Nej Ib tug Yuav Tsum Zam Txim rau Ib tug, Ib Yam Li Khetos twb Zam Txim rau Nej
Peb txhua tus txais tau kev kaj saib lug thiab yuav koom siab nrog peb tus Cawm Seej thaum peb kawm zam txim pub rau cov uas tau ua txhaum rau peb.
“Hnub kaj thaum kaj ntug txoog, cov poj niam txawm nqa tej tshuaj tsw qab uas lawv twb npaj tseg lawm, thiab lawv mus rau tom lub qhov ntxa.
“Lawv pom daim txiag zeb uas npog lub rooj ntxas twb dov rau ib cag lawm.
“Lawv mus saib hauv; tiam sis tsis pom Tswv Yexus lub cev lawm.
“Lawv sawv ntsug hauv thiab xav tsis thoob li, tam sim ntawd muaj ob tug txiv neej hnav ris tsho ci ntsa iab los sawv ntawm lawv ib sab.
“Cov poj niam ntawd ntshai kawg, thiab nyo hau rau hauv av, saib tsis taus ob tug txiv neej ntawd li, ob tug txiv neej ntawd hais rau lawv hais tias, Ua li cas nej tuaj nrhiav tus neeg ciaj ntawm cov neeg tuag no?
“Nws tsis nyob ntawm no, tiam sis twb sawv lawm.”1
Tag kis yog Hnub Easter, peb yuav nco ntsoov txog qhov uas Yexus Khetos tau ua rau peb: “Rau qhov Vajtswv hlub neeg ntiaj teb kawg li, nws thiaj li txib nws tib leeg Tub los rau hauv ntiaj teb. Tus uas ntseeg nws Leej Tub, ces yuav tsis tuag, tab sis yuav tau txoj sia nyob mus ib txhis.”2 Thaum kawg, peb yuav sawv rov los ib yam li Nws, kom peb nyob mus ib txhis.
Dhau los ntawm qhov txuj ci tseem ceeb uas yog Yexus Khetos txoj Kev Theej Txhoj, peb kuj txais tau lub txiaj ntsim uas yog kev zam txim rau peb tej kev txhaum thiab tej kev ua tsis yog, tsuas yog tias peb lees txais lub cib fim thiab lav ris kev zam txim. Thiab thaum peb ua tej kab ke uas peb yuav tsum ua, ua raws li peb tej kev khi lus, thiab coj raws li cov lus txib, peb yuav txais tau txoj sia nyob mus ib txhis thiab kev tsa nto.
Hnub no, kuv xav hais txog kev zam txim, uas yog ib lub txiaj ntsim tseem ceeb thiab muaj nqi uas peb tus Cawm Seej thiab tus Txhiv Dim, Yexus Khetos tau foom pub rau peb.
Muaj ib hmo thaum lub Kaum Ob Hlis Ntuj xyoo 1982, kuv tus poj niam, Terry, thiab kuv wb tsim los thaum leej twg hu xov tooj rau wb lub tsev nyob hauv Pocatello, Idaho. Kuv twb xov tooj, es tsuas hnov leej twg quaj xwb. Thaum kawg, kuv txawm hnov kuv tus muam lub suab hais tias, “Tommy tuag lawm.”
Ib tug uas muaj 20 xyoo uas tsav tsheb thaum qaug cawv, khiav ceev tshaj li 85 mais (135 km) ib xuab moos, tsis nres ntawm teeb liab nyob hauv ib lub zej zog hauv Denver, Colorado. Nws twb raug kuv tus kwv ntxawg, Tommy, lub tsheb, ua rau Tommy thiab nws tus poj niam, Joan, tuag kiag. Nkawd tab tom rov qab mus tsev rau nkawd tus me nyuam ntxhais tom qab muaj kev lom zem rau hnub Christmas.
Kuv tus poj niam thiab kuv wb txawm caij nyab hoom mus rau Denver thiab mus rau qhov chaw pam tuag. Wb tau koom nrog kuv niam kuv txiv thiab cov kwv tij cov muam thiab sib tham tu siab vim Tommy thiab Joan uas peb hlub twb xiam lawm. Ib tug neeg twb ua txhaum ua rau nkawd tas sim neej. Ua rau peb lub siab mob, thiab kuv npau taws zuj zus rau tus tub hluas uas txhaum cai ntawd.
Tommy twb yog ib tug kws lij choj rau lub Teb Chaws Amelikas Qhov Chaw Tsav Xwm rau Kev Txim Lij thiab yog ib tug uas yuav pab txhawb nqa thiab pov hwm cov Neeg Qhab tej thaj teb thiab ntiag tug hauv lub ntiaj teb rau yav tom ntej.
Sij hawm dhau mus, ces yuav ua kev txiav txim hauv tsev hais plaub rau tus tub hluas uas twb siv lub tsheb muab neeg tua tuag. Kuv niam kuv txiv thiab kuv tus muam hlob, Katy, tseem nyuaj siab heev, es lawv mus rau lub rooj hais plaub. Tus uas tsav tsheb thaum qaug cawv nws niam nws txiv nyob ntawd thiab, thiab tom qab hais plaub lawm, nkawd zaum saum lub rooj zaum ntev thiab quaj. Kuv niam kuv txiv thiab kuv tus muam zaum ze ze es lawv sim tswj lawv lub siab ntsws thiab. Tom qab ib pliag, kuv niam kuv txiv thiab kuv tus muam tau sawv thiab mus cuag tus tsav tsheb nws niam nws txiv thiab hais lus nplij nkawd lub siab thiab zam txim. Ob tug txiv neej tuav tes; cov poj niam tau koom ua ke tuav tes; muaj kev nyuaj siab thiab txhua tus tau los kua muag vim lawv txhua tus paub tias ob tsev neeg tau raug kev txom nyem heev. Niam thiab Txiv thiab Katy lawv tau muaj dag zog thiab ua siab loj qhia peb tsev neeg tias kev zam txim zoo li cas.
Qhov uas lawv tau zam txim thaum ntawd ua rau kuv lub siab mos muag ntxiv thiab qhib kev rau kuv txais kev kho mob. Sij hawm dhau mus ces kuv tau kawm kom muaj ib lub siab uas xav zam txim. Tsuas yog nrog tus Tub Vaj Ntxwv ntawm Kev Thaj Yeeb txoj kev pab thiaj li tau tshem kuv lub nra hnyav ntawd. Kuv yeej yuav nco Tommy thiab Joan, tiam sis kev zam txim ua rau kuv nco txog nkawd nrog kev xyiv fab uas tsis muaj dab tsi thaiv tau. Thiab kuv paub tias peb yuav ua ib tsev neeg nyob ua ke.
Kuv tsis qhia hais tias peb yuav tsum zam txim rau kev txhaum cai. Peb yeej paub tias tib neeg yuav tsum lav ris tej yam lawv ua thaum txhaum kev cai thiab ua tsis yog. Tiam sis, peb kuj paub tias, vim peb yog Vajtswv cov tub thiab cov ntxhais, peb coj raws li Yexus Khetos tej lus qhia. Peb yuav tsum zam txim rau tib neeg tsis hais lawv tsis tsim nyog txais tau peb txoj kev zam txim los yog.
Tus Cawm Seej qhia hais tias:
“Yog nej zam txim rau tus uas ua txhaum rau nej lawm, nej Leej Txiv tus uas nyob saum ntuj ceeb tsheej thiaj yuav zam txim rau nej:
“Tiam sis yog nej tsis zam txim rau lwm tus, nej Leej Txiv tus uas nyob saum ntuj ceeb tsheej yuav tsis zam txim rau nej thiab.”3
Peb txhua tus txais tau kev kaj saib lug thiab yuav koom siab nrog peb tus Cawm Seej thaum peb kawm zam txim pub rau cov uas tau ua txhaum rau peb. Kev koom siab no qhib kev rau tus Cawm Seej lub hwj chim los rau hauv peb lub neej uas peb yeej yuav nco ntsoov.
Tus Thwj Tim Povlauj ntuas hais tias:
“Nej yog Vajtswv haiv neeg, … yog li ntawd, nej yuav tsum hlub lwm tus thiab ua siab zoo tsis txhob khav theeb, tiam sis muaj lub siab mos siab muag thiab ua siab ntev.
“Nej ib tug yuav tsum pab ib tug [thiab ib tug yuav tsum zam txim rau ib tug] … : nej ib tug yuav tsum zam txim rau ib tug, ib yam li [Khetos] twb zam txim rau nej lawm.”4
Tus Tswv twb hais tias:
“Yog li ntawd, kuv hais rau nej tias, nej ib leeg yuav tsum zam txim rau ib leeg; vim tus uas tsis zam txim rau nws tus kwv tij tej kev txhaum yuav raug txim nyob ntawm tus Tswv xub ntiag; vim tus ntawd yog tus uas muaj kev txhaum loj dua.
“Kuv, tus Tswv, yuav zam txim rau tus uas kuv pom zoo zam txim, tiam sis nej yuav tsum zam txim rau txhua tus neeg.”5
Tus Cawm Seej thiab tus Txhiv Dim, Yexus Khetos, tej lus qhia yeej meej heev; tus uas ua txhaum yuav tsum txaus siab zam txim pub rau lwm tus yog tias tus ntawd xav txais kev zam txim.6
Cov kwv tij thiab cov muam, puas muaj neeg uas tau ua rau peb tu siab? Peb puas tseem muaj siab xav tias peb muaj cai npau taws thiab tu siab? Peb puas cia peb txoj kev muab hlob ua rau peb tsis zam txim thiab tsis tso tseg? Kuv caw peb txhua tus kom zam txim tag nrho thiab cia li muaj kev kho mob hauv peb siab. Thiab txawm yog yus zam txim tsis tau hnub no los, cia li paub hais tias thaum peb xav zam txim thiab siv zog kom muaj li ntawd, ces nej yeej yuav muaj siab xav zam txim—ib yam li thaum kawg kuv zam txim tau tom qab kuv tus kwv tas sim neej lawm.
Thov cia li nco ntsoov tias ib qho tseem ceeb ntawm kev zam txim yog qhov uas yus zam txim rau yus tus kheej.
Tus Tswv hais tias, “Tus uas tau hloov siab lees txim rau nws tej kev txhaum, ces twb zam txim rau tus ntawd, thiab kuv, tus Tswv, tsis nco qab txog tej ntawd ntxiv.”7
Kuv thov kom peb txhua tus nco ntsoov thiab coj raws li Yexus Khetos tus yam ntxwv hnub no. Nyob saum tus ntoo khaub lig nyob saum Khaulakhauthas, thaum Nws nyuaj siab kawg nkaus, Nws tau hais tej lus no: “Txiv, thov koj zam txim rau lawv; rau qhov lawv tsis paub hais tias lawv ua dab tsi.”8
Thaum peb muaj siab xav zam txim thiab peb zam txim rau lwm tus, ib yam li kuv niam kuv txiv thiab tus muam hlob, peb yuav muaj raws li tus Cawm Seej cog lus tias: “Kuv muab kuv txoj kev kaj siab tso rau nej; txoj kev kaj siab uas kuv muab pub rau nej, kuv tsis muab rau nej li neeg ntiaj teb muab. Nej tsis txhob txhawj, tsis txhob nyuaj siab thiab tsis txhob ntshai.”9
Kuv ua tim khawv tias kev kaj siab lug yuav los rau hauv peb lub neej thaum peb ua raws li Yexus Khetos tej lus qhia thiab coj raws li Nws tus yam ntxwv zam txim pub rau lwm tus. Thaum peb zam txim, kuv cog lus tias tus Cawm Seej yuav ntxiv dag zog rau peb, thiab Nws lub hwj chim thiab txoj kev xyiv fab yuav los rau hauv peb lub neej.
Tsis muaj leej twg hauv qhov ntxa. Yexus Khetos muaj txoj sia nyob. Kuv paub Nws. Kuv hlub Nws. Kuv zoo siab ua Vajtswv tsaug rau Nws txoj kev tshav ntuj, uas yog lub hwj chim ntxiv dag zog uas txawj kho txhua yam. Los ntawm Yexus Khetos lub npe dawb ceev, amees.