Saib Seb! Vaj Ntxwv Pab Tub Rog

Kuv cov kwv tij uas tuav lub pov thawj hwj, kuv txo hwj chim sawv rau ntawm nej thaum lub sij hawm tseem ceeb heev no, raws li peb tus yaj saub thiab tus Thawj Tswj Hwm, Russell M. Nelson, tau txib kuv ua. Kuv hlub thiab txhawb nqa tus txiv neej zoo uas mloog Vajtswv lus no thiab peb Thawj Pawg Thawj Tswj Hwm tshiab. Kuv koom nrog Txwj Laug D. Todd Christofferson thiab lwm tus Kwv Tij hauv Pawg Kaum Ob tug Thwj Tim ua tim khawv tias tej yam uas peb hloov hmo no yog tus Tswv lub siab nyiam.

Zoo li Thawj Tswj Hwm Nelson hais, nov yog ib yam uas peb cov Kwv Tij ntawm lub Koom Txoos tau thov Vajtswv thiab sib tham txog tau ntev. Qhov uas peb xav ua yog nrhiav tus Tswv lub siab nyiam thiab txhawb tej pawg Pov Thawj Hwj Mekixedes kom muaj dag zog. Peb tau txais kev tshoov siab, thiab hmo no peb tus yaj saub tau qhia tus Tswv lub siab nyiam rau peb. “Tus Tswv yuav ua ib yam dab tsi, nws yeej xub qhia rau nws cov tub txib uas yog cov [yaj saub] paub ua ntej nws mam ua!”¹ Peb tau koob hmoov vim peb muaj ib tug yaj saub niaj hnub nim no!

Nyob hauv kuv lub neej, Muam Rasband thiab kuv wb tau ncig mus thoob plaws lub ntiaj teb thaum wb txais kev txib ua hauj lwm rau lub Koom Txoos thiab rau kuv txoj hauj lwm. Kuv twb pom tej pawg hauv lub Koom Txoos txhua hom: ib ceg ntseeg me me nyob hauv lub teb chaws Russia uas siv tau ib txhais tes xwb suav tias muaj pes tsawg tus uas tuav lub Pov Thawj Hwj Mekixedes, ib pawg ntseeg tshiab uas tseem loj tuaj nyob hauv Afikas uas cov pov thawj hlob thiab cov txwj laug sib ntsib ua ke vim tag nrho cov uas tuav lub Pov Thawj Hwj Mekixedes los tseem tsawg xwb, thiab tej pawg ntseeg uas nyob ntev uas muaj cov txwj laug coob heev lawv thiaj li yuav tsum muab faib ua ob pawg!

Txhua qhov chaw uas wb mus, wb tau pom tus Tswv txhais tes pab Nws cov neeg ua ntej Nws cov tub qhe los txog, npaj cov neeg thiab npaj txoj kev kom tag nrho Nws cov me nyuam yuav tau koob hmoov raws li lawv xav tau. Nws twb cog lus tias Nws “yuav ua [peb] ntej mus” thiab “nyob ntawm [peb] sab xis thiab nyob ntawm [peb] sab laug”, thiab Nws “tus Ntsuj Plig yuav nyob hauv [peb] lub siab, thiab [Nws] cov tim tswv nyob ib puag ncig [peb].”²

Thaum kuv xav txog nej txhua tus, ua rau kuv nco txog zaj nkauj qhuas Vajtswv hu ua “Saib Seb! Vaj Ntxwv Pab Tub Rog.”

Txwj Laug Christofferson tau teb ob peb lo lus nug uas yeej yuav muaj tom qab tau tshaj tawm tias yuav muab pawg pov thawj hlob thiab pawg txwj laug, nyob hauv ib pawg ntseeg, koom ua ke nyob hauv ib pab tub rog loj loj uas yog cov kwv tij ntawm lub Pov Thawj Hwj Mekixedes.

Tej kev hloov no yuav pab tej pawg txwj laug thiab tej Koom Haum Niam Tsev koom siab ua lawv tej hauj lwm. Tej no kuj yuav pab pawg pov thawj no txoj kev koom tes nrog pawg npisov thiab pawg ntseeg pawg sab laj. Thiab tej no yuav pab tus npisov muab kev lav ris ntxiv rau pawg txwj laug thiab Koom Haum Niam Tsev ob tug thawj tswj hwm kom tus npisov thiab nws ob tug pab cuam muaj sij hawm tsom ntsoov rau lawv tej dej num tseem ceeb tshaj—xws li kev saib xyuas cov ntxhais hluas thiab cov tub hluas uas tuav lub Pov Thawj Hwj Aloos.

Kev hloov tej koom haum thiab tej txheej txheem hauv lub Koom Txoos yog ib yam uas yeej ib txwm muaj. Thaum xyoo 1883, tus Tswv hais rau Thawj Tswj Hwm John Taylor hais tias: “Hais txog kev tswj hwm thiab kev txhim tsa kuv lub Koom Txoos thiab lub pov thawj hwj … tej lub sij hawm kuv yuav siv tej txheej txheem uas kuv tau teem cia, muab kev tshwm sim rau nej, txog txhua yam uas yuav tsum muaj kom loj hlob tuaj rau yav tom ntej thiab ua kom kuv lub Koom Txoos zoo tag nrho, xwv kom hloov thiab khiav tau tej yam rau kuv lub nceeg vaj.”⁴

Nim no, kuv hais ob peb yam rau nej cov kwv tij uas yog pov thawj hlob—cia li paub hais tias peb hlub nej! Peb Leej Txiv thiab tus Cawm Seej hlub nej! Nej yog ib feem tseem ceeb ntawm pab tub rog uas tuav lub pov thawj hwj no, thiab peb yeej ua tsis tau tej hauj lwm thaum yav tom ntej yog tsis muaj nej lub siab zoo, txoj kev pab, tej kev txawj ntse, thiab kev ncaj ncees. Amas tau qhia hais tias Vajtswv hu cov txiv neej los ua pov thawj hlob vim lawv muaj kev ntseeg heev thiab ua tej hauj lwm zoo kom qhia thiab txhawb pab lwm tus.⁵ Txoj kev txawj ntse uas nej muaj los ntshe tam sim no peb haj yam xav tau.

Nyob hauv ntau pawg ntseeg, tej zaum peb muaj cov pov thawj hlob uas yuav muaj cib fim muaj ib tug txwj laug ua lawv pawg tus thawj tswj hwm. Yav tas los twb muaj piv txwv txog cov txwj laug uas tswj hwm cov pov thawj hlob: cov txwj laug uas tam sim no ua hauj lwm ua ceg ntseeg tus thawj tswj hwm nyob hauv tej qhov chaw uas muaj cov pov thawj hlob hauv ceg ntseeg, thiab muaj tej ceg ntseeg uas tsuas muaj ib pawg txwj laug tiam sis muaj pov thawj hlob nyob haud.

Yeej yog ib qho zoo siab uas txhua tus uas tuav lub Pov Thawj Hwj Mekixedes yuav tau koob hmoov thaum lawv qhia, kawm, thiab pab lwm tus ua ke nrog rau tag nrho cov mej zeej hauv lawv pawg ntseeg. Txawm nej nyob qhov twg los thiab txawm nej lub neej zoo li cas los, peb caw nej thov Vajtswv, rau siab ntseeg, thiab zoo siab txais tej cib fim tshiab kom coj los yog cia lwm tus coj nej thiab koom siab ua ib pawg pov thawj hwj ua hauj lwm pab lwm tus.

Tam sim no kuv yuav hais txog lwm yam uas tej zaum yuav tsum piav meej thaum peb mus tom ntej kom ua raws li tus Tswv lub siab nyiam hais txog txoj kev txhim tsa Nws tej pawg pov thawj hwj dawb huv.

Yuav hloov ceg txheem ntseeg pawg pov thawj hlob li cas? Ceg txheem ntseeg pawg pov thawj hlob tseem yuav ua li qub. Ceg txheem ntseeg pawg thawj tswj hwm tseem yuav ua hauj lwm ua pawg thawj tswj hwm ntawm ceg txheem ntseeg pawg pov thawj hlob. Tiam sis, ib yam li Txwj Laug Christofferson hais, cov mej zeej hauv ceg txheem ntseeg pawg pov thawj hlob yog pov thawj hlob uas ua hauj lwm tam sim no nyob hauv ceg txheem ntseeg pawg thawj tswj hwm, pawg npisov hauv ib pawg ntseeg, cov hauv ceg txheem ntseeg pawg sab laj hlob, thiab tus yawg suab uas ua hauj lwm tam sim no. Pawg ntseeg thiab ceg txheem ntseeg cov teev ntawv thiab tus thawj teem caij tsis yog mej zeej hauv ceg txheem ntseeg pawg pov thawj hlob. Thaum ib tug uas ua tej hauj lwm ntawm ib tug pov thawj hlob, yawg suab, tus Xya Caum, los yog Thwj Tim mus xyuas ib pawg ntseeg thiab xav mus koom kev sib ntsib pov thawj hwj, nws yuav koom nrog pawg txwj laug.

Thaum txog sij hawm muab cov kwv tij uas ua tej hauj lwm no tso tawm, lawv yuav rov qab mus koom nrog lawv pawg ntseeg los ua cov mej zeej hauv pawg txwj laug.

Ceg txheem ntseeg pawg pov thawj hlob yuav ua li cas? Ceg txheem ntseeg pawg thawj tswj hwm yuav sib ntsib nrog cov mej zeej hauv pawg pov thawj hlob kom ntuas, ua tim khawv, thiab qhia lawv. Kev sib ntsib ntawm ceg txheem ntseeg yuav muaj xws li nyob hauv peb tej phau ntawv coj kev tsuas yog hloov ob qho xwb:

Qhov thib ib, pawg ntseeg thiab ceg txheem ntseeg yuav tsis muaj pawg pov thawj hwj lub rooj tsav xwm tej kev sib ntsib (priesthood executive committee meetings). Yog tias muaj ib yam teeb meem tshwj xeeb hauv ib pawg ntseeg, xws li ib tsev neeg muaj xwm txheej los yog muaj teeb meem thaum pab lwm tus, ces tej zaum yuav hais txog qhov no nyob hauv pawg npisov ib txoj kev sib ntsib uas kav ntev me ntsis. Tej yam xwm txheej uas tsis muaj teeb meem cia lwm tus paub los hais tau nyob hauv pawg ntseeg pawg sab laj. Kev sib ntsib uas yav tas los peb hu ua ceg txheem ntseeg pawg pov thawj hwj lub rooj tsav xwm kev sib ntsib los tam sim no peb yuav hu ua “pawg sab laj hlob kev sib ntsib.”

Qhov thib ob, yuav tsis muaj kev sib ntsib rau tag nrho cov pov thawj hlob hauv ceg txheem ntseeg txhua xyoo ntxiv. Tiam sis, ceg txheem ntseeg pawg thawj tswj hwm yuav muaj kev sib ntsib txhua xyoo rau ceg txheem ntseeg pawg pov thawj hlob txhua xyoo li tau tshaj tawm hnub no.

Ib pawg ntseeg puas muaj tau ob pawg txwj laug? Muaj los tau. Zoo li hais nyob hauv Lus Qhuab Qhia thiab Kev Khi Lus tshooj 107, nqe 89, thaum ib pawg ntseeg muaj cov uas tuav lub Pov Thawj Hwj Mekixedes ntau heev, cov thawj coj muaj cai txhim tsa ntau tshaj li ib pawg txwj laug. Thaum ua li ntawd, tej pawg yuav tsum muaj sib luag zos kom txhua pawg muaj cov laus cov hluas sib xyaw, thiab muaj tej luag hauj lwm pov thawj hwj thiab muaj zog yuav luag zoo ib yam.

Kuv ua tim khawv tias thaum peb mus tom ntej hloov tej yam no uas los ntawm kev tshoov siab nyob hauv peb pawg ntseeg thiab ceg txheem ntseeg, peb yuav tau koob hmoov ntau nplua mias. Cia kuv hais ob peb yam piv txwv xwb.

Raws li tus npisov qhia, yuav muaj tej kev pab pov thawj hwj ntxiv uas pab tau txoj hauj lwm cawm neeg txoj sia. Tej kev pab no yuav muaj tej yam xws li kev pab muab Ixayees sau ua ke dhau ntawm tej hauj lwm hauv lub tuam tsev thiab kev tsev neeg zaj keeb kwm, kev ua hauj lwm pab tsev neeg thiab tib neeg uas xav tau, thiab kev pab cov tub txib coj tib neeg los cuag Yexus Khetos.

Thaum cov thawj coj yav tas los rov qab los qhia tej yam uas lawv kawm rau pawg txwj laug, kev ua mej zeej hauv pawg ntawd yuav haj yam muaj zog.

Yuav muaj tej lub txiaj ntsim thiab kev muaj peev xwm sib txawv nyob hauv pawg txwj laug.

Haj yam yuav muaj ntau yam lawv ua tau thiab muaj neeg coob ntxiv kom pab tau tej yam uas tib neeg xav tau tam sim no nyob hauv lawv pawg thiab pawg ntseeg thiab thaum ua raws li kev txib mus txhawb pab lwm tus.

Yuav muaj kev qhia thiab kev koom siab ntxiv thaum ib tug txwj laug tshiab thiab ib tug pov thawj hlob uas paub ntau nyob ua ke thiab qhia nkawd tej zaj hauv kev sib ntsib thiab thaum ua raws li txib nkawd ua.

Xav tias cov npisov thiab ceg ntseeg cov thawj tswj hwm yuav muaj kev ywj siab rau siab ua raws li lawv tej hauj lwm kom saib xyuas lawv pab yaj thiab txhawb pab cov uas xav tau kev pab.

Peb to taub hais tias txhua pawg ntseeg thiab ceg txheem ntseeg nyias txawv nyias. Peb to taub tej yam sib txawv no, tiam sis peb cia siab hais tias nej yuav ua raws li tej kev hloov no sai sai tom qab lub tuam rooj sab laj no. Vajtswv tus yaj saub twb qhia peb lawm! Yeej yog ib txoj koob hmoov thiab kev lav ris zoo kawg. Thov kom peb ua ncaj ncees rau siab ua li ntawd.

Kuv ua rau nej nco ntsoov tias txoj cai pov thawj hwj yog los ntawm kev tsa tes saum taub hau thiab kev foom koob hmoov, tiam sis lub hwj chim pov thawj hwj tiag tiag, lub hwj chim ua tej yam los ntawm tus Tswv Yexus Khetos lub npe, yeej los ntawm kev ua neej ncaj ncees xwb.

Tus Tswv tau qhia tus Yaj Saub Yauxej Xamiv, tus yaj saub ntawm Kev Muab Txoj Moo Zoo Txum Tim Rov Qab Los, hais tias:

“Saib seb, thiab xyuas seb, kuv yuav saib xyuas nej tej pab yaj, thiab yuav tsa cov txwj laug thiab xa mus rau lawv

“Saib seb, kuv yuav khiav kuv txoj hauj lwm nrawm nroos raws li lub sij hawm tsim nyog.”⁶

Muaj tseeb tiag, nov yog ib lub sij hawm thaum tus Tswv khiav Nws txoj hauj lwm nrawm nroos.

Thov kom peb cia li siv lub cib fim no xav txog peb lub neej thiab ua raws li Nws lub siab nyiam zoo dua ntxiv peb thiaj yuav tsim nyog txais cov koob hmoov uas Nws tau cog lus rau cov uas coj ncaj ncees thiab muaj siab ntseeg.

Cov kwv tij, ua nej tsaug rau txhua yam uas nej ua kom koom tes ua txoj hauj lwm zoo kawg nkaus no. Thov kom peb yuav mus tom ntej ua raws li lub hom phiaj zoo thiab txaus qhuas no.

Hnub no peb txhua tus ua tim khawv txog tus Tswv txoj kev qhia Nws lub siab nyiam dhau los ntawm Nws tus yaj saub, Thawj Tswj Hwm Russell M. Nelson. Kuv ua tim khawv tias nws yog Vajtswv tus yaj saub nyob hauv lub ntiaj teb no. Kuv ua tim khawv txog tus Tswv Yexus Khetos, tus uas yog peb tus Txhiv Dim thiab tus Cawm Seej. Nov yog Nws txoj hauj lwm, thiab nov yog Nws lub siab nyiam, kuv ua tim khawv li no los ntawm Yexus Khetos lub npe, amees.