Ib tug Yaj Saub lub Siab
Peb yeej xyiv fab heev vim tus Tswv tus yaj saub nyob no thiab peb ua tus Tswv txoj hauj lwm raws li Nws tau pom zoo.
Kuv rau siab thov Vajtswv kom tus Vaj Ntsuj Plig Dawb Huv yuav nrog nraim peb nyob hnub no thaum lub sij hawm zoo no. Qhov uas peb sawv daws tau pom yeej zoo kawg nkaus thaum peb tau txhawb nqa tus yaj saub thib 17 hauv lub caij nyoog tso txoj cai no nyob hauv lub rooj sab laj dawb huv.
Thaum kuv tau thov kom paub tias kuv tus Tswv xav kom kuv hais txog dab tsi hnub no, ua rau kuv xav txog ib lub sij hawm thaum kuv tau sib tham nrog Thawj Pawg Thawj Tswj Hwm tshiab. Nyob hauv txoj kev sib tham no, ib tug pab cuam tau hais tej lus zoo li no rau kuv: “Kuv cia siab tias cov mej zeej ntawm lub Koom Txoos yuav to taub qhov uas peb tau hu ib tug yaj saub tshiab, Thawj Tswj Hwm Russell M. Nelson tseem ceeb npaum li cas, thiab qhov uas peb yuav muaj lub rooj sab laj dawb huv nyob hauv lub tuam rooj sab laj tseem ceeb thiab dawb huv npaum li cas.” Nws tau hais ntxiv, “Twb dhau 10 xyoo lawm, thiab ntau tus, qhov tseem ceeb yog cov tub hluas ntxhais hluas ntawm lub Koom Txoos, tsis nco qab los yog tsis tau pom dua.”
Ua rau kuv xav txog tej yam uas muaj dhau los. Thawj tus yaj saub uas kuv nco txog yog Thawj Tswj Hwm David O. McKay. Kuv muaj 14 xyoos thaum nws tau tas sim neej. Kuv nco txog qhov uas tib neeg nco nco nws heev thaum nws tso lub ntiaj teb no tseg, kuv nco txog kuv niam txoj kev los kua muag, thiab nco txog kev tu siab ntawm tag nrho kuv tsev neeg. Kuv nco txog qhov uas kuv pheej hais tej lus “Thov foom koob hmoov rau Thawj Tswj Hwm David O. McKay” thaum kuv thov Vajtswv ces yog tias kuv tsis ua tib zoo thov, ces tom qab nws tas sim neej no, kuv tseem yuav hais tej lus no. Kuv xav seb kuv puas yuav muaj siab xav zoo ib yam thiab paub zoo ib yam txog cov yaj saub uas muaj tom qab nws. Tiam sis zoo li cov niam tsev txiv tsev uas hlub lawv cov me nyuam txhua tus, kuv yeej hlub, koom siab, thiab muaj ib zaj lus tim khawv txog Thawj Tswj Hwm Joseph Fielding Smith, uas yog tus yaj saub tom qab Thawj Tswj Hwm McKay, thiab txhua tus yaj saub tom qab ntawd: Harold B. Lee, Spencer W. Kimball, Ezra Taft Benson, Howard W. Hunter, Gordon B. Hinckley, Thomas S. Monson, thiab hnub no Thawj Tswj Hwm Russell M. Nelson. Kuv twb tsa tes txhawb nqa txhua tus yaj saub kawg siab kawg ntsws—thiab tsa kuv lub siab.
Tom qab ib tug yaj saub uas peb hlub tas sim neej no, peb yeej yuav nyuaj siab thiab tu siab. Tiam sis peb txoj kev tu siab kav tsis ntev vim peb muaj kev xyiv fab thiab kev cia siab thaum peb txais ib txoj koob hmoov zoo kawg los ntawm Kev Muab Txoj Moo Zoo Txum Tim Rov Qab Los: uas yog kev hu thiab kev txhawb nqa ib tug yaj saub uas muaj txoj sia nyob hauv lub ntiaj teb.
Yog li ntawd, kuv yuav hais txog tus txheej txheem uas los ntawm ntuj ceeb tsheej uas peb tau pom 90 hnub dhau los. Kuv yuav piav txog plaub lub sij hawm hauv tus txheej txheem no: lub sij hawm thib ib, peb tus yaj saub txoj kev tas sim neej thiab kev muab Thawj Pawg Thawj Tswj Hwm kom ploj mus; lub sij hawm thib ob, lub sij hawm uas peb tos ua ntej peb rov qab tsa ib Thawj Pawg Thawj Tswj Hwm tshiab; lub sij hawm thib peb, kev hu ib tug yaj saub thiab Thawj Pawg Thawj Tswj Hwm tshiab; thiab lub sij hawm thib plaub, kev txhawb nqa ib tug yaj saub thiab Thawj Pawg Thawj Tswj Hwm tshiab nyob hauv lub rooj sab laj dawb huv.
Thaum Ib tug Yaj Saub Tas Sim Neej
Pib thaum lub Ib Hlis Ntuj hnub tim 2, xyoo 2018, peb tus yaj saub uas peb hlub Thomas S. Monson tau tas sim neej no mus dhau daim ntaub thaiv. Nws yeej yuav muaj chaw nyob hauv peb lub siab. Tej yam uas Thawj Tswj Hwm Henry B. Eyring hais nyob hauv Thawj Tswj Hwm Monson lub ntees tuag yeej piav txog tej kev xav hauv peb lub siab hais tias: “Lub cim txog nws lub neej, zoo ib yam li tus Cawm Seej, yog qhov uas nws muaj siab xav mus ncav tes pab cov pluag, cov neeg mob—thiab txhua tus neeg—nyob thoob plaws lub ntiaj teb.”1
Thawj Tswj Hwm Spencer W. Kimball piav hais tias:
“Thaum ib lub hnub qub nqig mus tim qab ntug, muaj ib lub ntxiv uas los ci ci, thiab kev tuag ua rau lwm yam muaj txoj sia.
“Tus Tswv txoj hauj lwm yeej tsis paub kawg. Txawm yog ib tug thawj coj uas muaj hwj chim tuag lawm, lub Koom Txoos no yeej muaj cov thawj coj, ua tsaug rau tus Tswv uas muaj siab zoo kom ua rau nws lub nceeg vaj mus tom ntej thiab kav ib txhis. Zoo ib yam li tau muaj yav tas los … nyob hauv lub caij nyoog tso txoj cai no, tib neeg muab tus thawj coj faus, so lawv cov kua muag, thiab mus rau yav tom ntej.”2
Cov Thwj Tim txoj Kev Kav Ib Ntus
Lub sij hawm tom qab tus yaj saub tuag thiab kev rov qab tsa Thawj Pawg Thawj Tswj Hwm mas peb hu ua “apostolic interregnum” los yog cov thwj tim txoj kev kav ib ntus. Thaum lub sij hawm no, Pawg Kaum Ob tug Thwj Tim, raws li pawg ntawd tus Thawj Tswj Hwm coj, ua ke lawv tuav cov yuam sij kom tswj hwm lub Koom Txoos. Thawj Tswj Hwm Joseph F. Smith qhia hais tias, “Yeej muaj ib tug thawj coj ntawm lub Koom Txoos, thiab yog tias tsis muaj Pawg Thawj Tswj Hwm ntawm lub Koom Txoos vim ib tug tuag los yog muaj lwm yam xwm txheej, ces cov thawj coj ntawm lub Koom Txoos yog Pawg Kaum Ob tug Thwj Tim, mus txog thaum lawv rov qab tsa ib pawg thawj tswj hwm ntxiv.”3
Lub sij hawm uas cov thwj tim kav ib ntus tsis ntev dhau los no yog thaum Thawj Tswj Hwm Monson tas sim neej thaum lub Ib Hlis Ntuj 2, 2018, thiab tau xaus thaum lub Ib Hlis Ntuj hnub tim 14. Thaum Hnub Caiv ntawd, Pawg Kaum Ob tug Thwj Tim sib ntsib hauv chav sab saud ntawm lub Tuam Tsev Salt Lake, lawv yoo mov thiab thov Vajtswv, raws li tus thawj coj uas tswj hwm uas yog Thawj Tswj Hwm Russell M. Nelson, tus Thwj Tim hlob thiab tus Thawj Tswj Hwm ntawm Pawg Kaum Ob tug Thwj Tim.
Kev Hu Ib tug Yaj Saub Tshiab
Nyob hauv kev sib ntsib dawb ceev uas kuv nco ntsoov, ua raws li tus txheej txheem uas ua dhau los nrog kev koom siab koom ntsws, cov Kwv Tij tau zaum saum 13 lub rooj zaum pib ntawm tus uas koom ntev tshaj mus txog tus uas tus uas koom tsis ntev, es lawv tau tsa tes txhawb nqa kev tsa Thawj Pawg Thawj Tswj Hwm ces tau txhawb nqa Thawj Tswj Hwm Russell Marion Nelson ua tus Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Tom qab tau ua kev txhawb nqa no Pawg Kaum Ob tug Thwj Tim tau koom ua ke nyob ib ncig Thawj Tswj Hwm Nelson thiab tau tsa tes saum nws lub taub hau kom tsa nws thiab foom koob hmoov rau nws, es tus Thwj Tim hlob tom qab nws yog tus uas hais.
Ces Thawj Tswj Hwm Nelson hais tias leej ywg yuav ua nws ob tug pab cuam, Thawj Tswj Hwm Dallin Harris Oaks, thiab Thawj Tswj Hwm henry Bennion Eyring es Thawj Tswj Hwm Oaks yuav ua tus Thawj Tswj Hwm ntawm Pawg Kaum Ob tug Thwj Tim thiab Melvin Russell Ballard yuav ua tus Thawj Tswj Hwm Sawv Cev ntawm Pawg Kaum Ob tug Thwj Tim. Tom qab uas tau tsa tes txhawb nqa rau lawv, ces Thawj Tswj Hwm Nelson tau muab cov Kwv Tij no tsa rau lawv tej luag hauj lwm. Nov yog ib lub sij hawm dawb ceev, twb muaj tus Ntsuj Plig nplua mias. Kuv ua tim khawv rau nej hais tias peb twb paub tseeb txog tus Tswv lub siab nyiam, vim peb tau thov Vajtswv kom paub tiag tiag, thaum peb tau ua tej yam no hnub ntawd.
Vim peb tau muab Thawj Tswj Hwm Nelson tsa thiab rov qab tsa Thawj Pawg Thawj Tswj Hwm, ces cov thwj tim txoj kev kav ib ntus twb tiav lawm, thiab Thawj Pawg Thawj Tswj Hwm tshiab tau pib ua hauj lwm tsis tau muaj ib me pliag uas txoj hauj lwm khiav tus Tswv lub nceeg vaj hauv lub ntiaj teb tau nres.
Rooj Sab Laj Dawb Huv
Tag kis no, tus txheej txheem los ntawm ntuj ceeb tsheej no yog raws li kev txib hauv phau Lus Qhuab Qhia thiab Kev Khi Lus uas hais tias: “Vim yuav tsum ua txhua yam kom raws txheej txheem, thiab los ntawm sawv daws kev pom yeem nyob hauv lub koom txoos, los ntawm txoj kev thov Vajtswv nrog kev ntseeg,”4 thiab “peb tug Pov Thawj Hlob uas Tswj Hwm, uas … txhawb nqa los ntawm txoj kev tso siab, kev ntseeg, thiab kev thov Vajtswv ntawm cov ntseeg, ces ua ib Pawg Thawj Tswj Hwm ntawm lub Koom Txoos.”5
Txwj Laug David B. Haight piav txog ib zaug uas tau muaj zoo li peb koom tes ua hnub no:
“Peb tau pom thiab tau koom tes ua ib yam dawb ceev—ib lub rooj sab laj dawb huv kom ua tej yam los ntawm ntuj ceeb tsheej. Zoo li ua puag thaum ub, cov Haiv Neeg Ntseeg nyob thoob plaws lub ntiaj teb tau yoo mov thiab thov Vajtswv xwv kom peb yuav muaj tus Tswv tus Ntsuj Plig nplua mias, uas peb muaj ntau heev … thaum lub sij hawm no tag kis no.
“Ib lub rooj sab laj dawb huv, uas muaj lub npe qhia lub ntsiab no, txhais hais tias yog ib lub sij hawm dawb huv, tswm seeb, thiab tseem ceeb uas Haiv Neeg Ntseeg koom ua ke raws li Thawj Pawg Thawj Tswj Hwm coj.”6
Cov kwv tij thiab cov muam, peb yeej xyiv fab heev—thiab qw Hauxanas!—vim tus uas sawv tus Tswv cev hais lus, Vajtswv ib tug yaj saub, nyob no thiab tus Tswv zoo siab uas peb ua Nws txoj hauj lwm raws li Nws tau pom zoo.
Thawj Tswj Hwm Russell M. Nelson
Vajtswv pom zoo rau tus txheej txheem no kom Nws hu ib tug yaj saub ntxiv. Ib yam li Thawj Tswj Hwm Monson yog ib tug neeg zoo tshaj plaws uas twb nyob hauv lub ntiaj teb no, Thawj Tswj Hwm Nelson yeej zoo ib yam. Tus Tswv twb tau npaj nws thiab qhia nws kom nws txawj coj peb kev thaum lub sij hawm no. Peb yeej tau koob hmoov loj heev vim peb muaj Thawj Tswj Hwm Russell M. Nelson ua peb tus yaj saub uas hlub peb—tus Thawj Tswj Hwm ntawm lub Koom Txoos thib 17 nyob hauv lub caij nyoog tso txoj cai kawg no.
Thawj Tswj Hwm Nelson yeej yog ib tug neeg zoo kawg nkaus. Kuv twb muaj cib fim nrog nws ua hauj lwm hauv Pawg Kaum Ob tug Thwj Tim es nws yog kuv pawg tus thawj tswj hwm tau ob xyoos tawm. Kuv tau nrog nws ncig teb chaws thiab kuv xav tsis thoob uas nws muaj zog heev, yus yuav tsum mus nrawm thiaj li caum tau nws ua ib txig! Nyob hauv nws lub neej nws twb mus xyuas 133 lub teb chaws.
Nws yeej ncav tes pab txhua tus, tsis hais cov hluas cov laus los yog. Zoo nkaus li nws paub txhua leej txhua tus thiab txawj nco ntsoov txhua tus lub npe. Txhua tus uas paub nws xav tias nws nyiam lawv zoo tshaj plaws. Peb yeej xav li no thiab—vim nws hlub thiab txhawj txog txhua tus tiag tiag.
Kuv paub Thawj Tswj Hwm Nelson thaum ua hauj lwm hauv lub Koom Txoos xwb, tiam sis kuv kuj paub txog Thawj Tswj Hwm Nelson lub neej thaum nws ua hauj lwm ua ntej Vajtswv hu nws ua ib tug Tuam Thawj Coj. Zoo li nej feem coob paub, Thawj Tswj Hwm Nelson yog ib tug kws phais plawv uas muaj npe nyob thoob plaws lub ntiaj teb, thiab nyob hauv nws txoj hauj lwm, nws yog ib tug uas tau tsim lub tshuab pab txhawb lub plawv thiab lub ntsws. Thawj Tswj Hwm Nelson tau ua hauj lwm nrog pawg tshawb fawb uas txhawb nqa thawj zaus uas lawv tau phais plawv nrog ib lub tshuab pab lub plawv lub ntsws thaum xyoo 1951. Thawj Tswj Hwm Nelson tau phais Thawj Tswj Hwm Spencer W. Kimball lub plawv tsis ntev ua ntej Thawj Tswj Hwm Kimball tau los ua tus yaj saub.
Qhov uas lawv hu Thawj Tswj Hwm Nelson rau Pawg Kaum Ob tug Thwj Tim 34 xyoos tas los ua rau nws ua tiav nws txoj hauj lwm ua ib tug kws kho mob uas txhawb thiab kho tib neeg lub plawv, tiam sis nws pib ua ib tug Thwj Tim ua hauj lwm qhuab qhia txhawb nqa thiab kho tib neeg lub siab kom zoo, cov neeg suav tsis txheeb uas tau txais kev txhawb nqa thiab kev zoo siab los ntam nws tej lus thiab tej yam nws ua los ntawm kev muaj tswv yim, kev pab, thiab kev hlub.
Ib lub Siab Zoo li Khetos
Thaum kuv xav txog qhov uas ib lub siab uas zoo li Khetos hauv lub neej no zoo li cas, ua rau kuv xav txog Thawj Tswj Hwm Nelson. Kuv tsis tau ntsib leej twg uas coj yam ntxwv txog qhov no zoo dua li nws. Yeej yog ib lub cib fim zoo kawg rau kuv kawm tau los ntawm tej yam kuv pom Thawj Tswj Hwm uas muaj lub siab zoo li Khetos ua.
Ob peb lim tiam tom qab kuv tau txais kev hu ua ib tug hauv Pawg Kaum Ob tug Thwj Tim thaum lub Kaum Hli Ntuj xyoo 2015, kuv twb muaj cib fim pom Thawj Tswj Hwm Nelson txoj hauj lwm ua ntej. Kuv tau txais kev caw mus koom ib qho uas nws tau txais nqi zog vim nws tsim tej yam tshiab rau kev phais mob plawv. Thaum kuv nkag mus hauv qhov chaw ntawd, kuv xav tsis thoob pom ntau tus kws ua hauj lwm uas nyob ntawd ko mhwm thiab pom zoo rau tej hauj lwm ua ib tug kws kho mob thiab tus kws phais mob uas Thawj Tswj Hwm Nelson tau ua ntau xyoo tas los.
Hmo ntawd muaj cov kws ua hauj lwm coob uas sawv thiab hais tias lawv qhuas thiab saib Thawj Tswj Hwm Nelson rau nqi rau tej yam zoo nws tau ua thaum nws yog ib tug kws kho mob. Txawm yog txhua tus uas hais qhuas ntau yam uas Thawj Tswj Hwm Nelson los, ua rau kuv txais kev tshoov siab ntau tshaj thaum kuv sib tham nrog ib tug txiv neej uas zaum ntawm kuv ib sab. Nws tsis tau paub kuv yog leej twg, tiam sis nws paub Thawj Tswj Hwm Nelson, thaum ntawd yog tus Kws Kho Mob Nelson, uas yog tus coj kev qhia cov tub ntxhais kawm kev phais mob nyob hauv ib lub tsev kawm ntawv qhia kev kho mob thaum xyoo 1955.
Tus txiv neej no yog Thawj Tswj Hwm Nelson tus tub kawm ntawd thaum yav tas los. Nws qhia ntau yam uas nws nco ntsoov. Qhov ntxim mloog tshaj yog qhov uas nws piav txog Thawj Tswj Hwm Nelson txoj kev qhia, uas nws hais tias, tib neeg ntau qhuas. Nws piav hais tias cov uas kawm ua kws phais plawv lawv kawm ntau nyob hauv chav phais mob. Nyob ntawd, cov tub ntxhais kawm ntawv pom thiab ua kev phais plawv thaum cov xib hwb saib tau lawv, zoo li yog ib hoob kawm. Nws qhia hais tias ib txhia cov kwv kho mob uas qhia lawv tswj hwm lawv chav phais mob ua lwj ua liam, kom lawv sib tw, ntxhov siab, thiab ua kom txaus tus xib hwb siab xwb. Tus no piav hais tias yog ib txoj kev nyuaj kawm, tej lub sij hawm ua rau nws txaj muag. Yog li ntawd, cov tub ntxhais kawm phais mob xav tias ntshe lawv txoj hauj lwm yav tom ntej yuav raug xwm txheej.
Ces nws piav txog Thawj Tswj Hwm Nelson chav phais mob zoo li cas. Nws yeej nyob kaj siab lug, nyob tus, thiab muaj meej mom. Cov tub ntxhais kawm ntawv los nws saib lawv rau nqi. Tiam sis, tom qab nws qhia ua ib tug txheej txheem, tus Kws Kho Mob Nelson xav tias txhua tus tub ntxhais kawm ntawv yuav tsum ua zoo li yam li ntawd. Tus txiv neej no piav hais tias cov neeg mob tau zoo thiab cov kwv kho mob zoo tshaj yog los ntawm tus Kws Kho Mob Nelson chav phais mob.
Qhov no yeej tsis ua rau kuv xav tsis thoob. Nov yog qhov uas kuv tau pom kuv tus kheej thiab tau koob hmoov los ntawm nws nyob hauv Pawg Kaum Ob tug Thwj Tim. Kuv xav tias kuv yeej zoo ib yam li nws ib tug “tub kawm kev phais mob.”
Thawj Tswj Hwm Nelson muaj ib txoj kev zoo kawg nkaus qhia lwm tus thiab thaum nws ntuas neeg, nws hais lus zoo, saib lawv rau nqi, thiab txhawb nqa lawv. Nws yeej muaj siab hlub zoo li Yexus Khetos thiab coj yam ntxwv rau peb txhua tus xyaum. Los ntawm nws peb kawm hais tias txawm peb raug dab tsi los, tej yam peb ua thiab peb lub siab yeej muaj peev xwm ua tau raws li tej ntsiab cai ntawm Yexus Khetos txoj moo zoo.
Tam sim no peb muaj ib txoj koob hmoov zoo kawg vim peb muaj cib fim txhawb nqa peb tus yaj saub, Thawj Tswj Hwm Russell M. Nelson. Tas nws lub neej, nws tau ua tej hauj lwm zoo uas yog ib tug tub kawm ntawv, leej txiv, xib hwb, tus txiv, tus kws kho mob, tus thawj coj pov thawj hwj, yawg, thiab tus Thwj Tim. Nws yeej ib txwm tau ua tej ntawd—thiab tseem ua—nrog ib lub siab zoo li ib tug yaj saub.
Cov kwv tij thiab cov muam, qhov uas peb tau pom thiab koom tes ua hnub no, uas yog ib rooj sab laj dawb huv, ua rau kuv xav ua tim khawv tias Thawj Tswj Hwm Russell M. Nelson yog tus uas sawv tus Tswv cev hais lus rau tib neeg txhua leej txhua tus. Kuv kuj ua tim khawv txog Vajtswv Leej Txiv, txog Yexus Khetos, thiab txog Nws lub luag hauj lwm ua peb tus Cawm Seej thiab tus Txhiv Dim. Los ntawm Yexus Khetos lub npe, amees.