yia long hospital blong kam oraet, hem i gobak hom long Lovel, Waeoming. Hem i bin save se drim blong hem i blong kam wan medikol dokta bae i nomo posibol, be hem i gat strong tingting blong muv i go, mared mo sapotem wan famli.

Hem i kasem wok long Baltimo, Merilan, olsem wan kaonsela blong helpem man mo wok speselis blong olgeta we oli blaen. Long taem we hem i stap kam oraet, hem i bin lanem se olgeta we oli blaen oli save mekem moa bitim wanem we hem i ting long hem, mo long taem blong eit yia blong hem long posisen ia, hem i bin putum moa blaen man i go long wok bitim eni nara kaonsela long nesen.

Naoia, hem i trastem hemwan se bae i save lukaot long wan famli; Haeram i askem mared long switat blong hem, mo talem hem: “Sapos yu save ridim ol leta long postofis, sotemaot ol stoking mo draevem trak, bae mi mekem haf wok we i stap.” I no longtaem tufala i sil long Sol Lek Tempol mo tufala gat blesing blong gat eit pikinini.

Long 1954, Shumway famli i gobak long Waeoming, mo Brata Sumwei i wok blong 32 yia olsem Stet Daerekta blong Edukesen blong Olgeta we Oli Blaen mo Sora i Fas. Long tetaem ia, hem i givim seves tu blong seven yia olsem bisop blong Seyen Fas Wod, mo afta, 17 yia olsem stek petriak. Taem hem i finis wok, Brata mo sista Sumwei, tufala i stap olsem kapol misinari long London Saot Misin.

Haeram Sumwei i ded long Maj 2011, i livim biaen wan histri blong fet mo tras long Lod, iven anda ol hadtaem, i livim hemia long wan longfala laen blong ol pikinini, apupikinini, mo smol apupikinini.¹

Laef blong Haeram Sumwei, maet wo i bin jenisim, be hem i neva gat tu tingting abaot tabu fasin blong hem mo hamas moa hem i save kasem. Olsem hem, yumi ol spirit boe mo gel blong God, mo yumi “akseptem plan, we, tru long hem, yumi save kasem wan bodi blong mit mo bun, mo kasem wan eksperiens long wol blong save progres blong kam stret evriwan, mo long en, luksave tabu fiuja blong yumi olsem man mo woman we i gat raet long laef we i no save finis.”² I no gat inaf jenis, tes, o agens we i save jenisim rod ia we i no save finis—joes blong yumi nomo i mekem hemia taem yumi praktisim fridom blong joes blong yumi.

Ol jenis, ol risal blong ol jalenj we yumi fesem long wol ia i tajem wanwan long yumi long wan kaen wei. Olsem yu, mi bin witnesem ol fren mo ol famli we oli fesem ol jalenj we oli kamaot from:

• Wan we yumi lavem i ded.

• Wan konkon divos.

• Maet janis blong mared i neva kam.

• Bigfala sik o kil.

• Mo iven ol disasta, olsem we yumi bin witnesem i no longtaem i pas raon long wol.

Mo lis i gohed. Nomata we wanwan long ol “jenis” ia oli wan ia nomo long wanwan situesen blong yumi, i gat wan samting we i semmak long risal blong tes o jalenj—hop mo pis oli stap oltaem tru long sakrifaes blong Jisas Kraes we i pem praes. Atonmen blong Jisas Kraes i givim rod blong stretem samting, mo mak blong hilim evri kil long bodi, long spirit, long hat we i brokbrok.

Hem i save, long wan wei, se i no gat nara man i save andastanem wanem nao yumi nidim, olsem wanwan man o woman, blong save muv i go fored long medel blong taem we jenis i stap hapen. Hem i no semmak long ol fren mo olgeta we yumi lavem; Sevya i no sore long yumi nomo, be Hem i andastanem yumi evriwan, from se Hem i bin stap long ples we yumi stap long hem. Antap blong pem praes mo safa from ol sin blong yumi, Jisas Kraes i bin wokbaot long evri rod, i dil wetem evri jalenj, i fesem evri harem nogud—long bodi, long filing mo long spirit—we bae yumi save fesem long wol ia.

Presiden Boyd K. Packer i tijim: “Sore mo gladhat blong Jisas Kraes oli no nomo blong olgeta we oli mekem ol sin… be oli tekem promes blong pis we i no gat en i go long evriwan we bae i akseptem mo folem Hem. Sore blong Hem i nambawan meresin blong hilim man, iven man we i no gat rong we i gat kil.” ³

Long eksperiens blong wol ia, yumi no save kontrolem evri samting we i stap hapen long yumi, be yumi save kontrolem fulwan olsem wanem yumi fesem ol jenis long laef blong yumi. Hemia i no minim se ol jalenj mo ol tes we yumi fesem oli no gat risal blong ol, o i isi blong dil wetem. Hem i no minim se bae yumi fri long harem nogud mo hat i brok. I minim se i gat hop mo hemia, i from Atonmen blong Jisas Kraes; yumi save muv fored mo faenem ol moa gud dei–iven ol dei we oli fulap long glad, laet mo hapines.

Long Mosaea, yumi ridim stori blong Alma, foma pris blong King Noa, mo ol pipol blong hem we “Lod i bin wonem olgeta, mo oli aot long waelples fastaem long ol ami blong king Noa.” Afta long eit dei, “oli kam long wan graon we i naes tumas mo i gud mo oli stanemap ol tenet blong olgeta mo oli stat blong wok long graon, mo oli stat blong bildim ol bilding.”⁴

Situesen blong olgeta, naoia, i luk gud. Oli bin akseptem gospel blong Jisas Kraes. Oli bin kasem baptaes olsem wan kavenan se bae oli givim seves long Lod mo bae oli obei ol komanmen blong Hem. Mo “oli kam plante mo kam antap gud long graon.”⁵

Be situesen blong olgeta bae i jenis i no longtaem. “Wan ami blong Ol Man blong Leman i stap long boda blong graon.”⁶ Alma mo ol pipol blong hem oli bin stap prisena mo “oli gat fulap hadtaem nao oli prea strong long God.” Antap long hemia, olgeta we oli holemtaet olgeta oli stopem olgeta blong prea, sapos no, “huia we bae oli faenem se hem i stap prea long God, bae oli kilim hem i ded.”⁷ Alma mo ol pipol blong hem oli no mekem wan samting rong blong gotru long hemia. ?Bae oli fesem olsem wanem?

Oli no blemem God. Oli tanem olgeta i go long God mo oli “talemaot hat blong olgeta long Hem.” Olsem ansa blong fet mo prea blong olgeta, Lod i ansa: “Stap glad. [Bambae mi mekem ol samting we yufala i tekem long solda oli nomo hevi we bae yufala i no filim long baksaed blong yufala; mo oli glad blong folem evri tingting blong Lod wetem longfala tingting.]”⁸ Nomata we oli no fri yet long fasin blong slef, oli tanem olgeta i go long Lod, be oli no go longwe long Lod, mo oli bin gat blesing folem nid blong olgeta mo folem waes tingting blong Lod.

Elda Dallin H. Oaks i bin tijim: “Ol blesing blong hiling oli kam long plante wei, wanwan i stret long wanwan nid blong yumi, olsem we Hem we i lavem yumi i save gud. Samtaem, hiling i mekem sik i kam oraet, o i mekem samting i no hevi. Be samtaem, yumi kasem ‘hiling’ taem yumi kasem paoa, o andastaning, o fasin blong wet longtaem blong save tekem ol hevi samting we oli stap long yumi.”⁹

Long en, “fet mo fasin blong wet longtaem i bigwan tumas,” mo Lod i mekem Alma mo ol pipol blong hem oli go fri, mo oli “talem tangkyu” “from se oli bin slef mo i no gat wan i save mekem olgeta oli go fri, be Lod we i God blong olgeta nomo.”¹⁰

Plante taem, wanem i nogud, i we, olgeta we oli stap long nid oli tanem olgeta longwe long ples we i stret evriwan blong kasem help—Sevya, Jisas Kraes. Wan skripja stori blong snek blong aean we yumi save gud, i tijim yumi se yumi gat wan joes taem yumi fesem jalenj. Afta we plante long ol pikinini blong Isrel, “[ol snek oli kakae olgeta,]”¹¹ oli resemap wan saen i stap, se huia bae i lukluk, bae i save laef. [Be hemia i bin wan joes.] Plante oli lukluk mo oli laef.

“Be i gat plante we hat blong olgeta i strong tumas, mekem se oli no luk, nao oli ded.”¹²

Olsem Ol Man Isrel bifo, oli invaetem mo leftemap tingting blong yumi tu blong lukluk long Sevya mo stap laef—from yok blong Hem i isi mo ol samting blong Hem oli no hevi blong tekem, iven taem hemia blong yumi i hevi.

Yangfala Alma i tijim tabu trutok ia taem hem i talem: “Mi save se eni man we bae i putum tras blong hem long God, bae God i sapotem olgeta long ol tes blong olgeta, mo trabol blong olgeta, mo ol hadtaem blong olgeta, mo bae God i leftemap olgeta long las dei.”¹³

Long ol las dei, Lod i givim yumi plante risos, saen blong yumi, we i stap blong helpem yumi luk long Kraes mo putum tras blong yumi long Hem. Blong dil wetem ol jalenj blong laef i no blong no wantem save long ril laef, be i blong jusum weaples blong lukluk nomo long hem, mo weaples nao bae yumi jusum blong bildimap yumi antap long hem.

Hemia samfala risos, be i no olgeta ia nomo:

• Stadi evri taem long ol skripja mo ol tijing blong ol profet we oli stap laef.

• Tru prea mo fasin blong livim kakae we yumi mekem oltaem.

• Stap klin inaf blong tekem sakramen.

• Stap go long tempol oltaem.

• Prishud blesing.

• Waes kaonsel tru long ol profesenol.

• Mo tu, tekem meresin taem dokta i givim mo yu yusum olsem oli talem.

Nomata wan jenis i hapen long situesen blong laef, mo nomata wanem rod yumi mas wokbaot folem, hao yumi fesem, hem i wan joes. Blong tanem yumi i go long Sevya mo hang long han blong Hem we Hem i stretem i kam long yumi, i bes rod blong folem.

Elda Richard G. Scott i tijim trutok ia we i no save finis: “Hapines we i tru, we i stap strong, wetem paoa long bodi, paoa long tingting, mo paoa blong winim kolosap evri jalenj we i had, i kam taem yu gat Jisas Kraes long medel blong yu. I no gat se risal i hapen long wan dei nomo, be i gat stret save ia, se, long stret taem blong Lod, ol ansa oli kam, pis i wik, mo ples we emti i kam fulap bakegen.”¹⁴

Long saed blong ol trutok ia, mi mi witnes long ol. Long nem blong Jisas Kraes, amen.